Author: ڈاکٹرغلام مصطفی بڈانی

باغی ٹی وی ننکانہ صاحب ( احسان اللہ ایاز)ننکانہ صاحب کی نوجوان قیادت بانی آئی ایس ایف رائے فیصل محمود کھرل ان کی سیاست کا آغاز ہوتا ہے پاکستان تحریک انصاف سے 2007 سے 2008 یہ اس دور کی بات ہے جب ضلع ننکانہ میں کوئی تحریک انصاف کا نام لینا پسند نہیں کرتا تھا لوگ مذاق بنایا کرتے تھے کہ یہ بھی کوئی پارٹی ہے انہوں نے اپنی زندگی کا ایک اہم حصہ پارٹی میں صرف کیا ، ضلع ننکانہ کا ہر نوجوانMNA MPA اور اسٹیک ہولڈرز ان کی محنت اور ورتھ سے بخوبی واقف ہےان کی سیاست چمچہ گِری کی سیاست نہیں ہے شروع سے ہی اور نہ ہی کسی گلی محلے یا پھر سوشل میڈیا کی حد تک محدود ہے جیساکہ آجکل کے چمچے ورکر بنے پھرتے ہیں۔ الحمدللہ انہوں نے اپنی سیاست کا آغاز اپنے بل بوتے پر کی اور آج بھی اپنے بل بوتے پر ان کی خدمات پارٹی کے لیے جاری ہیں۔ الحمدللہ پورے ضلع میں ان کے بہت اچھے تعلقات ہیں جوکہ ہمیشہ ان کے شانہ بشانہ کھڑے نظر آتے ہیں ان کے ذاتی دوست احباب، رشتہ دار اور تنظیمی دوست ان کے سر کا تاج ہیں جن سب نے ان کو ہمیشہ عزت بخشی اور ساتھ دیا

باغی ٹی وی ،کندھ کوٹ (مختیااعوان کی رپورٹ)ں ڈینگی، ملیریا اور گیسٹرو میں دن بدن اضافہ ، مزید 2 افراد میں ڈینگی وائرس کی تشخیص، گزشتہ ایک ہفتے کے دوران پانچ افراد ڈینگی کا شکار ہوئے
تفصیل کے مطابق کندھ کوٹ میں ڈینگی وائرس خطرناک شکل اختیار کرنے لگا مزید 2 افراد میں ڈینگی وائرس کی تشخیص ہوئی ہے ،برکت علی ڈاہانی اور میرحسن نندوانی ڈینگی وائرس میں مبتلا ہوگئے ہیں ، ڈینگی سے متاثرہ افراد کی حالت تشویشناک ہونے پر انہیں سکھر اسپتال ریفر کردیا گیا، گزشتہ ایک ہفتے کے دوران پانچ افراد کو ڈینگی وائرس نے اپنی لپیٹ میں لے لیا ، ڈینگی وائرس سے ایک شخص جاں بحق ہوا ہے

باغی ٹی وی ،ڈیرہ غازی خان ( نامہ نگار)خواجہ فرید یونیورسٹی آف انجینئرنگ اینڈ انفارمیشن ٹیکنالوجی میں پانچویں بین الاقوامی کانفرنس آف اپلائیڈ زووالوجی کا انعقاد ہوا جس میں قائد اعظم یونیورسٹی اسلام آباد، کوہسار یونیورسٹی مری، یونیورسٹی آف اوکاڑہ سمیت ملک کی کئی جامعات کے وائس چانسلرز،کمشنر ڈیرہ غازی خان ڈویژن لیاقت علی چٹھہ اور ماہرین تعلیم شریک ہوئے۔ اس موقع پر وائس چانسلر پروفسیر ڈاکٹر محمد سلیمان طاہرنے مہمانوں کا استقبال کیا۔ وائس چانسلرپروفیسر ڈاکٹر سلیمان طاہر کا کہنا تھاکہ تحقیق کسی بھی معاشرے کی ترقی کے لئے ضروری ہے۔ اس کانفرنس کا مقصد معاشی اصلاحات، پیداوار میں بڑھوتری، بیسک سائنسزکی مدد سے معاشرے کی ترقی کے اسباب پیدا کرنا ہے۔ انہوں نے کہا تحقیق بڑھے گی تو جدید ایجادات سامنے آئیں گی۔ انہوں نے کہا خکواجہ فرید یونیورسٹی کی تحقیق کا اعتراف ہی ہے کہ اسے 25 این آر پی یو جیتنے کا اعزاز حاصل ہے۔ انہوں نے کہا خواجہ فرید یونیورسٹی جدید لیبز اور پروگرامز کی مدد سے باصلاحیت معاشرے کی تشکیل کے مشن پر عمل پیرا ہے اور ایسے اقدامات اٹھا رہی ہے جن سے نئی نسل کو تعلیم کے ساتھ تربیت بھی دی جائے۔ کمشنر ڈیرہ غازی خان ڈویژن لیاقت علی چٹھہ نے کہا کہ تعلیم کی ترقی کےلئے ملکر کام کرنا ہوگا۔علم سے ہی قومیں ترقی کرتی ہیں۔ اس موقع پر قائد اعظم یونیورسٹی اسلام آباد کے وائس چانسلر پروفیسر ڈاکٹر محمد علی کا کہنا تھا کہ پسماندہ تصور کئے جانے والے اس شہر میں اس قدر منظم ادارے کو دیکھ کر دلی مسرت ہوئی۔ انہوں نے کہا کہ خواجہ فرید یونیورسٹی آکر حضرت خواجہ غلام فریدؒ کی عظمت کوسلام پیش کرتے ہیں۔ وہ فطرت کے شاعر تھے اور اس خطے میں لبرل مائنڈ سیٹ رکھنے والی شخصیت تھے۔ انہوں نے کہا اپلائیڈ زووالوجی کانفرنس کا انعقاد انتہائی خوش آئند ہے۔ ملک کی ترقی مسلسل محنت سے ہی ممکن ہے۔ اس کانفرنس سے امپیکٹ فل ریسرچ میں اضافہ ہوگا۔ پیداوار بڑھانے کے طریقہ کار سامنے آئیں گے۔ انہوں نے وائس چانسلر پروفیسر ڈاکٹر محمد سلیمان طاہر کو شاندار پروگرام کا انعقاد کرنے پر مبارکباد پیش کی۔ اپنے آن لائن خطاب میں چیئرمین ایچ ای سی ڈاکٹر مختار احمد کا کہنا تھا کہ اکیڈیمیا کے درمیان موجود فاصلے کو ختم کرنے کی ضرورت ہے۔ جامعات کو باہمی تعاون کو فروغ دینا چاہئے۔ تحقیق سے مشترکہ طور پر فائدہ اٹھانا چاہئے۔ اجتماعی حکمت سے مسائل کو کم کرنے کی ضرورت ہے اور باہمی اختلافات کو پس پشت ڈال کر ہی تعلیمی اداروں کو حقیقی مشن پر گامزن کیا جا سکتا ہے۔ اس موقع پر کوہسار یونیورسٹی کے وائس چانسلر ڈاکٹر حبییب بخاری،سیکٹر کمانڈر چولستان رینجرزبریگیڈئیر رضوان اللہ،ڈاکٹر محمد اصغر،وی یونیورسٹی آف اوکاڑہ ڈاکٹر محمد واجد ، رجسٹرار خواجہ فرید یونیورسٹی ڈاکٹر محمد صغیر، ڈین پروفیسر ڈاکٹر محمد شہزاد مرتضیٰ،ڈائریکٹر اسٹوڈنٹس افیئرز ڈاکٹر محمد اسلم خان، ڈاکٹر تنویر، ڈاکٹر عمارہ سمیت فیکلٹی ممبران اور طلبہ و طالبات کی کثیر تعدادموجود تھی۔

باغی ٹی وی: شیخوپورہ (محمد طلال سے)شیخوپورہ چیمبرز آف کامرس اینڈ انڈسٹریز کے اجلاس میں کہا گیا ہے کہ موسم سرما کی آمد سے قبل سموگ دھند اور ماحولیاتی آلودگی سے حفاظت کیلئے اقدامات اٹھائے جائیں تاکہ شہریوں کی صحت کا تحفظ ممکن ہوسکے،سردی میں سموگ اور دھندکے باعث روڈ حادثات، صحت کے مسائل نزلہ زکام بخار اور سانس کی تکالیف شامل ہیں اس سلسلہ میں حکومت پنجاب کے انڈسٹری کامرس اینڈ انویسٹمنٹ اور سکیل ڈیپارٹمنٹ نے تمام چیمبرز آف کامرس و صنعتی اور تجارتی شعبوں کو ہدایت جاری کردی ہیں کہ وہ سموگ کو موثر انداز سے کنٹرول کرنے کیلئے عملی اقدامات اٹھائیں، اجلاس کی صدارت صدر طارق اقبال مغل نے کی جس میں سینئر نائب صدر خالد زمان طور، نائب صدر عظیم علی شیخ سمیت دیگر عہدیداروں و ممبران نے شرکت کی، اجلاس کے بعدمیڈیا کو بریفنگ دیتے ہوئے نائب صدر عظیم علی شیخ نے کہا کہ موسم سرما کے آغاز سے قبل عوام کے تحفظ کیلئے آگاہی دی جارہی ہے کہ صنعت کار اور کارخانہ دار صنعتوں اور کارخانوں کے دھویں اور زہریلی گیسوں کے اخراج کو کنٹرول کرنے کیلئے کارخانوں کی چمنیوں کو نہ صرف اونچا کریں بلکہ چمنیوں میں فلٹر بھی استعمال کریں تاکہ کاربن کا اخراج فضاء میں کم سے کم جا سکے، کارخانوں میں زیادہ سے زیادہ پھولدار پودے لگانے کی مہم بھی شروع کردی گئی ہے کارخانو ں اور صنعتوں کے ماحول کو بہتر بنانے کیلئے بھی صنعتکاروں کا ہدایات جاری کردی گئی ہیں۔

باغی ٹی وی:شیخوپورہ(محمد طلال سے) شیخوپورہ شہر کے قلب مین بازار اور اما م بارگاہ چوک سے متصل جوہر پارک اور نشتر پارک بدحالی کا شکار،صفائی ستھرائی اور دیکھ بھال کا شدید فقدان، نشئیوں نے ڈیرے جما لئے، دونوں پارکس بے رونق ہو کر رہ گئے، پارکس کے گرد قبضہ مافیا نے تجاوزات کی بھرمار کردی، اہل علاقہ کا شدید احتجاج، اعلیٰ حکام سے فوری نوٹس لینے اور اصلاح و احوال کا مطالبہ، تفصیلات کے مطابق شہر کے کلیدی تجارتی مرکز مین بازار اورامام بارگاہ چوک سے متصل جو ہر پارک اور نشتر پارک کی حالت نہایت ابتر ہو چکی ہے اور عرصہ دراز سے صفائی ستھرائی و تعمیر و مرمت پر کوئی توجہ نہیں دی گئی جس کے باعث پارکس کے جھولے اور چار دیواری نہایت خستہ حال ہوچکی ہے اور جگہ جگہ سے شدید ٹوٹ پھوٹ کا شکار ہے جھولے کسی بھی وقت زمین بوس ہوسکتے، جگہ جگہ کوڑے کرکٹ کے ڈھیر لگے ہیں، نشئیوں نے اپنے مسکن قائم کرکے رہی سہی کسر نکال دی ہے جو سارا دن ٹولیوں کی شکل میں بیٹھ کر نشہ کی لت پوری کرتے ہیں جس کے باعث شہری ان پارکوں کو رخ کرنے سے قاصر ہیں جبکہ پارکس کے گرد قبضہ مافیا نے ڈیرے ڈال لئے ہیں اور پارکس کے چاروں اطراف کے روڈ پر تجاوزات کی بھرمار کردی گئی ہے جس کے سبب ان بازارو ں سے پیدل گزرنا تک محال ہوچکا ہے، اہل علاقہ کے مطابق یہاں لگائی گئی ریڑھیوں اور پھڑیوں کے مالکان سے بعض با اثر افراد اور میونسپل کمیٹی کا عملہ ہفتہ و ار اور ماہانہ بھتہ لیتا ہے اور ایڈوانس کی مد میں سات سے آٹھ لاکھ روپے تک وصول کئے جاتے ہیں جبکہ جوہر پارک کے بالمقابل واقع سرکاری سکول بھی اس زبوں حالی کی زد میں آچکا ہے جس کے گیٹ کے سمانے تک پھڑیاں لگی ہیں جس کے باعث شہریوں نے بچوں کو اس سکول سے منتقل کرنا شروع کردیا ہے اور بڑھتی تجاوزات کے ساتھ ساتھ زیر تعلیم بچوں کی تعداد میں مسلسل کمی واقع ہورہی ہے او ر سکول انتظامیہ کو فلیکسز آویزاں کرکے والدین کو بچوں کو سکول بھیجنے کی استدعا کرنا پڑی رہی ہے، اہل علاقہ نے اعلیٰ حکام سے فوری نوٹس لینے اور اصلاح و احوال کا مطالبہ کیا ہے۔

باغی ٹی وی ، ڈیرہ غازی خان( نامہ نگار)گذشتہ روز غازی یونیورسٹی ڈیرہ غازی خان میں NUMS کے انٹری ٹیسٹ کا انعقاد ہوا ،غازی یونیورسٹی نے اس قومی فریضہ کی ادائیگی میں اپنے امتحانی ہال سمیت 37 کمرے اور انتظامی معاونت و عملہ سیکورٹی فراہم کیا۔ رجسٹرار غازی یونیورسٹی ڈاکٹر اللہ بخش گلشن کی ہدایات پرچیف سیکورٹی آفیسر کرنل اشفاق احمد اور ان کی ٹیم نے سیکورٹی اور انتظامی امور میں اپنا بھرپور کردار ادا کیا۔ کرنل اشفاق احمدکی کمانڈ میں یونیورسٹی کی سیکورٹی ٹیم نے ٹیسٹ ایریا اوراس کے اطراف میں حفاظتی انتظامات کو یقینی بنانے میں پاک فوج کا مکمل ساتھ دیا۔

اس ٹیسٹ میں تقریباً 1170 طلباء شریک ہوئے جن میں سے زیادہ تر کا تعلق ڈیرہ غازی خان ڈویژن سے تھا، علاقہ ازیں بھکر، میانوالی اور دیگر علاقوں سے بھی بچوں نے اس ٹیسٹ میں حصہ لیا۔ پاک آرمی کی جانب سے غازی یونیورسٹی کی پارکنگ میں والدین کے بیٹھنے کے لیے آرام دہ ماحول فراہم کیا اور کھانے پینے کی اشیاء کی فراہمی کو یقینی بنایا، طلباء و طالبات کی آسانی کے لیے راہنمائی و سہولیاتی مراکز کا قیام عمل میں لایا گیا،یونیورسٹی میں سائن بورڈ اور گائیڈ میپ آویزاں کیے گئے۔

پاک فوج کے طرف سے یہ تمام انتظامات کمانڈر بر گیڈیئر فیصل شرجیل قریشی کی زیر نگرانی کمانڈگ آفیسر کرنل مبشر گیلانی نے مکمل کروائے۔ نمز کی جانب سے کرنل مبشر حسین اور ان کی ٹیم نے امتحانات لینے کے مرحلہ کو بطریق احسن نبھایا۔ امیدواران کو دوران ٹیسٹ پینے کے پانی و کھانے کی فراہمی کو یقینی بنایا گیا۔ تمام والدین نے نمز انتظامیہ کا شکریہ ادا کیا جن کی بدولت ڈیرہ غازی خان میں ٹیسٹ کا مرکز قائم کیا گیا

جس سے نہ صرف ڈیرہ غازی خان بلکہ دیگر قریبی شہروں کے لوگوں کو فائدہ پہنچا اور اپنے گھر کے قریب ٹیسٹ مرکز میسر آیا۔ نمز انتظامیہ نے غازی یونیورسٹی کے بھرپور تعاون کا شکریہ ادا کیا۔ ایڈشنل ڈائریکٹر ایڈمنسٹریشن شعیب رضا نے نمز انتظامیہ کو آئندہ بھی اپنے ادارے کی طرف سے بھرپور معاونت کا یقین دلایا کہ کسی بھی قسم کے قومی فریضہ کی تکمیل میں غازی یونیورسٹی ہمیشہ ساتھ ہوگی۔