ان دنوں نجی چینل اے آر وائی پر نشر ہونے والے پاکستانی ڈرامہ سیریل ’نند‘ کے کافی چرچے ہیں اور عوام کی جانب سے ڈرامے کو کافی مقبولیت حاصل ہوئی ہے-
باغی ٹی وی : پاکستانی ڈرامہ سیریل ’نند‘ نجی ٹی وی چینل اے آر وائے پر پیر سے جمعرات شام 7 بجے نشر کیا جا تا ہے اس ڈرامے کے مرکزی کردار’نند‘ کو فائزہ حسن ادا کر رہی ہیں فائزہ حسن کے اس کردار کو شائقین کی جانب سے خوب پذیارائی ملی تاہم اس ڈرامے نے تب ایک نیا رخ اختیار کیا جب اس میں گوہر کے کردار کو بھارتی ڈراموں کی طرح دوبارہ زندہ کیا گیا-
بھارتی ڈراموں میں ان کے عقیدے یعنی سات جنموں کے مطابق کردار کو مار کر دوبارہ زندہ کیا جاتا ہے اور بعض دفعہ مرے ہوئے کردار کو پلاسٹک سرجری کے ذریعے دوبارہ زندہ کر دیا جاتا ہے تاہم پاکستانی ڈرامے نند میں بھی کچھ اس طرح سے ہی دکھایا گیا ہے جو کہ بہت ہی حیران کن ہے-
مذکورہ ڈرامے میں گوہر کا کردار فائزہ حسن ادا کر رہی تھیں ان کی موت کے بعد زندہ کر دیا گیا اور پلاسٹک سرجری کے بعد انہیں نئے چہرے کے ساتھ پیش کیا گیا اب گوہر کا کردار جویریہ سعود ادا کر رہی ہیں۔
اس بارے میں ایک ویب سائٹ سے بات کرتے ہوئے فائزہ حسن کا کہنا تھا کہ کہ مجھے دکھائے گئے اسکرپٹ کے مطابق میرا کام صرف گوہر کی موت کے اختتام تک تھاجس کو کرنے کے لیے میں نے رضامندی ظاہر کردی تھی گوہر کا کردار ایک بہت بڑا چیلنج تھا جسے نبھانے کے لیے میں نے بھرپور کوشش کی۔
اداکارہ نے یہ بھی کہا کہ میں واقف ہوں کہ میری اداکاری کی وجہ سے ڈرامے کی ریٹنگ میں اضافہ ہوا جس کی وجہ سے اس ڈرامے کو مزید آگے بڑھا دیا گیا۔
فائزہ حسن نے یہ بھی کہا کہ میرے مطابق ڈرامے کا اختتام گوہر کی موت پرہی ہوجانا تھا لیکن ڈرامے کی اقساط کو مزید بڑھا دیا گیا لیکن یہ بات بھی اہم ہے کہ میرے لیے طویل عرصے تک کسی بھی پراجیکٹ میں کام کرنا بہت مشکل ہے جس کی وجہ میرے چھوٹے بچے ہیں جو کہ توجہ مانگتے ہیں، لہٰذا میں نے ڈرامے میں مزید کام کرنے سے انکار کر دیا۔
’نند‘ کو ثمینہ اعجاز نے تحریر کیا ہے جبکہ اس کے ڈائریکٹر ذیشان علی زیدی ہیں جبکہ اس کی کاسٹ میں اعجازاسلم ،شہروز سبز واری ،منال خان (فائزہ حسن) اور اب جویریہ سعود، سمبل انصاری ،ایاز سمو، ٹیپو شریف اور مہوش قریشی شامل ہیں-
