Author: ڈاکٹرغلام مصطفی بڈانی

بہاولپور (باغی ٹی وی،نامہ نگار حبیب خان) وزیر اعلیٰ پنجاب محترمہ مریم نواز شریف کی خصوصی ہدایات پر 5 جون کو لال سوہانرا نیشنل پارک میں ورلڈ انوائرمنٹ ڈے کے موقع پر شجرکاری مہم اور آگاہی ریلی کا بھرپور انعقاد کیا گیا، جس میں شہریوں، طلباء، صحافیوں اور تاجر برادری سمیت مختلف طبقات زندگی سے تعلق رکھنے والے افراد نے جوش و خروش سے شرکت کی۔

تقریب کی صدارت ڈویژنل فاریسٹ آفیسر (ڈی ایف او) نیشنل پارک عمران ستار اور سب ڈویژنل فاریسٹ آفیسر (ایس ڈی ایف او) محمد موسیٰ نے کی۔ اس موقع پر ماحولیاتی تحفظ کے حوالے سے "پلاسٹک کے استعمال میں کمی لائیں، درخت لگائیں، ماحول کو آلودگی سے بچائیں” کا مؤثر پیغام عوام تک پہنچایا گیا۔

معروف صحافی سعید اختر چوہدری، سماجی کارکن عمر شہزاد عرف بھولا چشتی، تاجروں اور محکمہ جنگلات کے اہلکاروں نے نہ صرف شرکت کی بلکہ شجرکاری میں حصہ لے کر ماحولیاتی بہتری کے لیے عملی اقدام بھی اٹھایا۔

تقریب سے خطاب کرتے ہوئے ڈی ایف او عمران ستار نے کہا کہ درخت نہ صرف زمین کی خوبصورتی کا باعث ہیں بلکہ یہ ماحولیاتی توازن کو برقرار رکھنے میں کلیدی کردار ادا کرتے ہیں۔ انہوں نے کہا کہ فضائی آلودگی، گلوبل وارمنگ اور گرین ہاؤس ایفیکٹ جیسے چیلنجز کا واحد قدرتی حل شجرکاری ہے۔

ایس ڈی ایف او محمد موسیٰ نے کہا کہ جدید صنعتی ترقی نے جہاں انسانی سہولتوں میں اضافہ کیا ہے، وہیں قدرتی ماحول کو بھی نقصان پہنچایا ہے۔ اس وقت شجرکاری قومی، اخلاقی اور مذہبی فریضہ بن چکا ہے۔ انہوں نے شہریوں پر زور دیا کہ ہر فرد کم از کم ایک درخت ضرور لگائے تاکہ آئندہ نسلوں کو صاف اور صحت مند ماحول میسر آسکے۔

اس مہم کے دوران شہریوں نے جوش و خروش سے پودے لگا کر اس بات کا ثبوت دیا کہ وہ ماحولیاتی تحفظ کے لیے سنجیدہ اور باشعور ہیں۔ تقریب میں ماحول دوست پیغامات پر مشتمل بینرز، پلے کارڈز اور آگاہی مواد بھی تقسیم کیا گیا۔

تقریب کے اختتام پر شجرکاری مہم کو ہر سطح پر جاری رکھنے اور اسے ایک تحریک کی شکل دینے کے عزم کا اظہار کیا گیا۔

اوچ شریف (باغی ٹی وی، نامہ نگار حبیب خان) اوچ شریف شہر کی مرکزی شاہراہ گرڈ اسٹیشن روڈ مکمل طور پر تباہ حالی کا شکار ہو چکی ہے، جہاں روزانہ سینکڑوں شہری اور واپڈا ملازمین اذیت ناک سفر پر مجبور ہیں۔ گہرے گڑھوں، اکھڑی ہوئی تارکول، کیچڑ اور گردوغبار سے بھرے اس واحد راستے نے عوام کی زندگی کو اجیرن بنا دیا ہے۔

یہ سڑک واپڈا دفتر اور گرڈ اسٹیشن کی جانب جانے والی اہم گزرگاہ ہے جہاں روزانہ نہ صرف ملازمین آتے ہیں بلکہ عوام بجلی کے بل، میٹر تبدیلی اور شکایات کے لیے بھی اسی سڑک پر سفر کرتے ہیں۔ سڑک کی بربادی کے باعث موٹر سائیکل سوار آئے روز گر کر زخمی ہو رہے ہیں، گاڑیاں پنکچر ہو رہی ہیں، رکشے اُلٹ رہے ہیں، اور بارش کے بعد گڑھے خطرناک حادثات کا سبب بن رہے ہیں۔

واپڈا اہلکاروں اور شہریوں نے متعدد بار متعلقہ اداروں کو درخواستیں دیں، سوشل میڈیا پر تصاویر و ویڈیوز وائرل کیں، مگر بلدیاتی ادارے اور عوامی نمائندے مکمل خاموشی اختیار کیے ہوئے ہیں۔

شہریوں کا کہنا ہے کہ اگر فوری طور پر گرڈ اسٹیشن روڈ کی مرمت یا ازسرنو تعمیر شروع نہ کی گئی تو یہ سڑک صرف خستہ حال نہیں بلکہ حکومتی غفلت کی علامت بن جائے گی۔ انہوں نے ڈپٹی کمشنر بہاولپور ڈاکٹر فرحان فاروق اور نو منتخب نمائندوں سے فوری ایکشن کا مطالبہ کیا ہے۔

اوچ شریف (باغی ٹی وی، نامہ نگار حبیب خان) دربار عالیہ حضرت محبوب سبحانی کے سجادہ نشین مخدوم سید افتخار الحسن گیلانی اور دربار حضرت جلال الدین سرخ پوش کے سجادہ نشین مخدوم سید زمرد حسن بخاری نے مشترکہ بیان میں ذوالحجہ کے بابرکت مہینے میں قربانی کو ریاکاری سے پاک کرنے کی اپیل کی ہے۔

انہوں نے کہا کہ قربانی صرف رسم یا نمائش نہیں بلکہ اللہ کی رضا کے لیے خالص عبادت ہے۔ دکھاوے سے اس کی روح ختم ہو جاتی ہے۔ یہ عبادت ایثار، خلوص اور وفا کا مظہر ہے جس کا نعم البدل کوئی عمل نہیں۔

انہوں نے مزید کہا کہ اس موقع پر غریبوں اور مستحق افراد کا خاص خیال رکھا جائے کیونکہ یہی قربانی کا اصل پیغام ہے۔ اگر ہم خلوص نیت سے یہ عمل انجام دیں تو اللہ کا قرب حاصل کر کے معاشرے میں امن و بھائی چارہ قائم کیا جا سکتا ہے۔

انہوں نے عوام سے اپیل کی کہ قربانی کے وقت خلوص کو مقدم رکھیں اور دکھاوے سے گریز کریں تاکہ یہ عمل اللہ کی بارگاہ میں مقبول ہو۔