Author: ڈاکٹرغلام مصطفی بڈانی

گوجرخان (نامہ نگار)راولپنڈی کی تحصیل گوجرخان کے صندل روڈ پر سنگدل بھائی نے چھوٹے بھائی کو قتل کر دیا۔
پولیس کے مطابق ملزم خالد شریف نے گھریلو تنازع پر فائرنگ کرکے چھوٹے بھائی ساجد شریف کو قتل کیا، مقتول ساجد چند روز قبل بیٹے کی شادی کےلیے برطانیہ سے پاکستان آیا تھا۔پولیس کی جانب سے یہ بھی بتایا گیا ہے کہ مقتول کے بیٹے کی درخواست پر مقدمہ درج کر لیا گیا ہے جبکہ ملزم بھی پولیس کی گرفت میں ہے اور مدعی کی جانب سے بتایا گیا ہے کہ میرے تایا اور والد کے درمیان گھریلو تنازع تھا۔

علی پور(باغی ٹی وی )مظفرگڑھ کی تحصیل پور کے علاقے میں 3 ملزمان نے ایک نوجوان کی ناک کاٹ ڈالی۔
پولیس کے مطابق متاثرہ نوجوان کا کہنا ہے کہ 3 ملزمان اسے اغوا کرکے لے گئے اور تشدد کا نشانہ بنانے کے بعد اس کی ناک تیز دھار آلے کی مدد سے کاٹ دی۔پولیس کا کہنا ہے کہ نوجوان کی ناک کاٹنے والے 2 ملزمان کو گرفتار کر لیا گیا ہے، شبہ ہے ملزمان نے بہن سے دوستی کے الزام میں نوجوان پر تشدد کیا تاہم واقعے کی تحقیقات شروع کر دی گئی ہیں۔

ڈیرہ اسماعیل خان ،باغی ٹی وی (نامہ نگار)بنوں، شہید پولیس ہیڈ کانسٹیبل پشم خان کی نماز جنازہ پولیس لائن میں سرکاری اعزاز کے ساتھ ادا کردی گئی، پولیس کے چاق وچوبند دستے نے شہید کے جسد خاکی کو سلامی پیش کی-
تفصیلات کے مطابق دہشتگردوں کے ساتھ فائرنگ کے تبادلے میں شہادت کا مرتبہ پانے والے پولیس ہیڈ کانسٹیبل پشم خان کی نماز جنازہ بنوں پولیس لائن میں سرکاری اعزاز کیساتھ ادا کردی گئی۔ ڈسٹرکٹ پولیس آفیسر بنوں ڈاکٹر محمد اقبال، اعلیٰ فوجی ،سول حکام و دیگر پولیس افسران اور مقامی افراد نے کثیر تعداد میں جنازے میں شرکت کی۔ڈی پی او بنوں اور پاک فوج کے آفسران نے قومی پرچم میں لپٹے شہید کے تابوت پر پھول چڑھائے اور ان کی مغفرت کے لئے خصوصی دعا کی۔ واضح رہے کہ شہید پولیس ہیڈ کانسٹیبل پشم خان تھانہ ڈومیل میں تعینات تھے۔ جو آج دوران گشت دہشتگردوں کیساتھ فائرنگ کے تبادلے میں شہادت کے بلند مرتبے پر فائز ہوگئے۔ جبکہ دوسرا اہلکار شاہ ولی خان زخمی ہوئے تھے جنہیں علاج معالجے کی خاطر خلیفہ گلنواز ہسپتال منتقل کیا گیا ہے۔ شہید پولیس اہلکار پشم خان کے جسد خاکی کو سرکاری اعزاز کے ساتھ آبائی علاقے کو روانہ کر دیا گیا ہے جہاں پر شہید کو پورے سرکاری اعزاز کیساتھ سپرد خاک کیا جائے گا۔

اس موقع پر ڈسٹرکٹ پولیس آفیسر بنوں ڈاکٹر محمد اقبال نے پیغام جاری کرتے ہوئے کہا کہ شہید پولیس اہلکار پشم خان جیسے جوان ہمارا فخر ہیں۔ جنہوں نے ملک و قوم کی سلامتی و بقا کی خاطر اپنی جان قربان کردی۔ ہم ان جانبازوں کو کبھی نہیں بھولیں گے۔ دہشتگرد اپنے ناپاک عزائم سے ہمارے حوصلے پست نہیں کرسکتے۔ ہم ان کا ڈٹ کر مقابلہ کریں گے اور ان کے ناپاک عزائم خاک میں ملا دیں گے۔

ڈیرہ اسماعیل خان ،باغی ٹی وی (نامہ نگار)لکی مروت میں دہشت گردوں کا رات کو پولیس چوکی شاہ طورہ تختی خیل پر حملہ ،دونوں طرف سے شدید فائرنگ کا تبادلہ،اہل علاقہ کی چغہ پارٹی بھی پولیس کی مدد کیلئے میدان میں آگئی۔ مقامی مشر جاوید غفور پولیس اور اہل علاقہ کی بھرپور جوابی کارروائی سے حملہ آورفرارحملہ آوروں کی جانب سے بڑے اور خود کار ہتھیاروں کا استعمال، پولیس کی بھاری نفری موقع پر پہنچ گئی پرسوں رات سے لکی مروت میں پولیس پر دہشت گردوں نے پانچ حملے کیے ان حملوں میں دو پولیس اہلکاروں سمیت تین افراد جان کی بازی ہار گئے حملوں میں دو پولیس اہلکار زخمی بھی ہوئے ہیں۔
تفصیل کے مطابق لکی مروت میں دہشت گردوں نے رات گئے پولیس چوکی شاہ طورہ تختی خیل پر حملہ کیا۔اس بزدلانہ حملے میں دو پولیس اہلکاروں سمیت تین افراد جاں بحق جبکہ دو زخمی ہو گئے۔پولیس اور اہل علاقہ کی بھرپور جوابی کارروائی سے حملہ آور فرار ہو گئے۔ پولیس کا کہنا ہے کہ دونوں اطراف سے شدید فائرنگ کا تبادلہ کیا گیا۔ مقامی مشران کے مطابق اہل علاقہ کی چغہ پارٹی بھی پولیس کی مدد کیلئے میدان میں کود پڑی ہے۔
خیال رہے کہ گذشتہ روز سیکیورٹی فورسز نے بڑی کامیابی حاصل کرتے ہوئے دہشتگردی کی کارروائی کا بڑا منصوبہ ناکام بنا دیا تھا۔ آئی ایس پی آرکے مطابق سیکیورٹی فورسز نے جنوبی وزیرستان کے ضلع وانا میں انٹیلی جنس اطلاعات کی بنیاد پر آپریشن کرتے ہوئے دہشت گردی کی بڑی کارروائی کو ناکام بنا یا۔شدید فائرنگ کے تبادلے میں دہشت گرد کمانڈر حفیظ اللہ عرف تور حافظ اور 2 خودکش حملہ آوروں سمیت 11 دہشت گرد مارے گئے۔
ہلاک دہشت گردوں سے بھاری مقدار میں اسلحہ اور گولہ بارود بھی برآمد ہوا ہے۔ مارے گئے دہشت گرد ضلع جنوبی وزیرستان میں سیکیورٹی فورسز کے خلاف دہشت گردی اور پولیس کی ٹارگٹ کلنگ کی کارروائیوں میں ملوث رہے۔

ڈیرہ اسماعیل خان ،باغی ٹی وی(نامہ نگار) بنوں سی ٹی ڈی کمپائونڈ آپریشن میں پاک فوج کا زخمی کمانڈو زخموں کی تاب نہ لاتے ہوئے شہید ہوگیا، کمانڈو ظفریاب تین ہفتوں سے زندگی اور موت کی کشمکش میں مبتلا رہے ،آپریشن میں شہید ہونے والے فورسز اور پولیس شہداء کی تعداد سات ہوگئی۔
تفصیلات کے مطابق18دسمبر کو بنوں سی ٹی ڈی کمپائونڈ پر عسکریت پسندوں نے حملہ کرکے اپنے قبضے میں لیا تھااور سکیورٹی فورسز نے کامیاب آپریشن میں 25عسکریت پسندوں کو ہلاک کیا تھا۔آپریشن کے نتیجے میں کمانڈوظفریاب دہشت گردوں کی گولیاں لگنے سے زخمی ہوگئے تھے اور تین ہفتوں سے زندگی اور موت کی کشمکش میں مبتلا رہے اوربالآخرزندگی کی بازی ہارکر شہادت کے رتبے پر فائز ہوگئے۔شہید کمانڈوظفریاب کوفوجی اعزازکے ساتھ ان کے آبائی علاقے میں سپردخاک کردیاگیاہے ۔واضح رہے کہ بنوں آپریشن میں شہید ہونے والے فورسز اور پولیس شہداء کی تعداد سات ہوگئی ہے۔

ڈیرہ اسماعیل خان،باغی ٹی وی(نامہ نگار) محکمہ فوڈ ڈیرہ،’منتخب نمائندوں اور بااثر آٹا ڈیلرز کی ملی بھگت سے آٹا بلیک میں فروخت ہونے لگا ، آٹے کی بندر بانٹ کی وجہ سے آٹے کا بحران شدت اختیار کر گیا،ڈپٹی کمشنر ڈیرہ محمد قیصر خان سے آٹا ڈیلرز کی دوبارہ میرٹ کی بنیاد پر لسٹیں مرتب کرنے کا مطالبہ ۔ تفصیلات کے مطابق ڈیرہ اسماعیل خان اور اس کے مضافات میں صوبائی حکومت کی جانب سے سبسڈائزڈ آٹے کی تقسیم میں محکمہ فوڈ ڈیرہ ‘منتخب نمائندوں اور بااثرآٹا ڈیلرز کی ملی بھگت سے آٹا بلیک میں فروخت ہونے لگا ۔محکمہ فوڈ ڈیرہ کے اہلکار اور افسران منتخب نمائندوں کے چہیتے اور بااثرآٹاڈیلرز اس صورتحال میں بہتی گنگا میں ہاتھ دھو رہے ہیں،علاقہ میں آٹے کا بحران شدت اختیار کرچکاہے۔سیاسی جماعتوں اور منتخب ممبران اسمبلی کے مقرر کردہ نمائندے اس صورتحال میں آٹا کھلے عام بلیک کررہے ہیں۔ضلعی انتظامیہ کا کردار سوالیہ نشان بن کر رہ گیا ہے۔روزانہ کی بنیاد پر آٹا ڈیلرز اور د کانوں پر فراہم کیا جانے والا آٹا بلیک میں کھلے عام فروخت ہو رہاہے جبکہ اصل حقدار آٹے کے حصول کیلئے دربدر کی ٹھوکریں کھارہے ہیں۔عوامی’سماجی اور تجارتی حلقوں نے محکمہ فوڈ ‘منتخب نمائندوں اور ضلعی انتظامیہ کی طرف سے بنائی گئی آٹا ڈیلرز کی فہرستوں کو مستردکرتے ہوئے ڈپٹی کمشنر ڈیرہ محمد قیصر خان اور سیکرٹری فوڈ خیبرپختونخواہ سے مطالبہ کیا ہے کہ آٹاڈیلرز کی مرتب کردہ لسٹوں اور ٹرکوں کے ذریعے آٹے کی تقسیم کی لسٹوں کو از سرنو مرتب کیا جائے اور آٹے کی کھلے عام تقسیم کی جائے تاکہ غریب عوام کو آٹے کی فراہمی ممکن ہوسکے اورآٹے کے بحران پر قابو پایا جاسکے ۔