Author: ڈاکٹرغلام مصطفی بڈانی

ٹھٹھہ،باغی ٹی وی ( نامہ نگار راجہ قریشی )ٹھٹھہ کی میونسپل کمیٹی دیوالیہ ہوگئی ہے ، 2ماہ سے واٹرسپلائی میں گٹروں کاپانی سپلائی ہونے لگا
میونسپل کمیٹی کے ایڈمنسٹریٹر سکندرحیات بلوچ نے بدعنوانی کے ریکارڈ توڑ دیئے ہیں۔ تقریبا دو مہینوںسے ، شکر الہی محلہ ، سونارا گالی اور آس پاس کے علاقوں میں پینے کے صاف پانی کی بجائے واٹر سپلائی پائپوں سے گٹروں کا گندہ پانی آنا شروع ہوگیا ہے۔جس سے شہری بڑی اذیت میں مبتلا ہوچکے ہیں دوسری طرف شہریوں کو اس ہوشربا ء مہنگائی کے دور میں میونسپل کمیٹی کی نااہلی اور کرپشن کی وجہ سے ہزاروں روپے مالیت کا پانی خریدنے پر مجبور کردیا گیا ہے۔ شہریوں کاکہنا ہے کہ اعلیٰ آفیسران تو سرکاری خرچ پر منرل واٹر پیتے ہیں لیکن ہم غریب عوام صاف پانی کی بوند بوند کوترس رہے ہیں جبکہ واٹرمافیاپینے کے پانی کا ایک کین 40 روپے میں فروخت کررہا ہے اور سوزوکی واٹر ٹینک 11 سو روپے میں فروخت ہورہا ہے۔ شہریوں نے اعلی حکام سے درخواست کی ہے کہ وہ پینے کے پانی کے مسئلے کو فوری طور پر حل کریں اور پینے کے صاف پانی کی فراہمی جلد شروع کرائیں۔

ڈیرہ غازیخان (باغی ٹی وی) کالا شہر میں انڈس ہائی وے پر کار اور ٹریلر میں ٹکر،5 افراد موقع پرجاں بحق
تفصیل کے مطابق ریسکیو ذرائع کا بتانا ہے کہ تونسہ روڈ پر کالاشہرکے قریب منور پٹرول سے ریسکیو 1122 ڈی جی خان کنٹرول روم کو کال موصول ہوئی جس میں بتایا گیا کہ ایک کار اور ٹرالر کا تصادم ہوا ہے جس میں 5 لوگ زخمی ہوئے ہیں۔ ریسکیو 1122 کنٹرول روم نے بلا تاخیر جائے حادثہ کی طرف تین ایمبولینسزاور دو ریسکیو وہیکل روانہ کردی۔ان لوکیشن ہونے کے بعد سٹاف نے بتایا کہ ایک Alto car ( AEO-549) جو کہ ڈیرہ غازیخان آرہی تھی سامنے سے آتے ہوئے لوڈڈ ٹرالر(C-3155) جو کہ پشاور جا رہا تھا سے ٹکرا گئی۔ حادثہ میں کار میں موجود تمام افراد کی ڈیتھ ہوچکی ہے.
ڈیڈ باڈیز کو ریسکیو آپریشن کر کے نکال لیا گیا اور لواحقین کی استدعا پر انکے گھر دری ڈھولے والی شفٹ کر دیا گیا۔جاں بحق ہونے والوں میں طاہرولدپیربخش قوم سنجرانی عمر تقریباََ 27 سال،الیاس ولدبلال قوم دستی عمر تقریباََ 30 سال، زبیرولدعبدالرشید قوم چکرانی عمر تقریباََ 27 سال،عاصم ولدقاسم قوم گزروانی عمر تقریباََ 25 سال،ضیاء ولد سراج قوم گزروانی عمر تقریباََ 27 سال ،تمام جاں بحق ہونے والے دری ڈھولے والے کے رہائشی تھے-

ٹھٹھہ ،باغی ٹی وی (نامہ نگار راجہ قریشی )بھارت سے رہا ہو کر کراچی آنے والے پاکستانی ماہی گیروں نے بھارتی جیلوں میں بدترین تشدد کیے جانے کا پول کھول دیا۔ پاکستانی اور مسلمان ہونے پر ظلم کے پہاڑ توڑے جاتے۔ جیلوں میں قید ہندو قیدیوں کی خدمت پر مامور کیا جاتا۔ سارا سارا دن مشقت لے کر سوکھی روٹی اور بدبودار سالن دیا جاتا۔ رمضان میں تراویح یا نمازیں پڑھنا کڑا امتحان ہوتا۔ عید پر صاف کپڑے تک پہننے کی اجازت نہیں دی جاتی تھی۔
کراچی کے ایک اخبار روزنامہ امت کے مطابق واضح رہے کہ بھارتی جیلوں سے رہا ہونے والے 17 پاکستانی ماہی گیروں کو چند روز قبل واہگہ بارڈر پر پاکستانی حکام کے حوالے کیا گیا۔ ان میں غلطی سے بارڈر کراس کرنے والے 3 سویلین اور 12 ماہی گیر شامل تھے۔ ان بارہ ماہی گیروں میں سے غلام قادر، میر محمد، عثمان، محمد جمن، مقبول شاہ، اللہ بچایو، عالم، ساون، متھن، لالو ملاح کا تعلق ٹھٹھہ کے علاقوں سے ہے اور شبیر احمد، عبدالسلام اور محمد رفیق کا تعلق کراچی کی ماہی مچھر کالونی سے ہے۔
ان ماہی گیروں کو جمعرات کی دوپہر ایدھی فائونڈیشن کی گاڑی میں کراچی لایا گیا۔ ایدھی کنٹرول ٹاور پر ان کو فشرمین کوآپریٹو سوسائٹی کے ایڈمنسٹریٹر زاہد بھٹی نے ریسیو کیا اور ادارے کی جانب سے 20 ہزار روپے فی کس امداد دی گئی۔ رہا ہو کر آنے والوں کے اہل خانہ، رشتہ دار، دوست احباب جو صبح سے منتظر تھے۔ اپنے پیاروں کے آنے پر ان سے لپٹ گئے۔ اس وقت انتہائی رقت آمیز مناظر دیکھنے میں آئے۔
رہا ہو کر آنے والے میر محمد نے زندہ سلامت واپس آنے پر اللہ تعالیٰ کا شکر ادا کرتے ہوئے کہا کہ ’’میں 24 مارچ 2017ء کو شاہ بندر ٹھٹھہ سے لانچ لے کر دیگر ماہی گیروں کے ساتھ بچوں کی روزی روٹی کے لیے نکلا تھا۔ میں خود لانچ کا ناخدا تھا۔ رات کے وقت پانی کی لہریں تیز ہونے پر بس غلطی ہو گئی اور غلطی کا پتا تب چلا جب سرچ لائٹوں والی بھارتی کوسٹ گارڈ کی اسپیڈو بوٹس نے گھیر لیا۔ دیگر اطراف کی لانچیں ادھر ادھر ہو گئیں۔ جبکہ ہماری لانچ کو اسلحہ کے زور پر گھیرے میں لے کر جہاز تک لے گئے اور وہاں اس طرح کا سلوک کیا گیا کہ گویا تربیت یافتہ دہشت گرد یا جاسوس ہوں۔ پاکستانیوں اور مسلمانوں سے نفرت کا اظہار پہلی رات کو ہی پتہ چل گیا۔
کئی روز تک سخت تشدد کر کے تفتیش کرتے رہے۔ ظلم کے تمام ہتھکنڈے استعمال کرکے پوچھا جاتا رہا کہ کس لیے بھارت میں آئے تھے۔ لاکھ بار کہا کہ غریب ماہی گیر ہیں۔ بچوں کی روٹی کے لیے شکار کرنے نکلے تھے۔ لیکن فارن ایکٹ اور غیر قانونی شکار کے علاوہ نہ جانے کون کون سے الزامات کے تحت مقدمہ کر کے جیلسی (JALSI) بجھ جیل میں بھیج دیا گیا۔ قید کے 6 برسوں میں جو سلوک کیا گیا۔ وہ ایک ایک لمحہ کس طرح گزارا۔ میں جانتا ہوں اور میرا اللہ تعالیٰ‘‘۔
میر محمد نے بتایا کہ بھارتی جیلوں میں مسلمان اور پاکستانی قیدیوں کے ساتھ جو سلوک ہوتا ہے۔ رہا کرتے وقت جیل حکام اور واہگہ بارڈر تک لانے کے دوران بھارتی اہلکار کچھ بھی بتانے سے منع کرتے ہیں اور بلیک میل کرتے ہیں کہ تم ماہی گیر ہو۔ دوبارہ پکڑے گئے تو ساری کسر نکال دیں گے اور لاش ہی واپس جائے گی‘‘۔
ماہی گیر عبدالسلام نے کہا کہ ’’میں پاکستانی حکومت سے مطالبہ کروں گا کہ جو پاکستانی ماہی گیر بھارتی جیلوں میں قید ہیں، ان کو رہا کرایا جائے۔ ورنہ ظالم مودی سرکار ان کو جیلوں میں مار دے گی۔ ہمارا قصور اتنا نہیں ہوتا کہ فارن ایکٹ کے تحت تھوڑی بہت سزا دے کر واپس کر دیا جائے۔ بھارتی سمندری حدود میں جانے کا شوق نہیں۔ بلکہ کھلے سمندر میں چھوٹی لانچوں میں جدید آلات نہ ہونے پر بارڈر کا پتہ ہی نہیں چلتا۔
بھارتی جیلوں میں 10 سال کا عرصہ کاٹا ہے۔ جیل میں جانوروں جیسا سلوک ہوتا تھا۔ 10 سال کے دوران گھر والوں سے کوئی رابطہ نہیں کرایا گیا۔ دن بھر مشقت لی جاتی تھی۔ دوپہر اور شام کو دو دو سوکھی روٹیاں ملتی تھیں۔ پالک، دال یا کوئی سالن دیا جاتا۔ زیادہ تر سالن شام کو خراب ملتا تھا۔ اگر شکایت کرو تو تشدد کرتے تھے اور بھوکا پیاسا رکھتے تھے۔ پینے کے پانی گندا، بدبو اور بورنگ کا ہوتا تھا‘‘۔
ماہی گیر متھن جنت کا کہنا تھا کہ ’’پورے مہینے میں ایک صابن ملتا تھا کہ اس سے نہا لو یا کپڑے دھو لو۔ صبح سے رات تک بیرکوں کی صفائی کرنا روزانہ کا معمول تھا۔ بیرک میں ہندو قیدیوں کی خدمت کرانے پر رکھا جاتا تھا۔ جیل میں ہندو قیدیوں کے واش روم تک دھونا پاکستانی ماہی گیروں کی ذمہ داری تھی۔
6 سال کے دوران کئی بار حکام سے کہا گیا کہ پاکستان میں اہل خانہ سے بات کرا دو۔ مگر منع کر دیا جاتا۔ جب بھی پاک بھارت کشیدگی بڑھتی تو سارا غصہ ہم پاکستانی قیدیوں پر نکالا جاتا۔ بیرک میں چھپ کر نماز ادا کرتے تھے کہ گندگی کے کاموں پر زیادہ تر نماز پڑھنے والوں کو لگایا جاتا تھا۔ روزے کے لیے رات کی روٹی بطور سحری اور دوپہر کی روٹی افطاری کے لیے رکھتے تھے۔ ہماری ان حالات میں عید کیا ہوتی۔ عید کا دن بھی گندے میلے کپڑوں میں گزارتے۔ آئے روز سادے کپڑے میں ملبوس حکام آکر تفتیش کرتے تھے اور بعد میں تشدد کیا جاتا تھا‘‘۔
ماہی گیر شبیر احمد نے بتایا کہ 6 سال جیل کاٹی اور نوجوان ہونے کی وجہ سے اتنا ٹارچر کیا گیا کہ اب زندگی بھر ماہی گیر نہیں کروں گا۔ اس بار تو جان بچ گئی۔
ماہی گیر لالو ملاح کا کہنا ہے کہ ’’اگر جیل کے ماہی گیر بیمار ہو جاتے تو کہا جاتا کہ بہانہ کر رہا ہے اور مشقت بڑھا دی جاتی۔ ڈاکٹر کو نہیں بلواتے تھے۔ نہ دوائی دیتے تھے۔ وہاں قید ماہی گیر گردوں، دل، سانس، ہڈیوں، جوڑوں، سردرد اور ٹی بی کے مرض میں مبتلا ہوجاتے ہیں۔ ناقص خوراک، علاج نہ ہونے، نیند نہ کرنے دینے، مشقت زیادہ کرانے، صفائی نہ رکھنے دینے اور دیگر مسائل پر اکثر قیدی بیمار رہتے ہیں‘‘۔

ڈی جی خان ،باغی ٹی وی (سٹی رپورٹر)ریجنل پولیس آفیسر کیپٹن (ر) سجاد حسن خان کا شوکاز نوٹسززکی سماعت کے سلسلہ میں پولیس لائنز ڈیرہ غازی خان میں اردل روم کا انعقاد۔ اختیارات کے ناجائزاستعمال, غفلت لاپرواہی اورناقص تفتیش پر 6 سب انسپکٹرز اور 2 اسسٹنٹ سب انسپکٹرز کوسنشور اور سروس ضبطگی کی سزائیں۔ پولیس افسران قانون کی عمل داری اور میرٹ پر انصاف کی فراہمی کو یقینی بنائیں۔
تفصیلات کے مطابق ریجنل پولیس آفیسر کیپٹن (ر) سجاد حسن خان نےشوکاز نوٹسز کی سماعت کے سلسلہ میں پولیس لائنز ڈیرہ غازی خان میں اردل روم کا انعقاد کیا ۔ریجن کے تمام اضلاع سے افسران و اہلکاران اردل روم میں پیش ہوئے۔ آر پی او نے 50 شوکاز نوٹسز کی سماعت کرکے احکامات جاری کیئے۔ سماعت کے دوران تسلی بخش جواب پیش کرنے پر 35 شوکاز نوٹسز کو داخل دفتر کرنے جبکہ ناقص تفتیش، اختیارات کے ناجائز استعمال اور فرائض کی انجام دہی میں غفلت لاپرواہی برتنے پر 6 سب انسپکٹرز اور 2 اسسٹنٹ سب انسپکٹرز کو سنشور اور سروس ضبطگی کی سزائیں اور 6 شوکاز نوٹسز میں انکوائری کرنے کے احکامات جاری کیئے ۔ریجنل پولیس آفیسر کیپٹن (ر) سجاد حسن خان کا کہنا تھا کہ پولیس افسران اپنے پیشہ وارانہ امور کی ادائیگی ایمانداری ،دیانت داری اور فرض شناسی سے کریں۔ قانون کی عمل داری اور میرٹ پر انصاف کی فراہمی کو یقینی بنائیں۔ اختیار ات کاناجائز استعمال کرپشن اور فرائض میں غفلت و لاپرواہی کسی بھی صورت برداشت نہیں کی جائے گی ۔

ٹھٹھہ،باغی ٹی وی (نامہ نگار راجہ قریشی)ایس ایس پی کی ضلع بھر کے تمام پولیس افسران کے ساتھ اپنے آفس میں میٹنگ
ایس ایس پی ٹھٹھہ عدیل حسین چانڈیو نے تمام ایس ڈی پی اوز، ایس ایچ اوز، انچارج CIA اور انچارجز پولیس پوسٹز کے ساتھ ایس ایس پی آفس ٹھٹھہ میں اہم میٹنگ کا انعقاد کیا گیا۔
ایس ایس پی نے تمام افسران کو ہدایت جاری کی کہ آئی جی پی سندھ غلام نبی میمن کےاحکامات پر جرائم پیشہ عناصر، اشتہاری و روپوش ملزمان کی گرفتاری، A کلاس کیسز کو جلد از جلد ٹریس آؤٹ، منشیات و گھٹکہ کی خلاف ورزی کرنے والوں کے خلاف کارروائیوں میں بہترین کارکردگی کے لیے موثر حکمت عملی مرتب کی گئی ہیں اور کسی بھی ذرائع سے جرائم کے متعلق ملنے والی اطلاع کی فورا” تصدیق کرنے کے بعد قانونی کارروائی کرکے مقدمہ درج کریں، اور ملوث ملزمان کو گرفتار کر کے کیس پراپرٹی ریکور کریں۔ایس ایس پی نے افسران کو ہدایات جاری کرتے ہوئے کہا کہ جرائم پیشہ افراد کے خلاف نتیجہ خیز کارروائیوں کے ساتھ تفتیشی امور کو مزید مؤثر اور یقینی بنایا جائے.
ایس ایس پی ٹھٹھہ نے کہا کہ تمام ڈی ایس پیز، ایس ایچ اوز اور انچارج پولیس پوسٹز اپنی پیشہ ورانہ مہارت، حاصل کی گئی تربیت اور تجربوں کے بدولت مقدمات کو ناصرف منطقی انجام تک پہچائیں بلکہ متعلقہ عدالتوں سے ملوث ملزمان کو مثالی سزائیں بھی سنوائیں.
ایس ایس پی نے مزید کہا کہ جدید تیکنیکی سسٹم اور شہر بھر میں نصب سی سی ٹی وی کیمروں کی مدد سے جرائم پیشہ عناصر کے خلاف باقاعدہ نشاندھی کے تحت کاروائیوں کو مزید موثر بنایا جائے. اس کے علاوہ درج کیسسز کی تفتيش ایمانداری، باریک بینی اور میرٹ کے بنیاد پر کی جائے. کسی قسم کی بدعنوانی، بددیانتی اور کرپشن کو برداشت نہیں کیا جائیگا۔
ایس ایس پی نے سختی سے ہدایات جاری کرتے ہوئے کہا کہ منشیات و گھٹکہ کے خلاف کارروائیاں تیز کی جائیں اور کسی بھی افسر یا پولیس اہلکار کو ملوث پایا گیا تو اس کے خلاف سخت محکمانہ کارروائی عمل میں لائی جائیگی۔
ایس ایس پی ٹھٹھہ نے کہا کہ عوام کی جان و مال کی حفاظت کرنا ہمارا اولین فرض ہے اس کے علاوہ تمام ایس ایچ اوز اور پی پی انچارجز کو احکامات دیے کہ تمام افسران روزانہ کي بنیاد پر اپنے پولیس اسٹیشن اور پولیس پوسٹز پر موجود رہ کر شہریوں کی شکایات اور مسائل حل کریں۔