سابق وزیرِ اعظم شاہد خاقان عباسی کا کہنا ہے کہ نواز شریف اور مریم نواز کو سازش کے تحت سزا دی گئی، اگر حلف نامے میں کی گئی بات درست ہے تو ثاقب نثار کو سزا دیں، اگر غلط ہے تو رانا شمیم کو سزا دیں۔
باغی ٹی وی: میڈیا سے گفتگو کرتے ہوئے مسلم لیگ نون کے رہنما اور سابق وزیرِ اعظم شاہد خاقان عباسی نے کہا کہ سابق چیف جسٹس نے جو سزا دلوائی کیا اسے ختم نہیں کیا جا سکتا؟ ثاقب نثار نے نواز شریف، مریم نواز کو سزا دلوائی، یہ سزا کم از کم اب تو ختم کر دیں۔
شاہد خاقان عباسی نے کہا کہ پاکستان میں ہر ادارے کو اپنی آئینی حدود میں رہ کر کام کرنا چاہیئے، انصاف کے لیے کس کے پاس جاؤں گا؟ اگر ہم نے حلف نامے یا آڈیو بنائی ہے تو ہمیں بالکل سزا دیں، کوئی یہ نہیں کہہ سکتا کہ وہ آواز سابق چیف جسٹس کی نہیں۔
سابق وزیرِ اعظم کا کہنا ہے کہ ہر ادارے کو اپنی آئینی حدود میں رہ کر کام کرنا چاہیئے، معاملات عدالت میں آئین کے مطابق ہونے چاہئیں، سفارشات پر نہیں ہونے چاہئیں حکومت اپنا رشتہ آڈیو سے قائم کرنا چاہتی ہے، آڈیو میں ملک کے اس وقت کے چیف جسٹس کہہ رہے ہیں کہ انہیں حکم ہے کہ نواز شریف اور مریم نواز کو سزا دینی ہے۔
ن لیگ کے رہنما نے کہا کہ سابق چیف جسٹس نے حکم کس کو دیا کچھ معلوم نہیں، آپ فارنزک کروائیں لیکن ہمیں انصاف چاہیئے نیب آرڈیننس ہونا ہی نہیں چاہیئے تھا اور حکومت غلط آرڈیننس لے کر آئی ہے، چیئرمین نیب کو بلیک میل کیا جا رہا ہے۔
شاہد خاقان عباسی نے مزید کہا کہ پاکستان کی معیشت کی تباہی میں نیب کا بڑا حصہ ہے، نیب سے سوال ہے کہ کتنے سیاستدانوں کو شاملِ تفتیش کیا اور کتنی رقم برآمد کی؟ ملک میں عدل کے نظام کے ساتھ جو کچھ ہو رہا ہے وہ سب کے سامنے ہے۔
دوسری جانب فواد چوہدری کا ٹوئٹ میں کہنا تھا کہ نوازاینڈ کمپنی جعلی ویڈیوز،لیکس اورگیمزسے باہرآکرالزامات کا جواب میرٹ پردے یہ ڈرامے مکمل طورپرفلاپ ہوچکے ہیں جیل نہیں جانا توپیسے واپس کریں یہ مختصرحل ہے جس کوپیچیدہ بنا کرنکلنا چاہتے ہیں۔
قبل ازیں فواد چودھری کا اسلام آباد میں میڈیا سے گفتگو کرتے کہنا تھا کہ جب بھی مریم اورنوازشریف کےمقدمات چلتےہیں توکوئی لیک آجاتی ہے سب کچھ آجاتاہےلیکن رسیدیں نہیں آتیں یہ نہ پارلیمان کےسامنےثبوت دےسکےنہ سپریم کورٹ میں پیش کرسکے-
انہوں نے کہا کہ اگران کےپاس کوئی ثبوت ہوتےتوپیش کرتے عمران خان نے40سال پرانی رسیدیں عدالت کےسامنے پیش کیں ٹیپ ہےیا کوئی اورمعاملہ،قوم صرف یہ سمجھتی ہےکہ رسیدیں آنی چاہیئں کیلبری فونٹ کی دستاویزپیش کی گئی جوجعلی ثابت ہوئی آئین پاکستان نے اِن دو اداروں کوتحفظ دیا ہےاپوزیشن عد لیہ اورفوج کےخلاف مہم چلانا بند کرے-
