اوباڑو: لانھگو روڈ پر دن دہاڑے فائرنگ، نوجوان والدہ کے سامنے قتل، علاقے میں خوف و ہراس
گہوٹکی با غی ٹی وی/ نامہ نگار مشتاق علی لغاری
اوباڑو کے نواحی علاقے لانھگو روڈ پر پیش آنے والے دلخراش واقعے نے علاقے میں خوف و ہراس پھیلا دیا، جہاں نامعلوم مسلح افراد نے اندھا دھند فائرنگ کرکے ایک نوجوان کو اس کی والدہ کے سامنے قتل کردیا۔ واقعے کے بعد علاقے میں شدید بے چینی پھیل گئی جبکہ مقتول کے گھر میں کہرام مچ گیا۔تفصیلات کے مطابق نوجوان اپنی والدہ کے ہمراہ لانھگو روڈ کے قریب موجود تھا کہ اسی دوران مسلح افراد نے انہیں روک کر فائرنگ شروع کردی۔ عینی شاہدین کے مطابق حملہ آوروں نے انتہائی قریب سے متعدد گولیاں چلائیں جس کے نتیجے میں نوجوان شدید زخمی ہوکر موقع پر ہی دم توڑ گیا، جبکہ والدہ چیخ و پکار کرتی رہ گئی۔ افسوسناک منظر دیکھ کر علاقے کے لوگ بھی غمزدہ ہوگئے۔اطلاع ملنے پر پولیس کی بھاری نفری موقع پر پہنچ گئی اور جائے وقوعہ کو گھیرے میں لے کر شواہد اکٹھے کیے گئے۔ مقتول کی لاش کو ضروری قانونی کارروائی کے بعد اسپتال منتقل کردیا گیا، جہاں شناخت سوالی مزاری کے نام سے ہوئی۔ پولیس کے مطابق مقتول کا تعلق روجھان سے بتایا جارہا ہے۔پولیس حکام کا کہنا ہے کہ ابتدائی تحقیقات میں واقعہ دیرینہ دشمنی کا نتیجہ معلوم ہوتا ہے، تاہم مختلف پہلوؤں سے تحقیقات جاری ہیں۔ جائے وقوعہ سے گولیوں کے خول بھی تحویل میں لے لیے گئے ہیں جبکہ ملزمان کی گرفتاری کے لیے چھاپے مارنے کا سلسلہ شروع کردیا گیا ہے۔دوسری جانب واقعے کے بعد مقتول کے ورثا کی جانب سے انصاف کا مطالبہ کیا جارہا ہے۔ اہل علاقہ کا کہنا ہے کہ دن دہاڑے پیش آنے والے اس واقعے نے امن و امان کی صورتحال پر کئی سوالات کھڑے کردیے ہیں۔ شہریوں نے اعلیٰ حکام سے مطالبہ کیا ہے کہ قاتلوں کو فوری گرفتار کرکے قانون کے مطابق سخت سزا دی جائے تاکہ علاقے میں خوف کی فضا ختم ہوسکے۔پولیس کا کہنا ہے کہ جلد ہی واقعے میں ملوث ملزمان کو گرفتار کرکے اصل حقائق سامنے لائے جائیں گے۔
Author: Faizan Sheikh
-
اوباڑو میں دن دہاڑے قتل ماں کے سامنے نوجوان کو گولیوں سے چھلنی کر دیا
-
گھوٹکی میں سیپکو افسر کی ویڈیو وائرل نشے کا اعتراف؟ متنازع بیان پر ہنگامہ
گھوٹکی: سپرنٹنڈنگ انجینئر سیپکو غلام علی تنیو کا مبینہ ویڈیو بیان سوشل میڈیا پر وائرل، جس میں منشیات کے استعمال کا اعتراف اور متنازع گفتگو سامنے آگئی۔
گہوٹکی با غی ٹی وی/ نامہ نگار مشتاق علی لغاری ویڈیو میں مبینہ طور پر غلام علی تنیو کہتے سنائی دے رہے ہیں: "میں بھی نشے کا عادی ہوں، نشہ کرتا ہوں” اور "میں بھی آئس پیتا ہوں، آئس پی کر کام کرتا ہوں”ویڈیو میں مزید یہ بھی مبینہ طور پر کہا گیا: "نوکری کرنی ہے تو کام کرو، جو بھی آئے گولی مار دو، ایف آئی آر کٹوادو”سیپکو کے اعلیٰ افسر کے ان مبینہ بیانات پر شہریوں اور صارفین میں شدید تشویش پائی جا رہی ہے، جبکہ سوشل میڈیا پر ویڈیو تیزی سے وائرل ہو رہی ہے۔شہری حلقوں نے متعلقہ حکام سے واقعے کا نوٹس لینے اور شفاف تحقیقات کا مطالبہ کیا ہے۔ -
گھوٹکی میں تعلیمی بحران 286 اسکول خستہ حال، اساتذہ غائب | ڈپٹی کمشنر کا بڑا ایکشن
گہوٹکی باغی ٹی وی/نامہ نگار مشتاق علی لغاری میرپور ماتھیلو، 12 مئی 2026: ڈپٹی کمشنر گھوٹکی منظور احمد کنرانی نے کہا ہے کہ حکومت سندہ کی جانب سے ضلع گھوٹکی کے اسکولوں کو علیحدہ بجٹ فراہم کیا گیا ہے، اس لیے ہیڈ ماسٹرز کا فرض بنتا ہے کہ وہ اپنے اسکولوں کی حالت بہتر بنائیں۔ ان خیالات کا اظہار انہوں نے اپنی دفتر میں تعلیمی اصلاحات کے لیے قائم ڈسٹرکٹ سروس ڈلیوری کمیٹی کے اجلاس کی صدارت کرتے ہوئے کیا۔ اجلاس میں اسسٹنٹ کمشنرز، ڈی ای اوز سیکنڈری و پرائمری، سی ایم او عمران علی سیال اور ٹی ای اوز نے شرکت کی۔ اس موقع پر ڈپٹی کمشنر نے گفتگو کرتے ہوئے کہا کہ ضلع کے 135 اسکولوں کی مرمت کے لیے اسکیم رکھی گئی ہے جبکہ حکومت سندہ کی جانب سے سیکنڈری اور پرائمری اسکولوں کو مرمت، فرنیچر اور اسٹیشنری کی مد میں بجٹ فراہم کیا گیا ہے، اس لیے اب ہیڈ ماسٹرز کو چاہیے کہ وہ اپنے اسکولوں کی بہتری کے لیے مخلصانہ کردار ادا کریں، خصوصاً فرنیچر کی کمی کو ختم کیا جائے تاکہ طلبہ کو درپیش مشکلات کم ہوسکیں۔ اجلاس کے دوران انہوں نے ڈی ای اوز کو ہدایت دیتے ہوئے کہا کہ مسلسل غیر حاضر رہنے والے اساتذہ کے خلاف قانونی کارروائی کے لیے متعلقہ حکام کو رپورٹ ارسال کی جائے، تعلیمی معیار کو بہتر بنانے کے لیے تمام وسائل بروئے کار لائے جائیں اور جن اسکولوں کو بجٹ فراہم کیا گیا ہے ان کے ڈی ڈی اوز کی رہنمائی کی جائے تاکہ بجٹ کو مؤثر انداز میں استعمال کیا جاسکے۔ قبل ازیں سی ایم او عمران علی سیال نے ڈپٹی کمشنر کو بریفنگ دیتے ہوئے بتایا کہ 74 پرائمری اور 51 سیکنڈری اسکولوں کے اساتذہ مسلسل غیر حاضر ہیں جبکہ 286 اسکولوں کی عمارتیں خستہ حالی کا شکار ہیں۔
-
"اوکاڑہ نہر میں گرنے والی کار نکال لی گئی، 3 افراد جاں بحق، 12 سالہ بچہ معجزانہ طور پر محفوظ”
اوکاڑہ کی تحصیل دیپالپور کے علاقے بصیر پور میں واقع ہیڈ گلشیر راجوال لنک نہر میں گرنے والی کار کو ریسکیو 1122 نے کامیاب آپریشن کے بعد نکال لیا۔
ریسکیو حکام کے مطابق نہر میں گرنے والی گاڑی میں سوار 4 افراد میں سے 3 افراد جاں بحق ہو گئے جبکہ 12 سالہ بچہ مونم رسول معجزانہ طور پر زندہ بچ گیا۔
اطلاع ملتے ہی ریسکیو 1122 کی ٹیمیں فوری موقع پر پہنچ گئیں اور سرچ اینڈ ریسکیو آپریشن شروع کیا گیا۔ آپریشن میں 30 ریسکیورز، 8 غوطہ خوروں اور 4 کشتیوں نے حصہ لیا جبکہ گوجرانوالہ واٹر ریسکیو ٹیم نے بھی معاونت فراہم کی۔ریسکیو ٹیموں نے جدید تکنیک جیسے سکوبا سرچنگ، سونار ریڈار، پلنجر سرچنگ اور وائر سویپنگ ٹیکنالوجی استعمال کرتے ہوئے تقریباً 200 میٹر کے فاصلے سے گاڑی کا سراغ لگایا۔ بعد ازاں سکوبا ڈرائیورز نے رسوں کی مدد سے گاڑی کو باہر نکالا اور تینوں افراد کی نعشیں ضروری کارروائی کے بعد لواحقین کے حوالے کر دی گئیں۔یہ واقعہ علاقے میں افسوس اور غم کی فضا چھوڑ گیا جبکہ بچے کے محفوظ رہنے کو ایک معجزہ قرار دیا جا رہا ہے۔ -
اوکاڑہ میں معرکۂ حق کی کامیابی کا جشن، ڈی سی کی قیادت میں تاریخی ریلی، پاک فوج سے بھرپور اظہارِ یکجہتی
ضلع Okara میں معرکۂ حق کی کامیابی کا جشن بھرپور انداز میں منایا گیا، جہاں ڈی سی آفس سے ایک عظیم الشان ریلی نکالی گئی۔ریلی کی قیادت ڈپٹی کمشنر Ahmed Usman Javed نے کی، جبکہ ایم پی اے Chaudhry Ghulam Raza Rabeera، ضلعی افسران، انجمن تاجران اور مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔شہریوں کا جم غفیر افواج پاکستان سے اظہارِ یکجہتی کے لیے سڑکوں پر نکل آیا اور فضا "پاکستان زندہ باد” اور "پاک فوج پائندہ باد” کے نعروں سے گونج اٹھی۔ڈپٹی کمشنر نے کہا کہ یہ تاریخی ریلی اس بات کا واضح ثبوت ہے کہ اوکاڑہ کے عوام اپنی افواج سے بے پناہ محبت کرتے ہیں۔ معرکۂ حق ہمیں ہمیشہ حق کی جیت کا یقین دلاتا ہے، اور پوری قوم اپنی مسلح افواج کے ساتھ چٹان کی طرح کھڑی ہے۔ریلی ٹینک چوک پہنچ کر اختتام پذیر ہوئی جبکہ ضلع بھر میں جشن کی تقریبات کا سلسلہ جاری ہے، جن میں سکولوں، کالجوں اور دیگر اداروں میں خصوصی پروگرامز شامل ہیں۔
-
سیالکوٹ میں آل پارٹیز کانفرنس، آپریشن بنیان المرصوص کی کامیابی پر پاک افواج کو خراجِ تحسین
سیالکوٹ (بیورو چیف مدثر رتو) پاکستان مرکزی مسلم لیگ کے زیر اہتمام سیالکوٹ میں ایک اہم آل پارٹیز کانفرنس کا انعقاد کیا گیا، جس میں آپریشن بنیان المرصوص کی کامیابی کو ایک سال مکمل ہونے پر پاکستان کی عظیم کامیابی کو شاندار انداز میں خراجِ تحسین پیش کیا گیا۔کانفرنس میں مزمل اقبال ہاشمی، طاہر ہندلی، شیخ فیاض احمد، امتیاز احمد بریار، انجینیئر اعجاز نصر، پیر سید محبوب احمد گیلانی، حافظ جاوید گورایہ، آغا فدا حسین، الشیخ حکیم محمد عبدالواحد اور شیخ جاوید حیدر سمیت مختلف سیاسی، مذہبی اور سماجی شخصیات نے بھرپور شرکت کی۔شرکاء نے پاک افواج کی قربانیوں، پیشہ ورانہ مہارت اور دفاعِ وطن میں ان کے کردار کو زبردست خراجِ تحسین پیش کرتے ہوئے اس عزم کا اظہار کیا کہ ملک دشمن عناصر کے خلاف پوری قوم متحد ہے اور پاکستان کے دفاع کیلئے سیسہ پلائی دیوار بن کر کھڑی ہے۔مقررین نے کہا کہ پاکستان کی سلامتی، خودمختاری اور استحکام پر کوئی سمجھوتہ نہیں کیا جائے گا اور پوری قوم اپنی بہادر افواج کے شانہ بشانہ کھڑی ہے۔ انہوں نے کہا کہ آپریشن بنیان المرصوص کے بعد پاکستان ایک مضبوط اور مستحکم ریاست کے طور پر دنیا کے سامنے ابھرا ہے۔مقررین کا کہنا تھا کہ 10 مئی کے بعد عالمی سطح پر پاکستان کو ایک نئے زاویے سے دیکھا گیا، جہاں ملک نے اپنی مضبوط معیشت، جدید ٹیکنالوجی اور پیشہ ور افواج کے ذریعے اپنی صلاحیتوں کا بھرپور اظہار کیا۔کانفرنس کے اختتام پر ملک کی سلامتی، ترقی اور استحکام کیلئے خصوصی دعا بھی کی گئی۔
-
اوکاڑہ میں معرکۂ حق کے شہدا کو شاندار خراجِ عقیدت، جناح پارک میں خصوصی تقریب
اوکاڑہ (نامہ نگار ملک ظفر) اوکاڑہ میں معرکۂ حق کے شہدا کو خراجِ عقیدت پیش کرنے کیلئے جناح پارک میں خصوصی تقریب کا انعقاد کیا گیا، جس میں اسسٹنٹ کمشنر مرزا راحیل بیگ اور سی او ایم سی عمر نسیم نے شرکت کی۔تقریب کے دوران شہدائے وطن کی یاد میں شمعیں روشن کی گئیں جبکہ سول سوسائٹی، شہریوں اور مختلف شعبہ ہائے زندگی سے تعلق رکھنے والے افراد کی بڑی تعداد جناح پارک پہنچی۔ شرکاء نے شمعیں روشن کر کے شہداء سے اپنی محبت اور عقیدت کا اظہار کیا۔اس موقع پر اسسٹنٹ کمشنر مرزا راحیل بیگ نے کہا کہ شہدا کا خون قوم پر ایک عظیم قرض ہے اور ملک کی خاطر جانیں قربان کرنے والے ہمارے حقیقی ہیرو ہیں۔ انہوں نے کہا کہ شہداء کی قربانیاں کبھی رائیگاں نہیں جائیں گی اور پوری قوم ان کی عظیم خدمات کو سلام پیش کرتی ہے۔انہوں نے مزید کہا کہ وطن کی آزاد فضائیں غازیوں اور شہدا کی مرہونِ منت ہیں اور قوم ہمیشہ اپنے شہدا کو یاد رکھے گی۔
-
چترال: چلم جوشی تہوار سے قبل رومبور تھانے میں اہم اجلاس، سیکیورٹی کے فول پروف انتظامات
چترال میں زوشی (چلم جوشی) تہوار سے قبل رومبور تھانے میں ایک اہم اجلاس منعقد ہوا، جس میں سیکیورٹی اور انتظامی امور کا تفصیلی جائزہ لیا گیا۔اجلاس میں پولیس حکام، مقامی انتظامیہ اور دیگر متعلقہ اداروں کے نمائندگان نے شرکت کی۔ اس موقع پر تہوار کے دوران سیاحوں اور مقامی افراد کی حفاظت کو یقینی بنانے کے لیے فول پروف سیکیورٹی پلان ترتیب دینے پر زور دیا گیا۔حکام نے فیصلہ کیا کہ رومبور ویلی اور گردونواح میں سیکیورٹی مزید سخت کی جائے گی، داخلی و خارجی راستوں پر چیکنگ کا نظام بہتر بنایا جائے گا جبکہ ہنگامی صورتحال سے نمٹنے کے لیے خصوصی ٹیمیں بھی تعینات کی جائیں گی۔اجلاس میں صفائی، ٹریفک مینجمنٹ اور دیگر سہولیات کی فراہمی پر بھی تبادلہ خیال کیا گیا تاکہ چلم جوشی تہوار کے دوران آنے والے سیاحوں کو کسی قسم کی مشکلات کا سامنا نہ ہو۔انتظامیہ کا کہنا تھا کہ اس اہم ثقافتی تہوار کو پرامن اور خوشگوار ماحول میں منعقد کروانے کے لیے تمام تر وسائل بروئے کار لائے جائیں گے۔
-
ڈی جی خان: واسا کی پائپ لائن بچھانے کا کام عوام کیلئے عذاب بن گیا، نکاسی آب کا نظام تباہ
ڈیرہ غازی خان میں واسا کی جانب سے عبداللہ ٹاؤن کالونی یونین کونسل 17 میں جاری پائپ لائن بچھانے کا ترقیاتی کام علاقہ مکینوں کے لیے شدید مشکلات کا باعث بن گیا ہے۔تفصیلات کے مطابق ترقیاتی کام کے دوران پہلے سے موجود نکاسی آب کی نالیوں کو توڑ دیا گیا، جس کے باعث گندا پانی گھروں میں داخل ہونا شروع ہو گیا ہے۔ علاقہ مکینوں کا کہنا ہے کہ پانی کے نکاس کا واحد راستہ بھی بند کر دیا گیا ہے، جس سے صورتحال دن بدن سنگین ہوتی جا رہی ہے۔مزید برآں تمام گلیوں کو بیک وقت کھود دینے سے آمدورفت مکمل طور پر معطل ہو چکی ہے۔ شہریوں کو روزمرہ امور کی انجام دہی میں شدید دشواری کا سامنا ہے، جبکہ بزرگوں، بچوں اور مریضوں کیلئے گزرنا بھی مشکل ہو گیا ہے۔اہل علاقہ نے شکایت کی ہے کہ گلیوں میں چلنے کے لیے کوئی راستہ باقی نہیں چھوڑا گیا، جس سے شہری زندگی مفلوج ہو کر رہ گئی ہے۔مکینوں نے انتظامیہ سے پرزور مطالبہ کیا ہے کہ فوری طور پر اس مسئلے کا حل نکالا جائے اور جہاں پائپ لائن بچھائی جا رہی ہے وہاں نکاسی آب کے لیے پلاسٹک پائپس بھی نصب کیے جائیں تاکہ گندا پانی گھروں میں داخل ہونے سے روکا جا سکے اور نکاسی کا نظام بہتر بنایا جا سکے۔انہوں نے خبردار کیا ہے کہ اگر بروقت اقدامات نہ کیے گئے تو مسائل مزید شدت اختیار کر جائیں گے اور شہریوں کی مشکلات میں خطرناک حد تک اضافہ ہو سکتا ہے۔
-
عالمی یومِ آزادی صحافت: احسان اللہ ایاز کو “بیسٹ رپورٹر آف دی ایئر” ایوارڈ سے نواز دیا گیا
ننکانہ صاحب میں عالمی یومِ آزادی صحافت کے موقع پر ریجنل یونین آف جرنلسٹس (RUJ) کے زیر اہتمام ضلع کونسل ہال میں ایک پروقار تقریب کا انعقاد کیا گیا، جس میں صحافتی خدمات کے اعتراف میں ممتاز صحافی احسان اللہ ایاز کو “بیسٹ رپورٹر آف دی ایئر” ایوارڈ سے نوازا گیا۔تقریب میں شہر کے سینئر صحافیوں اور معزز شخصیات نے بھرپور شرکت کی۔ اس موقع پر صدر پریس کلب افضل حق، جنرل سیکرٹری آصف بھٹی، سینئر صحافی سمیع اللہ عثمانی، عرفان رشید بھٹی اور شیخ آصف اقبال سمیت دیگر مقررین نے احسان اللہ ایاز کو مبارکباد پیش کرتے ہوئے ان کی پیشہ ورانہ خدمات کو سراہا۔مقررین نے اپنے خطاب میں کہا کہ صحافت ایک مقدس پیشہ ہے، جس کی بنیاد سچائی، دیانتداری اور امانت پر ہے۔ انہوں نے کہا کہ سچ لکھنے والے صحافیوں کو اکثر دھمکیوں، مقدمات اور مختلف مشکلات کا سامنا کرنا پڑتا ہے، مگر ایک حقیقی صحافی ہر حال میں حق اور سچ کا ساتھ دیتا ہے۔انہوں نے مزید کہا کہ صحافی معاشرے کا آئینہ ہوتا ہے، جو اپنے قلم کے ذریعے سچ اور جھوٹ میں فرق واضح کرتا ہے اور ناانصافی کے خلاف آواز بلند کرتا ہے۔ ایک ایماندار صحافی قوم کا سرمایہ اور معاشرے کی حقیقی آواز ہوتا ہے، تاہم جب قلم بک جائے تو نہ صرف صحافت بلکہ پورا معاشرہ متاثر ہوتا ہے۔مقررین نے عوام سے اپیل کی کہ وہ صحافیوں کی قدر کریں، ان کی حوصلہ افزائی کریں اور اپنے مسائل اجاگر کرنے میں ان کے ساتھ تعاون کریں تاکہ معاشرے میں مثبت تبدیلی لائی جا سکے۔تقریب کے اختتام پر سرپرست اعلیٰ پریس کلب ننکانہ صاحب، بابائے صحافت شیخ منظور احمد شاد نے خصوصی شرکت کی۔ اس موقع پر صدر ڈسٹرکٹ بار ایسوسی ایشن علی ناصر قادری ایڈووکیٹ، سینئر صحافی شاہین اقبال غیور، حبیب احمد، راؤ توقیر الاسلام اور ڈاکٹر شاہنواز قادری نے احسان اللہ ایاز کو “بیسٹ رپورٹر آف دی ایئر” ایوارڈ پیش کیا، جس پر شرکاء نے بھرپور تالیاں بجا کر ان کی حوصلہ افزائی کی۔