بھارتی اداکار ارجن کپور کا کہنا ہے کہ آپ کو یہ نہیں بھولنا چاہیے کہ کورونا بحران کے وقت کون سے مددگار ہاتھ آپ کی طرف بڑھے جن کا احترام کیا جانا چاہیے-
باغی ٹی وی : بھارتی میڈیا کو دیئے گئے انٹرویو میں بالی ووڈ کے لیے پاکستان کے تعاون کے سوال کا جواب دیتے ہوئے ان کا کہنا تھا کہ پاکستان میں اکثریت بالی ووڈ کی معاون رہی ہے وہاں ہماری فلموں کے لیے جوش وخروش، محبت اور غیر مشروط تعاون پایا جاتا ہے۔
بھارتی اداکار نے کہا کہ میں یہ ماننے سے انکار کروں گا کہ فن سرحدوں کو عبور کرتے ہوئے لوگوں کو ایک دوسرے سے رابطے میں نہیں لاسکتا آج لوگ یہ نہیں سوچتے کہ صورتحال کیا تھی، لوگ اس صورتحال سے نمٹ رہے ہیں، میں اس کا احترام کرتا ہوں اور مجھے امید ہے اس کو فراموش نہیں کیا جائے گا۔
عالمی وبا کورونا کی دوسری لہر کے دوران آکسیجن کی کمی اور بھارت میں بدترین صورتحال پر پاکستانیوں کی جانب سے تعاون کی پیشکش کے حوالے سے ارجن کپورنے کہا کہ 6 ماہ بعد چیزیں بہتر ہوجائیں گی لیکن آپ کو یہ نہیں بھولنا چاہیے کہ کورونا بحران کے وقت کون سے مددگار ہاتھ آپ کی طرف بڑھے جن کا احترام کیا جانا چاہیے، یہ ایک ایسا وقت ہے جب جذبات گونج رہے ہیں اور لوگ اکٹھے ہورہے ہیں، جو بھی سیاسی منظر نامہ ایک یا دو سال قبل تھا اسے پس پشت ڈال رہے ہیں۔
ارجن نے کہا کہ کرکٹ کے علاوہ دونوں ممالک ایک دوسرے سے جڑے ہوئے ہیں اور امید ہے کہ اس دوستی کو مزید بڑھایا جائے گا۔
واضح رہے کہ بالی ووڈ ہدایت کار کاشف نیئر کی فلم ’سردار کا گرینڈ سن ‘حال ہی میں نیٹ فلیکس پر ریلیز کی گئی ہے، فلم میں اداکار ارجن کپور، راکول پریت سنگھ سمیت نینا گپتا نے مرکزی کردار ادا کیا ہے، فلم میں پاک بھارت کا تاریخی تعلق دکھایا گیا ہے۔
