Author: Khalid Mehmood Khalid

پاکستان سے پانچ سال قبل بھارت پہنچنے والی گونگی اور بہری لڑکی گیتا آج بھی اپنے والدین کی تلاش میں ہے لیکن اسے اپنے والدین نہیں مل رہے۔ گیتا کی عمردس سال تھی جب 2000 میں وہ امرتسر میں غلطی سے سمجھوتا ایکسپریس میں سوار ہو کر لاہور پہنچ گئی تھی اور ریلوے اسٹیشن پر بے یارومددگار پھر رہی تھی کہ پاکستان رینجرز نے اسے تحویل میں لے لیا جہاں اس سے تحقیقات کے دوران معلوم ہوا کہ وہ نہ تو سن سکتی ہے اور نہ ہی بول سکتی ہے۔ رینجرز حکام نےاسے ایدھی فاونڈیشن کے

سپرد کردیا جہاں عبدالستار ایدھی نے اسے اپنی بیٹی بنا لیااوراسے ایک دردمند شخص کے پاس رہنے کے لئے بھیج دیا۔ اسی دوران پاکستان نے بھارتی حکام سے رابطہ کیا تو بھارت میں کئی خاندانوں نے دعویٰ کیا کہ وہ ان کی بیٹی ہے۔ لیکن جب ان کی تصاویر پاکستان میں بھارتی ہائی کمیشن کی وساطت سے گیتا کو دکھائی جاتیں تو وہ انہیں پہچاننے سے انکار کر دیتی۔بالآخر ایک فیملی کو گپتا نے شناخت کرلیا جس کی بنیاد پر بھارتی حکام نے گپتا کی سفری دستاویز تیار کیں اورآخرکار 26اکتوبر 2015کو

اس وقت کی بھارتی وزیر خارجہ سشما سوراج گیتا کو بھارت لے جانے میں کامیاب ہوگئیں۔ بھارت پہنچ کر گیتا نے اس فیملی کو بھی اپنا ماننے سے انکار کردیا جس کے بعد سشما سوراج نے گیتا کو بھارت کی بیٹی قرار دیااور اس سے وعدہ کیا کہ وہ بھارت بھر میں اس کے حقیقی والدین کو تلاش کریں گی۔ سشماسوراج نے گیتا کو سرکاری سرپرستی میں چلنے والی ایک این جی او کے سپرد کردیا جہاں اسے گونگے بہرے بچوں کے اسکول میں داخل کرادیاگیا۔ اسی دوران گیتا کے والدین کی تلاش جاری رہی تاہم سشماسوراج کی موت کے بعد یہ تلاش رک گئی۔ گیتا اس وقت بھی ریاست مدھیہ پردیش کے شہر اندور میں اسی این جی او کے پاس رہ رہی ہے اور اس وقت اس کی عمر تیس برس ہے۔چند دن قبل گیتا کے والدین کی دوبارہ تلاش شروع کی گئی اور اسی سلسلے میں گیتا حیدرآباد کے شہر بسار ٹاؤن پہنچی جہاں پولیس کی مدد سے اسے ریلوے اسٹیشن، مندروں، دریا اور بس اڈوں پر لے جایا گیا لیکن اس کے والدین کا کوئی نشان نہ مل سکا۔ اتنا عرصہ اپنوں سے جدائی کا دکھ تو گیتا کو ضرور ہوگا لیکن اس کی سننے اور بولنے کی اہلیت نہ ہونے کے سبب اس کا دکھ گم ہو کر رہ گیا ہے۔ 

پاکستان میری ٹائم سکیورٹی ایجنسی نے بھارتی فشنگ بوٹس کے خلاف بڑی کارروائی کر کے کھلے سمندر میں آپریشن کرتے ہوے 3 بھارتی ماہی گیر کشتیوں کو قبضہ میں لے لیا جس میں سوار 26 بھارتی ماہی گیروں کو حراست میں لے لیا ۔ترجمان پاکستان میری ٹائم سکیورٹی ایجنسی کے مطابق یہ بھارتی کشتياں غیر قانونی طور پر پاکستانی سمندری حدود کے اندر کریک ایریا میں مچھلی کا شکار کر رہی تھی۔ بھارتی ماہی گیروں کو مزید قانونی کارروائی کے لیے ڈاکس پولیس کے حوالے کر دیا گیا۔

بھارت سرکار کی ہندوتوا سوچ کے باعث اقلیتوں کے ساتھ کیے جانے ناروا سلوک کے حوالے سے وزیر خارجہ مخدوم شاہ محمود قریشی نے ایک بیان میں کہا ہے کہ بھارت میں ہندوتوا پالیسی کے تحت اقلیتوں کو امتیازی سلوک کا نشانہ بنایا جا رہا ہے۔ انہوں نے کہا کہ
مسلمان ہوں ، دلت ہوں ، سکھ ہوں یا کرسچین ہوں کوئی بھی اقلیت بھارت میں محفوظ نہیں۔ مخدوم شاہ محمود قریشی نے کہا کہ پاکستان نے اس حوالے سے اپنے تحفظات کا اظہار کرتے ہوئے، بارہا اپنا احتجاج ریکارڈ کرایا ہے۔ دنیا نے دیکھا کہ فروری میں دہلی کے اندر چن چن کر لوگوں کو نشانہ بنایا گیا 50 کے قریب ہلاکتیں ہوئیں، وسیع پیمانے پر املاک جلائی گیئں۔ وزیر خارجہ نے کہا کہ اقلیتوں کو کچلنے کے لیے شہریت ترمیمی ایکٹ اور این آر سی جیسے امتیازی قوانین لائے گئے۔ بابری مسجد کو شہید کر کے اس کی جگہ مندر کی تعمیر اسی ہندوتوا سوچ کا شاخسانہ ہے۔ بھارتی قابض افواج کی جانب سے کشمیر میں جو مظالم ڈھائے جا رہے ہیں وہ سب کے سامنے ہیں۔ مخدوم شاہ محمود قریشی نے کہا کہ بھارت سرکار کی ہندوتوا سوچ نے سیکولر ہندوستان کے امیج کو ملیا میٹ کر دیا ہے۔