Author: Ayesha Rehmani

جنوبی کوریا نے شمالی کوریا پر ایک بار پھر میزائل تجربے کا الزام عائد کیا ہے-

برطانوی خبر رساں ادارے رائٹرز کے مطابق جنوبی کورین فوج نے الزام عائد کیا ہے کہ شمالی کوریا نے جمعرات کو مختصر فاصلے تک مار کرنے والا ایک بیلسٹک میزائل جزیرہ نما کوریا کے مشرقی جانب واقع سمندر کی طرف فائر کیا ہے،جاپان کی حکومت نے بھی تصدیق کی کہ شمالی کوریا سے ایک ایسا میزائل داغا گیا ہے جو بظاہر بیلسٹک میزائل معلوم ہوتا ہے۔

رپورٹ کے مطابق یہ تجربہ رواں سال شمالی کوریا کی جانب سے کیے جانے والے متعدد ہتھیاروں کے تجربات کا تسلسل ہے، جن میں مختصر فاصلے تک مار کرنے والے بیلسٹک میزائل، راکٹ اور دیگر ٹیکٹیکل ہتھیار شامل ہیں۔

جنوبی کوریا کے سرکاری خبر رساں ادارے ’کے سی این اے‘ کے مطابق شمالی کوریا نے آخری تصدیق شدہ ہتھیاروں کا تجربہ جون کے آخر میں کیا تھا، جس میں ملٹی پل لانچ راکٹ سسٹم، ٹیکٹیکل بیلسٹک میزائل اور خودکار ہووٹزر کا تجربہ کیا گیا تھا۔

جنوبی کوریا کی فوج نے ایک بیان میں کہا کہ مزید ممکنہ میزائل تجربات کے پیش نظر نگرانی اور دفاعی تیاریوں کو مزید سخت کر دیا گیا ہے، جب کہ اس حوالے سے امریکا اور جاپان کے ساتھ معلومات کا تبادلہ بھی جاری ہے۔

کیونگ نام یونیورسٹی کے انسٹی ٹیوٹ فار فار ایسٹرن اسٹڈیز کے پروفیسر لیم ایول چُل کے مطابق یہ تجربہ جنوبی کوریا اور امریکا کے درمیان جلد متوقع مشترکہ فوجی مشقوں سے قبل سامنے آیا ہے، جسے پیانگ یانگ کی جانب سے ایک ممکنہ سیاسی اور عسکری پیغام کے طور پر بھی دیکھا جا رہا ہے۔

سابق وزیراعظم اور بانی پی ٹی آئی عمران خان کے بیٹوں کا کہنا ہے کہ پاکستانی حکام انہیں اپنے والد سے ملاقات کی اجازت نہیں دے رہے۔

عمران خان جو 2022 میں قومی اسمبلی میں عدم اعتماد کی تحریک کے ذریعے اقتدار سے ہٹا دیے گئے تھے، اس کے ایک سال بعد انہیں بدعنوانی اور ریاستی راز افشا کرنے سمیت مختلف مقدمات میں سزا کے بعد قید کر دیا گیا عمران خان اور ان کے حامیوں کا کہنا ہے کہ یہ مقدمات سیاسی بنیادوں پر قائم کیے گئے۔

قاسم خان اور سلیمان خان نے سی این این کو انٹرویو میں کہا کہ ہمارے پاس ان کی کوئی تازہ معلومات نہیں کیونکہ گزشتہ سات ماہ سے ان کے اہلِ خانہ، ڈاکٹروں اور وکلا کو ان سے ملاقات کی اجازت نہیں دی گئی، جب بھی وہ میڈیا سے بات کرتے ہیں، پاکستانی حکام ان کے لیے والد سے ملاقات مزید مشکل بنا دیتے ہیں، ویزوں میں تاخیر کی جاتی ہے یا دیگر انتظامی رکاوٹیں کھڑی کی جاتی ہیں۔

قاسم نے کہا کہ ہم پاکستان جانا چاہتے ہیں اور کوشش کر رہے ہیں، لیکن کوئی پیش رفت نہیں ہو رہی، ایسی کوئی وجہ نہیں کہ ہمیں ویزا نہ دیا جائےان کے شناختی کارڈز کی مدت ختم ہو چکی ہے اور ان کی تجدید نہیں کی گئی، ویزے کے بغیر ہم پاکستان نہیں جا سکتےہمارے ویزا کی منظوری میں کوئی منطقی رکاوٹ نہیں، مگر فیصلہ کرنے والے لوگوں نے جان بوجھ کر معاملہ ایسا بنا دیا ہے کہ ہمیں ویزا نہ ملے ہمارا والد کیساتھ آخری مرتبہ فون پر رابطہ مارچ میں ہوا تھافون پر کم از کم دو ہفتوں میں بات کرانی چاہئے۔

قاسم اور سلیمان نے کہا کہ والد کی کرپشن کے حوالے سننا انتہائی مایوس کن بات ہے ہم نے بچپن سے ہمیشہ یہی سنا ہے کہ بدعنوانی کتنی زہریلی چیز ہوتی ہے اور یہ کسی بھی ملک کو کس طرح تباہ کر سکتی ہےپاکستان میں بھی انہوں نے یہی دیکھا جب وہ انگلینڈ آئے تو انہیں یہ موقع ملا کہ وہ یہاں کے نظام اور فرق کو دیکھ سکیں اور سمجھ سکیں کہ پاکستان کو کس طرح بہتر بنایا جا سکتا ہے اسی سوچ کے تحت وہ واپس پاکستان گئے اور سیاست میں قدم رکھاجب سے ہم نے ہوش سنبھالا ہے، وہ مسلسل بدعنوانی کے خلاف آواز بلند کرتے آئے ہیں۔

ان کا کہنا تھا کہ ہم نے نہ صرف انہیں بدعنوانی کے خلاف بات کرتے دیکھا بلکہ اس پر عمل کرتے ہوئے بھی دیکھا ہے، اگر وہ بند دروازوں کے پیچھے اپنے 5 اور 7 سال کے بچوں کو بھی بدعنوانی کے نقصانات کے بارے میں سمجھاتے رہے ہیں، تو آج انہی پر بدعنوانی کے الزامات لگتے دیکھنا انتہائی مایوس کن ہے۔

سی این این کے ابق کہ حکومت پاکستان نے عمران خان کے بیٹوں کے اس دعوے کی تردید کی ہے کہ عمران خان گزشتہ سات ماہ سے قید تنہائی میں ہیں یا انہیں اپنے اہلِ خانہ ، وکلاء اور ڈاکٹرز سے ملاقات کی اجازت نہیں دی جا رہی،یہ الزام جیل کے ریکارڈ سے برعکس اور ایسے وقت میں بین الاقوامی تنازع کھڑا کرنے کی کوشش ہے، عمران خان کو بار بار اور خاطر خواہ رسائی فراہم کی جاتی رہی ہے عمران خان اور ان کی اہلیہ کی 4 اگست کو بھی ملاقات کرائی گئی وزارت اطلاعات کے مطابق عمران خان کے بیٹوں کے پاس نائیکوپ کارڈ ہیں وہ پاکستان آ سکتے ہیں، پاکستان آنے کیلئے انہیں ویزے کی ضرورت نہیں۔

بھارتی پارلیمان میں قائد حزب اختلاف اور کانگریس کے سینئر رہنما راہول گاندھی نے الزام عائد کیا ہے کہ پرامن احتجاج کرنے والےطالبات کے گھروں پر غنڈے بھیج کر انہیں معافی مانگنے پر مجبور کیا گیا۔

کشمیر میڈیا سروس کے مطابق راہول گاندھی نے نئی دہلی کے جنتر منتر میں مختلف بھارتی ریاستوں سے تعلق رکھنے والے طلبہ کے ہمراہ پریس کانفرنس کرتے ہوئے کہا کہ طلبہ نے آئین، تعلیمی نظام اور ملک کے مستقبل کے تحفظ کے لیے آواز بلند کی تھی، احتجاج مکمل طور پر پرامن تھا، لیکن اس کے باوجود طلبہ پر لاٹھی چارج کیا گیا، انہیں تشدد کا نشانہ بنایا گیا اور اب بھی مختلف طریقوں سے ہراساں کیا جا رہا ہے،طلبہ نے کوئی غلط کام نہیں کیا، اس لیے انہیں کسی سے معافی مانگنے کی ضرورت نہیں۔

انہوں نے پولیس کارروائی کا ذمہ دار بھارتی وزیر داخلہ امت شاہ کو قرار دیتے ہوئے کہا کہ اگر یہ کارروائی ان کے علم کے بغیر ہوئی تو وہ اپنی ذمہ داری ادا کرنے میں ناکام رہے، اور اگر ان کے حکم پر کی گئی تو وہ براہِ راست اس کے ذمہ دار ہیں، دونوں صورتوں میں ذمہ داری امت شاہ پر عائد ہوتی ہے۔

انہوں نے وزیراعظم نریندر مودی اور وزیر داخلہ امت شاہ پر تنقید کرتے ہوئے کہا کہ دونوں میں اس واقعے پر میڈیا کا سامنا کرنے اور صحافیوں کے سوالات کے جواب دینے کا حوصلہ نہیں ہے، طلبہ کے خلاف مبینہ تشدد اور ہراسانی کے واقعات کی شفاف تحقیقات کی جائیں اور ذمہ داروں کا تعین کرکے ان کے خلاف کارروائی عمل میں لائی جائے۔