Author: Ayesha Rehmani

اسلام آباد: پشتونخوا ملی عوامی پارٹی کے چیئرمین محمود خان اچکزئی نے کہا کہ دس یا بیس آدمی بھی اگر مرجائیں تو اسے جواز بناکر پارلیمنٹ پر حملہ کرنا کسی صورت قابل قبول نہیں۔

باغی ٹی وی : قومی اسمبلی میں محمود خان اچکزئی نے کہا کہ یہاں جس انداز میں باتیں کی گئیں وہ ٹھیک نہیں تھا کہ فلانے آدمی (علی امین گنڈا پور) نے اخلاقیات سے بڑھ کر باتیں کی اگر کوئی اس سے بھی زیادہ باتیں کرے تو اس کا مطلب یہ نہیں کہ آپ پارلیمنٹ پر آکر حملہ کردیں یہ ناقابل قبول ہے،دس یا بیس آدمی بھی اگر مرجاتے تو اس کو جواز بناکر پارلیمنٹ پر حملہ کرنا کسی صورت قابل قبول نہیں۔

انہوں نے کہا کہ اسپیکر صاحب آپ ن لیگ کے ممبر ہیں میں اپوزیشن کی جانب سے نمائندگی کرتے ہوئے حلفاً آپ سے کہتا ہوں کہ آئین کی بالادستی، پارلیمنٹ کو بااختیار بنانے اور ملک کے ہر ادارے کو آئین کی دائرے میں رکھنے کے لیے آپ جس حد تک جائیں گے ہم آپ کے ساتھ ہیں اور کسی قربانی سے پیچھے نہیں ہٹیں گے۔

خواجہ آصف نے محمود خان سے کہا کہ پارلیمنٹ پر حملے کے واقعے کی کوئی تعریف نہیں کرتا اگر پارلیمان کی بے توقیری کی گئی تو یہ ہم سب کا نقصان ہے انہوں نے بیرسٹر گوہر سے کہا کہ جب کوئی شخص مطالبہ کرے تو اس کے ہاتھ صاف ہونے چاہئیں، میں واضح کرتا ہوں پارلیمنٹ میں پولیس اور نقاب پوشوں کا آنا ہماری اجتماعی بے توقیری ہے لیکن اگر پارلیمنٹ میں نقاب پوشوں کے آنے کی مذمت کی جاتی ہے تو کوئی اس شخص کی بھی تو مذمت کرے جس نے اسلام آباد میں تقریر کی وفاق اور آئین کو چیلنج کیا اور جمہوریت کو گالیاں دیں، اس کی بھی مذمت کی جائے جب چار ماہ اسی ایوان کے باہر ڈیرے ڈالے گئے۔

اسپیکر نے میثاق جمہوریت کی تجویز پیش کردی اور کہا کہ کیا ہم مل کر کوئی میثاق جمہوریت سائن نہیں کرسکتے؟ کیا ہم آئین میں رہتے ہوئے باہر کہنے کے بجائے اس فورم پر کوئی بات نہیں کرسکتے؟ ہمارے پاس ریکارڈ موجود ہے ہم نے اپوزیشن کو زیادہ بولنے کا موقع دیا میں نے کل وہ کیا جو میری ذمہ داری تھی اور میرے ضمیر نے کہا اس رات کو جو میں کرسکا میں نے کیا مگر الزام پر افسوس ہوا کہ میں اس جماعت کا حصہ ہوں۔

سلام آباد: چیئرمین پیپلز پارٹی بلاول بھٹو زرداری نے کہا ہے کہ آئین کی بالادستی کے بغیر پارلیمنٹ سمیت کوئی ادارہ نہیں چل سکتا۔

باغی ٹی وی:قومی اسمبلی میں خطاب کرتے ہوئے بلاول بھٹو زرداری نے کہا کہ سٹیج پر میڈیا اور خواتین کو گالیاں دیناکسی صورت قابل قبول نہیں ہمارا کنڈکٹ دیکھ کر یہ بچے سیاست دان نہیں بننا چاہیں گے، ہم نے سیاست کو ایک گالی بنا دیا ہے، ہم نے اسی سیاست سے ان نوجوانوں کو روزگار دلوانا ہے ہمیں اپنی ذمہ داریاں ادا کرنی ہیں، اگروزیراعلی جلسے میں کھڑا ہوکر حکومت اور عدلیہ کو گالی دے تو وہ اپنے صوبے کے عوام کو روزگار نہیں دے سکتا۔

انہوں نے کہا کہ بانی پی ٹی آئی نے ماحول خراب کیا تھا، وزیراعلی عوامی مسائل حل کرنے کی بجائے جلسوں میں گالیاں دے تو وہ سیاست چمکارہا ہے، حکومت نے ٹارگٹ رکھا تھا کہ مہنگائی ایک سال میں بارہ فیصد تک لانی ہے ایک سال سے پہلے ہی مہنگائی نوفیصد تک آگئی ہے پی ٹی آئی کے چئیرمین کچھ مہینوں سے جیل میں ہیں، پی ٹی آئی اپنے چئیرمین کا کیس عدالتوں میں لڑیں اور یہاں عوام کی خدمت کریں، اس نہج پر سیاست کو پہنچایا گیا ہے کہ آج ہم ایک دوسرے سے ہاتھ ملانے کے روادار نہیں، اسی طرح مینگل صاحب کے فیصلے پر مجھے بڑا افسوس ہوا۔

بلاول نے کہا کہ پی ٹی آئی کو اسمبلی چھوڑنے سے بہت منع کیا، آج خود تو بھگت رہے ہیں ملک بھی بھگت رہا ہے، بلاول
پی ٹی آئی عمران کا کیس لڑے لیکن پہلے ایوان میں آکر عوام کی خدمت کرے، حکومت لڑائی جھگڑے میں لگی رہی، آگ پر تیل ڈالتی رہی تو ملک کیسے چلے گا انہوں نے تجویز پیش کی کہ ایسی کمیٹی بنائیں جس میں تمام جماعتوں کے ارکان ہوں گے جلسے یہ بھی کریں گے ہم بھی کریں گے اور معاملے پر پارلیمانی کمیٹی بنائی جائے۔

پارلیمنٹ کے احاطہ سے سنی اتحاد کونسل اور پی ٹی آئی پارلیمنٹرین کی گرفتاریوں کا معاملہ ،اسپیکر نے سکیورٹی اسسٹنٹ سمیت چار اہلکاروں کو معطل کرنے کا حکم دے دیا-

باغی ٹی وی : تفصیلات کے مطابق پارلیمنٹ کے احاطہ سے سنی اتحاد کونسل اور پی ٹی آئی پارلیمنٹرین کی گرفتاریوں کے معاملے پر اسپیکر قومی اسمبلی نے ایکشن لیتے ہوئے احکامات جاری کر دیئے،جن پر عملدرآمد شروع ہو گیا ہے-

اس ضمن میں جاری نوٹیفییکشن کے مطابق اسپیکر نے سکیورٹی اسسٹنٹ سمیت چار اہلکاروں کو معطل کرنے کا حکم دے دیا چاروں کو 120 دن کےلےلئے معطل کیا گیا ہےمعطل ہونے والوں میں عبید اللہ،محمد وحید صفدر اور محمد ہارون شامل ہیں-

واضح رہے کہ اسلام آباد میں پارلیمنٹ ہاؤس میں موجود تمام پی ٹی آئی رہنماوں کو رات گئے حراست میں لے لیا گیا۔ ذرائع کے مطابق شیخ وقاص اکرم، زین قریشی، نسیم الرحمان، عامر ڈوگر، سید شاہ احد، شاہد خٹک، یوسف خٹک، لطیف چترالی گرفتار، صاحبزادہ حامد رضا کو بھی پارلیمنٹ ہاؤس سے حراست میں لے لیا گیا۔ بیرسٹر گوہر، شیرافضل مروت اور شعیب شاہین کے بعد ایم این اے زبیر خان کو بھی گرفتارکرلیا گیا تھا جبکہ شعیب شاہین کو ان کے دفتر سے حراست میں لیا گیا۔ ساتھ ہی عمر ایوب اور زرتاج گل پولیس کو چکمہ دے کر نکل گئے تھے۔ ذرائع کے مطابق یہ گرفتاریاں گزشتہ روز جلسے میں قانون کی خلاف ورزی اور دیگر الزامات کے تحت کی گئیں۔

جس کے بعد اسپیکر قومی اسمبلی سردار ایاز صادق نےپارلیمنٹ ہاؤس کے احاطے سے اراکین پارلیمنٹ کی گرفتاری پر انسپکٹر جنرل ( آئی جی) اسلام آباد پولیس کی سرزنش کی اور انہیں فوری رہا کرنے کا حکم دے دیا پارلیمنٹ سے ارکان کی گرفتاری سے متعلق اسپیکر قومی اسمبلی کے چیمبر میں حکومت اور اپوزیشن سے تعلق رکھنے والے رہنماؤں کا مشاورتی اجلاس ہوا۔

اجلاس میں وفاقی وزیر قانون و انصاف اعظم نذیر تارڑ، پاکستان تحریک انصاف کے رہنما علی محمد خان، پشتونخوا ملی عوامی پارٹی کے سربراہ محمود اچکزئی سمیت دیگر رہنما شریک ہوئے اس موقع پر اسپیکر قومی اسمبلی کے چیمبر میں آئی جی اسلام آباد کو بھی طلب کیا گیا اور پارلیمنٹیرین کی گرفتاری کے معاملے پر ان کی سرزنش کی-

ایاز صادق نے گرفتار ارکان پارلیمنٹ کو فوری رہا کرنے کا حکم دیتے ہوئے کہا کہ قانون کے مطابق پارلیمنٹ سے باہرجس کو چاہیں گرفتارکریں، پارلیمنٹ سے ارکان کی گرفتاری ناقابل قبول ہے-

انسداددِہشتگردی عدالت اسلام آباد نے شعیب شاہین کی چھبیس نمبر چنگی توڑپھوڑ کیس میں ضمانت بعد از گرفتاری منظور کر لی-

باغی ٹی وی :انسداددِہشتگردی عدالت اسلام آباد میں شعیب شاہین کی چھبیس نمبر چنگی توڑپھوڑ کیس کی سماعت ہوئی،سماعت انسداددِہشتگردی عدالت کے جج ابو الحسنات ذوالقرنین نے کی ،دوران سماعت پراسیکیوٹر راجانوید اور شعیب شاہین کے وکلاء نے دلائل دیے،انسداددِہشتگردی عدالت کے جج ابو الحسنات ذوالقرنین نے شعیب شاہین کی ضمانت منظور کی –

واضح رہے کہ شعیب شاہین کے خلاف تھانہ نون میں مقدمہ درج کیاگیاتھا،تھانہ نون میں درج مقدمہ میں ضمانت منظور ہونے کے باجود شعیب شاہین کی رہائی ممکن نہیں،شعیب شاہین تھانہ سنگجانی میں درج مقدمہ میں جسمانی ریمانڈ پر پولیس کے حوالے ہیں ، شعیب شاہین کو جوڈیشل ریمانڈ پر جیل بھیج دیا گیا تھا۔

پولیس نے تعزیرات پاکستان کی 10 دفعات کے تحت ملزمان اور نامعلوم افراد کے خلاف مقدمہ درج کیا تھا، مقدمہ میں انسداد دہشت گردی کی دفعات سمیت پولیس پر حملے اور گاڑیوں کی توڑ پھوڑ کی دفعات بھی شامل ہیں۔

ایف آئی آر کے متن کے مطابق محکمہ سی ٹی ڈی کی نفری جی ٹی روڈ پر 26 نمبر پُل پر موجود تھی کہ اسی دوران قریب موجود لوگوں کاہجوم ریاست مخالف نعرے بازی کر رہا تھا جو کہ ترنول پُل کے اوپر آیا پی ٹی آئی کارکنان زبیر خان کی قیادت میں پارٹی پرچم اٹھائے ہوئے تھے اور ان کے ہاتھوں میں ڈنڈوں، نوکیلے پتھر اور سریے کے راڈ تھے۔

ایف آئی آر میں کہا گیا تھا کہ پولیس کی جانب سے وجہ دریافت کرنے پر زبیر خان نے بتایاکہ سینئر مقامی قیادت جن میں شعیب شاہین اور عامر مغل شامل تھے، کی ہدایت پر 26 نمبر پُل کے روڈ کو بلاک کیا گیا، جبکہ ایف آئی آر میں پولیس اہلکاروں کو جان سے مارنے کی نیت پتھر مارنا اور آہنی راڈ سے مارنے کی دفعات بھی شامل ہیں ہملزمان نے پولیس افسران و اہلکاروں جن میں انسپکٹر اعجاز علی شاہ، سب انسپکٹر (ایس آئی) غلام سرور نعیمی، اسسٹنٹ سب انسپکٹر (اے ایس آئی) افسر علی، ہیڈ کانسٹیبل (ایچ سی) مشتاق احمد، کانسٹیبل یاسر محمود اور رضوان شامل ہیں، کو زخمی کیا جبکہ 4 پولیس اہلکاروں محمد اعجاز، محمد ریاض، حسن رضا اور یاسر محمود سے جبری طور پر اینٹی رائٹ کٹ چھین لی اور پولیس موبائل کو بھی نقصان پہنچایا۔

ایف آئی آر میں بتایا گیا تھا کہ پولیس کے مطابق آنسو گیس کی شیلنگ کے دوران تمام ملزمان موقع سے فرار ہو گئے تاہم پولیس نے 3 ملزمان کو پہچان لیا، جن کی شناخت سعود افتخار، محمد عارف اور محمد عارف ولد گلزار کے نام سے ہوئی ہے، جو کہ عامرمغل کے قریبی ہیں۔