Author: ڈاکٹرغلام مصطفی بڈانی

میرپورخاص،باغی ٹی وی( نامہ نگار سید شاہزیب شاہ کی رپورٹ)صحافی اور پولیس کا چولی دامن کا ساتھ ہوتا ہے اور ہر انسان جرم سے نفرت اور امن سے پیار کرتا ہے ، یہ بات ایس ایس پی کیپٹن ریٹائرڈ اسد علی چودھری نے نیشنل پریس کلب میرپورخاص کی 19 ویں سالگرہ کی تقریب سے خطاب کرتے ہوئے کہی –

تفصیلات کے مطابق نیشنل پریس کلب میرپورخاص کی 19 ویں سالگرہ کی انتہائی خوبصورت اور پروقار تقریب کا پروگرام نیشنل پریس کلب میرپورخاص میں انعقاد پذیر ہوا جس میں ایس ایس پی میرپورخاص کیپٹن ریٹائرڈ اسد علی چودھری نے مہمان خصوصی کے طور پہ شرکت کی اور سالگرہ کا کیک کاٹا،سالگرہ کی تقریب میں نیشنل پریس کلب کے سرپرست اعلیٰ آفاق احمد ، صدر قمر الدین شیخ ، ممبر نیشنل پریس کلب حیات قریشی نے ایس ایس پی میرپورخاص کا نیشنل پریس کلب پہنچنے پر والہانہ استقبال کیا اور سندھی پگ پہنائی ۔ سالگرہ تقریب کا آغاز تلاوت قرآن مجید سے ہوا، قرآن مجید کی تلاوت کی سعادت حیات قریشی نے حاصل کی

نیشنل پریس کلب کے صدر قمرالدین شیخ نے خطاب کرتے ہوئے نیشنل پریس کلب کے وجود میں لانے کے معاملات پہ روشنی ڈالی اور کہا کہ نیشنل پریس کلب پریس میرپورخاص کا وہ واحد صحافتی ادارہ جس نے میرپورخاص اور ملک بھر میں نامور صحافی پیدا کئے جو آج قلم کے ذریعے ملک اور قوم کی خدمت کر رہے ہیں ، اس موقع پر نیشنل پریس کلب کے سرپرست آفاق احمد خان نے کہا صحافی اور پولیس ایک دوسرے کے کان اور آنکھ ہوتے ہیں ، انھوں نے مزید کہا کہ ہم نے نیشنل پریس کلب کے ذریعے تحقیقی صحافت کو پروان چڑھایا تاکہ صحافی میں صحافت کی اصل روح اجاگر ہو اور اسے پتہ چلے کہ وہ صحافت جیسے عظیم اور پاکیزہ شعبے سے وابستہ ہے –

اس موقع پر ڈی ایس پی ہیڈکوارٹر اسلم جاگیرانی نے محکمہ پولیس کے بارے میں گفتگو کرتے ہوئے کہا پولیس کو اللہ پاک نے شہادت کے عظیم رتبے سے سرفراز فرمایا ہے اور ہم انتہائی کم وسائل ہونے کے باوجود ظلم وجبر سے برسرپیکار رہتے ہیں ،تقریب میں نیشنل پریس کلب کے جنرل سیکریٹری سہیل احمد خان ،حیات قریشی معروف صحافی و کیمرہ مین خالد(فوجی) باغی ٹی وی کے نامہ نگار سید شاہزیب شاہ ،حسن سولنگی ،شاہزیب خاصخیلی ، سٹی پریس کلب کے صدر وارث خاصخیلی ،امید علی لغاری ،کیمرہ مین سہیل احمد ، ڈاکٹر فہد ملک ، غلام قادر چانڈیو، پیپلز بیورو میرپورخاص کے رہنما ملازم حسین خاصخیلی اور دیگر معززین شہریوں نے شرکت کی اور مہمان خاص کو اجرک اور سندھی ٹوپی کے تحائف پیش کئے ۔

اس موقع پر ایس ایس پی میرپورخاص کیپٹن ریٹائرڈ اسد علی چودھری نے کہا کہ پولیس امن و امان کی صورتحال کو برقرار رکھنے کے لئے ہر ممکن اقدامات کر رہی ہے کیونکہ ہر انسان جرم سے نفرت اور امن سے پیار کرتا ہے اس لیے پولیس امن و امان کو برقرار رکھنے کے لیے اپنا فعال کردار ادا کرتی رہے گی اور کہا کہ پولیس کی کارکردگی عوام کے باہمی تعاون سے ہی مشروط ہے .ایس ایس پی میرپورخاص کیپٹن ریٹائرڈ اسد علی چودھری نے نیشنل پریس کلب میرپورخاص کی 19 ویں سالگرہ کے موقع پر نیشنل پریس کلب کے تمام ممبران کو مبارکباد دیتے ہوئے کہا کہ صحافتی اداروں نے نہ صرف عوامی مسائل کی نشاندہی اوران کے حل کرنے میں بلکہ ملکی ترقی میں بھی ریڑھ کی ہڈی کی حیثیت سے اپنا کردار ادا کیا ہے اور کہا ہے میڈیا نے ہمیشہ عوام کے مسائل کی نشاندہی اور امن و امان کی صورتحال کو برقرار رکھنے میں پولیس کی رہنمائی کی ہے جس سے عوام اور پولیس کا رابطہ بھی بحال ہوا ہے جو قابل ستائش بات ہے

اس موقع پر ایس ایس پی میرپور خاص کے ہمراہ ڈی ایس پی سٹیلائٹ ٹاؤن قاسم ملک ، ڈی ایس پی ہیڈ کوارٹر اسلم جاگیرانی بھی موجود تھے ، آخر میں نیشنل پریس کلب کے سرپرست آفاق احمد خان نے ایس ایس پی میرپورخاص کیپٹن ریٹائرڈ اسد علی چوہدری ڈی ایس پی اسلم جاگیرانی ،ڈی ایس پی سٹیلائٹ ٹاؤن قاسم ملک، صدر سٹی پریس کلب وارث خاصخیلی اور تقریب میں شریک تمام مہمانوں کا نیشنل پریس کلب کے تمام ممبران کی جانب سے شکریہ ادا کیاگیا جبکہ تقریب کی نظامت کے فرائض حسن سولنگی نے ادا کئے-

ڈیرہ غازیخان،سرگودھا،لاہور (باغی ٹی وی نمائندگان) تفصیلات کے مطابق پنجاب بھر میں میٹرک کےامتحانات کےنتائج کا اعلان کر دیا گیا، نتائج کا اعلان سپیشل سیکرٹری ہائر ایجوکیشن آغا علی عباس نے پریس کانفرنس میں کیا۔لاہوربورڈ میں کامیابی کاتناسب 74.57 فیصد، فیصل آبادمیں81.76 فیصد ، ڈی جی خان بورڈ میں کامیابی کا تناسب 86.37 فیصد، بہاولپور میں82.70فیصد رہا۔

اس کے علاوہ گوجرانوالہ بورڈ میں کامیابی کا تناسب 80.82فیصد ،ملتان میں 85فیصد ، راولپنڈی بورڈ میں کامیابی کا تناسب 77.20 فیصد، ساہیوال میں 78.76فیصد اور سرگودھا میں 82.82 فیصد رزلٹ رہا۔لاہور بورڈ میں 230915 امیدواران نے شرکت کی جن میں سے 172204 امیدوار نے کامیابی حاصل کی،دوسری جانب راولپنڈی بورڈ نے بھی میٹرک کے سالانہ امتحانات 2023 کے نتائج کا اعلان کر دیا ہے، راولپنڈی بورڈ کے مطابقمیٹرک کے سالانہ امتحانات میں 89184 امیدوار کامیاب ہوئے۔راولپنڈی بورڈ کا کہنا ہے کہ طلبا میں کامیابی کی شرح 71.42 فیصد اور طالبات کی 83.11 فیصد رہی۔

ثانوی و اعلیٰ ثانوی تعلیمی بورڈ ڈیرہ غازی خان نے میٹرک پہلے سالانہ 2023کے نتائج کا اعلان کر دیا ہے۔ ایڈیشنل کمشنر کوآرڈینیشن کریم بخش نے کلک کرکے رزلٹ آن لائن کیا. امتحان میں کل81296امیدواروں نے شرکت کی اور 70222نے کامیابی حاصل کی اور کامیابی کا تناسب 86.37فیصد رہا ۔ ایڈیشنل کمشنر نے کہا کہ نتائج بورڈ کی ویب سائٹ www.bisedgkhan.edu.pk پر اپ لوڈ کر دیئے گئے ہیں

اس موقع پر کنٹرولر امتحانات مرزا محمد ظہیر اصغر ، سیکرٹری بورڈ عبدالرحمن رشید ، آر سی او حبیب الرحمن گاڈی ، سسٹم اینالسٹ محمد بلال بھٹہ ، ٹیکنیکل پرسن احمد علی قریشی،پی ایس ٹو چیئر مین سجاد حسین سرکانی اوردیگر بھی موجود تھے ۔ ایڈیشنل کمشنر نے بتایا کہ مذکورہ امتحان میں 44132طلبہ نے حصہ لیا اور 36992کامیاب ہو ئے اور کامیابی کی شرح 83.92فیصد رہی جبکہ 37164طالبات نے امتحان میں شرکت کی اور 33230نے کامیابی حاصل کی اسی طرح لڑکیوں کی کامیابی کی شرح 89.41فیصد رہی۔

انہوں نے بتایا کہ اگلے سال سے طلبہ و طالبات کی ذہنی صلاحیتوں میں مزید نکھار پیدا کرنے کے لیے ہائر ایجوکیشن ڈیپارٹمنٹ نے 25فیصد اینالیٹیکل اور کریٹیکل طرز پر امتحان لینے کا فیصلہ کیا ہے کنٹرولر امتحانات مرزا محمد ظہیر اصغر نے بتایا کہ کمشنر و چیئر مین ڈاکٹر ناصر محمود بشیر اور ایڈیشنل کمشنر کوارڈینیشن کریم بخش کی سربراہی میں امتحان اور نتائج کی تیاری کے عمل کو انتہائی شفاف اور معیاری رکھا گیاجس میں انکی ٹیم نے بھر پور محنت کی اور نتائج تیار کرنے میں کامیاب ہوئے

انہوں نے بتایا کہ میٹرک دوسرا سالانہ امتحان2023 پندرہ ستمبر سے شروع ہو رہے ہیں جس کے لیے داخلہ فارم سنگل فیس کے ساتھ یکم سے 12اگست کے درمیان جمع کروائے جا سکتے ہیں اسی طرح دوگنا فیس کے ساتھ 13سے 16اگست جبکہ تین گنا فیس کے ساتھ 17سے 19اگست تک داخلہ فارم جمع کرائے جاسکیں گے .