Author: ڈاکٹرغلام مصطفی بڈانی

پشاور(باغی ٹی وی رپورٹ)امن وامان صورتحال بہتر بنانے کیلئے خیبرپختونخوا وفد ضلع کرم روانہ ہو گیا ہے۔

وزیر اعلیٰ خیبر پختون خوا سردار علی آمین گنڈا پور کی ہدایت پر امن وامان صورتحال بہتر بنانے کیلئے خیبرپختونخوا وفد ضلع کرم روانہ ہو گیا ہے، وفد کی سربراہی صوبائی وزیر قانون آفتاب عالم ایڈوکیٹ کر رہے ہیں، دیگر اراکین میں چیف سیکرٹری خیبر پختون خوا ندیم اسلم چوہدری، کمشنر کوہاٹ، ڈی آئی جی کوہاٹ اور ڈی پی او سمیت دیگر اعلی افسران شامل ہیں۔

روانہ ہونے والا وفد ضلع کرم کے حالات کا مکمل طور پر جائزہ لے گا اور امن وامان صورتحال بحال کرنے کے لیے جرگے کو دوبارہ فعال کرے گا، اس کے علاوہ دورے کے بعد وفد ضلع کرم کے امن وامان کے حوالے سے اپنی رپورٹ وزیراعلٰی خیبر پختون خوا کو پیش کرے گا۔

صوبائی وزیر قانون آفتاب عالم کا اس موقع پر کہنا تھا کہ خیبرپختونخوا حکومت، پولیس اور دیگر ادارے مل کر امن و امان کی صورتحال کو بہتر بنانے کے لیے سنجیدہ کوششیں کر رہے ہیں۔ ان کا کہنا تھا کہ امن و امان کی بحالی کے لیے سنجیدہ اقدامات اٹھائیں گے اور اپنا بھر پور کردار ادا کریں گے۔

لنڈی کوتل(باغی ٹی وی رپورٹ) مشران کی پریس کانفرنس، خاندانی جائیداد پر کام شروع کرنے کا اعلان

لنڈی کوتل پریس کلب میں سمین خان سدوخیل، آشنا گل آفریدی، خان اکبر، زرپور اور طارق شاہ نے پریس کانفرنس کے دوران بتایا کہ انہوں نے اپنی پدری جائیداد پر کام شروع کر دیا ہے جو پرانا سدوخیل پاٹک کے قریب واقع ہے۔ انہوں نے کہا کہ مخالف فریق اسلام سدوخیل اور خیال مت آفریدی غیر قانونی طور پر ان کے کام میں رکاوٹ ڈالتے ہیں اور زمین پر ناجائز دعویٰ کرتے ہیں۔

مشران نے مزید کہا کہ مخالف فریق نے پہلے دفعہ 107 اور پھر دفعہ 145 کے تحت ان کے خلاف کارروائی کی تھی، جس پر انہوں نے قانونی طور پر ضمانت حاصل کی اور عدالت سے دفعہ 145 کو ختم کروا لیا۔ سول جج کے فیصلے کے مطابق اگر کوئی بھی فریق اس زمین پر دعویٰ کرے گا تو اسے سول کورٹ میں درخواست دینی ہوگی۔

انہوں نے بتایا کہ مخالف فریق نے عدالت سے رجوع کیے بغیر غیر قانونی طریقے سے رات کے اندھیرے میں ان کا تعمیراتی سامان اٹھا لیا، جسے انہوں نے ظلم قرار دیا۔ مشران نے لنڈی کوتل ایس ایچ او اور انتظامیہ کو نوٹس دیتے ہوئے کہا کہ اگر اس معاملے میں کوئی ناخوشگوار واقعہ پیش آیا تو اس کی ذمہ داری مخالف فریق پر عائد ہوگی۔

انہوں نے آئی جی پی، سی سی پی او اور ڈی پی او خیبر سے فوری کارروائی کا مطالبہ کرتے ہوئے کہا کہ چونکہ ہم نے تمام قانونی تقاضے پورے کیے ہیں، لہذا مخالف فریق سے ہمارا تعمیراتی سامان واپس کیا جائے تاکہ ہم اپنے کام کو دوبارہ شروع کر سکیں۔