اوچ شریف (نامہ نگارحبیب خان) اوچ شریف کے مصروف ترین الشمس چوک پر اس وقت افراتفری پھیل گئی جب دو گداگر خواتین، شیلا اور نیلم کے درمیان اپنی ‘حدود’ کے تعین پر شدید لڑائی چھڑ گئی۔ عینی شاہدین کے مطابق دونوں خواتین نے ایک دوسرے پر نہ صرف گالم گلوچ کی بلکہ جسمانی طور پر بھی حملہ آور ہوئیں، بال نوچے گئے اور دھکے دیے گئے۔
یہ تصادم اس وقت شروع ہوا جب شیلا نے نیلم پر الزام لگایا کہ وہ اس کے ‘علاقے’ میں داخل ہو کر بھیک مانگ رہی ہے۔ دیکھتے ہی دیکھتے بحث تکرار میں بدلی اور پھر ہاتھا پائی تک جا پہنچی۔ چوک پر موجود دیگر گداگر اس تماشے کو خاموشی سے دیکھتے رہے جبکہ راہگیروں میں خوف و ہراس پھیل گیا۔
حیرت انگیز طور پر مقامی پولیس اور قانون نافذ کرنے والے ادارے اس سارے واقعے سے بے خبر رہے یا پھر خاموش تماشائی بنے رہے۔ شہریوں نے اس غفلت پر شدید برہمی کا اظہار کیا ہے اور ڈی پی او اور ڈپٹی کمشنر بہاولپور سے فوری نوٹس لینے کا مطالبہ کیا ہے۔ ان کا کہنا ہے کہ گداگروں کی آپس کی لڑائی نہ صرف امن عامہ کے لیے خطرہ ہے بلکہ شہر کی ساکھ کو بھی نقصان پہنچا رہی ہے۔
شہریوں نے مطالبہ کیا ہے کہ گداگروں کے خلاف سخت کارروائی کی جائے اور اس بات کو یقینی بنایا جائے کہ مصروف ترین چوکوں پر اس طرح کے واقعات دوبارہ پیش نہ آئیں۔ انہوں نے زور دیا کہ گداگری کے مسئلے سے نمٹنے کے لیے ایک جامع حکمت عملی وضع کی جائے تاکہ شہر کو اس لعنت سے پاک کیا جا سکے۔
