سیالکوٹ ،باغی ٹی وی ( بیورو چیف شاہد ریاض ) ایمان کا دعویٰ اور عمل کا تضاد، امیر عبدالقدیر اعوان کا اہم پیغام
تفصیل کے مطابق معروف روحانی رہنما امیر عبدالقدیر اعوان نے کہا کہ احکامات الٰہی اور رسالت نبوی ﷺ پر ایمان ہونے کے باوجود ہمارے اعمال دین اسلام کے مطابق نہیں ہیں، اور یہی عمل انکار کی ایک شکل ہے۔ انہوں نے کہا کہ مسلسل نافرمانی انسان کو کفر کی دلدل میں دھکیل دیتی ہے اور انسان اپنی غلطیوں کو جواز دینے لگتا ہے۔
امیر عبدالقدیر اعوان نے مزید کہا کہ ہم ایمان کا دعویٰ تو کرتے ہیں، مگر معاشرے میں انصاف، سکون اور لحاظ کی کمی واضح ہے۔ یہ سب اس لیے ہے کہ ہمارا معاشرہ فسق سے بھرا ہوا ہے، اور ہم صرف دعویٰ کرتے ہیں، عمل نہیں کرتے۔ یہ بھی انکار کی ایک قسم ہے، جسے کفر نہیں، بلکہ فسق کہا جا سکتا ہے۔
انہوں نے ایمان کی اہمیت پر زور دیتے ہوئے کہا کہ ایمان انسان کو اللہ کی رحمت سے جوڑتا ہے اور اس کے اعمال کو بہتر بناتا ہے۔ ایمان جتنا مضبوط ہوگا، عبادات میں اتنی ہی قبولیت ہوگی اور عبادات جتنی قبول ہوں گی، اتنے ہی ہمارے معاملات درست ہوں گے۔
