Author: ڈاکٹرغلام مصطفی بڈانی

سیالکوٹ (باغی ٹی وی، بیوروچیف شاہد ریاض)محرم الحرام کے دوران سیکیورٹی، صفائی و دیگر انتظامات کا جائزہ لینے کے لیے اراکین صوبائی اسمبلی محمد منشاء اللہ بٹ اور چودھری فیصل اکرام نے ساتویں محرم کے روز مرکزی امام بارگاہ مستری عبداللہ اور امام بارگاہ اڈہ پسروریاں کا دورہ کیا۔ انہوں نے جلوسوں کے روٹس، روشنی، نکاسی آب، ریسکیو خدمات، سیکیورٹی اور دیگر متعلقہ امور کا موقع پر جائزہ لیا اور منتظمین سے انتظامات پر تبادلہ خیال کیا۔

اس موقع پر گفتگو کرتے ہوئے اراکین اسمبلی نے بتایا کہ وزیر اعلیٰ پنجاب محترمہ مریم نواز شریف کی خصوصی ہدایات کی روشنی میں صوبہ بھر میں امن و امان، بین المذاہب ہم آہنگی اور بھائی چارے کو فروغ دینے کے لیے تاریخی اقدامات اٹھائے گئے ہیں۔ یکم سے 10 محرم تک دفعہ 144 نافذ ہے تاکہ کسی بھی قسم کی شرانگیزی، لاؤڈ اسپیکر کے غلط استعمال اور اسلحے کی نمائش کی مؤثر روک تھام ممکن بنائی جا سکے۔

محمد منشاء اللہ بٹ نے بتایا کہ محرم کے دوران صوبے بھر میں سیکیورٹی اداروں کے 79 ہزار سے زائد اہلکار تعینات کیے جا رہے ہیں، جبکہ 38 ہزار 375 مجالس و جلوسوں کو فول پروف سیکیورٹی فراہم کی جا رہی ہے۔ حساس مقامات پر سی سی ٹی وی کیمرے نصب کیے گئے ہیں اور صفائی، روشنی، نکاسی آب، ایمبولینس اور ریسکیو خدمات کو فعال رکھا گیا ہے۔ افواہوں اور فیک نیوز کی روک تھام کے لیے کنٹرول روم قائم کر دیا گیا ہے جبکہ جلوسوں کے راستوں پر ڈرون کیمروں کے استعمال پر مکمل پابندی عائد کر دی گئی ہے۔

دونوں اراکین اسمبلی نے ضلعی انتظامیہ، پولیس اور ریسکیو اداروں کے اقدامات کو سراہتے ہوئے کہا کہ تمام ادارے شاندار کوآرڈینیشن سے اپنے فرائض سرانجام دے رہے ہیں۔ انہوں نے منتظمین کو یقین دلایا کہ حکومت پنجاب کے احکامات کے مطابق عوامی نمائندے ہر ممکن تعاون فراہم کریں گے تاکہ محرم الحرام کے ایام پُرامن، باوقار اور منظم انداز میں مکمل کیے جا سکیں۔

اراکین اسمبلی نے عوام سے اپیل کی کہ وہ فرقہ وارانہ ہم آہنگی قائم رکھیں، افواہوں پر کان نہ دھریں، 9 اور 10 محرم کے جلوسوں کے متبادل ٹریفک پلان پر عمل کریں اور پولیس و انتظامیہ سے مکمل تعاون کریں تاکہ کسی ناخوشگوار واقعے سے بچا جا سکے۔

سیالکوٹ (باغی ٹی وی، سٹی رپورٹر مدثر رتو)ڈپٹی کمشنر سیالکوٹ صبا اصغر علی نے کہا ہے کہ محرم الحرام کے دوران ضلع بھر میں امن و امان برقرار رکھنے اور فول پروف سیکیورٹی یقینی بنانے کے لیے ڈی سی آفس میں قائم کنٹرول روم چوبیس گھنٹے فعال ہے، جو ڈی پی او آفس اور محکمہ داخلہ پنجاب کے مرکزی سسٹم سے منسلک ہے۔

یہ بات انہوں نے دفتر ڈپٹی کمشنر میں میڈیا سے گفتگو کرتے ہوئے کہی۔ اس موقع پر ایڈیشنل ڈپٹی کمشنر ریونیو اقبال سنگھیڑا اور ایڈیشنل ڈپٹی کمشنر جنرل ایوب بخاری بھی ان کے ہمراہ موجود تھے۔

ڈپٹی کمشنر نے بتایا کہ کنٹرول روم میں سیف سٹی کے 263 کیمروں کے علاوہ مزید 100 کیمرے بھی نصب کیے گئے ہیں تاکہ مجالس اور ماتمی جلوسوں کی مانیٹرنگ بہتر انداز میں کی جا سکے۔ انہوں نے کہا کہ دفعہ 144 نافذ کر دی گئی ہے، جس کے تحت ڈرون کیمروں کے استعمال پر پابندی عائد ہے، اور سوشل میڈیا پر اشتعال انگیز مواد پھیلانے والوں کے خلاف سخت کارروائی کی جا رہی ہے۔ اس سلسلے میں ایک شخص کی گرفتاری عمل میں لائی گئی ہے اور ایک ایف آئی آر درج کی گئی ہے۔

صبا اصغر علی نے مزید کہا کہ حکومت پنجاب کی جانب سے محرم کے دوران 23 سبیلیں قائم کی جا رہی ہیں جبکہ 5 موبائل ٹوائلٹس بھی ماتمی جلوسوں کے ساتھ متحرک ہوں گے۔ انہوں نے میڈیا کے کردار کو سراہتے ہوئے کہا کہ میڈیا امن و امان برقرار رکھنے میں اہم شراکت دار ہے، اور انتظامات میں اگر کوئی کمی ہو تو اس کی نشاندہی کی جائے تاکہ فوری اصلاح کی جا سکے۔

ڈپٹی کمشنر نے بتایا کہ تمام مجالس و جلوسوں کے منتظمین سے ضلعی انتظامیہ مسلسل رابطے میں ہے۔ محکمہ صحت کی کلینک آن ویلز سروس، ریسکیو 1122 ٹیمیں، اور ستھرا پنجاب کے سینٹری ورکرز موقع پر موجود ہوں گے تاکہ صحت اور صفائی کے امور میں کوئی کوتاہی نہ ہو۔

بعد ازاں میڈیا نمائندگان کو کنٹرول روم کا دورہ بھی کرایا گیا، جہاں انہیں سیکیورٹی اور مانیٹرنگ کے حوالے سے بریفنگ دی گئی۔

سیالکوٹ (باغی ٹی وی، سٹی رپورٹر: مدثر رتو)سیکرٹری جنرل حلقہ خواتین جماعت اسلامی پاکستان ڈاکٹر حمیرا طارق کی ہدایت پر جماعت اسلامی ضلع سیالکوٹ کی خواتین کے وفد نے ڈسکہ میں سانحہ سوات کے شہداء کے اہل خانہ سے ملاقات کی اور گہرے دکھ و افسوس کا اظہار کیا۔ وفد نے شہداء کی بلندی درجات کے لیے دعا کی اور متاثرہ خاندان کو ڈاکٹر حمیرا طارق کا تعزیتی پیغام پہنچایا۔

وفد کے ہمراہ اہلِ محلہ کی بڑی تعداد بھی موجود تھی، جنہوں نے جماعت اسلامی کی اس بھرپور یکجہتی کو سراہا۔ ملاقات کے دوران حلقہ خواتین جماعت اسلامی کے نمائندگان نے کہا کہ جماعت اسلامی غم کی اس گھڑی میں متاثرہ خاندان کے ساتھ کھڑی ہے اور قانونی معاونت سمیت ہر ممکن مدد فراہم کرے گی۔

اس موقع پر حکومتی بے حسی پر سخت تنقید کرتے ہوئے وفد نے کہا کہ افسوس کی بات ہے کہ جب ملک میں انسانی جانوں کے ضیاع پر قوم سوگوار ہے، تب بھی حکمران اپنے مشاغل میں مصروف ہیں۔ انہوں نے کہا کہ سانحہ سوات وفاقی و صوبائی حکومتوں کی سنگ دلی اور نااہلی کی بدترین مثال ہے، جو اس بات کا ثبوت ہے کہ موجودہ حکمران عوام کے دکھ درد میں شریک ہونے کے بجائے بے حسی کی چادر اوڑھے بیٹھے ہیں۔

وفد نے مزید کہا کہ اب وقت آ گیا ہے کہ عوام آنکھیں کھولیں اور سوچیں کہ انہوں نے کیسے بے حس عناصر کو اقتدار میں پہنچایا۔ انہوں نے تنبیہ کی کہ مون سون کا موسم قریب ہے، مگر حکومتی سطح پر کسی قسم کی تیاری نظر نہیں آ رہی۔ جگہ جگہ جوہڑ، گڑھے اور نالوں کی ناقص صفائی سے حادثات جنم لے سکتے ہیں، جس کے ذمہ دار نااہل حکمران ہوں گے۔

جماعت اسلامی کا کہنا تھا کہ وہ ماضی میں بھی آفات و سانحات کے دوران عوامی خدمت میں پیش پیش رہی ہے اور آئندہ بھی مظلوم اور متاثرہ افراد کے شانہ بشانہ کھڑی رہے گی۔