Author: ڈاکٹرغلام مصطفی بڈانی

سیالکوٹ(باغی ٹی وی، بیوروچیف شاہد ریاض)واپڈا کی نااہلی،اخبار مارکیٹ کا بل جمع ہونے کے باوجود میٹر اتار لیا گیا

سیالکوٹ کے علاقے اخبار مارکیٹ میں محکمہ واپڈا کی مبینہ غفلت اور غیرذمہ داری نے اخبار فروشوں کو شدید مشکلات سے دوچار کر دیا۔ اطلاعات کے مطابق، اخبار مارکیٹ سیالکوٹ کا بجلی بل باقاعدگی سے جمع کروائے جانے کے باوجود واپڈا اہلکار میٹر اتار کر لے گئے، جس کے نتیجے میں پورے ضلع کو اخبار فراہم کرنے والے اخبار فروش شدید گرمی میں جھلسنے پر مجبور ہو گئے۔

اس واقعے پر اخبار فروش یونین سیالکوٹ کے صدر چوہدری محمد اشرف، جنرل سیکریٹری مقصود چوہان اور پورے ضلع کی صحافی برادری بشمول پرنٹ اور الیکٹرانک میڈیا نے شدید احتجاج کیا ہے۔ صحافیوں نے واپڈا کے ایس ای سیالکوٹ سے مطالبہ کیا ہے کہ فوری طور پر اخبار مارکیٹ کا میٹر دوبارہ نصب کیا جائے اور اس سنگین غیرذمہ داری کے مرتکب اہلکاروں کے خلاف فوری کارروائی کی جائے۔

صحافی برادری کا کہنا ہے کہ اخبار فروش پہلے ہی کم وسائل میں عوامی خدمت انجام دے رہے ہیں، اور اس قسم کی انتظامی غفلت ان کی پیشہ ورانہ سرگرمیوں میں سنگین رکاوٹ ہے۔ عوامی مفاد کے اس مسئلے پر فوری ایکشن نہ لیا گیا تو احتجاج کا دائرہ وسیع کیا جائے گا۔

سیالکوٹ(باغی ٹی وی،بیوروچیف: شاہد ریاض)محرم الحرام کے دوران امن و امان کو برقرار رکھنے، شرپسند عناصر کی حوصلہ شکنی اور شہریوں کے جان و مال کے تحفظ کو یقینی بنانے کے لیے سیالکوٹ پولیس کی جانب سے ضلع بھر میں فلیگ مارچز کا انعقاد کیا گیا۔ یہ اقدامات ڈسٹرکٹ پولیس آفیسر (ڈی پی او) سیالکوٹ فیصل شہزاد کی خصوصی ہدایات پر کیے گئے۔

پولیس، ایلیٹ فورس، ٹریفک پولیس، اور دیگر قانون نافذ کرنے والے اداروں نے ایس ڈی پی اوز کی قیادت میں اپنے متعلقہ سرکلز میں بھرپور انداز میں فلیگ مارچ کیا۔ یہ فلیگ مارچ اہم شاہراہوں، مرکزی بازاروں، امام بارگاہوں، محرم کے جلوسوں کے روٹس اور حساس مقامات پر کیا گیا تاکہ شہریوں میں احساس تحفظ پیدا ہو اور کسی بھی ممکنہ ناخوشگوار واقعے کی روک تھام ممکن ہو سکے۔

ڈی پی او فیصل شہزاد نے میڈیا سے گفتگو کرتے ہوئے کہا کہ سیالکوٹ پولیس محرم الحرام کے دوران سیکیورٹی کے فول پروف انتظامات کر رہی ہے۔ تمام مرکزی جلوسوں اور مجالس کی مانیٹرنگ جدید سی سی ٹی وی کیمروں، ڈرونز اور کنٹرول رومز کے ذریعے کی جا رہی ہے۔ انہوں نے مزید کہا کہ ہر سطح پر سیکیورٹی الرٹ ہے اور پولیس فورس مسلسل گشت کر رہی ہے تاکہ کسی بھی شرپسند کوشش کو فوری ناکام بنایا جا سکے۔

فلیگ مارچ کا مقصد عوام میں یہ پیغام دینا بھی ہے کہ قانون نافذ کرنے والے ادارے پوری طرح متحرک اور چوکس ہیں اور وہ شہریوں کی جان و مال کے تحفظ کو اولین ترجیح دے رہے ہیں۔

ڈی پی او نے شہریوں سے اپیل کی کہ وہ محرم الحرام کے دوران پولیس کے ساتھ مکمل تعاون کریں، مشکوک افراد یا سرگرمیوں کی فوری اطلاع قریبی تھانے یا پولیس ہیلپ لائن پر دیں اور مذہبی رواداری، بھائی چارے اور امن کے فروغ میں اپنا کردار ادا کریں۔

شہری حلقوں اور مذہبی رہنماؤں کی جانب سے پولیس کی ان کاوشوں کو سراہا گیا ہے اور امید ظاہر کی گئی ہے کہ ان اقدامات سے محرم الحرام کے دوران مکمل امن قائم رہے گا۔

سیالکوٹ (باغی ٹی وی، بیوروچیف شاہد ریاض)سیالکوٹ میں شہریوں میں ٹریفک قوانین کے شعور کو اجاگر کرنے اور روڈ سیفٹی کو فروغ دینے کے لیے ایک اہم اقدام کے تحت مدرسہ انوارالعلوم اگوکی میں جامع ٹریفک آگاہی سیشن کا انعقاد کیا گیا۔ اس سیشن کا انعقاد ٹریفک ایجوکیشن ونگ سیالکوٹ نے ڈسٹرکٹ ٹریفک آفیسر مدثر صدیق کی زیر نگرانی کیا جبکہ اس کی قیادت انچارج ایجوکیشن ونگ ڈاکٹر شفقت رسول نے کی۔

سیشن میں مدرسہ کے سینکڑوں طلباء، اساتذہ اور معزز علمائے کرام نے شرکت کی۔ ڈاکٹر شفقت رسول نے اپنے خطاب میں طلباء کو مخاطب کرتے ہوئے کہا کہ سڑک پر محفوظ طرزِ عمل اپنانا اور ٹریفک قوانین کی پاسداری صرف ایک قانونی ضرورت نہیں بلکہ شرعی اصولوں کے عین مطابق بھی ہے۔ انہوں نے کہا کہ اکثر ٹریفک حادثات معمولی غفلت کے باعث رونما ہوتے ہیں، مثلاً ہیلمٹ نہ پہننا، سیٹ بیلٹ نہ باندھنا، یا ڈرائیونگ کے دوران موبائل فون کا استعمال۔ ان چھوٹی غلطیوں کو سدھار کر ہم قیمتی انسانی جانوں کو بچا سکتے ہیں۔

انہوں نے نوجوانوں کو تلقین کی کہ وہ نہ صرف خود ٹریفک قوانین کی پابندی کریں بلکہ اپنے گھر والوں، دوستوں اور محلے داروں کو بھی اس بارے میں شعور دیں تاکہ معاشرے میں ایک محفوظ اور مہذب ٹریفک ماحول قائم کیا جا سکے۔

سیشن کے اختتام پر علمائے کرام سے خصوصی نشست کا اہتمام کیا گیا جس میں انہیں ٹریفک پولیس کی جاری اصلاحی مہمات سے آگاہ کیا گیا۔ ڈاکٹر شفقت رسول نے علمائے کرام سے اپیل کی کہ وہ اپنے خطبات، دروس اور وعظ میں ٹریفک قوانین کی اہمیت کو اجاگر کریں۔ انہوں نے کہا کہ علماء کا معاشرے پر گہرا اثر ہوتا ہے، اور اگر وہ عوام کو روڈ سیفٹی کی تعلیم دیں گے تو اس سے حادثات میں خاطر خواہ کمی لائی جا سکتی ہے اور ایک با نظم و مہذب معاشرے کی بنیاد رکھی جا سکتی ہے۔

شرکاء نے اس آگاہی سیشن کو سراہتے ہوئے کہا کہ مدارس میں اس طرح کی سرگرمیاں وقت کی اہم ضرورت ہیں اور یہ نئی نسل میں قانون پسندی اور سماجی شعور کو فروغ دینے میں اہم کردار ادا کرتی ہیں۔

سیالکوٹ (باغی ٹی وی، بیوروچیف شاہد ریاض) ڈسٹرکٹ پولیس آفیسر فیصل شہزاد کی زیر صدارت پولیس لائن کے کانفرنس ہال میں محرم الحرام 2025 کے سلسلے میں سیکیورٹی انتظامات کے حوالے سے اہم اجلاس منعقد ہوا۔

اجلاس میں ایس پی انویسٹی گیشن عثمان منیر سیفی، تمام ایس ڈی پی اوز، ڈی ایس پی ہیڈکوارٹر، ڈی ایس پیز ٹریفک، ایس ایچ اوز اور ہیڈ برانچ افسران نے شرکت کی۔ میٹنگ میں سیالکوٹ بھر میں منعقد ہونے والی مجالس اور چھوٹے بڑے جلوسوں کیلئے سیکیورٹی انتظامات کا تفصیل سے جائزہ لیا گیا اور ممکنہ خطرات سے نمٹنے کی حکمت عملی پر مشاورت کی گئی۔