پی این ایس ہنگور کی کامیابی: موجو دہ دور کی جنگی تیاری کے لئے ایک سبق

بقلم: نوید مشتاق

جب 1971کی پاک بھارت جنگ نے زور پکڑا، تب پی این ایس ہنگور نے پاکستان کے بحری اثاثوں کی حفاظت کے لیے ایک مظبوط دفاعی دھاک بنائے رکھی۔ اس آبدوز کی جانب سے اپنے آپریشنل ایریا میں کیے گئے اقدامات اور کامیابیاں آج بھی پاکستان کا فخر ہیں۔ آبدوز ہنگور نے کامیابی کے ساتھ آپریشن کرتے ہوئے بھارتی بحری جہازآئی این ایس ککُری کو ڈبویا اور دوسرے بھارتی بحری جہاز آئی این ایس کریان کو تارپیڈو فائر کر کے نقصان پہنچایا۔

آبدوز ہنگور نے کمانڈراحمد تسنیم کی سربراہی میں 22نومبر1971کو مختص کیے گئے سمندری علاقے میں گشت شروع کیا۔ اس دوران آبدوز نے بھارتی کاٹھیا وار ساحل کے قریب گشت کیا تاکہ دشمن کی بحری سرگرمیوں پر نظر رکھی جاسکے۔ آبدوز ہنگور نے 9دسمبر کو شمال کی جانب سے اپنے سنسرز پر دشمن کی ایک ریڈیو ٹرانسمیشن سنی اور اس طرف روانہ ہوئی۔ اس ٹرانسمیشن کی جانچ کے بعد یہ معلوم ہواکہ دوبھارتی بحری جہاز آئی این ایس کرپان اور آئی این ایس ککری آبدوز کے خلاف جنگ کرنے کی تیاری کے ساتھ سمندرمیں موجود ہیں۔

آبدوز ہنگور کے کمانڈر ان جہازوں کی صلاحیت جانتے تھے پھر بھی انھوں نے دونوں جہازوں کو نشانہ بنانے کا نڈر فیصلہ کیا۔ آبدوز ہنگور نے آئی این ایس ککُری اور کرپان پر تار پیڈو فائر کیے جس کے نتیجے میں ککُری مکمل تباہ ہو کر ڈوب گیا جب کہ کریان کو شدید نقصان پہنچا۔ پاکستان کی آبدوز کے اس وار سے بھارتی بحریہ کے قیام سے تب تک سب سے بڑا نقصان پہنچا جس میں اُن کا دو قامت جہاز 18افسران اور 176 سیلرز کے ساتھ غرقِ آب ہوا۔ یہ جنگِ عظیم دوئم کے بعد کسی آبدوز کی جانب سے دشمن کے بحری جہاز کو تباہ کرنے کا پہلا واقعہ تھا۔

پاکستانی آبدوز ہنگور کے اس عمل سے کچھ آپریشنل اور اسٹریٹیجک سبق حاصل کرنے کی ضرورت ہے۔ پہلا یہ کہ اپنے سے کئی گنا بڑے اور طاقتور دشمن بحری جہاز کو ڈبونے سے یہ ثابت ہو کہ انڈین اوشن ریجن (IOR) اوربحیرہءِ عرب کے علاقے میں آبدوزکا ہونا پاک بحریہ کے لیے بہت ضروری ہے۔دوسرا یہ کہ اپنے سے کئی گنا بڑے دشمن کواچانک وار کرکے حیران کردینا عددی لحاظ سے چھوٹے مخالف کے لیے ہمیشہ سے ایک بہتر جنگی چال رہی ہے۔

آبدوز ہنگور کا آئی این ایس ککری پر کیا جانے والا حملہ بھی ایک بہترین جنگی چال تھی جس سے اپنے سے کئی گنا بڑے دشمن کو اپنی طاقت استعمال کرنے کا موقع ہی نہیں دیا گیا۔ انٹیلی جنس سرویلنس اینڈReconnaissance (ISR) کسی بھی فوج کے لیے مشکل آپریشنل صورتحال میں کام کرنے کے لیے ایک اہم جنگی چال ہے۔

پی این ایس ایم ہنگور نے اس آپریشن میں کامیابی سے ISRآپریشن انجام دیا۔ ہندوستانی بحری جہازوں کی کھوج لگانے، پاک بحریہ کے ہیڈکوارٹرز تک یہ خبر پہنچانے اور پھر دشمن پر حملہ کرنے تک تمام جنگی ماحول میں کامیاب ISR شاملِ حال رہا۔ انتہائی پیچیدہ اور جنگی ماحول میں اپنے دفاعی احداف کے حصول کے دوران بھی مضبوط تنظیمی درجہ بندی کو برقرار رکھنا پیشہ ورانہ مہارت کا ثبوت ہے۔ انتہائی پیچیدہ ماحول اور تکنیکی مشکلات میں بھی آ بدوز ہنگور کے کمانڈر نے تمام آپریشنل معاملات میں صبرواستقامت کا مظاہرہ کیا۔

پی این ایس ایم ہنگور کی کامیابی کی داستان کا تجزیہ کریں تو اس کے چند جُزو پاک بحریہ کی جدید نیول آپریشنل سرگرمیوں میں استعمال کیے جاسکتے ہیں۔ بھارت کے بڑھتے ہوئے مذموم مقاصد کے جواب میں پاک بحریہ ایک غیر مستقل میری ٹائم اسٹریٹیجی اپنا سکتی ہے جس میں ایک مظبوط آبدوز کی فورس دشمن کے لیے بالواسطہ جنگی حکمتِ عملی کا کام دے گی اور اپنی جدید ترین ISRصلاحیتوں کی بدولت دشمن اچانک وار کر سکے گی۔

یہ سنسرز کا دور ہے جہاں ہر بحری فوج اپنے سطح سمندراور زیرِ آب ا ثاثوں کو سنسرز سے لیس کر کے اپنی ISR صلاحیتوں میں اضافہ کر رہی ہے۔ اور یہ ایک اچھا موقع ہے کہ پاک بحریہ بھی اپنی آبدوزوں میں جدید ترین ISR صلاحیت نصب کروائے۔ بڑھتے ہوئے پاک چین میری ٹائم تعاون کی بدولت پاک بحریہ اپنی آپریشنل سیکیورٹی کو برقرار رکھتے ہوئے بیجنگ سے بھی اپنی آبدوزوں کے لیے جدید سنسنرز لے سکتی ہے۔

کسی بھی فوجی حکمتِ عملی میں اپنے حدف کا درستگی سے نشانہ لینا اور اُسے کاری ضرب لگانا ایک اہم حصّہ ہوتا ہے۔ پی این ایس ایم ہنگور کے اس آپریشن میں جس ایک تاروپیڈو حملے نے اپنے ہدف کو براہِ راست نشانہ نہیں بنایا اُس سے پاک بحریہ کو یہ سبق حاصل ہوا ہے کہ نشانے کی درستگی اور اُس کے مہلک ہونے سے مکمل آپریشنل سیکیورٹی حاصل کی جاسکتی ہے۔ معلومات کے اس دور میں، درست نشانہ بنانے کی صلاحیت اور Stealthٹیکنالوجی کا ہونا، بڑھتے ہوئے بحری ٹریفک اور پیچیدہ آپریشنل معاملات میں نہایت ضروری ہوگیا ہے۔ بحیثیت مجموعی، پی این ایس ایم ہنگور کی کامیابی پاک بحریہ کی آپریشنل اور دفاعی تیاری کے لیے ہمیشہ ایک اہم اور منطقی سبق رہے گا۔

ہنگور ڈے : ایک شاندار یاد

بقلم: حسن زیب:

آزادی حاصل کرنے کے بعد، پاکستان نے یہ سمجھ لیا تھا کہ آزادی کوبرقرار رکھنے کے لئے اپنے دشمن کے مذموم مقاصد کو رد کرنے کی صلاحیت ہونی چاہئے۔ پاکستان نے ا پنی زمینی اورفضائی حدود کے ساتھ ساتھ اپنے ساحلی دفاع کی اہمیت کو بخوبی جان لیاتھا۔ سمندر میں اپنے مقاصد کے حصول کے لئے پاک بحریہ کا قیام عمل میں لایا گیا۔ تاریخی طور پر بحری افواج کے قیام کا بنیادی مقصد اپنے ساحلوں سے دور اثر و رسوخ قائم رکھناہوتاہے لیکن اس کے ساتھ ہی دفاع استحکام اور امن کی اضافی ذمہ داری بھی بحری افواج پر عائد ہوتی ہے۔ اپنی سمندری سرحدوں کے دفاع کے لئے چوکس رہنے کے ساتھ ساتھ پاکستان نیوی،ٹیکنا لوجی اور عالمگیریت کے چیلنجوں کا مقابلہ کرتے ہوئے، باہمی تعاون کی بین الاقوامی ذمہ داریوں کی تکمیل کے لئے علاقائی اور بین الاقوامی سطح پر اپنا کردار بخوبی ادا کر رہی ہے۔

سائز میں عددی طور پر کم ہونے کے باوجود پاکستان نیوی پیشہ ورانہ مہارت کے اعلی معیار کو برقرار رکھتی ہے۔ 1971کی جنگ میں، پاکستان نیوی نے کامیاب کاروائیاں کیں، جن کا مقصد اپنی دفاعی دھاک بٹھانا تھا اور اس نے پاکستان مخالف قوتوں کو منہ توڑ جواب دیناتھا، جس کی مماثلت بحری جنگ کے میدان میں نہیں ملتی۔ 9 دسمبر 1971کو پاکستانی سب میرین پی این ایس ایم ہنگورنے ہندوستانی اینٹی سب میرین فریگیٹ آئی این ایس ککری کو سمندر برد کیا تھا اور آئی این ایس کرپان کو بری طرح نقصان پہنچایاتھا۔ اس تصادم کی اہمیت اس وقت کئی گنا بڑھ جاتی ہے جب اسے اس زاویئے سے دیکھا جاتا ہے کہ یہ دوسری جنگ عظیم کے بعد پہلا موقع تھا کہ سمندر میں براہ راست لڑائی میں کسی روایتی آبدوز نے ایک بحری جہاز کو تباہ کیا تھا۔ یہ سمجھنا ضروری ہے کہ ککری کاواقعہ راتوں رات نہیں ہوا تھا بلکہ1971 میں مشرقی پاکستان کی کشیدہ صورتحال ایسے واقعات کا باعث بن رہی تھی۔

1965 کے تازہ زخموں کے ساتھ، ہندوستانی اپنے حریف پاکستان سے بدلہ لینے کے لئے تمام امکانات تلاش کر رہے تھے اورانھوں نے فیصلہ کیا تھا کہ 1971 ہی ان کے لئے بہترین موقع تھا۔مشرقی پاکستان کی نازک صورتحال اور ہندوستانی میزائل کے خطرے کے باعث تقریباً غیرفعال بحری بیڑے کے باعث پاک بحریہ کی جارحانہ جنگی کاروائی کابوجھ اسکی نوزائیدہ آبدوز فورس پر تھا۔

نتیجتاً پاک بحریہ کی آبدوز ہنگور 22 نومبر 1971 کی شام کے اواخر میں ہندوستان کے کاٹھیاوار ساحل پر گشت کیلئے نکل پڑی۔ پی این ایس ایم ہنگور دشمن کی مسلسل فضائی سرگرمی سے بچتی ہوئی کامیابی کے ساتھ اپنے گشت کے علاقے میں پہنچی اور اپنا گشت شروع کیا۔ البتہ، 9 دسمبر 1971 کو جب آبدوز کاٹھیواڑ کے ساحل کے قریب تھی تو اسے ریڈار پر دو جہاز نظر آئے۔ ان کی شناخت اس کی سونار ٹرانسمیشن کے ذریعہ ہندوستانی جنگی جہاز وں کے طور پر ہوئی اور وہ 6 سے 8 میل کی دوری پر تھے۔ ان کی شناخت اینٹی سب میرین فریگیٹس (آئی این ایس ککری اور آئی این ایس کرپان) کے طور پر ہوئی جو کہ سرچ اینڈ اٹیک آپریشن میں مصروف تھے۔

ہنگور اہداف کے ممکنہ راستے پر انکا انتظار کر رہی تھا اور "ایکشن اسٹیشن” کی کا ل دی جا چکی تھی یعنی” شارک” اپنے تیز دانتوں کے ساتھ شکار کے لئے تیار تھی۔ اگرچہ دشمن اپنا سونار چلارہا تھا، لیکن پھر بھی اسے ہنگور کی موجودگی کا پتہ نہیں چل سکا اور اس وجہ سے آبدوز ہنگور نے اُس کی حیرت کا لطف اٹھایا۔ سمندر کے اس علاقے کی گہرائی کم تھی (60-65 میٹر)جس کے باعث آبدوز سازگار آپریشن کے لئے حالات سازگار نہیں تھے اور سب میرین کی محدود آپریشنل صلاحیت کی وجہ سے دشمن کاسطحی بیڑے لئے حالات سازگار تھے۔

اس کے باوجود ہنگور نے اپنے سفر کو جاری رکھا اور فائرنگ کا ایک اچھا موقع حاصل کرنے کے بعداس نے اس حملے کا آغاز آئی این ایس کرپان پر ایک ٹارپیڈو فائر کرکے کیا۔ٹارپیڈو ہندوستانی جنگی جہاز کے نیچے سے گزرا اور پھٹنے میں ناکام رہا۔ حیرت کا عنصر ختم ہو گیا اور دشمن کے جنگی جہاز کے عملے کو معلوم ہو گیا کہ ان پر حملہ ہوا ہے۔حالات اب مکمل طور پر دشمن کے حق میں ہو گئے تھے اور آئی این ایس ککری ٹارپیڈو لانچ پوزیشن کی جانب بڑھنے لگا۔

ہنگور کے عملے نے اپنے حواس قابو میں رکھتے ہوئے اپنا ہدف ککری پر منتقل کیا، اور اس پر دوسرا ٹارپیڈو فائر کیا۔ یہ ایک فوری حملہ تھا جس کا مقصد ککری کے حملے کوناکام کرنا تھا۔ ٹارپیڈو سیدھے ہدف کی طرف گیا اور آئی این ایس ککری کی کیل کے نیچے جا کر پھٹ گیا۔ اس شاندار کارروائی میں، آئی این ایس ککری ٹارپیڈو لگنے کے بعد دو منٹ کے اندر اندر ڈوب گئی۔کمانڈنگ آفیسر سمیت 18 افسران اور 176 سیلرز اپنی زندگی سے ہاتھ دھو بیٹھے۔ یہ ہندوستانی بحریہ کے لئے ایک کاری ضرب ثابت ہوئی، جس نے ایک ہی جھٹکے میں کراچی کے سا حل کے قریب موجود پاک نیوی کے جہازوں پر میزائل حملوں کی من گھڑت کہانیوں اور دعووں کو بھی غرق آب کر دیا۔

ہنگورکی کارروائی کی اہمیت کے کئی پہلو تھے۔ اس نے نہ صرف پاک بحریہ کی جنگی حکمت عملی میں برتری کا ثبو ت دیا بلکہ اس کااسٹریٹجک اثر اس سے بھی زیادہ اہم تھا کیونکہ ہندوستانی بحریہ نے اس واقعہ کے بعد میزائل حملہ "آپریشن ٹرائنف” منسوخ کردیا، جسے 10 دسمبر کو شروع کیا جانا تھا۔تاہم، 9 دسمبر کوہرسال ہنگور ڈے منایا جاتا ہے تا کہ ان تمام بہادر غازیوں کو خراج تحسین پیش کیا جا ئے جنھوں نے 1971کی جنگ میں فریگیٹ آئی این ایس ککری کو ڈبو کر اور آئی این ایس کرپان کو شدید نقصان پہنچاکر دشمن کے دلوں پر اپنے خوف کی دھاک بٹھا دی۔

آبدوزہنگور۔پاک بحریہ کی جنگی تاریخ کا سنہری باب
سید ایلیا حسن

صدیوں سے انسان کی کوشش رہی ہے کہ وہ جنگی ہتھیاروں میں انقلاب لے آئے اور اس روئے فانی کا ہر ملک دوسرے ملک سے جنگی ہتھیاروں میں سبقت لے جانے کے در پے ہے۔ اس مقصد کے حصول کے لیے روزانہ نت نئے تجربات کیے جاتے ہیں۔ان تجربات میں زیرِ آب قوت ” آبدوز ” کا تجربہ کافی حیران کن ثابت ہوا۔ پہلی جنگ ِعظیم میں جرمن بحری قوت میں شامل آبدوزوں نے دشمن کو پسپا ہونے پر مجبور کر دیا۔ جرمنی نے ان آبدوزوں کو U-Boatsکا نام دیا۔ جرمنی کے حریف ممالک کو اس ہتھیار کی وجہ سے بہت بڑے نقصان سے دو چار ہونا پڑا۔جرمنی کے کامیاب تجربے کے بعد ہر ملک نے اپنے طور پر اس ہتھیار کو بنانے یا حاصل کرنے کی کوشش شرو ع کی۔عالمی بحری افواج میں آبدوز کو ایک خاص مقام حاصل ہوا۔ اس ہتھیار کے حامل ممالک کوطاقتورترین ممالک کی فہرست میں گرداناجانے لگا۔ دوسری جنگِ عظیم میں بھی اس ہتھیار نے خوب تباہی مچائی۔

آبدوز کو اس کی ساخت اور قابلیت کے اعتبار سے بہت اہمیت کا حامل تصور کیا جاتا ہے۔ یہ ایک ایسا ہتھیار ہے جس کے ذریعے خاموشی سے نہ صرف دشمن پر نظر رکھی جا تی ہے بلکہ زمانہ جنگ میں اس کی تمام حربی چالوں کو پسپا کیا جاتا ہے۔ ان تمام خوبیوں اور صلاحیتوں کے پیشِ نظر پاکستان نے 1964میں پہلی آبدوز اپنے بحری بیڑے میں شامل کی جس نے بعد ازاں 1965 کی جنگ میں دشمن کی بحری فوج پر ایسا خوف طاری کیا کہ وہ اپنی بندر گاہوں میں دُبک کر رہ گئی۔ اس خوفناک ہتھیار کو ” غازی ” کا نام دیا گیا جس نے اپنے نام کی پوری لاج رکھی اور دشمن کو ایک بھاری نقصان اٹھانا پڑا۔

1965 کی جنگ میں پاکستان نیوی آبدوز غازی کی مقبولیت کے بعد مزید آبدوزوں کی شمولیت کی کوششیں تیز کر دی گئیں۔ جس کا نتیجہ یہ نکلا کہ بہت ہی قلیل عرصے میں مزید 3 آبدوزوں کو پاکستان کے بحری بیڑے میں شامل کیا گیا۔ ان کے نام شوشک، مانگرو اور ہنگور رکھے گئے۔

پاکستان کی جنگی تاریخ میں جہاں آبدوزغازی کے کارنامے:
سنہرے الفاظ سے رقم ہیں وہاں آبدوز ہنگورکے جنگی معرکے کا روشن باب بھی تاریخ کا حصہ ہے۔پاکستانی آبدوز ہنگور نے دشمن پر ایسی ضربِ کاری لگائی جس کا زخم کبھی مندمل نہیں ہو سکتا۔ دسمبر کی سرد راتوں کے وہ تاریخی دن کبھی بھلائے نہیں جا سکتے جب پاکستانی آبدوز ہنگور دشمن کے پانیوں میں مصروفِ گشت تھی۔ آبدوز کی کمان کمانڈر احمد تسنیم کر رہے تھے جو بعد ازاں وائس ایڈمرل کے عہدے سے ریٹائر ڈہوئے۔ 9 دسمبر کے دن جب سہ پہر کا وقت بیت چکا تھاتب آبدوز کے سینسر ز پر نقل و حرکت کو نوٹ کیا گیا۔ اس بات پر کامل یقین کے لیے آبدوز کو پیری سکوپ کی گہرائی تک لا کر ریڈار کا جائزہ لیا گیا۔ اس جائزہ سے یہ بات سامنے آئی کہ دشمن کے دو آبدوز شکن بحری جہاز ناپاک سازشوں میں مصروف ہیں۔ یہ آبدوز شکن بحری جہاز آئی این ایس کُکری(Khukri) اور کِرپان(Kirpan) تھے۔ ان جہازوں کی خاصیت یہ تھی کہ کسی بھی آبدوز کو ڈھونڈ نکالنے اور تباہ کرنے کے تمام آلات سے لیس تھے۔ مگر جہاں حوصلے بلند ہوں اور اللہ کی مدد ساتھ ہو وہاں یہ باتیں بے معنی ہو جاتی ہیں۔

ان بحری بیڑوں کی موجودگی کا علم ہوتے ہی پاکستانی آبدوز ہنگور نے جلدہی ان کو غرق کرنے کا منصوبہ تیار کر لیا۔ دشمن کو خبر بھی نہ تھی کہ ان کے نیچے ہی ان کی موت کا سامان تیار کیاجا رہا ہے۔ سب سے پہلے آئی این ایس کِرپان کو نشانے پر رکھ کر ایک تار پیڈو داغا گیا۔ ایک ہولناک آواز کے ساتھ سمندر کی خاموشی کو چیرتا ہوا یہ ہومنگ تار پیڈو دشمن کو غرق کرنے نکل پڑا،مگر نشانہ چوک گیا۔ہدف کو نشانہ بنانے میں ناکامی کے بعد پاکستانی آبزادوں کے حوصلے پست نہ ہوئے بلکہ دوسرے تار پیڈو کو ہدف کی طرف داغا۔ اس بار ہدف کُکری کو بنایا گیا۔ تار پیڈو نے سمندر میں اُترتے ہی ہلچل مچا دی۔ برق رفتاری سے اپنے تمام مراحل عبور کرتے ہوئے آئی این ایس کُکری کی جانب بڑھنے لگا۔ تار پیڈو نے کُکریکے عین نیچے پہنچ کر زور دار دھماکہ کیا۔ آئی این ایس کُکریکچھ ہی ساعتوں میں 18 آفیسرز اور 176 سیلرز کے ساتھ سمندربُرد ہو گیا۔ اپنی اس ناقابلِ فراموش کامیابی پر پاکستانی آبزادوں کے حوصلوں کو ایک نئی تقویت ملی اور ان کا اگلا ہدف کِرپان تھا۔

ٓکُکری کی تباہی کا منظر ہر آنکھ نے دیکھا جو کِرپان پر موجود تھی۔ اب انہیں بھاگ نکلنے کے علاوہ کوئی چارہ نظر نہ آیا۔ حملے کی منصوبہ بندی کو حتمی شکل دے کر کمانڈر احمد تسنیم نے کِرپان پر حملے کا حکم دیا۔ تار پیڈو نے اس بار کِرپان کودبوچ لیا۔ اور اس کے بیشتر حصے کو ناکارہ بنا کر واپس بھاگنے پر مجبور کر دیا۔ آئی این ایس کِر پان دشمن کے لیے عبرت کا نشان بن کر واپس پہنچا۔ پورے ملک میں ہنگور کے کارناموں کی صدائیں گونجنے لگیں اور دشمن کو ایک ہولناک شکست سے دو چار کرنے والی پاکستانی آبدوز کے چرچے ہونے لگے۔
دشمن کو ایک نا قابل فراموش شکست سے دو چار کرکے پاکستانی آبدوز ہنگور واپس اپنے پانیوں میں کامیابی سے پہنچ گئی۔ اس جانباز آبدوز نے پاکستان کی جنگی تاریخ میں ایک اور سنہرے باب کا اضافہ کیا جو کہ رہتی دنیا تک یاد رکھاجائے گا۔ پاکستانی آبدوز کے اس معرکے کو پوری دنیا میں پذیر ائی ملی اوردشمن کو پیغام ملا کہ اگر کسی نے بھی پاک وطن پر بری نگاہ ڈالی تو اسے سوائے رسوائی کے کچھ حاصل نہ ہوگا۔

پاکستان کا روایتی حریف آئے دن اپنی فوجی قوت کو بڑھانے کی کوششوں میں مصروف ہے اس کی تمام تر کاوشیں بحر ہند میں اپنی دھاک بٹھانے پر مبذول نظر آتی ہیں ان تمام عزائم سے پاکستانی فوج بھی پوری طرح آگا ہ ہے۔ اپنی بحری قوت کو تقویت دینے کے لیے پاکستان نے چین سے جدید ہتھیاروں اور آلات سے لیس آٹھ آبدوزوں کے حصول کامعاہدہ کیا۔جدید ٹیکنالوجی سے لیس ان آبدوزوں سے ملک کی بحری سرحدوں کی حفاظت میں مزید مدد ملے گی۔ اللہ پاکستانی فوج بالخصوص پاک بحریہ کا حامی و ناصر ہو اور اسے ایسا مقام اور دبدبہ عطا فرمائے کہ دشمن اس کا نام سن کر لرزنے لگے۔