Author: ڈاکٹرغلام مصطفی بڈانی

سیالکوٹ،باغی ٹی وی (سٹی رپورٹر شاہد ریاض)پولیس رسول اکرم ﷺ کے اسوہ حسنہ خیر النّاس من یّنفع النّاس پر عمل پیراہے، 15 کالز پر ضرورت مند فیملیز کی مدد کا سلسلہ جاری
حاجی پورہ بن کی رہائشی خاتون نے 15 پر کال کر کے بتایا کہ اس کا خاوند فالج کا مریض ہے گھر میں کھانے کو کچھ نہیں ، بچی بھوکی ہے. ڈی پی او سیالکوٹ محمد حسن اقبال کے نوٹس لینے پر ایس ایچ او حاجی پورہ مہینے بھر کا راشن لے کر خاتون کے گھر پہنچ گئے.

ایس ایچ او نے خاتون کے شوہر کو علاج میں مدد کی یقین دہانی کرائی. ضرورت مند فیملی نے پولیس کا شکریہ ادا کیا اور خوب دعائیں دیں.

آئی جی پنجاب ڈاکٹر عثمان انور نےصوبہ بھر کے پولیس افسران کو اپنے ارد گرد مجبور اور ضرورت مند لوگوں کا خیال رکھنے اور ان مدد کرنے کی ہدایت کی ہے جبکہ مشکل حالات میں ضرورت مند لوگوں کی مدد جیسے مستحسن اقدام پر پولیس کو شہریوں کے طرف سے خوب پذیرائی مل رہی ہے.

میرپورخاص،باغی ٹی وی( نامہ نگار سید شاہزیب شاہ کی رپورٹ ) ریجنل ڈائریکٹر محتسب اعلیٰ میرپورخاص ذوالفقار علی جونیجو اور ان کی ٹیم نے کوٹ غلام محمد میں تعلقہ ہسپتال کوٹ غلام محمد کے ڈائیلاسز سنٹر کا دورہ کیا جس میں 32 لاکھ کی لاگت کی مشین نصب کی گئی اور 10 لاکھ کے فلٹر پلانٹ کا معائنہ کیا۔

تعلقہ ہسپتال کوٹ غلام محمد میں ڈاکٹروں کی کمی کو دور کرنے اور اسے بہتر بنانے کے حوالے سے بھی غور و خوض کیا گیا اس موقع پر ریجنل ڈائریکٹر محتسب اعلی ذوالفقار علی جونیجو نے کہا کہ صوبائی محتسب اعلی کی ہر ممکن کوشش ہے کہ غریب عوام کو زیادہ سے زیادہ صحت اور پینے کے پانی کی سہولیات میسر کی جائیں .

دورے کے دوران ریجنل محتسب اعلی میرپورخاص کے سجاد احمد سومرو، پبلک ہیلتھ کے عبدالکلیم، ، صحافی علی غلام کھوسو، معشوق خاصخیلی، حمید کھوسو، اکبر راجپوت، شاہد آرائیں، حاجی عبدالرشید سانبھری اور دیگر موجود تھے۔

میرپورخاص،باغی ٹی وی (نامہ نگار سید شاہزیب شاہ کی رپورٹ )سول ڈیفنس میرپورخاص کا ایک اہم اجلاس زیرصدارت عبدالرؤف غوری چیف وارڈن و میئر میونسپل کارپوریشن منعقد ہوا۔اجلاس میں ڈپٹی کنٹرولر سول ڈیفنس محمد فھیم میمن۔ایڈشنل چیف وارڈن پروفیسر عبدالحمید شیخ۔ڈپٹی چیف وارڈن خلیل اللہ خان۔ڈپٹی ڈویژنل وارڈن نذیر احمد شیخ انسٹرکٹر عبدالوحید جیلانی۔ڈپٹی گروپ وارڈن محمد برہان سیکٹر وارڈن عارف نے شرکت کی

اجلاس میں میرپورخاص میں سول ڈیفنس کو فعال کرنے رضاکاروں کے لئے اعزازیہ مقرر کرنے اوریونیفارم مہیا کرنے سے متعلق اہم فیصلے کئے گئے ، چیف وارڈن و میئر عبدالرؤف غوری نے سول ڈیفنس کو فعال کرنے کے لئے اعلیٰ حکام سے بات کرنے اور رضاکاروں کو سہولتیں پہنچانے شہریوں کو عملی تربیت فراہم کرنے کی یقین دہانی کرائی گئی

آخر میں ڈپٹی کمشنر و کنٹرولر کی جانب سے جاری کردہ پرموشن آرڈر پروفیسر عبدالحمید شیخ اور خلیل اللہ خان میں تقسیم کئے۔جسکے تحت ڈپٹی چیف وارڈن سول ڈیفنس پروفیسر عبدالحمید شیخ کو ترقی دیکر ایڈشنل چیف وارڈن اور ڈویژنل وارڈن خلیل اللہ خان کو ڈپٹی چیف وارڈن کے عہدہ پر ترقی دی گئی ہے

میرپورخاص،باغی ٹی وی( نامہ نگار سید شاہزیب شاہ کی رپورٹ ) میرپور خاص ڈویژن بھر کے عوام کو ریلیف فراہم کرنے ، مشکلات کے فوری حل ، اور ریوینیو مسائل کے حل اور ضلع میں ہونے والی ترقیاتی اسکیموں پر خصوصی توجہ دے کر ڈپٹی کمشنر اپنے اپنے اضلاع میں بہتر اور موثر حکمت عملی بنا کر کام کریں تاکہ عوام کو زیادہ سے زیادہ فائدہ پہنچ سکے ان خیالات کا اظہار کمشنر فیصل احمد عقیلی نے کمشنر کانفرنس ہال میں ضلع میرپورخاص ، ضلع عمرکوٹ اور ضلع تھرپارکر کے ڈپٹی کمشنرز سے وڈیو لنک کے ذریعے اجلاس کی صدارت کرتے ہوئے کیا .

انہوں نے ڈویژن بھر کے ڈپٹی کمشنروں کو ہدایت کی کہ وہ عوامی مفاد میں ہونے والی ترقیاتی اسکیموں پر خصوصی توجہ دے کر اسکیمیں بنائیں تاکہ زیادہ سے زیادہ عوام کو فائدہ پہنچ سکے . انہوں نے ڈپٹی کمشنروں کو ہدایت کی کہ وہ اپنے اپنے اضلاع میں روزمرہ اشیاء کی قیمتوں کو کنٹرول کرنے ، نقلی اور بلیک پر کھاد کے فروخت کو روکنے ، انتخابات کی تیاری کے سلسلے میں پولنگ اسٹیشن کا دورہ کرنے کے تمام اسسٹنٹ کمشنرز کو ہدایات جاری کی جائیں .

اجلاس میں ڈپٹی کمشنر میرپورخاص ڈاکٹر رشید مسعود نے ضلع میرپورخاص کے حوالے سے تفصیلی بریفنگ دی . اسی طرح ضلع عمرکوٹ کے ڈپٹی کمشنر ولی محمد بلوچ اور ضلع تھرپارکر ڈپٹی کمشنر عبدالحلیم جاگیرانی نے اپنے اپنے اضلاع کے متعلق تفصیلی بریفنگ دی . اس موقع پر ایڈیشنل کمشنر ون ڈاکٹر علی نواز بھوت ، ایڈیشنل کمشنر ٹو سونو خان چانڈیو تمام تحصیلوں کے اسسٹنٹ کمشنروں نے بھی شرکت کی

کندھ کوٹ ،باغی ٹی وی (نامہ نگار مختیاراعوان ) نازیہ اور کوثر کو جلد ریکور کروایا جائے۔ صوبائی نگراں وزیر قانون انسانی حقوق محمد عمر سومرو۔
نگراں سندھ کابینہ پر کوئی دباؤ نہیں نہ ہی وہ برداشت کریں گے۔ ڈاکوؤں کا کسی بھی سیاستدان یا وڈیرے سے رابطہ ہوا تو ان کے خلاف قانون کے مطابق کارروائی کی جائے گی۔کشمور کے عوام کو ڈاکو کلچر سے نجات دلاؤں گا اور مجھے سندھ میں امن و امان کے لیے رکھا گیا ہے۔ صوبائی وزیر کا اجلاس سے خطاب۔

تفصیلات کے مطابق صوبائی وزیر قانون، مذہبی امور و انسانی حقوق محمد عمر سومرو نے ضلعی انتظامیہ سے کشمور میں امن و امان کی صورتحال اور اقلیتی برادری کے انسانی حقوق کے حوالے سے اجلاس کیا۔جس میں سیکریٹری انسانی حقوق جاوید صبغت اللہ مہر، ایڈیشنل ڈپٹی کمشنر ایس ایس پی کشمور روحیل احمد کوسو اور انسانی حقوق سے متعلقہ افسران، بار کے نمائندگان اقلیتی برادریوں کے رہنمائوں اور صوبائی محکمہ کے افسران نے شرکت کی۔

اجلاس میں اقلیتی برادری اور بار کے نمائندوں و دیگر نے کہا کہ ضلع کشمور میں امن و امان کی صورتحال انتہائی خراب ہے،اغوا برائے تاوان لوٹ مار سے زندگی اجیرن ہوگئی ہے،رینجرز کی تعیناتی کے احکامات جاری کئے جائیں۔ مغوی اقلیتی برادری اور دیگر یرغمالیوں کو جلد از جلد رہا کیا جائے۔ چند وڈیروں اور سیاست دانوں کے خلاف کارروائی ہونی چاہیے جو ڈاکوؤں کے سہولت کار ہیں۔جس کے جواب میں اجلاس سے خطاب کرتے ہوئے صوبائی وزیر نے ایس ایس پی کو ہدایت کی کہ پولیس سہولت کار وڈیروں اور سیاست دانوں کی فہرستیں تیار کی جائیں تاکہ آئندہ اجلاس میں ان کے خلاف کارروائی کی جا سکے۔

نازیہ اور کوثر کو پہلی فہرست میں شامل کیا جائے۔ پولیس پر کوئی دباؤ نہیں، نگراں حکومت وزیراعلیٰ سندھ اور ہم آپ کے ساتھ ہیں۔ ایس ایس پی کشمور نے کہا کہ ہم نے حکومت کو اسلحہ اور اہلکاروں کے لیے خط لکھ دیا ہے، شہر اور گردونواح میں گشت بڑھایا جائے گا، جرائم پیشہ عناصر اور ان کے سہولت کاروں کے خلاف سخت کارروائی کی جائے گی۔

صوبائی وزیر نے میڈیا سے گفتگو کرتے ہوئے کہا کہ سندھ میں امن و امان کی صورتحال کو بہتر بنانا نگران حکومت کی اولین ترجیح ہے۔ پولیس کے تعاون سے شہر اور دیہی علاقوں میں جرائم پر قابو پایا جائے گا اور پولیس گشت میں اضافہ کرکے امن و امان کی صورتحال کو بہتر بنایا جائے گا۔ کچے میں اپریشن لازمی ہوگا، ہم وقت اور تاریخ نہیں بتا سکتے۔ حکومت کے پاس اسلحے کی کوئی کمی نہیں، پولیس کا مطالبہ جلد پورا کیا جائے گا تاکہ کچے اور پکے پر ہونے والے جرائم پر قابو پایا جا سکے۔

چترال ،باغی ٹی وی (نامہ نگارگل حماد فاروقی)کم وولٹیج،ٹرانسفارمروں کی خرابی دور کرانا،سابق ایم این اے کا کردار قابل تحسین ہے
چترال ٹاؤن کے مختلف دیہات میں بجلی کی کم وولٹیج اور ٹرانسفارمروں کے بار بار خراب ہونے کی وجہ سے عوام کو نہایت مشکلات سامناتھا۔ اس مسئلے کو حل کرنے کیلئے چترال سے منتخب سابقہ رکن قومی اسمبلی مولانا عبد الاکبر چترالی نے اپنے صوابدیدی فنڈز سے آٹھ کروڑ چار لاکھ روپے کی لاگت سے مختلف ٹراسنفارمرز اور بجلی کے کھمبے لوگوں میں تقسیم کئے۔ اس سلسلے میں گریڈ اسٹیشن جوڈی لشت میں ایک تقریب بھی منعقد ہوئی جس میں جماعت اسلامی کے اراکین اور مختلف دیہات سے آئے ہوءے لوگوں نے کثیر تعداد میں شرکت کی۔

تقریب سے خطاب کرتے ہوئے سابق رکن قومی اسمبلی عبد الاکبر چترالی نے کہا کہ میں نے قومی اسمبلی میں سودی نظام کے خاتمے کیلئے کلیدی کردار ادا کیا۔ اس کے علاوہ میں نے چترال کے مختلف علاقوں میں سڑکوں کی تعمیر ، بجلی کے ٹرانسفارمر، کھمبے اور دیگر ترقیاتی کاموں کیلئے اربوں روپے منظور کروائے۔ انہوں نے کہا کہ قوم نے مجھ پر اعتماد کیا تھا اور میں نے قوم کے اعتماد کو ٹھیس نہیں پہنچائی۔ انہوں نے کہا کہ اگر دوبارہ مجھے خدمت کا موقع ملا تو دوبارہ قوم کی بھر پور انداز سے خدمت کروں گا۔

انہوں نے کہا کہ میں نے قومی اسمبلی سے توہین صحابہ کے مرتکب افراد کی سزا بڑھوائی ۔ انہوں نے کہا کہ مجھے کی بارہ کروڑوں روپے کمیشن کی پیشکش ہوئی مگر میں نے اسے ٹھکرادیا۔انہوں نے کہا کہ آئندہ انتحابات میں جماعت اسلامی کسی جماعت کے ساتھ اتحاد نہیں کرے گی، البتہ سیٹ ایڈجسٹمنٹ پر بات ہوسکتی ہے۔

انہوں نے کہا کہ کیسو، بروز، ایون، شیشی کوہ، ارندو، عشریت وغیرہ کے چھ فیڈر کی منظوری لے چکا ہوں اور چار ارب روپے کی لاگت سے یہ منصوبے تکمیل تک پہنچیں گے۔ انہوں نے کہا کہ بجلی کی مد میں حکومت سے ڈیڑھ ارب روپے لے چکا ہوں۔ انہوں نے کہا کہ مجھے فنڈ بھی نہیں ملتا تھا مگر میں نے عدالت سے رجوع کیا اور عدالت جانے کے بعد اپنا حق لینے میں کامیاب ہوا۔

باغی ٹی وی سے باتیں کرتے ہوئے عبد الاکبر چترالی نے کہا کہ ٹاؤن علاقے میں بجلی کا بہت مڑا مسئلہ تھا، جب چترال ٹاؤن میں بجلی کی ترسیل ہورہی تھِی اس وقت آبادی کم تھِی اب آبادی بڑھ گئی تو وولٹیج کا مسئلہ پیدا ہوا اور اکثر علاقوں میں ٹرانسفارمر خراب ہونے سے لوگ کیلئے ہفتے اندھیروں میں رہنے پر مجبور تھے۔ اب میری کوششوں سے چترال ٹاؤن کیلئے میں نے اپنی صوابدیدی فنڈز سے ایس ڈی جی سے آٹھ کروڑ چار لاکھ روپے بجلی کی مد میں لئے جس سے میں نے سو کے وی کے دس ٹرانسفارمر،نو ٹرانسفارمر پچاس کے وی، اور ایک ٹرانسفامر پچیس کے وی، اسی طرح دو سو پچاس چھوٹے کھمبے اور سات بڑے کھمبے لاکر لوگوں میں آج تقسیم ہورہے ہیں۔ اس سے چترال میں وولٹیج کا مسئلہ حل ہوگا۔

اس موقع پر مختلف دیہات سے آئے ہوئے لوگوں نے بھی خوشی کا اظہار کیا کہ ان کا ٹرانسفارمر بار بار خراب ہوتا تھا اور وہ اکثر اندھیروں میں رہتے اب امید ہے کہ اس نئے ٹرانسفارمر لگنے سے ان کا مسئلہ حل ہوتا۔ اس تقریب میں کثیر تعداد میں لوگوں نے شرکت کی جو بعد میں مولانا جمشید کے دعاییہ کلمات سے اختتام پذیر ہوئی۔ علاقے کے لوگوں نے اس موقع پر کافی جوش و خروش کا مظاہرہ کرتے ہوئے اپنے ساتھ لائے ہوئے گاڑیوں میں یہ ٹرانسفارمر اور بجلی کے پول لوڈ کرکے لے گئے۔