Author: ڈاکٹرغلام مصطفی بڈانی

میرپورخاص،باغی ٹی وی(نامہ نگارشاہزیب شاہ) ایس ایس پی شبیر احمد سیٹھار کا منشیات کے خلاف کریک ڈاؤن کے لیے ہنگامی اجلاس، سخت اقدامات کی ہدایت

تفصیل کے مطابق ایس ایس پی میرپورخاص شبیر احمد سیٹھار نے ایس ایس پی آفس میرپورخاص میں منشیات کے خلاف ہنگامی اجلاس منعقد کیا، جس میں ضلع بھر کے تمام SDPO’s/SHO’s، انچارج CIA، انچارج DIB اور ہیڈ آف برانچز نے شرکت کی۔

اجلاس میں ایس ایس پی میرپورخاص نے سخت احکامات دیتے ہوئے کہا کہ تمام ایس ڈی پی اوز اور ایس ایچ اوز اپنے علاقوں میں منشیات فروشوں کے خلاف فوری کارروائی کریں اور ایک ہفتے کے اندر ضلع کو منشیات سے پاک کریں۔ ایس ایس پی نے کہا کہ اس کارروائی کی نگرانی خود کریں گے اور کسی بھی منشیات فروش کے ساتھ کوئی رعایت نہیں برتی جائے گی۔

انہوں نے مزید کہا کہ اگر کوئی پولیس افسر یا اہلکار منشیات فروشوں کی سرپرستی کرتا پایا گیا تو اس کے خلاف سخت محکمانہ کارروائی کی جائے گی اور اسے B کمپنی بھیج دیا جائے گا۔ ایس ایس پی نے عوام سے بھی اپیل کی کہ اگر کسی کو منشیات کھانے سے کوئی نقصان یا بیماری ہو تو وہ اپنے متعلقہ تھانے پر مقدمہ درج کروا سکتے ہیں۔

سول سوسائٹی سے درخواست کرتے ہوئے ایس ایس پی نے کہا کہ پولیس کے ساتھ مل کر منشیات کے خلاف کارروائیاں کی جائیں، تاکہ میرپورخاص میں منشیات کا خاتمہ کیا جا سکے۔

مزید برآں، ایس ایس پی نے ضلع بھر میں ٹریفک مسائل پر بھی نوٹس لیا اور ایس ایچ اوز کو ہدایت کی کہ وہ ٹریفک کے مسائل کو حل کرنے کے لیے ٹریفک پولیس کے ساتھ تعاون کریں۔ انچارج کمانڈ اینڈ کنٹرول روم کو CCTV کیمروں کے ذریعے ٹریفک کی نگرانی کرنے اور فوری کارروائی کرنے کی ہدایت بھی دی گئی۔

میرپورخاص،باغی ٹی وی(نامہ نگار سید شاہزیب شاہ) عمرکوٹ روڈ پر جبری ٹول پلازہ کے خلاف جے یو آئی اور عوام کا دھرنا

عمرکوٹ روڈ پر انتظامیہ کی جانب سے جبری ٹول پلازہ قائم کرنے کے خلاف جمیعت علماء اسلام میرپورخاص اور علاقے کے عوام نے شدید احتجاج کرتے ہوئے دھرنا دیا۔

دھرنے میں جے یو آئی میرپورخاص کے نائب امیر مولانا محمد ابراہیم مہر نے خطاب کرتے ہوئے کہا کہ عمرکوٹ روڈ کی حالت خستہ ہے اور روڈ پر ہونے والے حادثات میں کئی قیمتی جانیں ضائع ہو چکی ہیں۔ ان کا کہنا تھا کہ سندھ حکومت کو اس سڑک کی تعمیر نو کرنی چاہیے تھی، لیکن عوام پر اضافی بوجھ ڈال کر ٹول پلازہ قائم کر دیا گیا۔ مولانا ابراہیم نے انتظامیہ کو متنبہ کرتے ہوئے کہا کہ یہ ٹول پلازہ عوام کے لیے جینے مرنے کا سوال ہے، اور اسے کسی صورت تسلیم نہیں کیا جائے گا۔

دیگر مقررین، جن میں وڈیرہ علی مہر، عبدالحمید بلوچ، مولانا عبدالہادی، جمیل شر، میر محمد منگریو، اور فقیر محمد علی مہر شامل تھے، نے خطاب کرتے ہوئے کہا کہ عوام اس ناجائز اقدام کے خلاف متحد ہیں۔ ان کا کہنا تھا کہ حکومت کو پہلے سڑک تعمیر کرنی چاہیے اور اس کے بعد ٹول پلازہ پر غور کرنا چاہیے۔ مقررین نے واضح کیا کہ ایف آئی آرز یا دیگر کارروائیاں انہیں ڈرا نہیں سکتیں۔

دھرنے کے شرکاء نے "نامنظور، ٹول پلازہ نامنظور” اور "نعرہ تکبیر، اللہ اکبر” کے فلک شگاف نعرے لگائے۔ دھرنے کے دوران عمرکوٹ روڈ دونوں اطراف سے بلاک ہو گیا، جس کی وجہ سے ٹریفک کا نظام متاثر ہوا۔ کسی ناخوشگوار واقعے سے نمٹنے کے لیے پولیس کی نفری بھی موقع پر موجود رہی۔

احتجاج کرنے والوں نے انتظامیہ اور سندھ حکومت سے مطالبہ کیا کہ وہ عوامی مفاد میں ٹول پلازہ قائم کرنے کا فیصلہ فوری طور پر واپس لے کر علاقے کے مسائل حل کریں۔

میرپور خاص ،باغی ٹی وی(نامہ نگار سید شاہزیب شاہ)منشیات فروشوں کے خلاف کریک ڈاؤن، 8 ملزمان گرفتار

ایس ایس پی میرپور خاص شبیر احمد سیٹھار کے سخت احکامات پر پولیس نے منشیات فروشوں کے خلاف بھرپور کریک ڈاؤن کرتے ہوئے 8 ملزمان کو گرفتار کر لیا۔ مختلف تھانوں کی کارروائیوں میں بڑی مقدار میں گٹکا، ماوہ اور دیسی شراب برآمد کی گئی۔

تھانہ ٹاؤن میں ڈی ایس پی سٹی عبدالغفور خاصخیلی کی قیادت میں ایس ایچ او کامران ہالیپوٹو نے گٹکا ماوہ مینوفیکچرنگ فیکٹری پر چھاپہ مارا۔ اس کارروائی میں 100 گٹکا ماوہ، 3 ٹپ تیار ماوہ، 3 ٹپ غیر تیار ماوہ، اور 1 بالٹی چھالیہ برآمد ہوئی، جبکہ ملزم شبیر قریشی کو گرفتار کیا گیا۔ ہیرآباد میں ایک اور کارروائی میں منشیات فروش شبیر شیخ کو گرفتار کر کے 6 پیکٹ سفینہ گٹکا برآمد کیا گیا۔ دونوں ملزمان پر الگ الگ مقدمات درج کیے گئے۔

تھانہ مہران کے ایس ایچ او سعید چنہ کی قیادت میں کارروائی میں راشد ملک کو گرفتار کیا گیا، جس کے قبضے سے 770 سفینہ ساشے، 100 رائل کنگ ساشے، اور 320 گٹکے برآمد ہوئے۔ کارروائی کے دوران دوسرا ملزم بابر ملک فرار ہو گیا۔

ٹنڈو جان محمد پولیس نے ایس ایچ او اسلم جمالی کی قیادت میں کارروائی کرتے ہوئے 1,100 سفینہ ساشے اور 250 گٹکے برآمد کیے۔ اس کارروائی میں دو ملزمان گرفتار ہوئے۔

پھلاڈیوں تھانے کے ایس ایچ او مجید گرگیج کی قیادت میں دیسی شراب فروش عناصر کے خلاف کارروائی میں سریش کمار کو گرفتار کیا گیا اور 20 لیٹر دیسی شراب برآمد ہوئی۔

تعلقہ پولیس اسٹیشن میں ایس ایچ او آفتاب رند نے کارروائی کرتے ہوئے 10 لیٹر تیار اور 230 لیٹر غیر تیار شدہ شراب برآمد کی۔ اس کارروائی میں لچھمن کولہی کو گرفتار کیا گیا۔

میرواہ تھانے کے ایس ایچ او جنید قمر میمن نے جھڑی جوگی میں کارروائی کرتے ہوئے 10 لیٹر دیسی شراب برآمد کی اور ملزم والجہی کولہی کو گرفتار کیا۔

تمام گرفتار ملزمان کے خلاف مختلف دفعات کے تحت مقدمات درج کر لیے گئے ہیں اور مزید تفتیش جاری ہے۔ عوامی حلقوں نے پولیس کی ان کامیاب کارروائیوں کو سراہا ہے۔ ایس ایس پی میرپور خاص نے عوام کو یقین دلایا ہے کہ منشیات فروش عناصر کے خلاف کارروائیاں بغیر کسی دباؤ کے جاری رہیں گی۔