Author: ڈاکٹرغلام مصطفی بڈانی

ننکانہ صاحب، باغی ٹی وی( نامہ نگار احسان اللہ ایاز)پاکستان فیڈرل یونین آف جرنلسٹس کی کال پر سابق صدر سکھر پریس کلب جان محمد مہر کے قاتلوں کی عدم گرفتاری کے خلاف ننکانہ صاحب پریس کلب کے باہر صحافی ، وکلاء اور سول سوسائٹی نے شدید احتجاج کیا

تفصیلات کے مطابق پاکستان فیڈرل یونین آف جرنلسٹس کی کال پر سابق صدر سکھر پریس کلب جان محمد مہر کے قاتلوں کی عدم گرفتاری کے خلاف ننکانہ صاحب پریس کلب کے باہر صحافی وکلاء اور سول سوسائٹی نے شدید احتجاج کیا۔

اس موقع پرصدر ننکانہ صاحب پریس کلب آصف اقبال شیخ ، صدر پنجاب پی یو جے ننکانہ صاحب سمیع اللہ عثمانی ، صدر الیکٹرانک میڈیا رپورٹرز ایسوسی ایشن عابد حمید رحمانی ، چئیرمین ننکانہ صاحب پریس کلب شاہنواز قادری ، امیر جماعت اہلسنت و مزہبی رہنما علامہ اسد مدنی، پاکستان مرکزی مسلم لیگ سٹی ننکانہ کے عمار ساجد اور سنئیر صحافیوں جی کیو علوی، میاں وحید قیصر ، وکلاء رہنماؤں راؤ مدبر اعظم، عبداللہ رفیق ،چوہدری مبشر منیر ایڈوکیٹ و دیگر نے خطاب کیا مقررین نے حکومت سندھ سے جان محمد مہر کے قاتلوں کو جلد از جلد گرفتار کرنے کا مطالبہ کیا

اس موقع پر صحافیوں نے پریس کلب ننکانہ صاحب پر سیاہ پرچم بھی لہرایا اور احتجاجی ریلی بھی نکالی

گو جرہ،باغی ٹی وی (نامہ نگار عبدالرحمان جٹ سے) گوجرہ ہائی ایس اور رکشہ میں حادثہ کے نتیجہ میں دس طلباوطالبات شدید زخمی ہو گئے۔زخمیوں کو تحصیل ہیڈ کوارٹر ہسپتال منتقل کر دیا گیا ہائی ایس ڈرائیور فرارہو نے میں کامیاب ہو گیا۔

تفصیل کے مطابق موٹر سائیکل رکشہ نمبر1642سی ٹی یواور ہائی ایس کے ڈرائیور دواکھڑی سکول سے چھٹی کے وقت بچوں کو لے کر چک نمبر414ج ب جا رہے تھے گاؤں کے قریب کراسنگ کے دوران تیز رفتاری کے باعث ان کی آپس میں ٹکر ہو گئی جس کے نتیجہ میں رکشہ پر سواردس طلباو طالبات زخمی ہو ئے جنہیں فوری طور پر ٹی ایچ کیو گوجرہ منتقل کیاگیاجہاں پرزخمیوں کو طبی امدادفراہم کی گئی جبکہ معمولی زخمیوں کو ابتدائی طبی امدادکی فراہمی کے بعد فارغ کر دیا گیاہے۔

شدیدزخمی لاریب،دعا زہرہ دختر تسلیم اور دعا زہرہ دختر سہیل عباس کوطبی امدادکی فراہمی جاری ہے۔ہائی ایس میں سوار تمام بچے اور بچیاں محفوظ رہے ہائی ایس ڈرائیور موقع سے فرارہو نے میں کامیاب ہو گیا۔اطلاع ملنے پر ڈی ایس پی گوجرہ آفتاب صدیقی پولیس نفری سے موقع پر پہنچے اور ہائی ایس ورکشہ تحویل میں لے کر تھانہ منتقل کرکے ڈرائیور کی تلاش شروع کر دی ہے۔

اوکاڑہ ،باغی ٹی وی( نامہ نگار ملک ظفر)سیکریٹری ایمرجنسی سروسز ڈاکٹر رضوان نصیر (ستارہ امتیاز) کی ہدایت پر ڈسٹرکٹ ایمرجنسی آفیسرانجینئر احتشام کی زیر نگرانی پنجاب ایمرجنسی سروس کے زیر اہتمام روڈ ٹریفک حادثات کے متاثرین کی یاد کا عالمی دن منایا گیا۔

اس دن کی مناسبت کے حوالہ سے عوام الناس میں حادثات سے بچاؤ کے بارے آگاہی فراہم کرنے کے لیے ریسکیو 1122 کے زیر اہتمام آگاہی سیمنار کا اہتمام کیا گیا اور آگاہی واکس کا انعقاد کیا گیا۔جسمیں ریسکیو افسران، نیشنل اینڈ ہائی ویز کے افسران،طلباء و طالبات، ریسکیو رضاکاروں، ریسکیورز اور سول سوسائٹی کے افراد شرکت کی۔ آگاہی سیمینارز اور واکس کا اہتمام کمیونٹی ریسکیو اسٹیشنوں کے ساتھ ساتھ ضلع بھر میں مختلف سکول، کالجز، ہسپتال اور ویلفیئر سوسائٹی میں کیا گیا۔

اس موقع ڈسٹرکٹ ایمرجنسی آفیسر انجینئر احتشام نے اپنے پیغام میں کہا کہ روڈ ٹریفک کے حادثات میں متاثرین کی یاد کا دن منانے کا مقصد عوام الناس میں حادثات سے بچاؤ کے بارے آگاہی دینا ہے اور حادثات میں متاثرین کو درپیش مسائل کو حل کرنا ہے روڈ ٹریفک حادثات سے بچاؤ کے لیے دوران سفر موٹر سائیکل پر ہیلمٹ، بیک ویو مرر اور لائیٹس کا استعمال کریں اور گاڑیوں پر سفر کے دوران سیٹ بیلٹ کا استعمال کرتے ہوئے تیز رفتاری سے گریز کیا جائے۔

ڈیرہ غازیخان ،باغی ٹی وی (نیوز رپورٹر شاہد خان )ڈسٹرکٹ ایمرجنسی بورڈ ڈیرہ غازیخان کا اجلاس ڈپٹی کمشنر مہر شاہد زمان لک کی زیرصدارت منعقد ہوا۔اجلاس میں ٹریکٹر ٹرالیوں سےہونیوالےحادثات اور کیمونٹی سیفٹی بارے اہم فیصلے کئے گئے۔اجلاس میں ضلعی ایمرجنسی آفیسر انجنیئر احمد کمال نے حادثات روک تھام بارے بریفنگ دی۔

ڈپٹی کمشنر مہر شاہد زمان لک نے کہا کہ دور حاضر میں حادثات کا بڑھنا لمحہ فکریہ ہے،حکومت پنجاب نے شہریوں کوحادثات سے بچانے کیلئے جدید سیفٹی میئرز متعارف کروائے ہیں،ضلع میں سیفٹی قوانین پر عملدرآمد کو یقینی بنانا ہماری ترجیح ہے،کسی بھی ایمرجنسی میں ریسکیو1122کیساتھ رابطے میں رہنا ضروری ہے،

ڈی سی ڈیرہ غازی خان نے کہا ریفلیکٹرز اور حفاظتی اقدامات کے بغیر کسی ٹریکٹر ٹرالی کو سڑک پر نہ آنے دیاجائے،شہریوں اور تمام سٹیک ہولڈرز میں حادثات بچاؤ بارے آگاہی دی جائے،

ڈسٹرکٹ ایمرجنسی آفیسر انجینئر احمد کمال نے بریفنگ دیتے ہوئے بتایا کہ ضلع میں484ٹریکٹر ٹرالی حادثات سے580افراد متاثر ہوئے،327کو موقع پر طبی امداد دی گئی ہے۔

سیالکوٹ ،باغی ٹی وی( سٹی رپورٹر شاہد ریاض) پسرور،تھانہ سبزپیر میں ڈی پی او سیالکوٹ حسن اقبال کی کھلی کچہری-
ڈی پی او سیالکوٹ محمدحسن اقبال کی جانب سے تھانہ سبزپیر میں لگائی گئی کھلی کچہری میں سائلین کی جانب سے شکایات کے انبار. زیادہ تر سائلین کی شکایات پولیس کے عدم تعاون کی تھیں، درخواستوں پر کارروائی نہ ہونے اور FIR کے اندراج کے بعد ملزمان کی عدم گرفتاری بارے کی گئیں.

علاقہ میں ہونیوالی بڑی ڈکیتیوں کے متاثرین بھی ڈاکووُں کی گرفتاری نہ ہونے پر شکایات لیکر پیش ہوئے جس پر پولیس کو کارروائیوں میں تیزی لانے کی ہدایت کی گئی.

ڈی پی او نے تمام سائلین کی شکایات توجہ سے سنیں اور کارروائی کے قابل درخواستوں کے بارے فوری احکامات جاری کئے اور ایس ایچ او سمیت دیگر پولیس اہلکاروں کو سائلین کے ساتھ دوستانہ رویہ اختیار کرنے کی ہدایت کی.

کندھ کوٹ ،باغی ٹی وی (نامہ نگارمختیاراعوان )کشمور میں فاروقی پیٹرول پمپ کے قریب روڈ حادثے میں 22 سالہ لڑکی جاں بحق ہوگئی،

کشمور پرائیویٹ سکول کے ٹیچر صبح سکول جا رہی تھی کہ سڑک عبور کرتے ہوئے تیز رفتار ٹرک کے نیچے آکر کچلی گئی ،جسے ورثاء زخمی حالت میں کشمور تعلقہ اسپتال لیکر آئے،جہاں پر ڈاکٹروں نے کہا کہ لڑکی دم توڑچکی ہے ،جب کہ ٹرک ڈرائیور موقع سے فرار ہوگیا،

کشمور پولیس نے ٹرک کو اپنی تحویل میں لے لیا،جب لڑ کی کی لاش اس کےگھر پہنچی پر گھر میں کہرام مچ گیا ،آخری اطلاعات تک واقعہ کا مقدمہ درج نہ ہو سکا تھا اور نہ ہی کوئی گرفتاری عمل میں لائی گئی ہے.

اوچ شریف،باغی ٹی وی (نامہ نگارحبیب خان )تھانہ اوچ شریف میں ٹاؤٹ مافیا کاراج، تاش پر جواء کھیلنے والے اور منشیات فروش بے لگام
تفصیلات کے مطابق اوچ شریف تھانہ کی حدود میں پولیس کی مبینہ ملی بھگت سے تاش کے پتوں پر لاکھوں روپے کا سرعام جوا جاری ہے کیونکہ پولیس افسران مبینہ طور پر اپنا حصہ وصول کرکے خود منشیات فروشوں اور جواریوں کی پشت پناہی کررہے ہیں۔

اوچ شریف شہر کے مختلف محلوں شمیم آباد، اکبر ٹاؤن ،اوچموغلہ ،للو والی پل، شمس کالونی، بلوچاں محلہ میں جوابلاروک ٹوک جاری ہے ،دوسری طرف ذرائع کا کہنا ہے کہ ان جوا کے اڈوں پر جسم فروشی کا مکروہ دھندہ بھی جاری ہے جہاں جرائم پیشہ افراد رات بھر شراب و شباب کی محفلیں سجاتے ہیں

اس کے علاوہ ذرائع کا بتانا ہے کہ باقاعدہ منتھلی کے عوض پابندی کے باوجود سرعام گٹکا، مین پڑی اور مختلف قسم کی منشیات کی فروخت بھی دھڑلے سے جاری ہے جس کے سبب نوجوان اور کم عمر بچے نشے کی بری لت میں مبتلا ہو رہے ہیں۔

اکثر جگہوں پر چرس افیون سمیت نشے کی مختلف اقسام کی فروخت پولیس کی آشیرباد سے جاری ہے۔ تاش کے پتوں اور دیگر جوئے کے سبب شہر میں جرائم پیشہ افراد، نشے کی حالت میں راتوں کو دیر تک سڑکوں پر گھومتے نظر آتے ہیں جبکہ شریف شہریوں کا گھروں سے نکلنا محال ہوگیا ہے۔

شہریوں جاوید اقبال،سمیع اللہ، ولید، فرحان، مبین، اسد اللہ، اکرام،اختر،عارف،شبیر ودیگر نے آر پی او بہاولپور اور ڈی پی او بہاولپور سے فوری نوٹس لے کر کرپٹ عناصرکی سرپرستی میں چلنے والے ان اڈوں کو بند کروانے اور اس مکروہ دھندہ میں پولیس کی وردی میں چھپے جرائم پیشہ عناصر کے خلاف کارروائی کرنے کا مطالبہ کیا ہے