Author: ڈاکٹرغلام مصطفی بڈانی

ننکانہ صاحب باغی ٹی وی(نامہ نگار احسان اللہ ایاز) ضلع ننکانہ میں نئے تعینات ہونیوالے ڈی پی او اعجاز رشید نے اپنے عہدے کا چارج سنبھال لیا۔ پولیس لائن آمد پر ضلعی پولیس کے چاق و چوبند دستے کے ہمراہ یاد گار شہداء پر سلامی پیش کی۔ ڈی پی او نے شہداء کی یاد گار پر حاضری دی، پھول چڑھائے اور فاتحہ خوانی کی۔ تفصیلات کے مطابق ضلع ننکانہ میں نئے تعینات ہونیوالے ڈی پی او اعجاز رشید نے سلامی کے بعد ہیڈ برانچز سے تعارفی ملاقات کی۔ پولیس لائن کا وزٹ کیا اور تمام برانچز کا ملاحظہ کیا۔ ڈی پی او نے محرر دفتر، اسلحہ خانے، ودری گودام، جم خانہ، وائرلیس کنٹرول، ایم ٹی شیڈ، کچن، میس ہال، ایلیٹ دفتر، رہائشی بیرکس، ریکریشن ہال اور ریسورس مینجمنٹ سنٹر، متفرق سٹور، واٹر فلٹریشن پلانٹ و دیگر برانچز کی فارمل انسپکشن کی۔ دوران وزٹ سٹاف سے ملاقات کی اور ریکارڈ رجسٹرز چیک کیے۔ ڈی پی او نے محرر لائن سے نفری کی تفصیل اور حاضری چیک کی، اسلحہ خانوں میں اسلحہ کی صفائی اور مختلف اقسام کے اسلحہ و دیگر سامان کی تفصیل اور ریکارڈ چیک کیا، ایم ٹی شیڈ میں کھڑی گاڑیوں کا ملاحظہ کیا، کرائم سین یونٹ موبائل اور سٹاف سے موقع واردات پر شہادت اکٹھی کرنے والے سامان کو چیک کیا، ڈی پی او نے کسی بھی ایمرجنسی صورتحال میں امن و امان کو برقرار رکھنے کے لیے پولیس لائن میں ریزرو پولیس پابند کرنے کے احکامات جاری کیے۔ اس موقع پر گفتگو کرتے ہوئے ڈی پی او کا کہنا تھا کہ شہدائے پولیس ہمارے ماتھے کا جھومر ہیں۔ شہدائے پولیس کی قربانیاں کبھی رائیگاں نہیں جائیں گی۔ ڈی پی او اعجاز رشید کا مزید کہنا تھا کہ بطور کمانڈر ضلعی پولیس کی ویلفیئر اور مسائل کا حل میری اولین ترجیح ہو گی۔ ضلعی پولیس کے تمام افسران و جوان عوامی جان و مال کے تحفظ اور خدمت خلق کو اپنا شعار بنائیں۔ فرائض کی انجام دہی میں نیک نیتی، ایمانداری اور رزق حلال کمانے والے پولیس افسران و جوان میرے لیے قابل فخر ہیں۔ دفاتر، تھانہ جات اور دیگر مدات پہ تعینات افسران و ملازمان وقت کی پابندی کو یقینی بنائیں۔ دوران ڈیوٹی عوام الناس سے نرمی، شفقت اور حسن اخلاق سے پیش آئیں۔ عوام الناس کی خدمت اور انصاف کی میرٹ پر فراہمی ہم سب کا اہم فریضہ ہے۔ دوران ڈیوٹی غفلت اور لاپرواہی برتنے والوں کے خلاف محکمانہ کاروائی عمل میں لائی جائے گی۔ اس موقع پر ڈی ایس پی سرکل ننکانہ افتخار رسول، RI انسپکٹر شیر محمد ،انچارج سیکیورٹی خرم بھٹی، انچارج ایلیٹ رائے سعید ظفر و دیگر بھی موجود تھے

ٹھٹھہ،باغی ٹی وی(نامہ نگار راجہ قریشی)گھارو کی رہائشی غریب ماں کی اپنے بیمار بچے کا سرکاری خرچ پر علاج کرانے کی اپیل
تفصیلات کے مطابق ٹھٹھہ کے علاقے گھارو نمبر دو کے ڈی اے روڈ کے رہائش پذیر معصوم دس سالہ بچہ عبدالرحمٰن ولد ندیم بھٹی جو کہ گزشتہ کئی ماہ سے سخت علیل ہے معاشی تنگدستی اور غربت کی وجہ سے غریب والدین اس مہنگائی کے دور میں بچے کا علاج و معالجہ کروانا تو دور کی بات دو وقت کی روٹی کھانے سے بھی سے قاصر ہیں اور کئی ماہ سے معصوم بچہ گھر میں ہی بیماری کے بستر پر بغیر علاج کے سخت تکلیف میں زندگی گزارنے پر مجبور ہو کر رہ گیا، کچھ دن قبل بچے کی بوڑھی ماں نے کسی کی مدد سے کراچی نیشنل چائلڈ آف انسٹیٹیوٹ (این آئی سی ایچ) ایمرجنسی میں جناح ہسپتال کراچی میں داخل کروایا گیا ہے جہاں بچہ مسلسل ایک ہفتہ سے بے یارو مددگار، لاچار پڑا ہوا ہے، پیٹ میں بڑے کیڑوں کے باعث پاخانہ کی جگہ بند ہونے سے پیٹ پھول گیا ہے اور بچہ اس وقت سخت تشویش ناک حالت میں زندگی اور موت کی کشمکش میں مبتلاء ہو کر زندگی کی جنگ لڑ رہا ہے غریب بچے کی بے یارو مددگار اور پریشان حال ماں نے اپنے بچے کے علاج و معالجہ کیلئے حکومت سندھ خاص طور وزیراعلیٰ سندھ سید مراد علی شاہ سے سرکاری خرچ پر اپنے بیٹے کا علاج کرانے کی اپیل کی ہے.اور ساتھ ہی ادویات خریدنے اور ان کی مدد کیلئے صاحب حیثیت، مخیر حضرات اور بالخصوص ٹھٹھہ کے منتخب نمائندے اور خدمت خلق رکھنے والے ایم پی اے حاجی علی حسن زرداری اور دیگر قومی و صوبائی اسمبلیوں کے نمائندوں سے درد مندانہ اپیل کی ہے کہ ان کے معصوم بچے کے علاج کیلئے انسانیت کے ناتے ان کی مالی معاونت کی جائے تاکہ ان کے معصوم بچے کی زندگی بچ سکے

ننکانہ صاحب باغی ٹی وی ( نامہ نگار احسان اللہ ایاز )درخت دھرتی کازیور،ماحول کی خوبصورتی اور آکسیجن کی فراہمی کا قدرتی ذریعہ ہیں۔محمد اکرم پنوار
موسم بہار میں ڈسٹرکٹ ایمرجنسی آ فیسرریسکیو 1122 محمد اکرم پنوار نے گرین سٹار فوڈز موڑ کھنڈہ میں پودا لگا کر شجرکاری مہم کا آغاز کر دیا۔ شجر کاری میں ڈسٹرکٹ ایمرجنسی آفیسر محمد اکرم پنوار کے ساتھ ملک وحید، حاجی فاروق احمد، ریسکیو آفیسرز وریسکیو رز نے بھر پور حصہ لیا۔ اس موقع پر ڈسٹرکٹ ایمرجنسی آفیسر محمد اکرم پنوار کا کہنا تھا کہ درخت لگانا صدقہ جاریہ اوروقت کی اہم ضرورت بن چکا ہے۔درخت ماحول کو سازگار بنانے اور ملکی معیشت کی ترقی میں اہم کردار ادا کرتے ہیں ہم سب کو ہر سال کم از کم ایک پودا ضرور لگانا چاہیے تا کہ ہماری آنے والی نسلوں کے لئے ماحولیاتی آلودگی اورتیزی سے بڑھتے ہوئے درجہ حرارت کو کنٹرول کیا جا سکے انہوں نے مزید کہا کہ پودے لگائیں اور درخت بنائیں کے مراحل میں دیکھ بھال کو یقینی بنایا جائے تا کہ حقیقت میں درختوں میں اضافہ اور قدرتی حسن کو دوبالہ کیا جا سکے

ٹھٹھہ،باغی ٹی وی (نامہ نگار راجہ قریشی) غیرمسلم پریمی جوڑے نے کورٹ میرج کرلی
ٹھٹھہ کے رہائشی پریمی جوڑے نے سیشن کورٹ میں پسند کی شادی کرلی، میں نے امر لال سے اپنی مرضی سے شادی کی ہے رشتے دار جان کے دشمن بن گئے ہیں نیہا سنگھ کا مؤقف
تفصیل کے مطابق ٹھٹھہ شاہ مبین محلہ وارڈ نمبر چار کی رہائشی نیہاسنگھ دختر ورسی سنگھ نے امر لال ولد آچار ملہ مشہیوری ساکن بخاری محلہ وارڈ نمبر 7 سے سیشن کورٹ ٹھٹھہ میں پسند کی شادی کرلی، نیہا سنگھ نے اپنے مؤقف میں کہا کہ میں بالغ ہوں اور اپنے اچھے برے کا سمجھتی ہوں میں نے بغیر کسی دباؤ یا زبردستی کے امر لال مشہیوری سے پسند کی شادی کرلی ہے ، جس پر ہمارے رشتے دار ہمیں مارنے کی دھمکیاں دے رہے ہیں اور جھوٹے کیسز میں پھسانے کی کوشش کررہے ہیں جسکی وجہ سے ہمارا جینا حرام ہوگیا ہے نیہا سنگھ نے اپنے شوہر امر لال کے ہمراہ کہا کہ ہمیں تحفظ فراہم کیا جائے اور میرا یہ بیان رکارڈ میں رکھا جائے تاکہ بوقت ضرورت کام آسکے-