Author: ڈاکٹرغلام مصطفی بڈانی

ڈیرہ غازی خان(باغی ٹی وی) بلوچ لیوی میں میرٹ کی پامالی اور اقربا پروری کے سنگین الزامات سامنے آئے ہیں۔ شاہنواز نامی ایک اہلکار جس نے کچھ عرصہ قبل دو روز کے اندر دو ترقیاں حاصل کیں، اب نائب صوبیدار کے عہدے پر ترقی کے لیے سرگرم ہے۔ ذرائع کے مطابق وہ اعلیٰ افسران کی خوشامد اور سفارشوں کے ذریعے اپنی من مانی کروانے کی کوشش کر رہا ہے۔

بلوچ لیوی کے نئے قواعد کے مطابق نائب صوبیدار کے عہدے کے لیے گریجویشن کی شرط لازمی ہے۔ تاہم شاہنواز جو کہ ایڈیشنل کمشنر ریونیو کے گن مین کے طور پر تعینات ہے نے مبینہ طور پر کمانڈنٹ کے اختیارات میں مداخلت کرتے ہوئے کوارٹر ماسٹر کا اضافی چارج بھی حاصل کر لیا ہے۔ اس کی عدم موجودگی کی وجہ سے دیگر ملازمین کو مشکلات کا سامنا کرنا پڑ رہا ہے۔

یہ خبر بھی پڑھیں
ڈیرہ غازیخان : بلوچ لیوی میں کیڈر تبدیل ایک ہی ملازم کی 2 روز میں2 ترقیاں

ذرائع نے انکشاف کیا ہے کہ شاہنواز پر کوارٹر ماسٹر کے طور پر ملازمین کی وردیوں، لائٹنگ اور دیگر سامان کی خریداری میں کرپشن کے الزامات بھی ہیں۔ کہا جاتا ہے کہ اس نے اپنی مرضی کے بل بنا کر سرکاری خزانے سے رقوم نکلوائیں۔

اس سے قبل شاہنواز نے مبینہ طور پر سابق کمانڈنٹ کے جعلی دستخطوں سے کیڈر تبدیل کروا کر دو روز میں 2 ترقیاں حاصل کیں۔ اس ناانصافی کے خلاف آواز اٹھانے والے ملازمین کو دور دراز پہاڑی علاقوں میں تبادلہ کر دیا گیا۔

تاہم بلوچ لیوی میں 27 سال بعد نئی بھرتیوں کا عمل شفاف طریقے سے مکمل کیا گیا ہے۔ عوامی حلقوں نے کمانڈنٹ محمد اسد خان چانڈیہ کو اس میرٹ پر مبنی بھرتی کے لیے خراج تحسین پیش کیا ہے۔ انہوں نے امید ظاہر کی ہے کہ کمانڈنٹ کسی اہلکار کی ذاتی خواہش پر میرٹ کے خلاف کوئی ترقی نہیں کریں گے، جس سے نئے بھرتی ہونے والے تعلیم یافتہ نوجوانوں کے حقوق کا تحفظ نہ ہو سکے۔

کوٹ چھٹہ ،باغی ٹی وی(تحصیل رپورٹرمرید حسین تالپور) تحصیل کوٹ چھٹہ ضلع ڈیرہ غازی خان کی بستی تالپور میں زیر تعمیر سڑک اور سیوریج نالے میں میگا کرپشن کا انکشاف ہوا ہے۔ علاقہ مکینوں نے ناقص میٹریل کے استعمال اور کرپشن کے خلاف شدید احتجاج کیا ہے۔

تفصیلات کے مطابق بستی تالپور سے چوٹی زیرین تک بننے والی سڑک اور سیوریج نالے کی تعمیر میں مبینہ طور پر انتہائی ناقص میٹریل استعمال کیا جا رہا ہے۔ مقامی لوگوں کے مطابق سڑک اور نالے کی تعمیر میں دو نمبر اینٹیں اور بغیر سیمنٹ کے کام کیا جا رہا ہےجبکہ ترائی کا عمل بھی نظر انداز کیا جا رہا ہے۔

علاقہ مکینوں نے الزام عائد کیا ہے کہ اس میگا کرپشن میں متعدد افراد ملوث ہیں، جن میں ایک ایسا شخص بھی شامل ہے جس نے مبینہ طور پر سرداری کالبادہ اوڑھ رکھا ہے اور چند سالوں میں ارب پتی بن گیا ہے۔

احتجاج کرنے والے علاقہ مکینوں نے وزیر اعظم، وزیر اعلیٰ پنجاب، کمشنر ڈیرہ غازی خان اور محکمہ ہائی وے کے اعلیٰ حکام سے فوری طور پر اس معاملے کا نوٹس لینے اور ذمہ داران کے خلاف سخت کارروائی کا مطالبہ کیا ہے۔ ان کا کہنا ہے کہ اگر فوری طور پر کوئی ایکشن نہ لیا گیا تو وہ احتجاج کا دائرہ وسیع کریں گے۔