اسلام آباد: وفاقی تعلیمی بورڈ (ایف بی آئی ایس ای) نے نہم اور دہم جماعت کے سالانہ امتحانات 2026 کے نتائج کا اعلان کر دیا-
وفاقی وزیر تعلیم ڈاکٹر خالد مقبول صدیقی نے تقریب میں بٹن دبا کر نتائج کا اعلان کیا، 10 میں سے 7 ٹاپ پوزیشن طالبات نے حاصل کیں جبکہ وفاقی سرکاری تعلیمی اداروں کا کوئی بھی طالبعلم پوزیشن حاصل نہ سکا۔
چیئرمین فیڈرل بورڈ نے بتایا کہ رواں سال نہم و دہم کے امتحانات میں مجموعی طور پر 2 لاکھ 92 ہزار 831 طلبہ و طالبات شریک ہوئے، امتحانات کے لیے 1006 مراکز قائم کیے گئے، 2012 سپروائزری عملہ، 6996 انویجی لیٹرز اور 4855 پیپر چیکرز کی خدمات حاصل کی گئیں، جبکہ پیپر چیکنگ کے لیے 10 ہزار 706 اساتذہ نے درخواستیں دیں۔
انہوں نے کہا کہ پہلی بار امتحانی پرچوں کی مارکنگ میں مصنوعی ذہانت (AI) کی مدد بھی لی گئی، جبکہ نقل کے 86 کیسز رپورٹ ہوئے،نتائج کے مطابق افیرا اعجاز نے 1089 نمبرز کے ساتھ پہلی، آمنہ نعمان نے 1088 نمبرز کے ساتھ دوسری جبکہ حذیفہ حیدر نے 1086 نمبرز کے ساتھ تیسری پوزیشن حاصل کی۔
تقریب سے خطاب کرتے ہوئے وفاقی وزیر تعلیم ڈاکٹر خالد مقبول صدیقی کا کہا تھا کہ یہ تقریب مستقبل کی کامیابیوں کی بنیاد ہے، آج کی دنیا میں جو خود کو نہیں بدلتا، وہ ترقی نہیں کر سکتا، جبکہ آئندہ 40 برس میں دنیا مزید تبدیل ہو جائے گی، علم مومن کی میراث ہے اور اسے اپنی روایات کے ساتھ ہم آہنگ کرتے ہوئے آگے بڑھنا ہوگا۔ تعلیمی میدان میں طالبات نمایاں کامیابیاں حاصل کر رہی ہیں اور اس سال ٹاپ 10 پوزیشنز میں سے 7 طالبات نے حاصل کیں۔
وفاقی وزیر نے نے کامیاب طلبہ، والدین اور اساتذہ کو مبارکباد دیتے ہوئے کہا کہ تعلیمی اداروں کا ماحول مزید سازگار بنانا ہوگا اور وفاقی تعلیمی بورڈ کو دیگر صوبوں کے لیے ایک مثالی ماڈل بننا چاہیے۔
