Author: غنی محمود قصوری

قصور
شہر میں تجاوزات کے خلاف بڑا آپریشن، فوڈ گیلری میں غیر قانونی تعمیرات مسمار
قصور: گزشتہ روز شہر کی معروف فوڈ گیلری میں ضلعی انتظامیہ کے احکامات پر پیرا فورس نے تجاوزات کے خلاف بڑا آپریشن کرتے ہوئے متعدد غیر قانونی تعمیرات کو مسمار کر دیا
کارروائی کے دوران دکانداروں کی جانب سے لگائے گئے غیر قانونی سائن بورڈز، ناجائز ریمپ، تھڑے اور دیگر تجاوزات کو بھاری مشینری کے ذریعے ہٹا دیا گیا۔ آپریشن کے باعث علاقے میں عارضی طور پر ہلچل رہی جبکہ شہریوں کی بڑی تعداد موقع پر موجود رہی
ضلعی انتظامیہ کے مطابق یہ اقدام عوامی گزرگاہوں کو بحال کرنے، ٹریفک کی روانی بہتر بنانے اور شہر کو تجاوزات سے پاک کرنے کے سلسلے کی کڑی ہے
حکام کا کہنا ہے کہ شہر کے دیگر علاقوں میں بھی بلا امتیاز کارروائیاں جاری رہیں گی اور کسی کو بھی سرکاری جگہ پر ناجائز قبضہ کرنے کی اجازت نہیں دی جائے گی
ذرائع کے مطابق بعض دکانداروں نے کارروائی پر تحفظات کا اظہار کیا تاہم انتظامیہ نے واضح کیا کہ آپریشن قانون کے مطابق اور پیشگی نوٹس کے بعد کیا گیا
شہری حلقوں نے تجاوزات کے خاتمے کے اقدام کو سراہتے ہوئے مطالبہ کیا ہے کہ یہ کارروائیاں مستقل بنیادوں پر جاری رکھی جائیں تاکہ شہر میں نظم و ضبط اور صفائی کی صورتحال بہتر بنائی جا سکے

قصور
تحصیل چونیاں میں شادی پر جانے والا شخص بدترین تشدد کا نشانہ، بال اور بھنویں کاٹ دی گئیں
تفصیلات کے مطابق قصور کی تحصیل چونیاں کے نواحی علاقے تھانہ چھانگا مانگا کی حدود تارا سنگھ میں بااثر افراد کی مبینہ غنڈہ گردی کا واقعہ سامنے آیا ہے جہاں شادی کی تقریب میں شرکت کے لئے تیار ہو کر جانے والے ایک شخص کو راستے میں روک کر تشدد کا نشانہ بنایا گیا
متاثرہ شخص، جسے مقامی افراد ،سائیں ٹائپ”م، قرار دے رہے ہیں، کو ملزمان نے نہ صرف زد و کوب کیا بلکہ اس کے سر کے بال، بھنویں اور مونچھیں بھی زبردستی کاٹ دیں جس سے اس کی تذلیل ہوئی
ذرائع کے مطابق متاثرہ شہری گھر سے مکمل تیاری کے ساتھ شادی میں شرکت کے لیے روانہ ہوا تھا کہ راستے میں بااثر ملزمان نے اسے روک کر بدسلوکی کی
واقعے کے بعد علاقے میں خوف و ہراس پھیل گیا ہے
متاثرہ شخص کی جانب سے تھانہ چھانگا مانگا پولیس کو باقاعدہ درخواست دے دی گئی ہے
پولیس حکام کا کہنا ہے کہ واقعے کی تحقیقات شروع کر دی گئی ہیں اور ملوث ملزمان کو جلد گرفتار کر کے قانون کے کٹہرے میں لایا جائے گا
علاقہ مکینوں نے اعلیٰ حکام سے مطالبہ کیا ہے کہ واقعے کا فوری نوٹس لے کر انصاف فراہم کیا جائے تاکہ ایسے واقعات کی روک تھام ممکن بنائی جا سکے

قصور
شہر قصور جو صوفی شاعر حضرت بابا بلھے شاہ کے نام سے پہچانا جاتا ہے اور برصغیر میں ایک اہم حیثیت رکھتا ہے، آج بنیادی سہولیات کے شدید بحران کا شکار ہے
شہر میں صحت اور صفائی کی صورتحال تشویشناک حد تک بگڑ چکی ہے
بلھے شاہ ہسپتال قصور میں مریضوں کو مناسب سہولیات میسر نہیں
شہریوں کے مطابق صبح کے محدود آؤٹ ڈور کے بعد مریضوں کو لاہور ریفر کر دیا جاتا ہے جبکہ عملے کا رویہ بھی شکایات کی زد میں ہے
دوسری جانب پینے کے پانی کا مسئلہ سنگین صورت اختیار کر چکا ہے
ذرائع کے مطابق شہر کا تقریباً 70 فیصد پانی، جو سرکاری ٹینکیوں کے ذریعے فراہم کیا جاتا ہے، آلودہ اور بدبودار ہے شہریوں کا کہنا ہے کہ پانی میں کبھی کیڑے پائے جاتے ہیں اور کبھی اس سے روہی نالہ جیسی بدبو آتی ہے، جو انسانی صحت کیلئے خطرناک ہے
ماہرین طب کے مطابق آلودہ پانی کے استعمال سے گردوں کی بیماریوں، کینسر، جلدی امراض اور گیسٹرو جیسی وبائیں تیزی سے پھیل رہی ہیں جس نے اہلِ علاقہ کو شدید پریشانی میں مبتلا کر دیا ہے
متاثرہ علاقوں میں مسجد نور، غوثیہ کالونی، کوٹ پیراں، کوٹ قتل گڑھی، کوٹ غلام محمد,کھارا روڈ شاہ عنایت کالونی سمیت دیگر علاقے شامل ہیں جہاں کے مکین بنیادی حق یعنی صاف پانی سے محروم ہیں
شہریوں نے منتخب نمائندے ایم این اے شیخ سعد وسیم سمیت اعلیٰ حکام سے اپیل کی ہے کہ خدارا قصور کے عوام پر رحم کیا جائے اور فوری طور پر صاف پانی کی فراہمی یقینی بنائی جائے تاکہ مزید انسانی جانوں کو خطرات سے بچایا جا سکے

قصور
پیٹرول کی قیمتوں میں ردوبدل، مہنگائی کا طوفان برقرار ، شہریوں کے سوالات بڑھ گئے
تفصیلات کے مطابق حالیہ دنوں میں پیٹرول کی قیمت 321 روپے فی لیٹر سے بڑھا کر 458 روپے تک پہنچائے جانے کے بعد حکومت کی جانب سے بظاہر ریلیف دیتے ہوئے 80 روپے فی لیٹر کمی کا اعلان کیا گیا تاہم اس عارضی کمی کے باوجود مہنگائی کا طوفان تھمنے کا نام نہیں لے رہا
قصور میں پیٹرول کی قیمتوں میں اضافے کے فوری بعد ٹرانسپورٹرز نے کرایوں میں کئی گنا اضافہ کر دیا جبکہ نان، روٹی اور دیگر اشیائے ضروریہ کی قیمتیں بھی بے تحاشا بڑھ گئیں ہیں
شہریوں کا کہنا ہے کہ جب پیٹرول مہنگا ہوتا ہے تو ہر چیز مہنگی کر دی جاتی ہے لیکن جب قیمتیں کم ہوتی ہیں تو اشیاء کی قیمتیں اپنی جگہ برقرار رہتی ہیں
شہریوں نے سوال اٹھایا ہے کہ کیا حکومت صرف پیٹرول کی قیمتوں میں اضافہ اور کمی تک ہی محدود ہے یا پھر وہ مارکیٹ میں دیگر اشیاء کی قیمتوں کو بھی کنٹرول کر سکتی ہے؟
عوامی حلقوں کا کہنا ہے کہ ٹرانسپورٹ کرایوں میں کمی کے حوالے سے کوئی عملی اقدام نظر نہیں آ رہا جس کے باعث عام آدمی کو ریلیف نہیں مل پا رہا
ماہرین کے مطابق قیمتوں میں استحکام کے لیے موثر مانیٹرنگ سسٹم اور سخت حکومتی عملدرآمد ناگزیر ہے بصورت دیگر وقتی ریلیف کا فائدہ عوام تک منتقل نہیں ہو پاتا
شہریوں نے مطالبہ کیا ہے کہ حکومت نہ صرف پیٹرول کی قیمتوں کو متوازن رکھے بلکہ ٹرانسپورٹ کرایوں اور اشیائے ضروریہ کی قیمتوں پر بھی سختی سے عملدرآمد کروائے تاکہ حقیقی معنوں میں عوام کو ریلیف مل سکے

قصور میں ڈسٹرکٹ انفارمیشن آفیسر کی عدم فعالیت، انتظامیہ اور صحافیوں کے درمیان رابطے متاثر
قصور: ضلع قصور میں ڈسٹرکٹ انفارمیشن آفیسر کی پوسٹ عملاً غیر فعال ہونے کے باعث انتظامیہ اور صحافتی حلقوں کے درمیان روابط شدید تعطل اور بدنظمی کا شکار ہو گئے ہیں۔ ذرائع کے مطابق اطلاعات کی بروقت فراہمی، سرکاری مؤقف کی وضاحت اور میڈیا کو آگاہی دینے کا نظام تقریباً مفلوج ہو کر رہ گیا ہے، جس سے نہ صرف صحافی برادری کو مشکلات کا سامنا ہے بلکہ عوام تک درست اور بروقت معلومات کی ترسیل بھی متاثر ہو رہی ہے۔
صحافتی حلقوں کا کہنا ہے کہ ڈسٹرکٹ انفارمیشن آفس کی غیر مؤثر کارکردگی کے باعث خبریں حاصل کرنے اور تصدیق کرنے میں غیر ضروری تاخیر ہو رہی ہے، جبکہ کئی اہم معاملات میں سرکاری موقف سامنے نہ آنے سے افواہوں کو بھی تقویت مل رہی ہے۔
مزید برآں، ذرائع نے انکشاف کیا ہے کہ ڈسٹرکٹ انفارمیشن آفس کے لیے لاکھوں روپے ماہانہ کرایہ پر حاصل کی گئی کوٹھی حکومتی وسائل پر بوجھ بنی ہوئی ہے، جبکہ اس کے برعکس کارکردگی نہ ہونے کے برابر ہے۔ اس صورتحال پر صحافیوں اور شہری حلقوں نے شدید تشویش کا اظہار کیا ہے۔
مقامی صحافیوں نے تجویز دی ہے کہ اگر یہی صورتحال برقرار رہنی ہے تو مذکورہ دفتر کو ختم کر کے ڈی سی آفس کے کسی حصے میں ایک سادہ سی ورک اسٹیشن قائم کر دیا جائے، تاکہ حکومت کی جاری کفایت شعاری مہم کے تحت بجلی، کرایہ اور پٹرول کی مد میں ماہانہ لاکھوں روپے کی بچت ممکن بنائی جا سکے۔
صحافتی و سماجی حلقوں نے اعلیٰ حکام سے مطالبہ کیا ہے کہ فوری طور پر اس صورتحال کا نوٹس لیا جائے، ڈسٹرکٹ انفارمیشن آفس کو فعال بنایا جائے اور میڈیا و انتظامیہ کے درمیان مؤثر رابطہ بحال کرنے کے لیے عملی اقدامات کیے جائیں، تاکہ عوام کو بروقت اور مستند معلومات کی فراہمی یقینی بنائی جا سکے۔

قصور میں طوفانی بارش اور آندھی سے تباہی، جانی و مالی نقصان
گزشتہ شام قصور اور اس کے گردونواح میں آنے والی شدید طوفانی بارش اور تیز آندھی نے بڑے پیمانے پر تباہی مچا دی جس کے نتیجے میں جانی و مالی نقصان ہوا
شدید آندھی کے باعث شہر اور مضافاتی علاقوں میں متعدد درخت جڑوں سے اکھڑ کر سڑکوں پر گر گئے، جبکہ کئی مقامات پر بجلی کے کھمبے بھی زمین بوس ہو گئے
سڑکوں پر درختوں اور کھمبوں کے گرنے سے ٹریفک کا نظام شدید متاثر رہا اور شہریوں کو آمدورفت میں مشکلات کا سامنا کرنا پڑا
ذرائع کے مطابق تھ شیخم کے علاقے میں ایک نجی میرج ہال کا چار دیواری پردہ گرنے سے تین افراد جاں بحق ہو گئے جس پر مقامی آبادی میں شدید غم و غصہ پایا جاتا ہے
قصور رائیونڈ روڈ پر بھی صورتحال انتہائی خراب رہی جہاں درجن کے قریب ہائی ٹرانسمیشن لائن کے کھمبے گر گئے جس کے باعث نہ صرف ٹریفک کی روانی متاثر ہوئی بلکہ بجلی کی فراہمی بھی معطل ہو گئی
شہر کے قریبی مختلف علاقوں میں اب تک بجلی اور انٹرنیٹ سروس بحال نہ ہو سکی ہے جس سے شہریوں کو شدید مشکلات کا سامنا ہے
متعلقہ ادارے بحالی کے کاموں میں مصروف ہیں تاہم مکمل بحالی میں وقت لگنے کا امکان ہے
شہریوں نے ضلعی انتظامیہ سے مطالبہ کیا ہے کہ متاثرہ علاقوں میں فوری امدادی کارروائیاں تیز کی جائیں اور نقصانات کا ازالہ کیا جائے

قصور پرنسپل کی مبینہ غفلت، متعدد طالبات میٹرک کا پہلا پرچہ نہ دے سکیں

قصور کے نواحی گاؤں کے گورنمنٹ گرلز ہائی سکول گرین کوٹ کی پرنسپل ریحانہ سلیم کی مبینہ لاپرواہی کے باعث میٹرک کی کئی طالبات کو رول نمبر سلپس جاری نہ کی گئیں جس کے نتیجے میں متعدد بچیاں کل انگریزی کا پہلا پرچہ دینے سے محروم رہ گئیں

متاثرہ طالبات کے مطابق انہوں نے بارہا درخواست کی مگر پرنسپل نے رولنمبر سلپس دینے سے انکار کر دیا
اہلِ علاقہ چوہدری سعید قمر ایڈووکیٹ ،انوار خان ایڈووکیٹ اسرار احمد مئیو ایڈووکیٹ نے وزیر تعلیم پنجاب رانا سکندر حیات سے فوری نوٹس لینے اور ذمہ دار کے خلاف سخت قانونی کارروائی کا مطالبہ کیا ہے

قصور
صحافیوں کے مسائل کا حل اولین ترجیح ہے ،ساجد حسین انصاری، پی آر او ٹو ڈی پی او قصور
تفصیلات کے مطابق پی آر او ٹو ڈی پی او قصور ساجد حسین انصاری نے کہا ہے کہ ضلع بھر کے سینئر اور جونئیر صحافیوں کے جائز مسائل کا حل ان کی اولین ترجیح ہے اور وہ صحافی برادری کو قدر کی نگاہ سے دیکھتے ہیں
اپنے ایک بیان میں انہوں نے کہا کہ صحافی معاشرے کا اہم ستون ہیں ان کی مثبت تنقید اور جرائم کی نشاندہی ایک تعمیری عمل ہے جس سے پولیس کو بہتری کا موقع ملتا ہے
انہوں نے کہا کہ صحافیوں کو چاہیے کہ وہ ذاتی پسند و ناپسند سے بالاتر ہو کر حقائق پر مبنی رپورٹنگ کریں تاکہ معاشرے میں درست معلومات کی فراہمی یقینی بنائی جا سکے
ساجد حسین انصاری کا مذید کہنا تھا کہ پولیس اور صحافیوں کا باہمی تعاون جرائم کے خاتمے میں اہم کردار ادا کر سکتا ہے
اگرچہ جرائم کا مکمل خاتمہ ممکن نہیں تاہم مؤثر حکمت عملی سے اسے کافی حد تک کنٹرول کیا جا سکتا ہے
انہوں نے واضح کیا کہ ان کے دفتر کے دروازے چوبیس گھنٹے ضلع بھر کے صحافیوں کے لیے کھلے ہیں اور وہ ہر ممکن کوشش کرتے ہیں کہ صحافیوں کے جائز کام فوری طور پر حل کئے جائیں

قصور
نانبائیوں کی من مانیاں عروج پر، شہری مہنگے اور ناقص نان لینے پر مجبور

قصور کے نواحی علاقے موضع کھارا نزد بائی پاس میں نانبائیوں کی من مانیاں کھل کر سامنے آ گئی ہیں جہاں سادہ نان سرکاری نرخوں کے برعکس 25 روپے میں فروخت کیا جا رہا ہے جبکہ اس کا وزن بھی مقررہ معیار سے کم ہو کر صرف 80 سے 90 گرام رہ گیا ہے
اہل علاقہ کے مطابق نان نہ صرف مہنگا دیا جا رہا ہے بلکہ اس کی کوالٹی بھی انتہائی ناقص ہے جبکہ متعدد دکانوں پر صفائی کی صورتحال تشویشناک ہے اور نان پر مکھیوں کا راج ہے جو صحت عامہ کے لیے سنگین خطرہ بن چکا ہے
مقامی آبادی، جس کی تعداد تقریباً 40 ہزار ہے، اس صورتحال سے شدید پریشانی کا شکار ہے
شہریوں کا کہنا ہے کہ انتظامیہ کی عدم توجہی کے باعث نانبائی کھلے عام من مانی کر رہے ہیں اور کوئی پوچھنے والا نہیں
اہلیان علاقہ نے ڈپٹی کمشنر قصور، پیرا فورس اور پنجاب فوڈ اتھارٹی سے فوری نوٹس لینے کا مطالبہ کرتے ہوئے کہا ہے کہ سرکاری نرخوں اور وزن پر عملدرآمد یقینی بنایا جائے صفائی کے ناقص انتظامات کا خاتمہ کیا جائے اور ذمہ داروں کے خلاف سخت کارروائی کی جائے، تاکہ عوام کو ریلیف مل سکے

قصور میں مہنگی اور کم وزن روٹی، شہریوں کا شدید احتجاج، انتظامیہ پر سوالات

تفصیلات کے مطابق قصور شہر بھر میں روٹی کی قیمت اور وزن کے معاملے پر شہریوں میں شدید بے چینی پائی جا رہی ہے
عوام کا کہنا ہے کہ 15 روپیہ میں فروخت ہونے والی روٹی کا وزن محض 60 گرام رکھا جا رہا ہے جو کہ نہ صرف سرکاری نرخنامے کی خلاف ورزی ہے بلکہ کھلا دھوکہ بھی ہے
شہریوں نے شکایت کی ہے کہ نانبائی حضرات من مانی کرتے ہوئے مقررہ وزن سے کم روٹی فروخت کر رہے ہیں جبکہ قیمت پوری وصول کی جا رہی ہے
عوامی حلقوں کے مطابق ضلعی انتظامیہ قصور اور پنجاب فوڈ اتھارٹی اس صورتحال کو کنٹرول کرنے میں مکمل طور پر ناکام دکھائی دے رہے ہیں
نہ ڈپٹی کمشنر کی جانب سے کوئی مؤثر کارروائی نظر آ رہی ہے اور نہ ہی پرائس کنٹرول مجسٹریٹس ،پیرا فورس کی فیلڈ میں موجودگی محسوس ہو رہی ہے
شہریوں کا کہنا ہے کہ اگر یہی صورتحال برقرار رہی تو نانبائیوں کی من مانیاں مذید بڑھ جائیں گی جس کا براہ راست بوجھ غریب عوام پر پڑے گا
انہوں نے حکومت پنجاب اور متعلقہ اداروں سے مطالبہ کیا ہے کہ فوری کارروائی کرتے ہوئے روٹی کے مقررہ وزن اور قیمت پر سختی سے عمل درآمد کروایا جائے
واضح رہے کہ حکومت کی جانب سے روٹی کا وزن اور قیمت باقاعدہ مقرر کی جاتی ہے، تاہم عمل درآمد نہ ہونے کے باعث عوام کو مشکلات کا سامنا ہے