Author: عائشہ ذوالفقار

پاکستان بھر میں مسلمان آج عیدالاضحی مذہبی عقیدت و احترام سے منا رہے ہیں معروف سیاسی شخصیات کی جانب سے عوام کو عیدا لاضحیٰ کی مبارکباد اور کورونا وبا کے باعث احتیاطی تدابیر اختیار کرنے کی تلقین کی گئی ہے-

باغی ٹی وی : صدر مملکت ڈاکٹر عارف علوی نے فیصل مسجد میں عید کی نماز ادا کی اورعیدالاضحی پر عالم اسلام کو مبارک باد دیتے ہوئے کہا ہے کہ قوم کورونا کے عالمی امتحان میں سرخرو ہونے کے لیے ثابت قدمی کا مظاہرہ کرے، عوام احتیاطی تدابیر پر عمل کریں، ماسک پہنیں، ہاتھ دھوئیں، سماجی فاصلہ رکھیں۔

مسلم لیگ ن کے صدر محمد شہباز شریف نے لاہورمیں عید کی نماز ادا کی اور عالم اسلام کو حج اور عیدالاضحٰی کی مبارک دی اور کہاہے کہ حج اس بار بھی کورونا وبا کے مصائب میں آیا ہے، اللّٰہ تعالی اس موذی مرض سے دنیا کونجات دے۔

عید الاضحی کے موقع پر پیغام میں وزیراعظم عمران خان نے کہا کہ قربانی کا جذبہ عالمگیر حیثیت کا حامل ہے، دنیا میں کوئی قوم اس وقت تک ترقی نہیں کرسکتی جب تک اس میں ایثار اور قربانی کا جذبہ موجود نہ ہو،قربانی صرف جانور کے ذبح کرنے کا نام نہیں ہے بلکہ اس کا مقصد انسان کا اپنی خواہشات کو اعلیٰ مقاصد کے حصول کے لئے قربان کرنا ہے۔

پاکستان پیپلز پارٹی (پی پی پی) کے چیئرمین بلاول بھٹو زرداری نے پاکستان سمیت پوری امتِ مسلمہ کو دل کی گہرائیوں سے عیدالاضحیٰ کی مبارکباد پیش کی ہے۔

عید کی مناسبت سے جاری کردہ اپنے پیغام میں پی پی پی چیئرمین نے کہا کہ عیدالاضحیٰ، اللّٰہ تعالیٰ کی رضا کے سامنے غیر مشروط طور سر بسجود ہونے اور اس پر کامل یقین رکھنے کی یاد دلاتی ہے، اور اپنی ذات کو بالائے طاق رکھ کر ایک عظیم مقصد کی خاطر قربانی دینے کا درس ہے۔

ملتان، وزیر خارجہ شاہ محمود قریشی دربار حضرت بہاءالدین زکریا ؒپہنچ گئے وہاں عید کی نماز ادا کی عید الاضحی کے موقع پر پیغام میں وزیر خارجہ شاہ محمود قریشی نے کہا کہ پوری قوم کو عید کی مبارک باد دیتا ہوں یہ دوسرا سال ہے کہ امت مسلمہ پوری طرح حج سے مستفید نہیں ہو سکے، کورونا وبا کی وجہ سے محدود لوگوں نے حج کی سعادت حاصل کی دعا ہے کہ آئندہ سال سب کو حج کی سعادت نصیب ہو-

وزیر اعلیٰ پنجاب عثمان بزدار نے بھی قوم کو عیدالاضحیٰ کی مبارک باد پیش کی ہے عید کی مناسبت سے جاری کردہ اپنے پیغام میں وزیر اعلیٰ پنجاب نے کہا کہ عید الاضحیٰ قربانی، ایثار اورخوشیاں بانٹنے کا تہوار ہے عید پر محروم طبقے کے ساتھ خوشیاں منانا ہمارا دینی اور قومی فریضہ ہے –

انہوں نےکہا کہ کورونا کی چوتھی لہر کے پیش نظر عید سادگی سے منانا ہمارا قومی فریضہ ہے عید پر ماسک ضرور پہنیں اور ہاتھوں کو بار بار دھوئیں عوام عید الاضحیٰ پر سماجی فاصلے برقرار رکھیں او ر ایس او پیز پرعمل کریں مظلوم کشمیری بھارتی ظلم وستم میں یہ عید الاضحیٰ منا رہے ہیں مودی سرکار نے کشمیری عوام سے عید کی خوشیاں چھین لی ہیں پاکستانی قوم اپنے کشمیری بھائیوں کے ساتھ کھڑی ہے-

پاکستان پیپلز پارٹی کے مرکزی رہنما سینیٹر مولا بخش چانڈیو نے امت مسلمہ کو عید کی مبارکباد پیش کی –

وزیرمملکت اطلاعات فرخ حیبب نے عید کی مبارکابد پیش کی اورکہا کہ جن لوگوں نے ویکسین نہیں لگوائی ،وہ لازمی ویکسین لگوائیں عیدالاضحی ایثار اور قربانی کا درس دیتی ہے-

پاکستان بھر میں مسلمان آج عیدالاضحی مذہبی عقیدت و احترام سے منا رہے ہیں۔

باغی ٹی وی : کراچی، اسلام آباد، پشاور اور کوئٹہ سمیت ملک کے تمام چھوٹے بڑے شہروں میں مساجد، عیدگاہوں اور کھلے میدانوں میں نماز عید کے اجتماعات میں امت مسلمہ، مقبوضہ کشمیر، ملک کی سلامتی، ترقی و خوشحالی اور کورونا وبا کے خاتمے کے لئے خصوصی دعائیں مانگی گئیں۔ حکومتی ہدایات کے پیش نظر نمازعید الاضحیٰ سماجی فاصلوں کو مد نظر رکھتے ہوئے ادا کی گئی جبکہ نمازیوں کی جانب سے منہ پر ماسک پہننے کا بھی اہتمام کیا گیا۔

جس کے بعد سنت ابراہیمی پر عمل کرتے ہوئے جانوروں کی قربانی کی جارہی ہے ملک بھر میں شہری نماز عید کے بعد اپنے مرحومین کی قبروں پر فاتحہ خوانی کے لئے بھی جارہے ہیں۔

حکومت کی جانب سے بھی عوام کو سخت احتیاطی تدابیر اختیار کرنے کی ہدایات جاری کی گئی ہیں کہ میل جول سے اجتناب کیا جائے گا اور ایک دوسرے کے گھر آنے جانے کے بجائے ویڈیو لنک کے ذریعے ایک دوسرے کی خوشیوں میں شریک ہونے کی کوشش کریں اور عید کے اجتماعات میں بیمار افراد، بچوں اور بزرگ شہریوں کو شرکت نہ کرنے دی جائے، فیس ماسک کا استعمال لازمی، ہاتھ ملانے اور گلے ملنے سے بھی گریز کیا جائے۔

میڈیا رپورٹس کے مطابق گزشتہ سالوں کی نسبت اس سال کورونا وائرس کی وجہ سے اجتماعی قربانی کے رحجان میں اضافہ دیکھنے میں آ یا ہے مختلف حکومتی شخصیات کی جانب سے بھی دیے جانے والے پیغامات میں عوام الناس سے کہا گیا کہ وہ انفرادی قربانی کرنے کے بجائے اجتماعی قربانی کرنے کو ترجیح دیں۔