بھارت کے غیر قانونی زیر تسلط جموں وکشمیر میں نریندر مودی کی فسطائی بھارتی حکومت کی طرف سے 05 اگست 2019 کو نافذ کئے گئے مسلسل فوجی محاصرے کی وجہ سے مقبوضہ علاقے میں کشمیریوں کی معمولات زندگی بری طرح متاثر ہو رہی ہے ۔
فوجی محاصرے کو 18 ماہ مکمل ہونے کے موقع پرکشمیر میڈیا سروس کے ریسرچ سیکشن کی طرف سے جاری ایک رپورٹ میں انکشاف کیا گیا ہے کہ بھارتی فوجیوں نے اس عرصے کے دوران 7 خواتین سمیت 308 کشمیریوں کو شہید کیا۔
ان میں سے بیشتر کشمیریوں کو فوجیوں نے جعلی مقابلوں یاحراست کے دوران شہید کیا ۔نوجوانوں کو تلاشی اور محاصرے کی نام نہاد کارروائیوں کے دوران گھروں سے اغوا کر کے انہیں مجاہدیا مجاہد تنظیموں کا کارکن قراردیکر جعلی مقابلوں میں شہید کردیاجاتا ہے۔ گزشتہ 18 ماہ کے دوران فوجیوں کے ہاتھوں کشمیریوںکی شہادتوں کے نتیجے میں 16خواتین بیوہ اور 38بچے یتیم ہوئے ۔
رپورٹ میں مزید کہاگیا ہے کہ بھارتی فوجیوں کی طرف سے مقبوضہ علاقے میں پر امن مظاہرین پر آنسو گیس ، گولیوں اور پیلٹ گن سمیت طاقت کے وحشیانہ استعمال سے کم سے کم ایک ہزار701کشمیری شدیدزخمی ہو گئے ۔ اس دوران فوجیوں نے 993سے زائد گھروں اور عمارتوں کو تباہ، 103خواتین کی بے حرمتی کی اور 14ہزار489افراد کو گرفتار کیا۔
گزشتہ ماہ جنوری کے دوران فوجیوں نے بی ٹیک گریجویٹ سمیت تین کشمیری نوجوانوں کو جعلی مقابلوں میں شہید کیا۔ کشمیرمیڈیاسروس کے ریسرچ سیکشن کے مطابق بھارتی فوجیوں اور پولیس اہلکاروں کی طرف سے گولیوں اور آنسو گیس کے بے دریغ استعمال کی وجہ سے کم سے کم 16کشمیری زخمی ہو گئے ۔ گزشتہ ماہ جموں وکشمیر کے مختلف علاقوں میں تلاشی اور محاصرے کی 289کارروائیوں کے دوران 46افراد کو گرفتار کیاگیا جبکہ دو مکانوں کو تباہ کیاگیا
