Author: Khalid Mehmood Khalid

بھارتی وزارت داخلہ نے ملک کی مختلف جیلوں میں قید 24 پاکستانیوں کو رہا کرنے کے احکامات جاری کر دئیے ہیں۔ نئی دہلی سے ملنے والی اطلاعات کے مطابق ان تمام پاکستانی شہریوں کوآج رات کو ہی امرتسر پہنچا دیا گیا۔ ان تمام پاکستانیوں کو کل واہگہ بارڈر کے راستے پاکستان رینجرز کے حکام کے حوالے کیا جائے گا۔ اس سلسلے میں واہگہ اٹاری بارڈر خاص طور پر کھولا جائے گا۔ رہا کئے جانے والے پاکستانیوں میں 20 ماہی گیر اور 4 عام شہری شامل ہیں۔ اسلام آباد میں بھارتی ہائی کمیشن نے پاکستانی حکام کو تحریری طور پر مذکورہ قیدیوں کی پاکستان حوالگی کی اطلاع دے دی ہے۔ پاکستان پہنچنے کے بعد ان تمام پاکستانی شہریوں کا کورونا ٹیسٹ بھی کیا جائے گا۔  

وزیر خارجہ مخدوم شاہ محمود قریشی نے کہا ہے کہ پچھلے دنوں انہوں نے ڈی جی آئی ایس پی آر کے ساتھ مشترکہ پریس کانفرنس میں ایک ڈوزئیر پیش کیا تھا جس میں انہوں نے شواہد کے ساتھ واضح کیا تھا کہ کس طرح ہندوستان پاکستان کے اندر دہشت گردانہ کارروائیوں کی پشت پناہی کر رہا ہے اور سی پیک کے تحت منصوبوں کو نشانہ بنانے کے درپے ہے۔ ایک بیان میں انہوں نے کہا کہ انہوں نے واضح کیا تھا کہ ہندوستان نے اس مقصد کیلئے ایک سیل بنایا ہے جس کے لیے 80 ارب کے لگ بھگ رقم مختص کی گئی ہے۔ مخدوم شاہ محمود قریشی نے کہا کہ ہمارا اور اس خطے کا مستقبل سی پیک سے جڑا ہوا ہے اس کی ہر ممکن حفاظت کو یقینی بنانے کیلئے ہم پرعزم ہیں۔ انہوں نے کہا کہ چین بھی اس اقتصادی راہداری کی اہمیت کو سمجھتا ہے اس لیے انہوں نے سی پیک کی سیکورٹی کے حوالے سے واضح پیغام دیا ہے۔ مخدوم شاہ محمود قریشی نے کہا کہ ہم چین کے ساتھ ملکر سی پیک کی حفاظت کریں گے اور ان منصوبوں کو پایہ تکمیل تک پہنچائیں گے۔ وزیرخارجہ نے کہا کہ ڈوزئیر میں ظاہر کیے گئے خدشات کو ہم اقوام متحدہ، او آئی سی سمیت تمام اہم عالمی فورمز پر اٹھائیں گے جب کہ سی پیک کےخلاف سازش کرنےپر بھارت کوناکامی ہوگی۔ شاہ محمودقریشی نے واضح کیا کہ بھارتی ہتھکنڈوں پرپاکستان خاموش نہیں رہےگا۔ بھارت کا رویہ غیر ذمہ دارانہ ہے اس کو ہر محاٖذ پر ناکامی ہوگی۔

بھارتی میڈیا نے دعوی کیا ہے کہ فرانس کے صدرعمینوئل میکرون نے پاکستان کی حکومت کی طرف سے فرانس کے حوالے سے دئیے گئے بیانات کے جواب میں پاکستانی فضائیہ کے زیر استعمال فرانس کی فرم ڈسالٹ ایوی ایشن کے تیار کردہ 150 کے قریب میراج لڑاکا طیاروں اور پاک بحریہ کی اوگسٹا 90 بی کلاس آبدوزوں کو اپ گریڈ کرنے سے انکار کر دیا ہے۔ بھارتی اخبار ہندوستان ٹائمز کی ایک رپورٹ کے مطابق فرانس نے پاکستان کے اٹلی ساختہ ائر ڈیفنس سسٹم کو اپ گریڈ کرنے کی درخواست بھی مسترد کر دی ہے۔ اخبار کے مطابق پاکستان نے اپنی اوگسٹا کلاس آبدوزوں کو ایئر انڈیپنڈنٹ پروپلشن اے آئی پی سسٹمز کے ساتھ اپ گریڈ کرنے کی درخواست بھی کی تھی۔ اپ گریڈ ہونے کے بعد ان میں زیادہ دن پانی کے اندر رہنے کی صلاحیت بڑھ جائے گی۔ لیکن فرانس کے ایک سفارت کار کے مطابق فرانس نے اسے  بھی   مسترد کردیا ہے۔ پاک فضائیہ کے پاس فرانس کی فرم ڈسالٹ ایوی ایشن کے تیار کردہ 150 کے قریب میراج لڑاکا طیارے ہیں۔ جنہیں اب تک پاکستان ہی میں اوورہال اور اپ گریڈ کیا جاتا رہا ہے۔ جبکہ اب جدید ٹیکنالوجی کی اپ گریڈیشن کا اختیار انہیں تیار کرنے والی فرانسیسی فرم کے پاس ہے۔ پاکستان بحریہ میں تین اگوسٹا 90 بی کلاس کی آبدوزیں خالد ، سعد اور حمزہ ہیں۔ اخبار کے مطابق فرانس نے قطر سے بھی کہا ہے کہ وہ اپنے رافیل فائٹر طیاروں کے لئے پاکستانی ٹیکنیشنز کو ملازمت نہ دے کیونکہ اس طرح رافیل کی ٹیکنالوجی لیک ہونے کا اندیشہ ہے۔

بھارتی دفتر خارجہ نے دعوی کیا ہے کہ سعودی عرب 20 ریال کے اس کرنسی نوٹ کو واپس لے رہا ہے جس کی پشت پر جموں کشمیر اور لداخ کو بھارتی حصہ نہ دکھانے پربھارت نے شدید احتجاج کیاتھا۔ سعودی عرب نے یہ کرنسی نوٹ 24 اکتوبر کو جی 20 ممالک کی کانفرنس کے حوالے سے جاری کیا تھا جس کی پشت پر دنیا کا نقشہ بنایا گیا تھا۔ نقشے میں کشمیر اور لداخ کو بھارتی یا پاکستان کا حصہ نہیں دکھایا گیا تھا۔پاکستان نے بھی اس کرنسی نوٹ پرشائع ہونے والے نقشہ پر اعتراض کیا تھا۔ واضح رہے کہ جی 20 ممالک کی پہلی ورچوئل کانفرنس آج سے شروع ہورہی ہے جس میں بھارتی وزیر اعظم نریندر مودی بھارت کی نمائندگی کریں گے۔ 

کابل سے ملنے والی اطلاعات کے مطابق پاکستان کے وزیراعظم عمران خان کے دورہ افغانستان کو سبوتاژ کرنے کی بھارتی کوشش بری طرح ناکام ہوگئی۔ کابل میں بھارتی سفارتخانے کے ایک سینئر افسر نے اپنا نام ظاہر نہ کرنے کی شرط پر باغی ٹی وی کو جو حقائق بتائے اس سے بھارت کا چہرہ بے نقاب ہو گیا ہے۔ اس افسے کے مطابق بھارت نے افغانستان میں کابل سمیت مختلف شہروں میں عمران خان کے خلاف مظاہرے کرنے کے لئے کروڑوں روپے خرچ کئے اور اس بات کو یقینی بنایا کہ وہ لوگ جن کو پیسے دئیے گئے وہ کم از کم پانچ پانچ سو لوگ تمام بڑے شہروں میں مظاہرے میں اکٹھا کریں گے لیکن خوست اور پکتیا کے سوا کسی جگہ پر بھی بھارت کو اپنے مقاصد میں کامیابی نہیں ہو سکی اور کہیں پر بھی لوگوں کو عمران خان کے خلاف مظاہروں میں شرکت کے لئے باہر نہ نکالا جا سکا۔ خوست میں کئے جانے والے مظاہرے میں صرف 11 لوگ شامل ہوئے جب کہ پکتیا میں 50 کے قرہب لوگ باہر نکالے جاسکے۔ کابل میں بھارتی سفارتخانے نے خوست اور پکتیا کے "مظاہروں” کی تصاویر سوشل میڈیا پر پھیلانے کی بھی کوشش کی لیکن ان کی یہ کوشش بھی زیادہ کارگر ثابت نہیں ہوئی۔