Author: Khalid Mehmood Khalid

پاکستان کے وزیر خارجہ شاہ محمود قریشی نےکہا ہے کہ دوشنبے میں سب سے خوش آئند بات یہ تھی کہ بھارتی وزیر خارجہ ایس جے شنکر نے ہارٹ ایشیا کانفرنس میں پاکستان کے حوالے سے کوئی منفی بات نہیں کی۔

دوشنبے میں ایک بھارتی ٹی وی رپورٹر انس ملک سے بات کرتے ہوئے انہوں نے کہاکہ انہوں نے بھارتی وزیر خارجہ کی تقریر کو انتہائی غور سے سنا، انہوں نے ماضی کے برعکس اپنے تقریر میں پاکستان کے بارے میں کوئی نامناسب اور منفی تذکرہ نہیں کیا۔ انہوں نے بھارتی وزیر خارجہ کی طرف سے پاکستان پر الزام تراشی اورطعنے بازی کا رویہ اختیار نہ کرنے کو انتہائی مثبت اقدام قرار دیا۔

انہوں نے کہا کہ پاکستان اور بھارت کے درمیان آگے بڑھنے کا واحد راستہ صرف بات چیت ہے۔ انہوں نے اس بات کا اعادہ کیا کہ بھارت خطے میں امن کے لئے اگر ایک قدم آگے بڑھائے گا تو پاکستان دو قدم آگے بڑھے گا۔ انہوں نے کہا کہ پاکستان بھارت کے ساتھ مذاکرات سے کبھی پیچھے نہیں ہٹا۔ پاکستان اور بھارت دونوں ایٹمی طاقتیں ہیں۔ دونوں ملک جنگ کی حماقتوں میں ملوث نہیں ہو سکتے۔ دونوں ملکوں کے درمیان مسائل کے حل کا کوئی ملٹری آپشن نہیں ہے جنگ دونوں ملکوں کے لئے خودکشی کے مترادف ہے۔ انہوں نے کہا کہ جب کوئی دوسرا آپشن نہیں ہے تو بات چیت سے گریز کیوں۔ 

ایک سوال کے جواب میں انہوں نے کہا کہ دوشنبے میں بھارتی وزیرخارجہ جے شنکر سے کوئی باضابطہ ملاقات نہیں ہوئی اور نہ ہی کوئی بات چیت ہوئی۔ میڈیابھی اس کا گواہ ہے۔ انہوں نے کہا کہ بھارت کی طرف سے ملاقات کی کوئی درخواست نہیں ملی تھی اور نہ ہی ہماری کوئی ملاقات طے تھی۔ بھارتی وزہرخارجہ اپنے طے شدہ پروگرام میں مصروف تھے اور میری اپنی مصروفیات طے تھیں۔ 

وزیر خارجہ نے لائن آف کنٹرول پر فائر بندی کو خوش آئند قرار دیااور کہا کہ یہ خوشی کی بات ہے کہ دونوں ملکوں نے 2003 میں ہونے والے فائر بندی کے معاہدے کی اہمیت کو سمجھا ہے۔ انہوں نے کہا کہ کشمیری بھی اس کا خیرمقدم کررہے ہیں۔ 

وزیر خارجہ نے پاکستان کے قومی دن کے موقعہ پر بھارتی وزیراعظم نریندر مودی کے مبارکبادی خط اور وزیر اعظم عمران خان کے جوابی خط کا خاص طور پر ذکر کیا اور کہا کہ عمران خان نے مودی کا شکریہ ادا کیا اور واضح کیا کہ پاکستان کی دیرینہ خواہش رہی ہے کہ وہ تمام ہمسایوں کے ساتھ بہتر تعلقات اور امن کے ساتھ زندگی گزارے۔

وزیرخارجہ شاہ محمود قریشی نے مزید کہا کہ دونوں ممالک کو تمام حل طلب معاملات کا مناسب حل نکالنا چاہئے۔  

بھارتی حکام نے بدھ کے روز پاکستان آنے کے منتظر 212 کشمیری طلباوطالبات اور ان کے والدین کو عین اس وقت پاکستان میں داخلے سے روک دیا جب وہ اٹاری بارڈر پر امیگریشن کروانے کے کاونٹر پر موجود تھے جب کہ پاکستانی پاسپورٹ کے حامل137 افراد کو پاکستان بھیج دیا گیا۔

تفصیلات کے مطابق گزشتہ سال مارچ میں کورونا کے باعث پاک بھارت بارڈربند ہوجانے کے باعث  بھارت میں رکے ہوئے 212 کشمیری افراد جن میں طلبا وطالبات کی بڑی تعداد جو کہ پاکستان کے مختلف تعلیمی اداروں میں زیر تعلیم ہیں، سمیت 349 افراد کوبدھ کے روز پاکستان آنے کے لئے بھارتی حکومت نے اجازت دی تھی اور اس مقصد کیلئے واہگہ اٹاری بارڈر کو خصوصی طور پر کھولا گیا تھا۔

کشمیری افراد ہوائی جہاز کے ٹکٹ خرید کراٹاری واہگہ بارڈر پہنچے تو بھارتی امیگریشن حکام نے ان کو پاکستان جانے سے روک دیا اور کہا کہ نئی دہلی سے ان کی امیگریشن نہ کرنے کے احکامات آئے ہیں جس کے باعث وہ پاکستان نہیں جا سکتے۔

ان طلباوطالبات نے اٹاری بارڈر پر شدید احتجاج کیا اور انصاف کے نعرے لگائے تاہم بھارتی حکام ٹس سے مس نہ ہوئے اور انہیں پاکستان آنے کی اجازت نہیں دی۔ 

پاکستان سے ساڑھے پانچ سال قبل بھارت واپس جانے والی گونگی اور بہری لڑکی گیتاکے والدین کی تلاش میں بڑی حد تک کامیابی مل گئی ہے۔ بھارتی ریاست مہاراشٹر کے ضلع پربھانی کے علاقہ جنتور کی ایک خاتون مینا پندھارے نے دعوی کیا ہے کہ گیتا اس کی بیٹی ہے۔ اس نے گیتا کی جو جسمانی نشانیاں بتائی ہیں وہ بھی درست ثابت ہوگئی ہیں جب کہ گیتا اپنے رہائشی علاقہ کے بارے میں جو کچھ بتاتی رہی ہے وہ بھی مینا پندھارے کے گھر کے اردگرد درست ثابت ہورہی ہیں۔

تفصیلات کے مطابق مینا پندھاری نے بتایا کہ گیتا کے پیٹ پر جلنے کا نشان ہے جو جو گیتا کے پیٹ پر اسی جگہ موجود ہے جہاں مینا بتارہی ہے۔ اس کے گھر کے نزدیک گنے کے کھیت بھی ہیں جب کہ وہاں دریا بھی موجود ہے۔ یہ سب نشانیاں گیتا نے بتائی تھیں۔ بھارےی حکام اب جلد ہی دونوں کے ڈی این اے ٹیسٹ کروانے کی تیاریوں میں ہیں اور اگر یہ ٹیسٹ میچ کر گیا تو گیتا کو مینا کے حوالے کردیا جائے گا اور یوں گیتا کو والدین سے ملانے کا جو وعدہ آنجہانی سشماسوراج نے گیتا سے کیا تھا وہ پورا ہو جائے گا۔

گیتا کی عمردس سال تھی جب 2000 میں وہ امرتسر میں غلطی سے سمجھوتا ایکسپریس میں سوار ہو کر لاہور پہنچ گئی تھی اور ریلوے اسٹیشن پر بے یارومددگار پھر رہی تھی کہ پاکستان رینجرز نے اسے تحویل میں لے لیا جہاں اس سے تحقیقات کے دوران معلوم ہوا کہ وہ نہ تو سن سکتی ہے اور نہ ہی بول سکتی ہے۔ رینجرز حکام نےاسے ایدھی فاونڈیشن کے سپرد کردیا جہاں عبدالستار ایدھی نے اسے اپنی بیٹی بنا لیااوراسے ایک دردمند شخص کے پاس رہنے کے لئے بھیج دیا۔

اسی دوران پاکستان نے بھارتی حکام سے رابطہ کیا تو بھارت میں کئی خاندانوں نے دعویٰ کیا کہ وہ ان کی بیٹی ہے۔ لیکن جب ان کی تصاویر پاکستان میں بھارتی ہائی کمیشن کی وساطت سے گیتا کو دکھائی جاتیں تو وہ انہیں پہچاننے سے انکار کر دیتی۔ بالآخر ایک فیملی کو گپتا نے شناخت کرلیا جس کی بنیاد پر بھارتی حکام نے گپتا کی سفری دستاویز تیار کیں اورآخرکار 26اکتوبر 2015کو اس وقت کی بھارتی وزیر خارجہ سشما سوراج گیتا کو بھارت لے جانے میں کامیاب ہوگئیں۔

بھارت پہنچ کر گیتا نے اس فیملی کو بھی اپنا ماننے سے انکار کردیا جس کے بعد سشما سوراج نے گیتا کو بھارت کی بیٹی قرار دیااور اس سے وعدہ کیا کہ وہ بھارت بھر میں اس کے حقیقی والدین کو تلاش کریں گی۔ سشماسوراج نے گیتا کو سرکاری سرپرستی میں چلنے والی ایک این جی او کے سپرد کردیا جہاں اسے گونگے بہرے بچوں کے اسکول میں داخل کرادیاگیا۔ اسی دوران گیتا کے والدین کی تلاش جاری رہی تاہم سشماسوراج کی موت کے بعد یہ تلاش رک گئی۔

گیتا اس وقت بھی ریاست مدھیہ پردیش کے شہر اندور میں اسی این جی او کے پاس رہ رہی ہے اور اس وقت اس کی عمر تیس برس ہے۔چند دن قبل گیتا کے والدین کی دوبارہ تلاش شروع کی گئی اور اسی سلسلے میں گیتا حیدرآباد کے شہر بسار ٹاؤن پہنچی جہاں پولیس کی مدد سے اسے ریلوے اسٹیشن، مندروں، دریا اور بس اڈوں پر لے جایا گیا لیکن اس کے والدین کا کوئی نشان نہ مل سکا۔ اتنا عرصہ اپنوں سے جدائی کا دکھ تو گیتا کو ضرور ہوگا لیکن اس کی سننے اور بولنے کی اہلیت نہ ہونے کے سبب اس کا دکھ گم ہو کر رہ گیا ہے۔

کراچی کے آئی آئی چندریگر روڈ پرجنگ اور جیو کے مرکزی دفتر پر حملے کے دوران مظاہرین  نے عملے پر تشدد کیا اور دھکے دیے۔
مظاہرین نے واک تھرو گیٹ اورمرکزی دروازہ توڑدیا جبکہ مظاہرین نے دفتر کے شیشے بھی توڑ دیے ہیں۔

جنگ جیو انتظامیہ کے مطابق مظاہرین نے جیو نیوز کے عملے کو حراساں کیا جبکہ عمارت کے اندر بھی خواتین سمیت ملازمین کی بڑی تعداد موجود ہے۔
مظاہرین نے دفتر کے باہر  دھرنا دے دیا ہے اور جیو نیوز کے پروگرام  کے اینکر کی وضاحت کے باوجود معافی کا مطالبہ کیا ہے۔
دوسری جانب سینیر تجزیہ کار اور جیو نیوز کے پروگرام ’خبرناک‘ کے میزبان ارشاد بھٹی نے وضاحت  دی ہے۔
ان کا کہنا ہے کہ ان کا پروگرام طنز و مزاح کا پروگرام ہے، سندھ اور سندھی اسی طرح ان کے وجود کا حصہ ہیں، جس طرح ملک کا کوئی اور دوسرا صوبہ ہے۔

‏وفاقی وزیر اطلاعات شبلی فراز کا کہنا ہے کہ جنگ، جیودفاترپرحملےکی مذمت کرتےہیں، انہوں نے کہا کہ ‏تشددکسی صورت بھی قابل قبول نہیں ہے،شبلی فراز نے کہا کہ سندھ حکومت نےبروقت پولیس فراہم کیوں نہیں کی۔
‏اس واقعےکی تحقیقات ہونی چاہیے، انہوں نے کہا کہ ‏احتجاج سب کاحق ہےمگرتشددکی کسی صورت اجازت نہیں دی جاسکتی،

بھارتی حکومت کی سرحدی دہشت گردی میں کمی نہ آسکی۔ گزشتہ روز بھی غلطی سے بھارتی علاقے میں جانے والے پاکستانی کو گولی مار کر شہید کر دیا۔ تفصیلات کے مطابق آزاد کشمیر کا رہائشی نوجوان راستہ بھٹک کر بھارتی مقبوضہ کشمیر بارڈر پوسٹ نمبر 64 سے بھارتی علاقے چک فقیرہ میں جا پہنچا جہاں بغیر وارننگ کے اسے گولی مار دی گئی اور وہ موقعہ پر ہی شہید ہو گیا۔ دریں اثنا بھارتی بارڈر سیکیورٹی فورسز کے انسپکٹر جنرل این ایس جسوال کا کہنا ہے کہ شہید ہونے والا پاکستانی بھارت میں دراندازی کی کوشش کر رہا تھا جسے روکنے کی کوشش کی گئی لیکن وہ بھارتی علاقے میں کافی اندر تک آگیا جسے کے بعد بی ایس ایف نے کارروائی کر کے اسے گولی مار دی تاہم اس کے قبضہ سے کوئی بھی چیز برآمد نہیں ہو سکی اور نہ ہی اس کی شناخت ظاہر کی گئی ہے۔ اس سے قبل 23 نومر کو بھی اسی علاقے میں ایک پاکستانی شخص کو گولی مار دی گئی تھی۔