Author: ڈاکٹرغلام مصطفی بڈانی

ڈیرہ اسماعیل خان،باغی ٹی وی (نامہ نگاراحمدنوازمغل)گرینڈ ٹیچرز الائنس کے زیراہتمام صدر جی ٹی اے محمدفاروق کی قیادت میں گورنمنٹ ہائر سیکنڈری 4 سے ریلی نکالی گئی جو کہ ڈیرہ پریس کلب پر اختتام پذیر ہوئی ،

ریلی میں اساتذہ کرام نے ہاتھوں میں بینرز اٹھا رکھے تھے جن پر مطالبات کے حق میں نعرے درج تھے، اس موقع پر خطاب کرتے ہوئے جی ٹی اے کے صدر محمد فاروق سمیت دیگر مقررین نے کہا کہ ہماری اپگریڈیشن بارے حکومت مسلسل ٹال مٹول سے کام لے رہی ہے،حکومت اساتذہ کے اپگریڈیشن کا نوٹیفیکیشن جاری کرے ،

ظالمانہ پنشن اصلاحات ختم کی جائیں، اہڈہاک اساتذہ کو ریگولر کیا جائے، جبری پروموشن کو ختم کیا جائے، انہوں نے کہاکہ اگر ہمارے مطالبات پورے نہ ہوئے تو ہمارے احتجاج کا سلسلہ جاری رہے گا۔

ڈیرہ اسماعیل خان،باغی ٹی وی (نامہ نگاراحمدنوازمغل)پاکستان تحریک انصاف پارلیمنٹرین کے مرکزی چیئرمین و سابق وزیر اعلیٰ خیبر پختون خوا پرویز خٹک نے کہا ہے کہ لٹیروں کو اقتدار دیتے رہے تو پسماندگی ، غربت اور مشکلات رہیں گی۔ہم امن ترقی اور خوشحالی چاہتے ہیں۔ سارے مداری دیکھ چکے ہیں۔عوام کی حالت نہیں بدلی اور چند لوگ خوش حال ہو گئے۔آئندہ الیکشن میں عوام کارکردگی و کردار کو مد نظر رکھ کر ووٹ کا استعمال کر یں،بد دیانت لیڈر ملک کو ترقی نہیں دے سکتا، ڈیرہ، ٹانک اور وزیرستان کے ابتر حالات دیکھ کر شرم آتی ہے،35 برس حکمرانی کرنے والے دوبارہ اقتدار میں آئے تو لوٹ مار ہی کریں گے۔تبدیلی کے نعرے پر صرف ہم نے عمل کیا۔ایسے لوگوں کی بد شکل عوام کو دکھا رہے ہیں،عوام ان سے انتقام لیں۔ان خیالات کا اظہار انہوں نے پا کستان تحریک انصاف پارلیمنٹرین کے زیر اہتمام حق نواز پارک ڈیرہ میں گزشتہ شب ایک بڑے جلسہ عام سے خطاب کرتے ہوئے کیا ،

ا س موقع پر سابق وزیراعلیٰ خیبرپختونخواہ محمود خان ، سابق وفاقی پارلیمانی سیکرٹری محمد یعقوب شیخ ، سابق ایم پی اے سردار آغاز خان گنڈہ پور، سابق ایم پی اے احتشام جاوید اکبر ، سابق امیدوار صوبائی اسمبلی سٹی ون ملک قیوم نواز حسام ، سابق امیدوار صوبائی اسمبلی پروآ خالد سلیم استرانہ ، عرفان خان کامرانی ، سجیل برکی ، محمد رمضان شوری ودیگر قائدین موجود تھے ،

پاکستان تحریک انصاف پارلیمنٹرین کے مرکزی چیئرمین پرویز خٹک نے کہا کہ پاکستان میں سب کچھ ہے مگر قرض کی واپسی کا وقت آیا تو ملک بدحال ہو گیا۔اجارہ داروں سے نجات پانے کا وقت آ چکا ہے۔سی پیک مغربی روٹ ہماری جدوجہد کا نتیجہ ہے۔ پی ٹی آئی نے ساڑھے تین سال میں نہ کرپشن ختم کر سکی نہ نظام درست کیا۔

خیبر پختونخوا حکومت کی کارکردگی عمران خان کی نہیں ہماری کارکردگی تھی، وہ جھوٹ بول رہا ہے، سولہ ماہ چوروں کی حکومت رہی، مہنگائی کا طوفان آ گیا۔خدا کا واسطہ ہے ہمیں ووٹ مت دو لیکن چوروں سے بچیں، اقتدار میں آئے تو چشمہ رائٹ بینک لفٹ کینال بنائیں گے۔

ڈیرہ کی ترقی ہماری مرہون منت ہے۔ہم نے اربوں روپے مہیا کیے۔انہوں نے کہا کہ مولانا فضل الرحمان اپنے عوام کا اعتماد تو حاصل کریں، سیلاب زدگان کو مالی امداد دلوائیں گے، ٹانک زام ڈیم بنائیں گے، وائس چیئرمین وسابق وزیر اعلیٰ محمود خان نے کہا کہ مولانا فضل الرحمان پر ڈیرہ کے عوام کا اعتماد نہیں ہم نے پسماندہ علاقوں کی ترقی کے لیے اقدامات کیے، ٹانک کے لیے 75 کروڑ روپے آب نوشی منصوبے کے لیے دیے۔ٹانک زام ڈیم پر کام پی ڈی ایم حکومت نے روک دیا،عوام نے الیکشن میں ہم پر اعتماد کیا تو گل امام و پنیالہ کو تحصیل بنائیں گے۔سی آر بی سی لفٹ کینال تعمیر کریں گے۔موٹر وے بنائیں گے۔رابطہ سڑکیں بنائیں گے۔ایجوکیشن و فوڈ کارڈز جاری کریں گے۔

ایمل ولی خان کہتے ہیں کہ پی ڈی ایم والے چور ہیں۔آئندہ حکومت پی ٹی آئی پی کی ہو گی، سابق ایم پی اے احتشام جاوید اکبر نے کہا کہ سیاست کو پرویز خٹک کی ضرورت ہے۔ان کی کارکردگی نے عمران خان کو وزیر اعظم بنایا، یہ ہمارے محسن اور اچھائی کے مالک ہیں، پرویز خٹک ہی وفاق سے ہمارے حقوق کی جنگ لڑ سکتے ہیں۔ سابق رکن خیبر پختونخوا اسمبلی سردار آغاز خان گنڈاپور نے کہا کہ آئندہ الیکشن میں جھاڑو پھیر دیں گے۔ہماری حکومت ترقی و خوش حالی کے لیے اقدامات کرے گی۔

امیدوار برائے صوبائی اسمبلی سٹی ون ملک قیوم نواز حسام نے کہا کہ ماضی میں عوامی انتخاب کا احترام کرنے کے بجائے نتائج تبدیل کیے گئے،ہمیں امید ہے کہ ڈیرہ کے مسائل پرویز خٹک حل کریں گے۔عوام ہمارے ساتھ ہیں۔مہنگائی بھی کم کی جائے گی، سابق امیدوار صوبائی اسمبلی حلقہ پروآ خالد سلیم خان آسترانہ نے پروآ کے لوگوں کی جلسے میں شرکت پر شکریہ ادا کیا

ٹانک سے رمضان شوری نے کہا کہ ڈیرہ و ٹانک کو ماضی میں ترقی سے محروم رکھا گیا ہے۔پینے کا صاف پانی و بجلی دستیاب نہیں، ٹانک ذام ڈیم بنایا جائے،صحت و مواصلات اور آب نوشی کی سہولیات فراہم کی جائیں،

سابق وفاقی پارلیمانی سیکرٹری محمد شیخ یعقوب نے تلاوت کلام کے بعد مہمانوں سمیت عوام کو خوش آمدید کہتے ہوئے ان کا شکریہ ادا کیا۔انہوں نے کہا کہ پسماندہ علاقے سے تحریک کی ابتدا خوش آئند اقدام ہے۔امید ہے پرویز خٹک اقتدار میں آکر ڈیرہ کو میگاپراجیکٹ دیں گے۔اگر حکومت ختم نہ ہوتی تو چشمہ رائٹ بینک کینال کے لیے دس کروڑ روپے مختص کیے گئے تھے،

جلسہ میں عابد پرویز نے نقابت کے فرائض سرانجام دیے۔ قبل ازیں ملک قیوم نواز حسام کی قیادت میں ان کی رہائشگاہ حسام ہاؤس ظفر آباد کالونی سے موٹرکاروں ، موٹرسائیکلوں کی ایک بڑی ریلی نکالی گئی ، اس موقع پر شرکاء نے پرویز خٹک ، محمود خان ، یعقوب شیخ اور ملک قیوم نواز حسام کے حق میں زبردست نعرہ بازی کی ، جلوس کے شرکاء پر مختلف راستوں پر لوگوں نے گل پاشی بھی کی ،یہ ریلی مختلف راستوں سے ہوتی ہوئی حق نواز پارک میں منعقدہ جلسہ پر پہنچ کر اختتام پذیرہوئی ۔

ننکانہ صاحب باغی ٹی وی (نامہ نگار احسان اللہ ایاز)ننکانہ : ڈی ایچ کیو ہسپتال،منیجمنٹ کی غفلت و لاپرواہی، خواتین مریض پریشان
ننکانہ صاحب میں ڈسٹرکٹ ہیڈ کوارٹرز ہسپتال میں مریضوں کو دی جانے والی سہولیات کا شدید فقدان ،لیبر روم کے باہر علاج ومعالج کے لیے آنے والےمریضوں اور ان کے لواحقین کو شدید مشکلات کا سامنا، وزیر اعلی پنجاب ,صوبائی وزیر صحت پنجاب ,سیکرٹری ہیلتھ اور ڈپٹی کمشنر سے فوری اصلاح احوال کا مطالبہ

تفصیلات کے مطابق ڈسٹرکٹ ہیڈ کوارٹر ہسپتال ننکانہ صاحب میں ایڈمنسڑیشن کی مبینہ غفلت اور لاپرواہی کے باعث مریضوں اور ان کے لواحقین کو دی جانے والی سہولیات کا بھی شدید فقدان پیدا ہو گیا ہے,ڈی ایچ کیوہسپتال ننکانہ صاحب کے لیبر روم کے باہر مریضوں اور ان کے لواحقین کے بیٹھنے کے لیے سہولت نہ ہونے کی وجہ سے شدید مشکلات کا سامنا کرنا پڑتا ہے ,لیبر روم کے باہر صرف اور صرف تین بینچ ہیں جن پرصرف نو افراد کے بیٹھنے کی گنجائش ہے جب کہ باقی چیک اپ کے لیے آنے والی مریض خواتین اور ان کے لواحقین کے لیےکوئی بیٹھنے کی سہولت نہیں ہے,

ذرائع کا کہنا ہے کہ ڈی ایچ کیو ہسپتال کی ایڈمنسٹریشن کی ناقص حکمت عملی کے باعث یہ مشکلات پیش آ رہی ہیں,لیبر روم کے دروازہ کے باہر لیب سیمپلنگ کے لیےبناۓ گئے ڈیسک کو ختم کر کے ایک بہترین سہولت مریضوں اور ان کے لواحقین کو دی جاسکتی ہے اور مزید بینچ لگاۓ جاسکتے ہیں اور لیبر روم کے سامنے سے رش بھی ختم کیا جا سکتا ہے اور مریضوں کو سٹریچر اور ویل چیئرز پر اپریشن ٹھیٹر جانے میں بھی آسانی ہو جاۓ گی اور لیبر روم میں تعینات ڈاکٹرز اور میڈیکل عملہ کو بھی آنے جانے میں آسانی میسر ہو گی جبکہ مریضوں کے ساتھ آنے والے مرد لواحقین کا جو رش لیبر روم کے دروازے کے سامنے بنا رہتا ہے وہ بھی ختم ہو جاۓ گا,

لیبر روم کے دروازے کے باہر لیب سیمپلنگ کی وجہ سے بھی شدید رش رہتا ہے ،شہریوں کاکہنا ہے کاس ڈیسک کو جنرل وارڈ کے باہر لیب کے قریب شفٹ کر دیا جانا چاہیے ,

ذرائع کا کہنا ہے کہ اگر ایڈمنسٹریشن کام کرنا شروع کر دے تو ڈی ایچ کیو ہسپتال کو پنجاب بھر کا ایک بہترین ہسپتال بنایا جا سکتا ہے,وزیر اعلی پنجاب محسن نقوی اور سیکرٹری ہیلتھ پنجاب اور ڈپٹی کمشنر ننکانہ صاحب کو اس بات کا نوٹس لینا چاہئے اور جلد از جلد اس درینہ مسئلہ کو حل ہونا چاہئے

میرپورخاص ،باغی ٹی وی (نامہ نگار شاہزیب شاہ)کمشنر میرپورخاص فیصل احمد عقیلی کا ڈپٹی کمشنر ڈاکٹر رشید مسعود خان کے ہمراہ پرانے سول ہسپتال اور ڈسٹرکٹ ہیڈ کوارٹر ہسپتال کا اچانک دورہ ، دورے کے دوران ڈائریکٹر صحت ڈاکٹر عبدالشکور جروار ، ڈسٹرکٹ ہیلتھ آفیسر میرپورخاص ڈاکٹر جیرام داس ، ایم ایس سول ہسپتال ڈاکٹر ہیمجی چوہان ان کے ہمراہ تھے

.اس موقع پر کمشنر میرپورخاص فیصل احمد عقیلی نے پرانے سول ہسپتال میں بچوں کے غذائی وارڈ ، بچوں کے نرسری وارڈ ، ڈائیلاسز وارڈ ، گائنی وارڈ اور ایمرجنسی وارڈ کا دورہ کیا. جبکہ ڈسٹرکٹ ہیڈ کوارٹر ہسپتال میں امراض قلب وارڈ، سرجری وارڈ، ایمرجنسی وارڈ اور دیگر شعبہ جات کا تفصیلی معائنہ کیا .

اس موقع پرکمشنر نے کہا کہ دورے کا مقصد عام لوگوں کو صحت کی بنیادی سہولیات فراہم کرنا ہے انہوں نے سول سرجن کو ہدایت کی کہ ہسپتال میں صحت کی فراہمی کے ساتھ ساتھ صفائی ستھرائی کی صورتحال کو بھی یقینی بنایا جائے .

میڈیا سے گفتگو کرتے ہوئے کمشنر فیصل احمد عقیلی نے کہا کہ صحت کے شعبے میں مزید بہتری کی ضرورت ہے اس ضمن میں محکمہء صحت کے افسران کو مکمل رپورٹ دینے کی ہدایت کی ہے . انہوں نے نے یقین دلایا کہ صحت شعبے کے جو بھی مسائل ہیں وہ میڈیا کی نشاندہی سے مل کر حل کیے جائیں گے .

ایک سوال کے جواب میں انہوں نے کہا کہ ڈسٹرکٹ ہیڈکوارٹر ہسپتال میں نصب سولر سسٹم کو فعال بنانے کے لیے سیکرٹری انرجی سے بات کی جائے گی اور کہا کہ میرپورخاص کے شہریوں کو صحت کی بنیادی سہولیات فراہم کرنا اولین ترجیح ہے