Author: Khalid Mehmood Khalid

ایک بھارتی طیارہ دبئی ایئر شو میں گر کر تباہ ہوا، جس کے نتیجے میں پائلٹ موقع پر ہی جاں بحق ہوگیا۔ اگرچہ یہ ایک افسوسناک سانحہ ہے، لیکن یہ واقعہ صرف ایک حادثہ نہیں۔ یہ بھارتی فضائیہ اور اس کے ہوابازی کے پروگراموں میں موجود گہرے مسائل کی عکاسی کرتا ہے۔

اس واقعے نے آپریشنل سیفٹی، مرمت کے معیار، اور دفاعی منصوبوں کے سیاسی فروغ کے بارے میں انتہائی سنگین سوالات کھڑے کر دیے ہیں ۔ ایسے منصوبے جن میں انسانی جانوں سے زیادہ دکھاوے اور سیاسی بیانیے کو ترجیح دی جاتی ہے۔ رپورٹس کے مطابق ستمبر 2023 تک بھارت 2,374 طیارے کھو چکا ہے، جن میں 1,126 لڑاکا طیارے، سیکڑوں نان فائٹر ایئرکرافٹ، اور 1,300 سے زائد پائلٹس شامل ہیں جو اپنی جانیں گنوا بیٹھے۔

بھارتی پارلیمانی رپورٹ ، جو ظاہر ہے کہ بہت محتاط اور محدود ڈیٹا پر مبنی ہوتی ہے، اس میں بھی یہ اعتراف موجود ہے کہ 2017 سے 2022 کے دوران بھارتی فضائیہ میں 34 فضائی حادثات پیش آئے۔ ان میں سے کئی کو انسانی غلطی قرار دیا گیا، لیکن حقیقت یہ ہے کہ تکنیکی نقائص، ناکافی مرمت، اور پرانے طیارے (جیسے مگ-21) بھی بڑے عوامل ہیں۔

ایچ اے ایل تیجس، بھارت کا مقامی طور پر تیار کردہ ہلکا لڑاکا طیارہ، جو حادثے میں تباہ ہوا، دراصل خودانحصاری کے سیاسی بیانیے آتمنربھر بھارت کی نمائندگی کے لیے تیار کیا گیا تھا۔ اگرچہ اسے تکنیکی کامیابی کے طور پر پیش کیا گیا، لیکن اس پروگرام کو ہمیشہ سے اخراجات میں اضافے، ڈیزائن کی خامیوں، تاخیر، اور معیار کے مسائل کا سامنا رہا ہے۔

متعدد بھارتی اور بین الاقوامی رپورٹس میں کرپشن، بدنظمی، لاگت میں غیر ضروری اضافہ، سب کنٹریکٹرز کو ادائیگیوں کی تاخیر اور غیر ملکی پرزوں پر انحصار جیسے مسائل کی نشاندہی کی گئی ہے۔ مقامی Kaveri انجن کی ناکامی کے باعث تیجس کے لیے آج بھی GE F404 غیر ملکی انجن استعمال کیے جاتے ہیں۔

بھارتی دفاعی تجزیہ کاروں کے کئی عوامی بیانات میں تیجس کو ایک سیاسی پروجیکٹ قرار دیا گیا ہے، نہ کہ مکمل طور پر تیار اور قابلِ بھروسہ جنگی طیارہ۔ کچھ ماہرین اسے پرانے حادثہ خیز مگ-21 کی طرح "اڑتا تابوت” بھی قرار دیتے رہے ہیں۔

تیجس کا یہ حادثہ بین الاقوامی ایئر شوز کے لیے بھی ایک سنگین خطرے کو ظاہر کرتا ہے۔ ایسے ملک کے طیارے جن کا حفاظتی ریکارڈ کمزور ہو، وہ پائلٹس اور تماشائیوں دونوں کی جانوں کو خطرے میں ڈال سکتے ہیں۔ ہجوم کے قریب پیچیدہ فضائی کرتب پہلے ہی خطرناک ہوتے ہیں، اور اگر پلیٹ فارم میں تکنیکی خامیاں ہوں تو خطرہ کئی گنا بڑھ جاتا ہے۔

عالمی منتظمین اور شراکت دار فضائی افواج کو چاہیے کہ وہ سخت حفاظتی تقاضے، تکنیکی آڈٹ، اور آپریشنل سرٹیفیکیشن کو لازمی بنائیں، اس سے پہلے کہ ایسے طیاروں کو ہائی پروفائل تقریبات میں حصہ لینے کی اجازت دی جائے۔

بغیر ان حفاظتی اقدامات کے، تماشائیوں اور پائلٹس کی زندگیاں خطرے میں پڑ سکتی ہیں۔

تیجس کے گرد کھڑا کیا گیا سیاسی بیانیہ، قومی فخر اور خود انحصاری کا دعویٰ انسانی جانوں کی قیمت پر نہیں ہونا چاہیے۔ بار بار ہونے والے حادثات یہ دکھاتے ہیں کہ وقار اور دکھاوا اصل حفاظت، احتساب، پیشہ ورانہ معیار، اور آپریشنل رسک سے زیادہ اہم سمجھا جانے لگا ہے۔

شفاف آڈٹ، آزادانہ حفاظتی تحقیقات، اور سخت مرمتی و تربیتی پروٹوکول کی فوری ضرورت ہے۔ ان کے بغیر، بھارت مسلسل ایسے چکر میں پھنسا رہے گا جہاں پائلٹ مرتے ہیں، طیارے ناکام ہوتے ہیں، اور سیاسی بیانیہ ان جانوں اور ساکھ پر غالب رہتا ہے جنہیں یہ بیانیہ تحفظ دینے کا دعویٰ کرتا ہے۔

بھارت کے مقامی طور پر تیار کردہ تیجس لڑاکا طیاروں کے دو بڑے حادثات کے بعد اس پروگرام کی کارکردگی اور موجودہ فلیٹ کے سائز پر ایک بار پھر سوالات اٹھنے لگے ہیں۔ بھارتی فضائیہ نے 2016 میں پہلا تیجس طیارہ باقاعدہ طور پر اپنے بیڑے میں شامل کیا تھا۔ بھارتی فضائیہ اور دفاعی صنعت کے ذرائع کے مطابق بھارتی فضائیہ کے پاس چالیس تیجس ایم کے 1 طیارے موجود تھے جن میں سے دو فائٹر غیر فعال ہوچکے ہیں جب کہ اب تک دو تیجس فائٹر تباہ ہوئے ہیں۔ جس کے بعد اس وقت 36 طیارے فعال بیڑے کا حصہ رہ گئے ہیں۔ مارچ 2024 میں راجستھان کے علاقے جیسلمیر میں ایک تربیتی مشن کے دوران پہلا تیجس طیارہ گر کر تباہ ہوا۔ پائلٹ نے محفوظ طریقے سے ایجیکٹ کر لیا۔ ابتدائی تحقیق کے مطابق حادثے کی وجہ انجن سیژر تھا جو آئل پمپ کی خرابی کے باعث پیش آیا۔ دوسرا حادثہ گزشتہ روز دبئی ایئر شو کے دوران پیش آیا جس میں طیارہ ڈیمو فلائٹ کے وقت بارل رول کے بعد کنٹرول کھو بیٹھا اور زمین سے ٹکرا گیا۔ حادثے میں پائلٹ جان کی بازی ہار گیا۔ دفاعی تجزیہ کاروں کے مطابق تیجس فائٹر طیاروں کو پیش آنے والے یہ دونوں حادثات بھارتی دفاعی ایوی ایشن کے لیے سنگین دھچکا ہیں کیونکہ تیجس پروگرام کو پہلے ہی تاخیر، لاگت میں اضافے اور تکنیکی مسائل کا سامنا تھا۔ گزشتہ روز ہونے والے حادثے کے بعد بھارتی اسٹاک مارکیٹ میں تیجس طیارے تیار کرنے والے ادارے ہندوستان ایروناٹکس لیمیٹڈ کے شیئرز ڈھائی فی صد تک گر گئے۔ 

بھارت کے قومی سلامتی کے مشیر اجیت ڈوول کی خصوصی دعوت پر بنگلہ دیش کے ہم منصب میجر جنرل (ر) خلیلُ الرحمٰن 19 سے 20 نومبر کو دہلی میں منعقد ہونے والی کولمبو سیکیورٹی کونکلیو کے ساتویں این ایس اے سطح کے اجلاس میں شرکت کریں گے۔ یہ فورم بھارت، سری لنکا، مالدیپ، ماریشس اور بنگلہ دیش کے درمیان علاقائی سلامتی، دہشت گردی کے انسداد، سمندری تحفظ اور سائبر سیکیورٹی پر تعاون بڑھانے کے لیے تشکیل دیا گیا ہے۔

ذرائع کا کہنا ہے کہ اجیت ڈوول کی جانب سے خلیلُ الرحمٰن کو خصوصی طور پر دعوت نامہ بھیجنا محض رسمی کارروائی نہیں، بلکہ اس کے پیچھے بھارت کی اسٹریٹجک پالیسی کارفرما ہے۔ ذرائع کے مطابق بھارت بنگلہ دیش کی عبوری حکومت کی چند حالیہ پالیسیوں پر گہری نظر رکھے ہوئے ہے جن میں ڈھاکہ میں پاکستانی فوجی افسران کے حالیہ دورے سب سے اہم ہے۔ اس کے علاوہ بنگلادیش کے چین کے ساتھ بڑھتے ہوئے دفاعی رابطے اور بعض انتہائی اہم اور بھارت مخالف افراد کی رہائی پر بھی بھارت گہری نظر رکھے ہوئے ہے۔ 

واضح رہے کہ بھارت اور بنگلہ دیش کے تعلقات حالیہ چند ماہ کے دوران مختلف سیاسی اور سیکیورٹی معاملات کے باعث کشیدگی کا شکار رہے ہیں۔ ایسے میں ڈوول کی دعوت کو خطے میں بدلتی صورتحال کے تناظر میں ایک اہم قدم قرار دیا جا رہا ہے۔

بھارتی دارالحکومت نئی دہلی میں لال قلعہ کے قریب ہونے والے کار بم دھماکے کے حوالے سے بھارتی میڈیا نے مبینہ طور پر بنگلہ دیش کا ہاتھ ہونے کا دعویٰ کیا ہے تاہم بنگلہ دیشی حکومت نے ان الزامات کو مسترد کرتے ہوئے بے بنیاد، مضحکہ خیز اور گمراہ کن قرار دیا ہے۔

بھارتی میڈیا کے مطابق دھماکے کی منصوبہ بندی اس سال اکتوبر کے آخر میں ڈھاکہ میں ایک اہم میٹنگ میں کی گئی۔ اس میٹنگ میں مبینہ طور پر لشکرِ طیبہ کے کمانڈر سیف اللہ سیف، حزب التحریر کے مقامی رہنما، انصاراللہ بنگلہ ٹیم کے ارکان اور دو بنگلہ دیشی سرکاری اہلکار شریک تھے۔ اسی ملاقات میں دہلی حملے کے لیے ابتدائی خاکہ تیار ہوا۔ بھارتی میڈیا نے یہ دعویٰ بھی کیا ہے کہ دھماکے میں استعمال ہونے والا بارودی مواد بنگلہ دیش سے مغربی بنگال کے مرشدآباد کے راستے بھارت منتقل کیا گیا۔ اختیار نامی ایک شخص کو اس مبینہ نیٹ ورک کا اہم سہولت کار قرار دیا جا رہا ہے تاہم اس حوالے سے بھارتی تحقیقاتی ایجنسیوں نے باضابطہ طور پر کوئی بیان جاری نہیں کیا۔

دریں اثنا بنگلہ دیش کی وزارتِ خارجہ نے بھارتی میڈیا رپورٹس کو مسترد کرتے ہوئے کہا ہے کہ ڈھاکہ پر دہلی دھماکے میں ملوث ہونے کا الزام بے بنیاد ہے۔ مشیر خارجہ توحید حسین نے کہا کہ بنگلہ دیش ہر قسم کی دہشت گردی کے خلاف ہے اور دہلی دھماکے پر بھارتی عوام سے ہمدردی رکھتا ہے، لیکن غیر مصدقہ دعووں کو حقیقت سمجھنے کا عمل تفتیش کو نقصان پہنچا سکتا ہے۔

لاہور(خالدمحمودخالد) پاکستان میں بابا گرو نانک کے جنم دن کی یاترا کے لئے بھارت سے آنے والے جتھے میں شامل سکھ خاتون سربجیت کور نے اسلام قبول کرکے ایک پاکستانی شہری سے شادی کرلی ہے۔ ان کا اسلامی نام نور رکھا گیا ہے۔ نکاح نامے کے مطابق 48 سالہ سربجیت کور نے 5 نومبر کو ضلع شیخوپورہ کے فاروق آباد کے رہائشی پاکستانی شہری مقامی حجام ناصر حسین سے نکاح کیا۔ نکاح میں دس ہزار روپے حق مہر درج ہے جو ادا کیا جا چکا ہے۔ سربجیت کور 4 نومبر کو  بھارتی یاتریوں کے ساتھ پاکستان آئی تھیں لیکن 13 نومبر کو بھارت واپس جانے والے یاتریوں میں شامل نہیں تھیں جب کہ اسی روز ان کا ویزہ بھی ختم ہوگیا تھا۔ اسی بنا پر انہیں لاپتہ قرار دے کر ان تلاش شروع کی گئی۔ گزشتہ روز ان کا نکاح نامہ منظرعام پر آگیا۔ یاترا کے دوران وہ ننکانہ صاحب، حسن ابدال، لاہور اور دیگر شہروں میں گروپ سے الگ ہوکر باہر بھی نکلتی رہیں اور بظاہر اسی دوران انہوں نے اپنی مرضی سے گروپ چھوڑ کر نکاح کرلیا۔ نکاح نامے میں انہوں نے بتایا ہے کہ وہ مطلقہ ہیں اور بھارت میں ان کے دو لڑکے بھی ہیں۔ ان کی اپنے سابقہ شوہر کلونت سنگھ سے علیحدگی ہو چکی ہے جب کہ وہ گزشتہ پندرہ سال سے برطانیہ میں مقیم ہے۔ بھارتی میڈیا کے مطابق مذکورہ خاتون پر بھارت میں مختلف الزامات کے تحت تین مقدمات بھی درج ہیں جب کہ اس کے بیٹوں کے خلاف دس مقدمات درج ہیں۔

ترکی نے بھارتی فوج کے لیے امریکا سے آنے والے اپاچی ہیلی کاپٹروں کی کارگو پرواز کو اپنی فضائی حدود سے گزرنے کی اجازت دینے سے انکار کر دیا ہے جس کے نتیجے میں جدید جنگی ہیلی کاپٹروں پر مشتمل کارگو طیارہ واپس امریکا لوٹ گیا۔تفصیلات کے مطابق تین عدد AH-64E اپاچی فائٹر ہیلی کاپٹر جو بھارتی فوج کے لیے تیار کیے گئے تھے، ایک Antonov An-124 کارگو طیارے کے ذریعے امریکا کے شہر میسا ایریزونا سے بھارت روانہ ہوئے۔ راستے میں طیارہ برطانیہ کے ایسٹ مڈلینڈ ائرپورٹ پر رکا تاہم ترکی کی جانب سے فضائی گزرگاہ نہ ملنے پر طیارے کو اپنی پرواز منسوخ کرنی پڑی اور بالآخر وہ امریکا واپس چلا گیا۔ بھارتی دفاعی ذرائع کے مطابق ترکی کی جانب سے یہ فیصلہ سیاسی بنیادوں پر کیا گیا ہے کیونکہ انقرہ پاکستان کا قریبی اتحادی تصور کیا جاتا ہے اور حالیہ مہینوں میں ترکی کی بھارت کے ساتھ تعلقات میں کشیدگی بھی دیکھی گئی ہے۔ دفاعی ماہرین کے مطابق یہ اقدام بھارت کے لیے ایک سفارتی چیلنج بن گیا ہے، کیونکہ ترکی ایشیا اور یورپ کے درمیان اہم فضائی راہداری رکھتا ہے۔ بھارتی فوج نے 2020 میں چھ AH-64E اپاچی ہیلی کاپٹروں کی خریداری کا معاہدہ کیا تھا۔ پہلی کھیپ پہلے ہی بھارت پہنچ چکی ہے جبکہ یہ دوسری کھیپ تھی جس میں تین ہیلی کاپٹر شامل تھے۔ اب اس تاخیر کے باعث بھارتی فوج میں ان ہیلی کاپٹروں کی شمولیت مزید مؤخر ہو گئی ہے۔ ذرائع کا کہنا ہے کہ بھارت اب متبادل فضائی راستے یا سمندری راستے سے ترسیل کے آپشنز پر غور کر رہا ہے تاکہ مستقبل میں ایسے مسائل سے بچا جا سکے۔