Author: عائشہ ذوالفقار

انسان کی تخلیق فطرت سلیم پر ہوئی ہے۔ اس کے والدین، دوست احباب اور ماحول اس کی طبع کو متاثر کیے بغیر نہیں چھوڑتا اور انسان زمانے کے ساتھ ساتھ بہت سی تبدیلیوں سے گزرتا ہوا کچھ مخصوص عادات اپنا لیتا ہے جس کو اس کی فطرت، نیچر یا طبیعت کا نام دیا جا سکتا ہے۔ خوب معلوم رہے کہ اس طبیعت کا انحصار تین بنیادی مراکز پر ہے جو اس کے والدین، قریبی لوگ اور ماحول ہیں۔ ماحول میں آنے والی قدرتی و مصنوعی تبدیلیاں اس کو اثر انداز کرتی ہیں، والدین اور اقرباء کا عمل، ان کی گفتگو اور الفاظ اس کو متاثر کرتے ہیں اور انسان ایک خاص سانچے میں ڈھلتا چلا جاتا ہے۔

انسانی رویے انہیں تبدیلیوں کے زیر اثر وجود پاتے ہیں اور اسی سے متاثر ہو کر انسان صحیح اور غلط کے اپنے معیارات مقرر کرتا ہے۔ کن باتوں سے اسے راحت حاصل ہوتی ہے اور کون سی باتیں اس کے لیے رنجیدہ خاطر ہیں سب انہیں عوامل پر منحصر ہے۔

ان تینوں طبعی عوامل کے ساتھ ایک چوتھا عامل ابلیس، اس کی ذریت اور تلبیسات ہے۔ یہ ایک مضبوط محرک ہے جو انسان کے ہر جذبے، سوچ اور عمل پر اثر انداز ہونے کی کوشش کرتا ہے۔ انسان اگر فطرت سلیم پر قائم رہے اور اللہ تعالیٰ کے ذکر کو اپنے لیے حفاظتی حصار بنا لے تو یہ محرک اس پر اثر انداز نہیں ہو سکتا مگر بتقاضائے بشریت انسان بہت سے مقامات پر اپنی حفاظت سے غافل ہو کر اس دامِ پرفریب میں آ جاتا ہے اور پھر جو ابلیس چاہتا ہے اس سے کرواتا ہے اور اس ساری تخریب کاری کا ذمہ دار تو بہرحال یہ انسان خود ہی قرار پاتا ہے۔

انہی تخریبی جذبات میں حسد، بغض و عناد اور آپس کی رنجشیں ہیں جو انسان کے دین اور دنیا کو تباہ کر کے رکھ دیتے ہیں۔ ہادی برحق صلی اللہ علیہ وسلم نے ایسی ہی صورتحال کا تذکرہ اپنے اصحاب رضی اللہ عنہم سے ان الفاظ میں کیا:

عَنْ عَبْدِ اللهِ بْنِ عَمْرِو بْنِ الْعَاصِ عَنْ رَسُولِ اللهِ ‌صلی ‌اللہ ‌علیہ ‌وآلہ ‌وسلم ‌أَنَّهُ قَالَ: إِذَا فُتِحَتْ عَلَيْكُمْ (خَزَائِن) فَارِسُ وَالرُّومُ أَيُّ قَوْمٍ أَنْتُمْ؟ قَالَ عَبْدُ الرَّحْمَنِ بْنُ عَوْفٍ: نَقُولُ كَمَا أَمَرَنَا اللهُ. قَالَ رَسُولُ اللهِ صلی اللہ علیہ وسلم : أَوَ غَيْرَ ذَلِكَ تَتَنَافَسُونَ ثُمَّ تَتَحَاسَدُونَ ثُمَّ تَتَدَابَرُونَ ثُمَّ تَتَبَاغَضُونَ أَوْ نَحْوَ ذَلِكَ ثُمَّ تَنْطَلِقُونَ فِي مَسَاكِينِ الْمُهَاجِرِينَ فَتَجْعَلُونَ بَعْضَهُمْ عَلَى رِقَابِ بَعْضٍ

عبداللہ بن عمر و بن عاص رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: جب فارس اور روم کے(خزانے) تم پر کھول دیئے جائیں گے، تو اس وقت تم کس طرح کے بن جاؤ گے؟ عبدالرحمن بن عوف‌رضی اللہ عنہ نے کہا: ہم وہی بات کہیں گے جو اللہ تعالیٰ ہمیں حکم دیا ہے۔ (یعنی شکر کریں گے)۔ آپ صلی اللہ علیہ وسلم نے فرمایا: اس کے علاوہ بھی، تم ایک دوسرے سے رشک کرو گے، پھر حسد کرنے لگو گے، پھر ایک دوسرے سےپیٹھ پھیرو گے، پھر آپس میں بغض رکھو گے، یا اسی طرح کچھ کرو گے، پھر تم مہاجرین کے گھروں کی طرف جاؤ گے اور انہیں ایک دوسرے کی گردنوں پر رکھو گے(ایک دوسرے کا حکم بناؤ گے)۔
(سلسلہ احادیث صحیحہ، حدیث :2035)

حسد، بغض اور عناد ایسے زہریلے عناصر ہیں جو معاشرتی زندگی کو تہ و بالا کر کے رکھ دیتے ہیں اور انسان سکون قلب سے محروم ہو جاتا ہے مگر ابلیس اس کو یہ سارے حالات خوشنما کر کے دکھاتا ہے اور وہ اپنے آپ کو عین حق پر جانتا ہے۔ انا پرستی کا بت انتہائی طاقتور ہو جاتا ہے اور انسانیت کا جذبہ معدوم ہو جاتا ہے۔ ایسے میں الہامی ہدایت ہی ہمارے لیے مینارہ نور کی حیثیت رکھتی ہے اور عناد کے بحر ظلمات سے بھائی چارہ اور باہمی انس و محبت کے روشن جہان میں لانے کا ذریعہ بنتی ہے۔

حَدَّثَنَا عَبْدُ اللَّهِ بْنُ مَسْلَمَةَ، ‏‏‏‏‏‏عَنْ مَالِكٍ، ‏‏‏‏‏‏عَنْ ابْنِ شِهَابٍ، ‏‏‏‏‏‏عَنْ أَنَسِ بْنِ مَالِكٍ، ‏‏‏‏‏‏أَنّ النَّبِيَّ صَلَّى اللَّهُ عَلَيْهِ وَسَلَّمَ، ‏‏‏‏‏‏قَالَ:‏‏‏‏ لَا تَبَاغَضُوا وَلَا تَحَاسَدُوا وَلَا تَدَابَرُوا وَكُونُوا عِبَادَ اللَّهِ إِخْوَانًا وَلَا يَحِلُّ لِمُسْلِمٍ أَنْ يَهْجُرَ أَخَاهُ فَوْقَ ثَلَاثِ لَيَالٍ .

نبی اکرم صلی اللہ علیہ وسلم نے فرمایا: تم لوگ ایک دوسرے سے بغض نہ رکھو، ایک دوسرے سے حسد نہ کرو، اور ایک دوسرے کو پیٹھ نہ دکھاؤ ( یعنی ملاقات ترک نہ کرو ) اور اللہ کے بندے بھائی بھائی بن کر رہو، اور کسی مسلمان کے لیے یہ درست نہیں کہ وہ اپنے بھائی سے تین دن سے زیادہ ملنا جلنا چھوڑے رکھے ۔
(سنن ابی داؤد، حدیث: 4910)

مام ابن قیم رحمہ اللہ، ابن تیمیہ رحمہ اللہ کے خاص تلامذہ میں سے ہیں۔ تصوف اور سلوک کی صحیح اسلامی شکل کو انھوں نے اپنی تصانیف کے ذریعے واضح کیا۔ مدارج السّالكين میں وہ لکھتے ہیں :

‏طبعٌ مذموم، نسأل اللَّه العافية

قال الإمام ابن القيِّم – رحمه اللّٰه -:

كثيرٌ من النّاس لا يهنأ له عيشٌ في يومٍ
لا يؤذي فيه أحدًا من بني جنسه،

ويجد في نفسه تأذيًا بِحمل تلك السمّية
والشر الذي فيه، حتى يفرغهُ في غيره،

فيبرد عند ذلك أنينهُ، وتسْكن نفسَه.

مدارج السّالكين (٧٩/١)

بد طینت طبع، ہم اللہ تعالیٰ سے عافیت طلب کرتے ہیں

امام ابن القیم رحمۃ اللہ علیہ فرماتے ہیں:

بہت سے لوگ اپنی زندگی کا ایک دن بھی اس حال میں نہیں گزارنا چاہتے
کہ وہ اپنے ہم جنس (کسی دوسرے انسان) کو تکلیف نہ دیں

وہ اپنے آپ کو تکلیف میں محسوس کرتے ہیں اس زہر سے جو ان کے اندر بھرا ہوا ہے
اور اس کا ضرر اٹھائے رکھتے ہیں حتی کہ اسے کسی اور کے جسم میں داخل کر دیں

پھر کہیں جا کر ان کا غضب ٹھنڈا ہوتا ہے اور ان کی روح کو تسکین ملتی ہے۔

مدارج السّالكين (جلد 1/صفحہ 79 )

کس احسن انداز میں انھوں نے انسان کے دو رویوں کو بیان کر دیا ہے۔ پہلا رویہ انسان کا دسرے انسانوں کے ساتھ اور دوسری طرف اس کی رب تعالیٰ سے لگائی گئی امیدیں۔ انسان کا اپنا تو یہ حال ہے کہ وہ خوامخواہ دوسروں کے لیے اپنے دل میں عناد بھرے رکھتا ہے اور ان کو اذیت دیے بغیر اطمینان نہیں پاتا۔ دوسروں کو ایذا دینے کو ہم اپنی تسکین کا ذریعہ بنا بیٹھے ہیں اور اللہ تعالیٰ سے عافیت کے طلبگار ہیں۔ کیونکر ممکن ہے کہ اللہ تعالیٰ کی مخلوق کو جسے اللہ تعالیٰ نے اپنے عیال کہا، ہم رنج پہنچائیں اور بدلے میں اللہ تعالیٰ سے عافیت کا سوال کریں۔ ہرگز نہیں بلکہ دنیا کے غموم و ھموم، وباؤں اور بیماریوں سے عافیت چاہتے ہیں تو اپنے قلب کی اصلاح کیجیے۔ دوسروں کو معاف کرنا سیکھیے اور اپنے دل کو وساوس سے پاک کر لیجیے۔ جب آپ کے دل میں دوسروں کے لیے عناد کی جگہ محبت ہو گی تو کائنات کا مالک بھی آپ کو عافیت عطا فرمائے گا۔

وبا
"ماں! بھوک لگی ہے،روٹی دے دو” نقاہت بھری ننھی سی آواز اس کے قریب ہی ابھری تھی۔
"ماں! تم سنتی کیوں نہیں،مجھے بھوک لگ رہی ہے،روٹی دے دو نا” آواز پھر آئی تھی مگر وہ اب بھی چپ سادھے بیٹھی تھی۔
"ماااااااں! مجھے بھوک لگ رہی ہے” اب کے آواز میں شدت ابھری تھی مگر وہ اب بھی بغیر اس آواز پر توجہ دیئے بے تاثر آنکھوں سے دروازے کو تک رہی تھی۔

"ماں! بابا ہوتے تو مجھے روٹی لاکر ضرور دیتے،بابا بہت بہادر تھے وہ فوجیوں سے بھی نہیں ڈرتے تھے،تم بالکل بھی اچھی نہیں ہو،روٹی بھی نہیں دیتی بات بھی نہیں سنتی” منہ بسورے وہ ننھی کلی شکووں کی پٹاری کھولے بیٹھی اور ماں خشک بنجر آنکھیں لیے یوں بے حس و حرکت بیٹھی تھی جیسے بہری ہی ہوگئی ہو۔

"میں جنت میں جاؤں گی نا تو اللہ کو بھی تمہاری شکایت لگاؤں گی اور بابا کو بھی بتاؤں گی تم مجھے روٹی نہیں دیتی تھی، ماں! چلو ابھی جنت چلتے ہیں بس، وہاں اللہ تعالی سے کھانا بھی لیں گے اور بابا بھی مل لیں گے۔ وہاں، چلو ماں۔۔۔اب اٹھو بھی۔ اب کی بار ننھے ننھے ہاتھوں نے اس کو جھنجھوڑا تھا اور وہ جو پتھر کی مورت بنی بے حس و حرکت بیٹھی تھی،ان جملوں نے گویا اس میں کرنٹ بھردیا تھا، خشک ویران آنکھوں میں چمک سی بھرگئی تھی ،تیر کی تیزی سے وہ اٹھی اور چادر سر پر جمائے، پانچ سالہ زاریہ کا ہاتھ تھامے دروازے کی طرف بڑھی اور کنڈی کھول کر سنسان گلی میں نکل گئی تھی۔

"اے اے ! کہاں جا رہی ہے تو؟ رک ،ارے رک ۔۔۔!” اپنے پیچھے چلاتے ہندو فوجی کی للکار کو ان سنی کرتی وہ زاریہ کو گھسیٹتی تیز قدموں سے آگے بڑھ رہی تھی کہ ایک دم فضا میں تڑتڑاہٹ کی آواز گونجی تھی اور ساتھ ہی زاریہ کی معصوم چیخ بھی، وہ ٹھٹھک کر رکی تھی اور بے دم ہوکر گرتی زاریہ کو لپک کر سینے سے لگایا تھا۔
"اللہ! ” آخری ہچکی کے ساتھ یہ لفظ زاریہ کے لبوں سے ادا ہوا تھا اور زاریہ کو سینے سے چمٹائے اس کی پشت سے بہتے لہو میں اپنے تر بتر ہاتھوں کو تکتی وادئ کشمیر کی اس بلکتی ماں نے ساتھ چھوڑتے حواس کے ساتھ تڑپ کر دور ساتویں آسمان پر متمکن ستر ماؤں سے بھی زیادہ پیار کرنے والی اس وحدہ لاشریک ذات کو شکوہ کناں نگاہوں سے تکا تھا اور عرش ہل گیا تھا۔۔۔

آناً فاناً فیصلہ ہوا تھا۔۔۔زمین والوں پر وبا چھوڑ دی گئی تھی۔۔۔
وہ آزاد تھے مگر "موت” کے نادیدہ خوف نے ان کو گھروں میں محصور کردیا تھا۔۔۔
جگمگاتے شہر اور پر رونق گلیوں میں گویا ایسا سناٹا در آیا تھا جیسے کسی عفریت نے یہاں اپنے پنجے گاڑ دیے ہوں یا کسی آسیب کی افواہ نے لوگوں کو وہاں سے دور بھگادیا ہو۔۔۔
ملاقات تو دور ایک دوسرے کی شکلیں تک دیکھنے کو ترس گئے تھے۔۔۔
اور سزا صرف یہیں تک محدود نہیں تھی بلکہ۔۔۔۔خدا نے اپنے گھر کے دروازے بھی ان پر بند کرلیے تھے!

#سفیہِ برگ گل

انہوں نے کہا کہیں نظر نہ آنا
جواب ملا "ٹھیک ہے نہیں نظر آئیں گے لیکن کیوں” ؟
انہوں نے بتایا "تمہارا نام اور تمہارا ہر اچھا کام دنیا والوں کو چبھتا ہے”
جواب ملا "نام نہیں نظر آئے گا البتہ کام نہ رکنے والا ہے اور نہ رکے گا.”

پھر دنیا والوں نے دیکھا سب کچھ ختم کر دیا گیا . گھنے درختوں کی گھنی آور ٹھنڈی چھاؤں سے تمام مسافر اٹھا دئیے گئے اور اس سایہ چمن سے محروم کر دئیے گئے جو سالہا سال سے گرتے پڑتے تھکن سے چور مسافروں کو حوصلہ اور تسکین بخش رہا تھا.

اللہ کی مرضی اور اللہ کے فیصلے اللہ سے بڑھ کر اور کوئی نہیں جانتا
کرونا جنگ شروع ہوئی تو وہ گمنام مسافر اور بے نام راہی جو تپتے صحراؤں میں چلتے چلتے گھنی چھاوں والے درختوں سے محروم ہو کر ادھر ادھر بھٹک رہے تھے… منزل تک پہنچنے سے مایوس ہو رہے تھے نئے ولولوں کے ساتھ دوبارہ عازم سفر ہوئے. نیکی کبھی فنا نہیں کی جا سکتی. احسان کا بدلہ احسان سے بڑھ کر کچھ نہیں. وہ نیکی اور اچھائی کے درس جو امت کے نوجوانوں کے دل میں بٹھا دئیے گئے حالات کے اتار چڑھاؤ کے باعث اتنی جلدی مٹنے والے نہیں ہوتے. حکومتوں کے فیصلے بیشک بجا ہو گے لیکن یہ بھی تو حقیقت ہے
افراد کے ہاتھوں میں ہے اقوام کی تقدیر
ہر فرد ہے ملت کے مقدر کا ستارہ….!

کرونا وائرس کی اس جنگ میں جس وقت حکومتی ایوانوں میں ٹائیگرز فورس کے ابھی صرف مشورے چل رہے تھے…. اس وقت "تلہ گنگ کرونا فائیٹرز” میدان میں اتر چکے تھے . جس وقت ٹائیگرز فورس کی شرٹیں پرنٹ ہو رہی تھیں کرونا فائیٹرز ایک تاریخ رقم کر رہے تھے. تلہ گنگ کا ایک نوجوان….. ایک سرکاری سکول ٹیچر اٹھا اور اپنے چند رفقاء کے ساتھ ملکر کرونا وائرس کی اس جنگ میں ہراول دستہ بن کر سامنے آیا. اور میڈیا پر ایک بار پھر یہ تاریخی الفاظ گونج گئے کہ” کسی بھی حادثے میں جہاں ابھی فوج اور سرکاری ادارے نہیں پہنچتے یہ لوگ وہاں پہلے پہنچ جاتے ہیں ”

ایک سرکاری سکول ٹیچر کو کسی "اچھے کام” سے نہ تو روکا جا سکتا اور نہ ہی اس پر انگلیاں اٹھائی جا سکتی ہیں . کیوں کہ وہ سرکاری بندہ ہے. وہ "ہم” میں سے ہی ہے اس لیے جو اس کے ساتھ ہے وہ بھی” ہم” میں سے ہی ہے.

سفیہِ برگِ گل بنا لے گا قافلہ مورِ ناتواں کا
ہزار موجوں کی ہو کشاکش مگر یہ دریا سے پار ہو گا

خدا کے بندے تو ہیں ہزاروں بنوں میں پھرتے ہیں مارے مارے
میں اس کا بندہ بنوں گا جس کو خدا کے بندوں سے پیار ہو گا

(اللہ تعالیٰ عرفان صادق صاحب اور ان کے رفقاء کو ریاکاری اور ہر قسم کے فتہ و فساد سے محفوظ رکھے )

#رنگِ_سفیر

اصل حقدار کون؟؟؟

سورج ڈھل چکا تھا سائے لمبے ہوکر معدوم ہونے کے قریب تھے اور شام اپنا سحر طاری کرنے کو تھی ایسے میں راولپنڈی کے ایک غیر معروف چوک میں ایک دوست کا انتظار کرنے کیلئے جیسے ہی گاڑی روکی تو مختلف اطراف سے چند بظاہر مزدور نظر آنے والے لوگ میری گاڑی کے شیشوں سے مجھ سے مخاطب ہونے لگ گئے بھائی صبح سے بیٹھے ہیں مزدوری نہیں ملی کچھ راشن ہی دے دیں۔

چونکہ پچھلی سیٹ پر پڑے راشن کے پیک شاید ان کو نظر آ گئے تھے۔

میں ان کی مفلوک الحالی اور چہروں پر طاری مسکینیت سے متاثر ہوکر ان لوگوں کو راشن دینے کا ارادہ کر ہی چکا تھا لیکن اس سے قبل میں نے ان چاروں مزدوروں سے کہا کہ آپ سب میرے ساتھ گھر چلو تھوڑا سا کام ہے معقول مزدوری بھی دوں گا اور راشن بھی۔ بس میرا اس بات کا کہنا ہی تھا کہ وہ سب پیشہ ور بھکاری جو بظاہر مزردورں کے کیل کانٹوں سے لیس تھے مجھ سے پیچھے آکر رکنے والی پراڈو کے اردگرد ہوگئے اور چند منٹ میں اس گاڑی میں موجود خدا ترس خاتون سے بھاری بھرکم راشن کے پیک لیکر رفو چکر ہو چکے تھے۔

وہ راشن پیک دینے والی خاتون ان کو راشن تو دے چکی تھی لیکن نہ جانے کہاں سے چند لمحوں میں ہی درجنوں مانگنے والے مرد وزن اس کی گاڑی کو گھیرے کھڑے تھے اور اس خاتون سے اپنے بھوکے بچوں کا واسطہ دیکر راشن پیک مانگ رہے تھے۔ اور اس خاتون کے ہاتھ پیر پھول چکے تھے کہ ان مانگنے والوں سے کیسے جان چھڑائے۔ اور پھر اس خاتون کو اپنے پرس سے سو سو کے نوٹ نکال کر ان مانگنے والوں و دیکر بمشکل جان چھڑانے پڑی۔

یہ تو ایک چھوٹے سے چوک کا منظر تھا شہر کے مصروف چوکوں پر مزدوروں کی لگی لمبی لائنیں اور اسلام آباد کی سڑکوں کنارے بیٹھے یہ نام نہاد مزدور یقیناً ایسے سہل پسند خرچ کرنے والوں کے منتظر ہوتے ہیں جو آتے ہیں اور اپنی بڑی گاڑیوں کے شیشے کھول کر ان مزدوروں کے ہاتھوں میں پیسے تھما جاتے ہیں۔

یہ خرچ کرنے والے اپنے تئیں نیکی تو کر رہے ہوتے ہیں لیکن نہ جانے کتنے لوگوں کو پیشہ ور بھکاری بنا رہے ہوتے ہیں اور ان بھکاریوں کی وجہ سے وہ سفید پوش لوگ جو مانگ نہیں سکتے ان خرچ کرنے والوں کے تعاون سے محروم رہ جاتے ہیں۔

میری خرچ کرنے والے تمام احباب سے درد مندانہ اپیل ہے کہ آپ خرچ کریں ضرور کریں لیکن اس میں اپنی سہل پسندی تلاش نہ کریں بلکہ تھوڑی سی تکلیف برداشت کر کے سفید پوش افراد کو تلاش کر کے ان تک راشن پہنچائیں کہ وہ مانگ بھی نہیں سکتے اور انتہائی مجبور بھی ہیں۔ خرچ کرنا اصل کام نہیں ہے بلکہ صحیح جگہ خرچ کرنا اصل کام ہے۔

خیراتی اداروں اور فلاحی تنظیموں کے افراد سے گزارش ہے کہ کچی آبادیوں تک ضرور پہنچیں لیکن یہ بات بھی مدِ نظر رکھیں کہ ہر تنظیم یا ادارہ بظاہر ان کچی بستیوں کو ہی ہدف بناتے ہیں تو ایسے میں وہ سفید پوش گھرانے کہ جن کے کفیل موجودہ حالات کی وجہ سے بے روزگار ہوکر گھروں میں محصور ہیں اور ان کی عزتِ نفس گوارا نہیں کرتی کہ کسی سے سوال کریں ان تک اپنا تعاون بہر صورت پہنچائیں۔ کہ کہیں ایسا نہ ہو کہ حالات اس حد تک پہنچ جائیں کہ یہ سفید پوش طبقہ حالات سے تنگ آ کر کوئی انتہائی اقدام کرے۔ ہاں ہمیں پہچاننا ہوگا اس سفید پوش طبقہ کو اور بچانا ہوگا انہیں بھی بھکاری بنانے سے