Author: ڈاکٹرغلام مصطفی بڈانی

ننکانہ صاحب،باغی ٹی وی( نامہ نگار،احسان اللہ ایاز) ننکانہ صاحب میں چیف آرگنائزر فیصل رشید بھٹی کے زیر انتظام نیشنل پیس اینڈ جسٹس کونسل، حکومت پاکستان کے زیر اہتمام ایک روزہ قومی امن کانفرنس کا انعقاد کیا گیا جس میں چیئرمین این پی جے سی میاں عبدالوحید نے بطور مہمان خصوصی شرکت کی۔

کانفرنس کا مقصد ملک میں شدت پسندی کے خاتمے، اقلیتوں کے حقوق کے تحفظ اور بین المذاہب ہم آہنگی کے فروغ کے لیے آگاہی پیدا کرنا تھا۔ اس اہم تقریب میں این پی جے سی کے مرکزی قائدین، سول سوسائٹی کے نمائندگان اور ضلعی شخصیات نے بڑی تعداد میں شرکت کی۔

تقریب کے دوران نیشنل پیس اینڈ جسٹس کونسل ننکانہ صاحب کے نومنتخب عہدیداروں نے حلف اٹھایا، جبکہ امن کے فروغ میں نمایاں خدمات پر فیصل رشید بھٹی کو "امن شیلڈ” سے بھی نوازا گیا۔

کانفرنس سے خطاب کرتے ہوئے چیئرمین میاں عبدالوحید نے بھارت اور اسرائیل کی جانب سے کشمیریوں اور فلسطینیوں پر جاری مظالم کی شدید مذمت کی۔ ان کا کہنا تھا کہ وہ ممالک جو خود ظلم و جبر میں ملوث ہیں، وہ دنیا کو امن کا درس کیسے دے سکتے ہیں؟ انہوں نے واضح کیا کہ پاکستانی قوم دہشتگردی برداشت نہیں کرے گی اور ہر ظلم کا جواب دے گی۔

چیف آرگنائزر فیصل رشید بھٹی نے خطاب میں کہا کہ ملک میں ہر چند سال بعد قوم کو فرقہ واریت، برادری ازم اور سیاسی تقسیم کی بنیاد پر بانٹا جاتا ہے، حالانکہ ہم سب ایک کلمہ پڑھنے والی قوم ہیں۔ انہوں نے کہا کہ دنیا کا واحد اسلامی ایٹمی ملک پاکستان ہے، جس نے دہشتگردی کا سب سے زیادہ سامنا کیا، چاہے سری لنکن کرکٹ ٹیم پر حملہ ہو یا ٹرین سانحے—دشمنوں نے پاکستان کو کمزور کرنے کی کوشش کی، لیکن افواج اور ریاستی اداروں نے دنیا کے سامنے بھرپور دفاع کیا۔

شرکاء نے اس بات پر زور دیا کہ ملک سے دہشتگردی، انتہاپسندی اور فرقہ واریت کے خاتمے کے لیے ایسے قومی نوعیت کے پروگرامز کا تسلسل ضروری ہے تاکہ امن، بھائی چارہ اور مذہبی ہم آہنگی فروغ پا سکے۔

ننکانہ صاحب (نامہ نگار، احسان اللہ ایاز) ڈپٹی کمشنر ننکانہ صاحب محمد تسلیم اختر راؤ کی جانب سے جاری ترقیاتی منصوبوں کے معائنے کے دوران مانوالہ روڈ پر تعمیراتی کام میں ناقص میٹریل کا انکشاف ہوا، جس پر ڈپٹی کمشنر نے سخت برہمی کا اظہار کرتے ہوئے متعلقہ ٹھیکیدار کی سرزنش کی اور ازسرنو معیاری انداز میں کام مکمل کرنے کی ہدایت جاری کر دی۔

ڈپٹی کمشنر نے ننکانہ تا فیروز وٹواں اور ننکانہ تا مانوالہ سڑکوں کے 44 کلومیٹر طویل منصوبے کا معائنہ کیا، جو کہ 1100 ملین روپے کی لاگت سے تعمیر کیے جا رہے ہیں۔ اس موقع پر انہوں نے میٹریل کے معیار، کام کی رفتار اور منصوبے کی تکمیل کے ٹائم فریم کا تفصیلی جائزہ لیا۔ ایس ڈی او ہائی وے نے ڈپٹی کمشنر کو تمام تکنیکی پہلوؤں پر بریفنگ دی، تاہم جب مانوالہ روڈ پر ناقص میٹریل استعمال ہوتا پایا گیا تو ڈی سی نے موقع پر ہی کارروائی کی۔

ڈپٹی کمشنر نے سختی سے ہدایت دی کہ تمام ترقیاتی منصوبے ہر صورت 30 مئی 2025 تک مکمل کیے جائیں اور معیار پر کوئی سمجھوتہ برداشت نہیں کیا جائے گا۔ انہوں نے کہا کہ اگر بروقت وزٹ نہ کیا جاتا تو ناقص میٹریل سے یہ سڑک مکمل کر دی جاتی، جو سرکاری فنڈز کے ضیاع اور عوام کے ساتھ ناانصافی کے مترادف ہوتا۔

ترقیاتی منصوبوں میں غفلت، ناقص کارکردگی یا کسی بھی بدعنوانی کے امکانات کو مکمل طور پر رد کرتے ہوئے ڈپٹی کمشنر نے واضح کیا کہ منصوبوں میں شفاف نگرانی نہ ہوئی تو کروڑوں روپے ضائع ہونے کا خدشہ ہے۔ انہوں نے ہدایت کی کہ مین شاہراہوں پر کیٹ آئیز، لین مارکنگ، اور اسٹینڈرڈ سائن بورڈز کو بھی یقینی بنایا جائے تاکہ عوام کو پائیدار سہولیات فراہم کی جا سکیں۔

دورے کے دوران اسسٹنٹ کمشنر عطیہ عنایت، ڈپٹی ڈائریکٹر ڈویلپمنٹ حماد یوسف، ڈسٹرکٹ انفارمیشن آفیسر، سی او ضلع کونسل اور ہائی وے کے دیگر افسران بھی موجود تھے۔

ڈپٹی کمشنر نے اس موقع پر کہا کہ وزیر اعلیٰ پنجاب مریم نواز شریف کے ترقیاتی ویژن کے تحت ننکانہ صاحب میں سڑکوں کی بحالی و تعمیراتی کام برق رفتاری سے جاری ہے، اور جلد ہی دیگر نئی اسکیموں پر بھی کام شروع کر دیا جائے گا۔ انہوں نے کہا کہ عوام، طلبہ اور کسانوں کو ان سڑکوں سے براہ راست فائدہ ہوگا، اور ہر منصوبہ معیار، شفافیت اور پائیداری کی مکمل ضمانت کے ساتھ مکمل کیا جائے گا۔