Author: ڈاکٹرغلام مصطفی بڈانی

اوچ شریف (باغی ٹی وی نامہ نگار حبیب خان)علی پور میں ڈاکوؤں نے محکمہ صحت کے ایک ملازم سے گن پوائنٹ پر موٹرسائیکل چھین لی۔ پولیس تھانہ سٹی علی پور نے واقعے کا مقدمہ درج کر کے تحقیقات کا آغاز کر دیا ہے۔

تفصیلات کے مطابق، محمد عامر ولد غلام یاسین والوٹ، جو محکمہ صحت میں ملازم ہے، گزشتہ شب ڈاکٹر فرزانہ یاسمین کے ہسپتال سے اپنے گھر، چاہ پکے والہ، واپس جا رہا تھا۔ جیسے ہی وہ بہاول نالہ سے گزر کر اپنے گھر کی گلی میں مڑا، دو مسلح نقاب پوش ڈاکو اچانک اس کے سامنے آ گئے۔

ڈاکوؤں نے آتشیں اسلحہ کے زور پر محمد عامر کو روکا اور اس کی ذاتی ملکیت موٹرسائیکل، جس کی مالیت تقریباً ایک لاکھ ساٹھ ہزار روپے بتائی جا رہی ہے، چھین لی اور فرار ہو گئے۔ واردات کے بعد ملزمان پنجاب بینک روڈ کی جانب فرار ہوئے۔

متاثرہ شخص کا کہنا ہے کہ گلی میں روشنی ہونے کی وجہ سے وہ اور دیگر عینی شاہدین ڈاکوؤں کو شناخت کر سکتے ہیں۔ پولیس تھانہ سٹی علی پور نے واقعے کا مقدمہ درج کر کے ملزمان کی تلاش شروع کر دی ہے۔

علاقہ مکینوں نے پولیس سے مطالبہ کیا ہے کہ گشت کو مؤثر بنایا جائے اور جلد از جلد ملزمان کو گرفتار کر کے قانون کے کٹہرے میں لایا جائے۔

اوچ شریف، (باغی ٹی وی نامہ نگار حبیب خان)اوچ شریف کے نواحی علاقے اکبر ٹاؤن میں گھریلو جھگڑے نے خونی رنگ اختیار کر لیا۔ اپنی روٹھی بیوی کو منانے میں ناکامی پر ایک مشتعل داماد نے ساتھیوں سمیت سسرالیوں کے گھر پر دھاوا بول دیا۔ اس اندوہناک واقعے میں سریے اور لاٹھیوں کے وار سے 20 سالہ برادر نسبتی راشد حسین جاں بحق ہو گیا، جبکہ ساس اور دو دیگر برادر نسبتی شدید زخمی ہوئے۔

تفصیلات کے مطابق، ملزم وحید حسین نے اپنے ساتھیوں ناظم حسین، خادم حسین، محمد عاشق، جمیل اور محمد حسن کے ہمراہ اپنے سسر قاسم حسین کے گھر پر حملہ کیا۔ گھر میں موجود قاسم حسین کے بیٹوں راشد، نادر اور خادم حسین نے مزاحمت کی کوشش کی، جس پر وحید حسین نے سریے کا وار کر کے راشد کو شدید زخمی کر دیا۔ دیگر ساتھیوں نے بھی لاٹھیوں سے حملہ کیا، جس کے نتیجے میں نادر اور خادم زخمی ہو گئے، جبکہ نسیم بی بی (ساس) کو بھی تشدد کا نشانہ بنایا گیا۔

تمام زخمیوں کو فوری طور پر RHC اوچ شریف منتقل کیا گیا، جہاں راشد حسین زخموں کی تاب نہ لاتے ہوئے دم توڑ گیا۔ واقعے کی اطلاع ملتے ہی پولیس تھانہ اوچ شریف موقع پر پہنچی۔ پولیس نے شواہد اکٹھے کرنے کے بعد لاش کو پوسٹ مارٹم کے لیے بھجوایا اور پھر ورثا کے حوالے کر دیا۔

متاثرہ خاندان کے سربراہ قاسم حسین کی مدعیت میں تھانہ اوچ شریف میں مقدمہ درج کر لیا گیا ہے۔ پولیس نے اس واقعے کے مرکزی ملزمان کو گرفتار کر لیا ہے۔

بہاولپور، (باغی ٹی وی نامہ نگار حبیب خان)لال سوہانرا کے قریب بہاول کینال نہر سے ایک 20 سالہ نامعلوم لڑکی کی بوری بند لاش برآمد ہوئی ہے، جس کے ہاتھ پاؤں بندھے ہوئے تھے۔ اس اندوہناک واقعے نے علاقے میں خوف و ہراس پھیلا دیا ہے جبکہ پولیس نے قتل کا شبہ ظاہر کرتے ہوئے تحقیقات کا آغاز کر دیا ہے۔

عینی شاہدین کے مطابق، مقامی افراد نے نہر میں تیرتی ہوئی لاش دیکھ کر فوری طور پر پولیس چوکی لال سوہانرا اور ریسکیو 1122 کو اطلاع دی۔ اطلاع ملتے ہی انچارج پولیس چوکی مقصود ورک، ڈی ایس پی صدر سرکل خالد محمود وٹو، اور ریسکیو اہلکار موقع پر پہنچ گئے۔ ریسکیو ٹیم جس میں اینسیڈینٹ کمانڈر جاوید، سینیئر میڈیکل ٹیکنیشن محمد مشتاق، اور آصف رضا شامل تھے، نے کارروائی کرتے ہوئے لاش کو نہر سے نکال کر پولیس کے حوالے کیا۔

پولیس کے مطابق، مقتولہ کی شناخت تاحال نہیں ہو سکی ہے۔ لاش کی ٹانگ کے ساتھ رسی کے ذریعے بھاری وزن باندھ کر نہر میں پھینکا گیا تھا، جس سے ظاہر ہوتا ہے کہ اسے قتل کر کے شواہد چھپانے کی کوشش کی گئی ہے۔ پولیس نے لاش کو قانونی کارروائی کے لیے تحویل میں لے کر پوسٹ مارٹم کے لیے بھجوا دیا ہے۔

شناخت کے عمل کو ممکن بنانے کے لیے پولیس نے قریبی تھانوں — خیرپور ٹامیوالی، عنائتی، میلسی اور کہروڑپکا — سے رابطہ کر لیا ہے۔ پولیس حکام کا کہنا ہے کہ واقعہ کی ہر پہلو سے تفتیش جاری ہے اور جلد ہی حقائق سامنے لانے کی کوشش کی جا رہی ہے۔

علاقے کے مکینوں نے اس دلخراش واقعے پر شدید دکھ اور غم کا اظہار کرتے ہوئے قاتلوں کو جلد گرفتار کرنے اور انصاف فراہم کرنے کا مطالبہ کیا ہے۔