Author: ڈاکٹرغلام مصطفی بڈانی

ٹھٹھہ،باغی ٹی وی( نامہ نگار راجہ قریشی)جنگشاہی میں سی پیک، کے فور سمیت مختلف کمپنیوں کے منصوبے چل رہے ہیں تاہم منصوبے میں کام کرنے والے ہزاروں ملازمین سمیت ضلع ٹھٹہ کے عوام کو سفری مشکلات کا سامنا ہے اس لئے جنگشاہی ریلوے اسٹیشن پر ٹرینوں کے اسٹاپ کو بحال کرکے عوام کو بہتر سفری سہولیات فراہم کی جائیں ان خیالات کا اظہار جنگشاہی کے سماجی رہنماؤں نے پاکستان ریلوے کے اعلیٰ حکام سے ملاقات کے دوران کیا۔ تفصیلات کے مطابق جی ایم پاکستان ریلوے علی محمد آفریدی، سی ای او پاکستان ریلوے سلمان صادق شیخ، ڈی ایس ریلوے کراچی کاشف رشید یوسفانی اور دیگر اعلیٰ حکام معائنہ کرنے کے سلسلے میں جنگشاہی ریلوے اسٹیشن پہنچے اس موقعہ پر جنگشاہی کے سماجی رہنماء عبد القادر شیخ، سینئر صحافی عبد الرؤف بروہی، حاجی غلام محمد بروہی، کامریڈ نور محمد جوکھیو، عاطف عثمان پلیجو، عبد الرحمن بروہی، صادق علی بروہی، مختیار علی بروہی اور دیگر نے ریلوے انتظامیہ کے اعلیٰ حکام سے مطالبہ کرتے ہوئے کہا ہے کہ جنگشاہی ریلوے اسٹیشن پر ٹرینوں کا اسٹاپ نہ ہونے کی وجہ سے یہاں کے عوام کو شدید مشکلات کا سامنا ہے ان کا کہنا تھا کہ اس وقت جنگشاہی کوہستان میں سی پیک کے فور سمیت مختلف کمپنیوں کے منصوبے چل رہے جس کی وجہ سے پروجیکٹ میں کام کرنے والے ہزاروں ملازمین جنگشاہی ریلوے اسٹیشن سے ملک کے مختلف علاقوں میں ٹرینوں کے ذریعے سفر کرتے ہیں مگر بدقسمتی سے جنگشاہی ریلوے اسٹیشن پر ٹرینوں کے سٹاپ نہ ہونے کی وجہ سے ونڈ پلانٹ کمپینوں کے ملازمین سمیت ضلع ٹھٹہ کے ہزاروں رہائشیوں کو شدید پریشانی اور مشکلات کا سامنا ہے اس کے علاوہ کراچی اور حیدرآباد کے مختلف اداروں میں کام کرنے والے ملازمین مختلف یونیورسٹیوں میں زیر تعلیم طلباء اور زیر علاج مریضوں کو بھی سخت پریشانی کا سامنا کرنا پڑتا ہے ملاقات کے دوران سماجی رہنماء عبد القادر شیخ نے سی ای او پاکستان ریلوے سلمان صادق شیخ کو مزید تفصیل بتاتے ہوئے کہا کہ اس سے قبل جنگشاہی ریلوے اسٹیشن پر سکھر ایکسپریس، خوشحال خان خٹک، چناب ایکسپریس، عوامی ایکسپریس، غوث بہاؤالدین زکریا، بولان میل اور سپر ایکسپریس کے اسٹاپ بحال تھے جنہیں مختلف اوقات میں بلاجواز ختم کردیا گیا جبکہ موجودہ وقت جنگشاہی ریلوے اسٹیشن پر صرف دو لوکل ٹرینیں مہران ایکسپریس اور شاہ لطیف ایکسپریس کا اسٹاپ ہے وفد نے ملاقات کے دوران ریلوے انتظامیہ کے اعلیٰ حکام سے مطالبہ کرتے ہوئے کہا کہ مذکورہ ٹرینوں کے تمام سٹاپ بحال کرکے ضلع ٹھٹہ کی عوام کو بہتر سفری سہولیات فراہم کی جائیں اس موقعہ پر سی ای او پاکستان ریلوے سلمان صادق شیخ نے وفد کو ٹرینوں کے سٹاپ بحال کرنے کی یقین دہانی کراتے ہوئے کہا کہ عوام کو بہتر سفری سہولیات کی فراہمی کے لیے ہر ممکن اقدامات کئے جائیں گے آخر میں جنگشاہی کے سماجی رہنماؤں نے ریلوے انتظامیہ کے اعلیٰ حکام کو سندھ کا ثقافتی تحفہ اجرک کے تحائف بھی پیش کیے۔

ٹھٹہ ،باغی ٹی وی (نامہ نگار راجہ قریشی) ایدھی فاؤنڈیشن کے چیئرمین کی خصوصی ہدایات پر سیلاب متاثرین میں امدادی سامان کی تقسیم۔
تفصیلات کے مطابق ایدھی فاؤنڈیشن کے چیئرمین فیصل ایدھی کی خصوصی ہدایات پر عمل درآمد کرتے ہوئے ایدھی فاؤنڈیشن کے رضاکاروں نے ضلع ٹھٹہ میں نیشنل ہائی وے لنک روڈ پر قائم گزشتہ بارشوں اور سیلاب کی تباہ کاریوں کی وجہ سے متاثرین کے لیے لگائے گئے ٹینٹ سٹی میں موجود سینکڑوں کی تعداد میں رہائش پذیر خاندانوں میں خشک راشن اور سردی سے بچنے کے لیے گرم کپڑوں کمبل اور بستروں ودیگر ضروریات زندگی گزارنے کا سامان تقسیم کیا گیا اور انہوں کا کہنا تھا کہ ہماری کوشش ہوگی کہ امدادی سامان کی تقسیم کا سلسلہ متاثرین کے اپنے گھروں میں واپس جانے تک جاری رہے سیلاب متاثرین نے ایدھی فاؤنڈیشن پاکستان کے اس عمل پر چیئرمین فیصل ایدھی اور تمام رضاکاروں کا شکریہ ادا کرتے ہوئے ایدھی فاؤنڈیشن کے کاموں کو بے حد سراہا گیا۔

ڈیرہ اسماعیل خان،باغی ٹی وی(نامہ نگارذیشان خان) مستحق افراد کے لیے سعودی عرب سے بھیجی گئی کھجور کے ہزاروں پیکٹ مستحقین میں تقسیم کرنے کی بجائے ضلعی انتظامیہ کے گوداموں میں پڑے پڑے گل سڑ گئی، ضلعی انتظامیہ نے ہزاروں پیکٹ امدادی کھجور دریا سندھ میں پھینک کر ضائع کر دئیے ۔ ذرائع کے مطابق مختلف اوقات میں سعودی حکومت کی جانب سے ڈیرہ اسماعیل کے مستحق افراد کیلئے ہزاروں پیکٹ کھجور سعودی سفارتخانے کی وساطت سے ضلعی انتظامیہ ڈیرہ کو فراہم کئے گئے تھے جو عوام دوست ضلعی انتظامیہ کی نااہلی کے باعث مستحقین میں تقسیم کرنے کی بجائے سرکاری گوداموں میں پڑے پڑے ہزاروں پیکٹ سعودی امدادی کھجور گل سڑ گئیں مگر یہ کھجور مستحقین میں تقسیم نہیں کی گئی جسے خراب ہونے پر دریائے سندھ پر نوتعمیر مارجنل بند کنارے پھینک دیا گیا مگر عجلت میں تلف کی گئی یہ ہزاروں پیکٹ کھجور مکمل طور پر دریا برد کرنے کی بجائے مارجنل بند کنارے پھینک کر جان چھڑانے کی ناکام کوشش کی گئی جو بد قسمتی سے میڈیا کی نگاہ سے نہ بچ پائی، اس حوالے سے عوامی و سماجی حلقوں نے مرکزی و صوبائی حکومتوں ، تحقیقاتی اداروں اور سعودی سفارتخانے سے اس ضمن میں شفاف انکوائری اور ذمہ داران کیخلاف تادیبی کاروائی کا مطالبہ کیا ہے

چترال(باغی ٹی وی) پسماندہ علاقے وادی آرکروئی میں دس سال قبل سول ڈسپنسری تعمیر ہوچکی ہے مگر زمین کے مالک اور محکمہ صحت کے درمیان ملازمت پر تنازعہ کی وجہ سے یہ ہسپتال پچھلے دس سالوں سے بند پڑا ہے جس کی وجہ سے علاقے کے لوگوں کو نہایت مشکلات کا سامنا ہے اور وہ علاج کیلئے چار گھنٹے سفر کرکے دروش، چترال جاتے ہیں تفصیل گل حماد فاروقی کی اس رپورٹ میں