امریکہ میں پاکستان کے سفیر ڈاکٹر اسد مجید خان نے کہا ہے امریکہ میں مقیم پاکستانی کمیونٹی پاکستان کا بڑا اثاثہ ہے۔
باغی تی وی : پاکستان امریکن لیگیسی فاؤنڈیشن کی جانب سے ہیوسٹن میںایک تقریب میں مقامی کمیونٹی رہنماؤں سید جاوید انور اور طاہر جاوید جن کو حکومت پاکستان کی جانب سے ہلال امتیاز اور تمغہ امتیاز دیا گیا ہے یہ ایوارڈ سفیر پاکستان نے دیئے-
تقریب میں ہیوسٹن میں متعین پاکستان کے قونصل جنرل ابرار حسین ہاشمی مقامی منتخب نمائندوں کمیونٹی رہنماؤں کی بڑی تعداد نے شرکت کی جبکہ خطبہ استقبالیہ پاکستان امریکن لیگیسی فاؤنڈیشن کے سیکریٹری سعید شیخ نے پیش کیا ۔
تقریب میں دونوں کمیونٹی رہنماؤں کا تعارف ایونٹ کے چیئرمین ایم جے خان اور ڈائریکٹر ڈاکٹر آصف قدیر نے کرایا اس موقع پر دونوں رہنماؤں کے حالات زندگی اور خدمات پر مشتمل ڈاکومینٹری حاضرین کو دکھائی گئی جبکہ پاکستان امریکین لیگیسی فاؤنڈیشن کے صدر ہارون شیخ نے فاؤنڈیشن کے اغراض و مقاصد پیش کیئے اور سفیر پاکستان کا تعارف کرایا۔
ڈاکٹر اسد مجید کا تقریب سے خطاب کرتے ہوئے کہنا تھا کہ مجھے ذاتی طور پر خوشی اس وقت محسوس ہوتی ہے جب میں یہ دیکھتا ہوں کہ ہمارے پاکستانی نژاد نوجوان جس تیزی سے امریکہ میں ترقی کر رہے ہیں اور شہر کی سیاست سے لے کر سٹی میں اہم عہدوں پر تعینات ہیں ،ان کو دیکھ کر مجھے نہ صرف خوشی محسوس ہوتی ہے بلکہ ان پر فخر بھی محسوس ہوتا ہے کہ پاکستان کی نوجوان نسل امریکہ میں کافی ترقی کر رہی ہے اور زاہد قریشی، بلاول سید، علی زیدی، سلمان احمد، نعمان حسن اس کی بڑی مثال ہیں۔
سفیر پاکستان نے کہا کہ ہماری کمیونٹی پاک و امریکہ تعلقات کے حوالے سے جو کردار ادا کر رہی ہے وہ قابل تحسین اور قابل فخر ہے کیونکہ وہ اس ملک میں رہتے ہوئے نہ صرف اپنے خاندان کے لئے بلکہ ملک کے لیے بھی گراں قدر خدمات سرانجام دے رہے ہیں۔
سفیر پاکستان کا مزید کہنا تھا کہ سید جاوید انور طاہر جاوید کو حکومت پاکستان کی جانب سے جو اعزازات اور ایوارڈ دیے گئے ہیں، یہ ان کی والہانہ خدمت کا اعتراف ہے ، کشمیر کا معاملہ ہو یا دیگر معاملات پاکستان کو کسی بھی قسم کے مسائل درپیش ہوں یہ کمیونٹی ہر ایشوز میں پاکستان کی مدد کرنے میں پاکستان کا ہراول دستہ ثابت ہوئی ہے اور جو کام ہم سفارت کار بھی سرانجام نہیں دے سکتے وہ کام آپ کررہے ہیں۔
انہوں نے کہا کہ اس ضمن میں ایک عام پاکستانی نژاد امریکی شہری بھی پاکستان سے متعلق اہم مسائل پر اپنے سینیٹرز اور کانگریس کے اراکین سے ای میل ،خط اور کال کے ذریعے ان کو اس ضمن میں حمایت کرنے پر آمادہ کرسکتا ہے اور اس طرح عام پاکستانی بھی اپنے ملک کی خدمت کرسکتا ہے۔
انہوں نے کہا کہ موجودہ حکومت اوورسیز پاکستانیوں کو انتہائی اہمیت دیتی ہے یہی وجہ ہے کہ آپ کو سفارتخانہ ہرممکن سہولیات بہم پہنچانے کے لیے ہماں وقت کوشاں ہے،زیادہ تر قونصلر سروس آن لائن کر دی گئی ہیں اس طرح ہم آپ کی دہلیز تک سہولیات بہم پہنچانے میں ہر ممکن اقدامات کر رہے ہیں۔
سفیر پاکستان ڈاکٹر اسد مجید کا مزید کہنا تھا کہ حکومت کی جانب سے روشن ڈیجیٹل اکاؤنٹ روشن سماجی خدمت سمیت دیگر اہم اقدامات اس کی بھرپور مثال ہیں۔
پروگرام کے آخر میں محفل موسیقی کا پروگرام منعقد کیا گیا جس میں پاکستان کے معروف قوال ریاض اور ہمنوا نے صوفی کلام پیش کیے،مذکورہ پروگرام کی نظامت زینت خان مٹھانی نے کی اور آنے والے مہمانوں کا خیر مقدم طاہر بھٹی نے کیا۔
