Author: ڈاکٹرغلام مصطفی بڈانی

میہڑ ،باغی ٹی وی (نامہ نگار) نجی ہسپتال میں دوران اپریشن خاتون جاں بحق،ورثاء کا لاش روڈ پر رکھ کراحتجاج ،لیڈی ڈاکٹرکے خلاف مقدمہ درج کرکے گرفتار کرنے کامطالبہ
تفصیل کے مطابق میہڑ کے نجی ہسپتال میں آپریشن کے دوران ذوالفقارکھوسوکی بیوی مسماۃ سلمیٰ دوران اپریشن جاں بحق ہوگئی ،دوران اپریشن خاتون کے جاں بحق پر ورثاء کاکہنا ہے کہ لیڈی ڈاکٹرڈاکٹر طلعت بلدائی نے غفلت کاارتکاب کرتے ہوئے غلط اپریشن کیا ہے ،جس کی وجہ سے خاتون جاں بحق ہوگئی،ورثاء نے احتجاج کرتے ہوئے خاتون کی لاش کو بائی پاس روڈ پر رکھ کر بلاک کردیا جس سے ٹریفک کی روانی معطل ہو گئی ،گاڑیوں کی لمبی لائنیں لگ گئیں،جاں بحق خاتون کے لواحقین نے غفلت برتنے کے الزام میں لیڈی ڈاکٹر کے خلاف مقدمہ درج کرکے اسے گرفتار کرنے کا مطالبہ کیا ۔

کوئٹہ ،باغی ٹی وی(نامہ نگار زبیرآکاخیل)بولان قومی شاہراہ این اے 65 سیلاب سے متاثرہ پنجرہ پل کے علارضی گزر گاہ سے ٹریفک کی روانی شروع ہوگئی ہے
تفصیل کے مطابق اسسٹنٹ کمشنر ڈھاڈر فہد شاہ راشدی نے بتایا ہے کہ گزشتہ روز پنجرہ پل کو نچلے درجے کا سیلابی ریلہ آنے سے جزوی نقصان پہنچا،ضلعی انتظامیہ بولان کی امدادی ٹیموں کی جانب سے گزر گاہ کو ہنگامی طور پر ٹریفک گزارنے کے قابل بنایا گیاہے ،اس وقت چھوٹی گاڑیوں کو گزار اجا رہا ہےجبکہ دوسرے مرحلے میں پھنسی ہوئی بڑی مال بردار گاڑیوں کو پنجرہ پل سے گزارا جائے گا۔پھنسی ہوئی تمام چھوٹی بڑی گاڑیوں کی روانگی کے بعد متاثرہ حصے کے کا کام مزید مکمل کیا جائے گا۔19گھنٹے کی طویل بندش کے بعد قومی شاہراہ کو بحال کر دیا گیا ہے.

ڈی آئی خان،باغی ٹی وی (نامہ نگاراحمدنوازمغل) سی ٹی ڈی، پولیس اور دیگر سیکیورٹی فورسز نے ڈی آئی خان میں مشترکہ کارروائی کے دوران کالعدم تنظیم کے 2 دہشت گردوں کو ہلاک کردیا۔
تفصیل کےمطابق سیکیورٹی فورسز ،سی ٹی ڈی اور پولیس نے ڈی آئی خان کے چودھوان گاؤں کے قریب کوٹ تگہ میں دہشت گردوں کے خلاف مشترکہ آپریشن کیا، اس دوران دہشت گردوں نے فورسز پر حملہ کر دیا۔
پولیس کے مطابق سیکیورٹی اداروں کی جوابی کارروائی میں دو دہشت گرد مارے گئے، جن کی شناخت ان کے قبضے سے ملنے مقامی کالعدم تنظیم کے کارڈز سے ہوئی۔علاقے میں سرچ آپریشن شروع کردیا گیا۔

چمن،باغی ٹی وی (نامہ نگار) بلوچستان کے مختلف علاقوں میں بارشوں اور سیلابی ریلوں سے 5 افراد جاں بحق ہوگئے۔
پراونشل ڈیزاسٹر مینجمنٹ اتھارٹی ( پی ڈی ایم اے ) کے مطابق بارشوں اور ریلوں سے ہونے والے نقصانات میں خضدار میں 2 ، مچھ، لسبیلہ میں 2 اور کیچ میں ایک شخص جاں بحق ہوا۔
پی ڈی ایم اے حکام کا بتانا ہے کہ حالیہ بارشوں سے چاغی اور پنجگور میں متعدد کچے مکانات کو نقصان پہنچا جبکہ بولان پنجرہ پل کا ایک حصہ اور سوناری پل کوہلو سیلابی پانی میں بہہ گئے۔پراونشل ڈیزاسٹر مینجمنٹ اتھارٹی کا کہنا ہے کہ دونوں مقامات پر پلوں کی مرمت اور ٹریفک بحالی کا کام جاری ہے۔
بلوچستان،ڈی جی‌خان بارشیں ، ندی نالوں میں طغیانی،سندھ سے رابطہ کی2 قومی شاہراہیں بند

لسبیلہ ،باغی ٹی وی (ویب نیوز)بلوچستان کے علاقے لسبیلہ میں ہنگلاج ماتامندر سے واپسی پر ہندو یاتریوں کی بس الٹ گئی، جس کے نتیجے میں 30 سے زائد افراد زخمی ہوگئے ،جنہیں فوری طور پر ہسپتال منتقل کردیا گیا۔
تفصیل کے مطابق دنیا بھر میں ہندو برادری کی قدیم ترین مذہبی عبادت گاہ ہنگلاج ماتا مندر کا سالانہ تین روزہ میلہ جاری ہے، دنیا بھر سے آنے والے ہندویاتری دشوار گزار راستوں سے ہوتے ہوئے مذہبی رسومات کی ادائیگی کر رہے ہیں، ہنگلاج مندر کے داخلی وخارجی راستوں پر سیکیورٹی کے لۓ ضلعی پولیس کے کمانڈوز تعینات ہیں۔
ڈسٹرکٹ ایڈمنسٹریشن حب اور ڈسٹرکٹ ایڈمنسٹریشن لسبیلہ نے ملک بھر سے مذہبی رسومات کی ادائیگی کے لیے ہنگلاج مندر آنے والے ہندو یاتریوں کے لیے سی پیک روٹ پر واقعہ کوسٹل ہائے پر تین مقامات پر رابطہ کاری مراکز قائم کئے ہیں۔بلوچستان حکومت کی جانب سے تاریخی ہنگلاج مندر کے ترقیاتی منصوبوں پر کام شروع کیا گیا ہے۔
سی پیک روٹ سے ملحقہ کوسٹل ہائی وے پر 24 گھنٹے ہیلپ لائن سروس ایمرجنسی ریسپانس سینٹرز کا قیام اور واٹر ٹینکرز کے ذریعے یاتریوں کو پینے کا پانی اور برف 24 گھنٹے فراہم کی جارہی ہے۔دنیا بھر میں مہا استھان شکتی کے حوالے سے ہنگلاج ماتا مندر کا شمار قدیم ترین مذہبی عبادت گاہوں میں ہوتا ہے۔سی پیک روٹ کے ساحلی پٹی پر آئندہ 30 سالہ ماسٹر پلاننگ میں ہنگلاج ماتا مندر کو بھی ترقیاتی پیکیج میں شامل کیا گیا ہے اور اس ماسٹر پلان کے تحت ہندو یاتریوں کے لیے تمام بہترین سہولیات فراہم کی گئی ہیں۔
گزشتہ روز چندر گپ کے مقام پر 25 ہزار سے زائد ہندو یاتریوں نے مذہبی رسومات کی ادائیگی کی۔ہنگلاج مہا استھان تیرتھ یاترہ آنے والے ہندو یاتری پانچ مقامات پر مذہبی رسومات ادا کرتے ہیں۔

کوئٹہ،حب ،ڈیرہ غازیخان (باغی ٹی وی نمائندگان )بلوچستان میں بارشیں ، ندی نالوں میں طغیانی،سندھ سے رابطہ کی2 قومی شاہراہیں بند
تفصیل کے مطابق بلوچستان طاقتور موسمی سسٹم کے زیراثر آ گیا، چمن، پشین، مستونگ، دکی، ڈیرہ بگٹی، کوہلو، آواران اور نصیرآباد میں تیز بارشوں سے ندی نالوں میں طغیانی کے بعد بلوچستان کو سندھ سے ملانے والے دونوں اہم قومی شاہراہیں بند ہوگئیں ہیں ،بولان کے علاقے پنجرہ پل کا متبادل راستہ بہہ جانے سے ٹریفک معطل، لسبیلہ کے قریب کوئٹہ کراچی شاہراہ بھی سیلابی ریلے میں بہہ گئی، کراچی جانے والی ٹریفک کا متبادل راستہ بھی متاثر جبکہ کوئٹہ سبی شاہراہ کو ہر قسم کی ٹریفک کیلئے بند کر دیا گیا ہے،
حکام کے مطابق بلوچستان کے پاک افغان اور پاک ایران سرحدی علاقوں میں موسلادھار بارش اور ژالہ باری کے بعد کیچ، تربت، مند اور بلو سمیت کئی علاقوں میں طوفانی بارش اور سیلابی ریلوں سےنقصانات رپورٹ ہوئے ہیں۔حکام کا کہنا ہے کہ گزشتہ رات پانی کا بہاؤ زیادہ ہونے کی وجہ سے حب ندی کے متبادل راستے کو نقصان پہنچنے سے آمد و رفت بند ہوگئی ہے، ٹریفک پولیس نے عوام کو کراچی سے کوئٹہ آمد و رفت کیلئے حب بائی پاس استعمال کرنے کی ہدایت کی ہے۔پراونشل ڈیزاسٹر اتھارٹی (پی ڈی ایم اے) کا کہنا ہے کہ کوہ سلیمان اور کھیرتھر رینج میں بارش کا سسٹم بن رہا ہے جس کے بلوچستان سندھ اور جنوبی پنجاب بارڈر پر زیادہ اثر انداز ہونے کا امکان ہے۔جبکہ گذشتہ روز ہفتہ کے دن ڈیرہ غازیخان میں کوہ سلیمان کے علاوہ میدانی علاقوں اور شہرمیں موسلادھاربارش ہوئی ،جس سے کئی نشیبی علاقے زیرآب آگئے،پی ڈی ایم اے کے مطابق آج دوپہر کے بعد تیز ہواؤں، آندھی اور گرج چمک کے ساتھ مزید بارش بھی متوقع ہے۔