Author: Faizan Sheikh

ڈیرہ غازی خان (باغی ٹی وی نیوز رپورٹر) – ڈسٹرکٹ ایمرجنسی آفیسر ریسکیو 1122 انجینئر احمد کمال نے کہا ہے کہ ایسٹر اور گڈ فرائی ڈے کی تقریبات کے موقع پر مسیحی برادری کی حفاظت کے لیے ریسکیو 1122 نے مکمل اقدامات کر لیے ہیں۔
سنٹرل سٹیشن ریسکیو 1122، چوک چورہٹہ میں منعقدہ اجلاس سے خطاب کرتے ہوئے انہوں نے بتایا کہ تہوار کے دوران سیفٹی اور ایمرجنسی کور کے تمام انتظامات مکمل کر دیے گئے ہیں۔ انہوں نے مسیحی برادری کو تہوار کی مبارکباد پیش کرتے ہوئے کہا کہ "ہم سب مل کر اپنی اور دوسروں کی حفاظت کو شعار بنائیں، اور آپکی حفاظت ہماری پہلی ترجیح ہے۔”
انجینئر احمد کمال نے مزید کہا کہ ریسکیو 1122 ہر وقت کسی بھی ایمرجنسی سے نمٹنے کے لیے مستعد اور تیار ہے تاکہ شہری محفوظ اور پرامن ماحول میں تہوار منا سکیں۔

ڈیرہ غازی خان (باغی ٹی وی نیوز، رپورٹر شاہد خان): کمشنر ڈیرہ غازی خان ڈویژن و چیئرمین بورڈ آف انٹرمیڈیٹ اینڈ سیکنڈری ایجوکیشن اشفاق احمد چوہدری نے میٹرک کے جاری سالانہ امتحانات کے سلسلے میں مختلف امتحانی مراکز کا اچانک دورہ کیا۔
انہوں نے گورنمنٹ گریجویٹ کالج فار ویمن ماڈل ٹاؤن میں قائم گرلز امتحانی سنٹر کا معائنہ کیا، جہاں امتحانی عمل، سکیورٹی انتظامات اور فراہم کی جانے والی سہولیات کا تفصیلی جائزہ لیا۔ اس موقع پر کمشنر نے طالبات سے بھی گفتگو کی اور ان سے سہولیات کے بارے میں دریافت کیا۔
بعد ازاں کمشنر نے گورنمنٹ کمپری ہینسو سکول میں قائم بوائز امتحانی مرکز کا دورہ کیا، جہاں پرنسپل محمد حفیظ مستوئی بھی ان کے ہمراہ تھے۔ کمشنر نے نقل کی روک تھام کے لیے کیے گئے اقدامات کا بغور جائزہ لیا اور متعلقہ عملے کو سخت ہدایات جاری کیں۔
کمشنر اشفاق احمد چوہدری نے واضح کیا کہ امتحانات کے دوران نظم و ضبط اور شفافیت پر کسی قسم کا سمجھوتہ نہیں کیا جائے گا۔ انہوں نے متعلقہ افسران کو ہدایت کی کہ طلبہ و طالبات کو بہترین سہولیات فراہم کی جائیں اور کسی بھی شکایت کی صورت میں فوری کارروائی یقینی بنائی جائے۔
انہوں نے مزید کہا کہ صاف و شفاف امتحانی نظام ہی طلبہ کے روشن مستقبل کی ضمانت ہے، اس لیے تمام ادارے اپنی ذمہ داریاں دیانتداری سے ادا کریں۔