Author: Ayesha Rehmani

امریکی اخبار نے اپنی رپورٹ میں کہا ہے کہ ایران اور امریکا کے درمیان حالیہ جنگ اور اس کے بعد ہونے والے عبوری معاہدے کو چین اپنی سفارتی کامیابیوں اور عالمی کردار میں اضافے کے تناظر میں دیکھ رہا ہے-

سی این این میں شائع رپورٹ کے مطابق ایران جنگ کے بعد چین خود کو ایک ایسے عالمی فریق کے طور پر پیش کر رہا ہے جس نے تنازع کے دوران سفارتی توازن برقرار رکھا، توانائی کے بحران سے نسبتاً بہتر انداز میں نمٹا اور مشرق وسطیٰ میں امن کے حامی کردار کو اجاگر کیا اور امریکا کے درمیان حالیہ جنگ اور اس کے بعد ہونے والے عبوری معاہدے کو چین اپنی سفارتی کامیابیوں اور عالمی کردار میں اضافے کے تناظر میں دیکھ رہا ہے تجزیہ کاروں کے مطابق بیجنگ نے اس تنازع کے دوران ایک محتاط حکمت عملی اپنائی، جس کے نتیجے میں وہ ایک ایسے ملک کے طور پر سامنے آیا جو جنگ کے بجائے سفارتکاری کی حمایت کرتا ہے۔

رپورٹ کے مطابق جب فروری کے آخر میں امریکا اور اسرائیل کیجانب سے ایران پر حملوں کا آغاز ہوا تو چین کو خدشہ تھا کہ تہران میں حکومت کو بھی اسی طرح نقصان پہنچ سکتا ہے جیسے ماضی میں بعض دیگر اتحادی حکومتوں کو پہنچا، تاہم کئی ماہ بعد صورتحال مختلف نظر آ رہی ہے، کیونکہ امریکا اور ایران کے درمیان مذاکرات کے نتیجے میں عبوری معاہدہ طے پایا، جبکہ ایرانی حکومت اپنی جگہ برقرار ہے۔ وزارت خارجہ نے امریکا اور ایران کے معاہدے کا خیرمقدم کرتے ہوئے کہا کہ چین مشرق وسطیٰ میں امن اور استحکام کی بحالی کے لیے فعال کردار ادا کرنے کے لیے تیار ہے چین نے اپریل میں صدر شی جن پنگ کی جانب سے پیش کردہ 4 نکاتی امن تجاویز کا بھی حوالہ دیا۔

امریکی صدر ڈونلڈ ٹرمپ نےبھی جی سیون اجلاس کے دوران چین اور صدر شی جن پنگ کےکردار کو سراہتے ہوئے کہا کہ چین نےغیر جانبدار رہتے ہوئے تنازع کو حل کرنے میں مدد کی،ایران جنگ کے دوران توانائی کے بحران کے باوجود چین کو نسبتاً کم نقصان اٹھانا پڑا، جس کی بڑی وجہ اس کے بڑے تیل ذخائر، متبادل توانائی اور الیکٹرک گاڑیوں کی پا لیسی کو قرار دیا جا رہا ہے۔

چینی مبصرین کا کہنا ہے کہ اس جنگ نے امریکا کی فوجی طاقت کے استعمال کی حدود کو نمایاں کیا ہے، بعض تجزیہ کار اسے امریکا کے لیے ’سویز لمحہ‘ قرار دے رہے ہیں، جس سے مراد عالمی طاقت کے اثر و رسوخ میں تبدیلی کا آغاز ہوتا ہے،تاہم چینی ماہرین یہ بھی کہتے ہیں کہ امریکا کی کمزوری کا مطلب یہ نہیں کہ چین خود بخود عالمی نظام کا نیا سربراہ بن جائے گا بلکہ چین کے لیے اصل امتحان یہ ہوگا کہ وہ صرف تنقید کے بجائے عملی سفارتی حل، توانائی کے استحکام اور علاقائی امن کے لیے مؤثر کردار ادا کر سکے۔

پاکستان کے وزیرِ داخلہ محسن نقوی کے دورہ ایران کے دوران ایرانی وزیرِ خارجہ عباس عراقچی سے اہم ملاقات متوقع ہے-

عرب نیوز اور الجزیرہ کے مطابق ایرانی وزارتِ خارجہ کے ترجمان اسماعیل بقائی نے بتایا ہے کہ محسن نقوی ہفتے کے روز تہران میں ایرانی قیادت سے ملاقاتیں کریں گے انہوں نے کہا کہ یہ دورہ اسلام آباد کی ان کوششوں کا حصہ ہے جن کا مقصد ایران اور امریکا کے درمیان جاری سفارتی مذاکرات کو سہولت فراہم کرنا ہے،پاکستانی وزیرِ داخلہ کی یہ مصروفیات پہلے سے طے شدہ سفارتی رابطوں کا تسلسل ہیں، جن میں خطے میں کشیدگی میں کمی اور باہمی رابطوں کے فروغ پر زور دیا جا رہا ہے۔

سفارتی ذرائع کے مطابق متوقع ملاقات میں دوطرفہ تعلقات، سکیورٹی تعاون، سرحدی امور اور علاقائی صورتحال بھی زیر بحث آنے کا امکان ہے،تجزیہ کاروں کے مطابق یہ ملاقات نہ صرف پاکستان ایران تعلقات کے لیے اہم ہے بلکہ ایران امریکا مذاکراتی عمل کے تناظر میں بھی اسے ایک اہم سفارتی پیش رفت قرار دیا جا رہا ہے۔

متحدہ عرب امارات نے سوشل میڈیا کے استعمال کے لیے کم از کم عمر 15 سال مقرر کر دی ہے،متحدہ عرب امارات (UAE) نے بچوں کی ڈیجیٹل حفاظت کو یقینی بنانے کے لیے یہ تاریخی قدم اٹھایا ہے

برطانوی خبر رساں ادارے رائٹرز کے مطابق فیصلے کے تحت 15 سال سے کم عمر بچوں کو ذاتی سوشل میڈیا اکاؤنٹس بنانے یا استعمال کرنے کی اجازت نہیں ہوگی 15 سال سے کم عمر بچوں کو سوشل میڈیا پلیٹ فارمز کی مکمل سہولیات تک رسائی بھی حاصل نہیں ہوگی، جبکہ سوشل میڈیا کمپنیوں کو صارفین کی عمر کی تصدیق کے لیے مؤثر اقدامات کرنا ہوں گے۔

حکام کا کہنا ہے کہ اس فیصلے کا مقصد بچوں کو آن لائن خطرات، نامناسب مواد، سائبر بُلنگ اور ڈیجیٹل لت سے محفوظ رکھنا ہے، جبکہ انٹرنیٹ کے محفوظ اور ذمہ دارانہ استعمال کو فروغ دینا بھی اس پالیسی کا اہم حصہ ہے متحدہ عرب امارات اس اقدام کے ذریعے بچوں کے ڈیجیٹل تحفظ کے حوالے سے خطے میں ایک نئی مثال قائم کرنے والا پہلا عرب ملک بن گیا ہے،جس کی خلاف ورزی کی صورت میں سخت سزائیں اور بھاری جرمانے عائد کیے جا سکتے ہیں-

واضح رہے کہ اس سے قبل آسٹریلیا میں بھی 16 سال سے کم عمر بچوں کے سوشل میڈیا استعمال پر پابندی عائد کی جا چکی ہے۔

یوکرین نے ڈرون حملوں کے ذریعے ماسکو کی ایک اہم آئل ریفائنری کو نشانہ بنایا، جبکہ روس نے بھی یوکرین کے دارالحکومت کیف سمیت مختلف علاقوں پر میزائل اور ڈرون حملے کیے ہیں۔

روسی وزارت دفاع کے مطابق گزشتہ رات یوکرین نے مختلف روسی علاقوں پر سینکڑوں ڈرونز کے ذریعے حملے کیے، وزارت دفاع کا کہنا ہے کہ روسی فضائی دفاعی نظام نے 555 یوکرینی ڈرونز کو تباہ کیا، جن میں سے تقریباً 200 ڈرون ماسکو کی جانب بڑھ رہے تھے۔

ماسکو کے میئر سرگئی سوبیانن نے تصدیق کی کہ متعدد ڈرونز ماسکو کی ایک آئل ریفائنری تک پہنچنے میں کامیاب ہوگئے، جس کے باعث وہاں آگ بھڑک اٹھی،ایک شاپنگ سینٹر کو بھی معمولی نقصان پہنچا ہے یہ ایک ہفتے کے دوران ماسکو کی اس اہم آئل ریفائنری پر دوسرا حملہ ہے، ماہرین کا کہنا ہے کہ یہ ریفائنری روسی دارالحکومت کی ایندھن ضروریات کا بڑا حصہ پورا کرتی ہے اور اسے اسٹریٹجک اہمیت حاصل ہے۔

ادھر ماسکو کے نواحی علاقوں میں بھی ڈرون حملوں کے باعث ایک رہائشی عمارت، صنعتی تنصیبات اور متعدد مکانات کو نقصان پہنچا حملوں کے بعد ماسکو کے مصروف ترین شیرمیتیوو ایئرپورٹ پر پروازیں عارضی طور پر معطل کر دی گئیں اور مسافروں کو محفوظ مقامات پر منتقل کیا گیا۔

دوسری جانب یوکرین نے الزام لگایا ہے کہ روس نے کیف پر ایک بار پھر بیلسٹک میزائلوں اور ڈرونز سے حملہ کیا۔ یوکرینی حکام کے مطابق رات بھر میں 239 ڈرونز اور 7 بیلسٹک میزائل داغے گئے، جن میں سے بیشتر کو فضائی دفاعی نظام نے تباہ کر دیا شمال مشرقی یوکرینی شہر سومی میں ایک ڈرون حملے کے نتیجے میں کم از کم ایک شخص ہلاک ہونے کی بھی اطلاع ہے۔

روس اور یوکرین کے درمیان چار سال سے زائد عرصے سے جاری جنگ میں حالیہ حملے اس بات کی نشاندہی کرتے ہیں کہ امن مذاکرات کی کوششوں کے باوجود میدان جنگ میں کشیدگی بدستور برقرار ہے۔