مری ایکسپریس وے پر کھجٹ کے مقام کے قریب سیاحوں کی ٹیوٹا ہائی ایس میں اچانک آگ بھڑک اٹھی حادثے میں 10 افراد جاں بحق جبکہ 13 زخمی ہو گئے-
ریسکیو حکام کے مطابق آگ لگنے کے بعد ہائی ایس میں شدید شعلے بلند ہوئے جس کے باعث نہ صرف گاڑی مکمل طور پر جل گئی بلکہ قریبی جنگل کے ایک حصے تک آگ پھیل گئی، جس پر قابو پانے کے لیے امدادی کارروائیاں شروع کر دی گئیں مقامی افراد نے بروقت کارروائی کرتے ہوئے گاڑی میں پھنسے 4 سیاحوں کو نکالا اور انہیں فوری طور پر اسپتال منتقل کیا۔
ذرائع کے مطابق ریسکیو 1122 بروقت جائے وقوعہ پر نہ پہنچ سکی، تاہم مقامی افراد نے اپنی مدد آپ کے تحت امدادی کارروائیوں میں حصہ لیا زخمیوں میں سے 5 افراد کو پمز اسپتال اسلام آباد جبکہ تین کو فاروق اسپتال منتقل کیا گیا ہے، جبکہ دیگر زخمیوں کو مری اور قریبی طبی مراکز میں طبی امداد دی جا رہی ہے۔ حکام کا کہنا ہے کہ بعض زخمیوں کی حالت تشویشناک ہے۔
ریسکیو حکام کا کہنا ہے کہ ابتدائی معلومات کے مطابق ہائی ایس میں سیاح سوار تھے جبکہ واقعے کی وجوہات جاننے کے لیے تحقیقات جاری ہیں آگ لگنے کے بعد ہائی ایس بے قابو ہو کر سڑک سے پھسل کر نالے میں جا گری، جس کے باعث مری ایکسپریس وے پر ٹریفک عارضی طور پر معطل ہو گئی۔
عینی شاہدین کے مطابق گاڑی میں سیاحوں کا ایک گروپ سوار تھا اور اچانک آگ لگنے کے بعد چند ہی لمحوں میں صورتحال انتہائی خطرناک ہو گئی حکام نے واقعے کی مکمل تحقیقات کا آغاز کر دیا ہے تاکہ آگ لگنے کی اصل وجہ معلوم کی جا سکے۔
ڈپٹی کمشنر مری ظہیر شیرازی کے مطابق ابتدائی اطلاعات کے مطابق حادثہ تیز رفتاری کے باعث پیش آیا، گاڑی بے قابو ہو کر دیوار سے ٹکرائی، جس کے نتیجے میں وین میں آگ لگ گئی حادثے میں زخمی ہونے والے 13 افراد کو فوری طور پر قریبی اسپتالوں میں منتقل کر دیا گیا ہے جبکہ امدادی اور ریسکیو سرگر میاں جاری ہیں۔
موٹر وے پولیس کا کہنا ہے کہ مری ایکسپریس وے پروین موڑ کاٹتے ہوئے نالے میں گری، جس کے باعث آگ بھڑک اٹھی،ترجمان موٹروے پولیس کا کہنا تھا کہ وین اس جانب گری جہاں سے دروازے کھولنا ممکن نہ تھا زخمی پمزاسلام آبادمنتقل کر دیے گئے، جاں بحق افراد کاتعلق ملتان سے تھا اورایک ہی خاندان کےتھے۔
دریں اثنا، وزیراعلیٰ پنجاب مریم نواز نے واقعے پر گہرے دکھ اور افسوس کا اظہار کیا ہے۔ انہوں نے زخمیوں کو فوری اور بہترین طبی سہولیات فراہم کرنے کی ہدایت کرتے ہوئے حادثے کی تفصیلی رپورٹ بھی طلب کر لی ہےوزیراعلیٰ پنجاب مریم نواز نے سوگوار خاندانوں سے اظہار ہمدردی و تعزیت کیا ہے۔
