Author: Khalid Mehmood Khalid

لاہور(خالدمحمودخالد) بھارتی ریاست بہار میں ہونے والے انتخابات کے پہلے مرحلے میں ووٹنگ 6 نومبر کو ہوگی۔جمعرات کو شروع ہونے والے انتخابات میں دو بڑے پولیٹیکل بلاکس بھرپور طریقے سے حصہ لے رہے ہیں جن میں بھارتیہ جنتا پارٹی کی سربراہی میں نیشنل ڈیموکریٹک الائنس اور راشٹریہ جنتا دل اور انڈین نیشنل کانگریس کی قیادت میں گرینڈ الائنس شامل ہیں۔ انتخابی مقابلہ 243 نشستوں پر ہوگا۔ بہار کے انتخابی میدان میں اس بار بھی وہی پرانی کہانی دہرائی جا رہی ہے۔ اپوزیش کی طرف سے عوامی مسائل، مہنگائی، روزگار اور تعلیم کے سوالات اٹھائے جارہے ہیں جب کہ حکومت کی طرف سے ماضی کی طرح قوم خطرے میں ہے، پاکستان سازش کر رہا ہے اور مودی ہی ملک کو بچا سکتے ہیں، کے نعرے لگائے جارہے ہیں۔ بھارتی اپوزیشن جماعت نیشنل کانگریس کے اہم لیڈر راہول گاندھی نے گزشتہ روز ایک انٹرویو میں کہا ہے کہ وزیرِاعظم نریندر مودی کی سیاسی حکمتِ عملی ہمیشہ سے ایک ہی نکتے کے گرد گھومتی آئی ہے۔ جب عوامی غصہ بڑھے، اقتصادی دباؤ محسوس ہو، یا پارٹی کے اندر اختلافات ابھرنے لگیں تو پاکستان کارڈ سامنے لے آؤ،  یہی کارڈ آج بہار میں دوبارہ کھیلا جا رہا ہے۔ انہوں نے کہا کہ مودی نے 2014 میں ملک کو ترقی، روزگار اور شفاف حکومت کا خواب دکھایا تھا لیکن آج گیارہ سال بعد وہی وزیرِاعظم اپنی تقریروں میں زیادہ تر پاکستان، دہشت گردی اور قومی سلامتی پر بات کرتا نظر آتا ہے۔ انہوں نے کہا کہ ان کی اس حکمت عملی کا مقصد عوامی گفتگو کو مسائل سے ہٹا کر خطرے کی طرف موڑ دینا ہے۔ مودی حکومت کے خلاف سب سے بڑا غصہ روزمرہ زندگی کے دباؤ سے جنم لے رہا ہے۔ مہنگائی نے عام شہری کی کمر توڑ دی ہے، اور نوجوانوں کے پاس روزگار کے مواقع نہ ہونے کے برابر ہیں۔ یہ وہ حقیقت ہے جس پر مودی حکومت کھل کر بات نہیں کرنا چاہتی کیونکہ اس کے پاس عملی نتائج دکھانے کیلئے کچھ زیادہ نہیں۔ اسی لیے انتخابی جلسوں میں معیشت کی بات کم، پاکستان کی بات زیادہ کی جا رہی ہے۔ مودی کے بہار میں حالیہ بیانات جن میں اپوزیشن پر پاکستان کے ایٹمی خوف سے ڈرنے کا الزام لگایا گیا دراصل اسی پرانی سیاسی تکنیک کی تازہ قسط ہیں۔ یہ ایک جذباتی نکتہ ہے جو ووٹروں کے قومی احساس کو جگاتا ہے مگر سوال یہ ہے کہ کیا عوام اب بھی ان نعروں سے متاثر ہوتے ہیں، یا ان کی ترجیحات بدل چکی ہیں۔ راہل گاندھی کا کہنا ہے کہ اس بار زمینی فضا الگ ہے۔ اب عوام پاکستان کی بجائے پٹرول کی قیمت اور نوکری کی تلاش پر بات کر رہے ہیں۔ اپوزیشن لیڈر تیجسوی یادو کا کہنا ہے کہ مودی جب سوالوں میں گھرتے ہیں، تو دشمن ملک کی بات کرنے لگتے ہیں۔ مودی اب ایک ایسے مقام پر ہیں جہاں ان کی کامیابی کا بوجھ خود ان کے کندھوں پر ہے۔ اگر وہ ترقی کے وعدوں کی طرف واپس نہ لوٹے تو ان کی سیاست ہمیشہ کے لیے خطرے کے بیانیے پر منحصر ہو سکتی ہے۔ انہوں نے کہا کہ پاکستان کارڈ نے ماضی میں بی جے پی کو انتخابی فائدہ ضرور دیا۔ مگر موجودہ بھارت میں ووٹر اب کہیں زیادہ باشعور ہے۔ وہ جانتا ہے کہ قوم پرستی کے نعروں سے پیٹ نہیں بھرتا اور دشمن کے نام پر روزگار نہیں ملتا۔ مودی کے پاس اب دو راستے ہیں۔ یا تو وہ ترقی کے اپنے وعدے دوبارہ زندہ کریں یا پھر یہ تسلیم کر لیں کہ ان کی سیاست اب دشمن کے خوف پر چلتی ہے عوامی امیدوں پر نہیں۔ واضح رہے کہ بہار سمیت پورے ملک میں مودی حکومت کو جن چیلنجز کا سامنا ہے ان میں سب سے نمایاں مہنگائی، بے روزگاری اور کسانوں کی ناراضی سرفہرست ہیں۔ روزمرہ اشیائے خورد و نوش کی قیمتوں میں اضافے نے عام شہری کو متاثر کیا ہے جبکہ نوجوان طبقہ روزگار کے مواقع نہ ملنے سے مایوس ہے۔ کاروباری طبقے میں جی ایس ٹی اور ٹیکس اصلاحات پر ناراضی برقرار ہے۔ جس کی وجہ سے انتخابی نتائج کے بارے میں فوری طور پر کچھ کہنا قبل از وقت ہوگا۔

(خصوصی رپورٹ: خالد محمودخالد)امریکی صدر ڈونلڈ ٹرمپ کے ایک مختصر مگر بھاری بیان نے جنوبی ایشیا کی فضا میں سفارتی ارتعاش پیدا کر دیا ہے۔انہوں نے کہا کہ پاکستان جوہری تجربات کر رہا ہے، جبکہ امریکہ نہیں۔ یہ جملہ بظاہر ایک سیاسی نکتہ لگتا ہے مگر درحقیقت اس کے دور رس سفارتی اثرات ہیں اور ان اثرات سے سب سے زیادہ فائدہ بھارت کو پہنچ سکتا ہے۔

امریکی سیاست میں ٹرمپ ہمیشہ خوف کا بیانیہ بیچنے کے ماہر رہے ہیں۔ اب جب وہ دوبارہ انتخابی مہم کی تیاری میں ہیں تو انہوں نے عالمی جوہری خطرات کا ذکر چھیڑ کر اپنے حامیوں کو باور کرایا کہ دنیا غیر محفوظ ہے۔لیکن سوال یہ ہے کہ اگر وہ واقعی تشویش ظاہر کر رہے تھے تو انہوں نے بھارت کا نام کیوں نہیں لیا؟ اس کی وجہ یہ ہے کہ واشنگٹن آج بھی نئی دہلی کو چین کے مقابلے میں سب سے بڑا اسٹریٹجک اتحادی سمجھتا ہے لہٰذا بھارت کو کسی الزام میں گھسیٹنا امریکی مفادات کے خلاف ہوتا۔ نتیجتاً ٹرمپ کا بیان پاکستان کو دباؤ میں لاتا ہے اور بھارت کو ایک ذمہ دار ایٹمی طاقت کے طور پر پیش کرتا ہے۔

جب کسی ملک کو خطرہ قرار دے دیا جائے تو اس کے مخالف خودبخود محافظ بن جاتے ہیں۔ٹرمپ کے بیان کے بعد بھارت کو یہ موقع مل گیا ہے کہ وہ پاکستان کے خلاف عالمی فورمز پر ایک بار پھر جوہری تحفظ کے نعرے کے ساتھ اپنی مہم تیز کرے۔ بھارت یہ دعویٰ کر سکے گا کہ دہلی ایک ذمہ دار، شفاف اور جمہوری جوہری ریاست ہے جبکہ پاکستان کا نظام غیر واضح اور عسکری کنٹرول میں ہے۔ یہی وہ سفارتی نکتہ ہے جس سے بھارت کو واشنگٹن، پیرس، لندن اور ٹوکیو جیسے دارالحکومتوں میں نرم گوشہ حاصل ہوتا ہے۔

ٹرمپ کے بیان کے بعد بھارت کے دفاعی اداروں کے لیے ایک نیا موقع پیدا ہو گیا ہے کہ وہ علاقائی خطرے کے نام پر مزید فنڈز اور جدید اسلحہ کی منظوری حاصل کریں۔امریکہ اور یورپ کی بڑی کمپنیوں کے لیے یہ ٹرمپ کا یہ بیان دفاعی مارکیٹ کی توسیع ہے جب کہ یہ بھارت کے لیے دفاعی صنعت کی مضبوطی کا باعث بنے گا۔ امریکی صدر کے بیان سے یہ بھی ثابت ہوتا ہے کہ بھارت کے ساتھ امریکہ کے تعلقات خراب نہیں جب کہ خرابی کادعوی محض دکھاوے کا ایک بیانیہ ہے۔ اس کے برعکس پاکستان کے ساتھ امریکہ کی بڑھتی ہوئی دوستی اس غبارے کی طرح ہے جس کی ہوا صرف ایک پن کی نوک سے نکل جاتی ہے۔ 

بھارت کا نام نہاد آپریشن سیندور جاری رکھنے کیلئے 114 رافال جنگی طیاروں کا بڑا دفاعی منصوبہ ایک بار پھر سنگین بحران کا شکار ہو گیا ہے۔ فرانس نے چوبیس ارب ڈالرز کے اس معاہدے میں نئی دہلی کی سخت شرائط خاص طور پر سافٹ ویئر سورس کوڈ کے حصول سے متعلق مطالبات کو تسلیم کرنے سے انکار کر دیا ہے جب کہ بھارتی وزارت دفاع نے اپنی فضائیہ کو کہا ہے کہ فرانس سے معاہدے کو مکمل کرنے کیلئے دوبارہ پروپوزل دے۔ بھارت نے فرانس کو جو تجاویز دی ہیں اس میں بھارت کا یہ بھی اصرار کہ فرانس رافال کی مکمل ٹیکنالوجی بھارت کو منتقل کرے لیکن فرانس نے بھارت پر واضح کردیا ہے کہ یورپی ممالک حساس نوعیت کے کوڈ کسی تیسرے ملک کے حوالے نہیں کرتے۔ فرانس نے طیاروں کی بھارت میں مقامی تیاری پر تو اتفاق کیا ہے جب کہ اصل ٹیکنالوجی یعنی انجن، ریڈار اور سافٹ ویئر کے کنٹرول مکمل طور پر فرانس کے ہی کنٹرول میں رہیں گے کیونکہ فرانس میں انہیں اپنا “اسٹریٹجک اثاثہ” سمجھا جاتا ہے۔ بھارت کی کوشش ہے کہ اسے رافال کے اویانکس سسٹم اور مشن سافٹ ویئر کا سورس کوڈ ملے تاکہ وہ اپنے مقامی میزائل، بم، اور الیکٹرانک وارفیئر سسٹم ان طیاروں میں خود شامل کر سکے۔ لیکن فرانس اس پر تیار نہیں۔ اس کا کہنا ہے کہ بھارت جو حساس نوعیت کی ٹیکنالوجی حاصل کرنا چاہتا ہے وہ دسالت اور تھیلز کمپنیوں کی ملکیتی ہے جب کہ دوسری طرف نیٹو اور یورپی یونین کے ایکسپورٹ کنٹرول قوانین بھی اس ٹیکنالوجی کو کسی دوسرے ملک کو ٹرانسفر کرنے پر پابندی لگاتے ہیں۔ فرانس نے کہا ہے کہ integration support تو دی جا سکتی ہے مگر مکمل سورس کوڈ کی فراہمی ممکن نہیں۔ بھارت یہ بھی چاہتا ہے کہ 114 میں سے کم از کم 80 طیارے میک ان انڈیا اسکیم کے تحت بھارت میں تیار کیے جائیں لیکن فرانس کا کہنا ہے کہ حیدرآباد میں فائنل اسمبلی لائن تو ممکن ہے مگر بنیادی ڈھانچے اور ٹیکنالوجی منتقلی پر بھاری لاگت آئے گی جس سے معاہدے کی قیمت دگنی ہو سکتی ہے اس لئے پہلے 18 سے 24 طیارے فرانس میں بنائے جائیں گے جب کہ باقی طیارے بعد میں بھارت میں مکمل کئے جائیں گے۔ اس وقت یہ معاہدہ تقریباً 24 ارب ڈالر کا ہے۔ ماہرین کا کہنا ہے کہ اس تاخیر سے بھارت کی فضائی قوت پر براہِ راست اثر پڑے گا کیونکہ اس کے کئی اسکواڈرن پہلے ہی ریٹائرڈ ہو چکے ہیں جبکہ چین اور پاکستان دونوں تیزی سے اپنے فضائی بیڑے جدید بنا رہے ہیں۔

دریں اثنا بھارتی اپوزیشن نے مودی کے میک ان انڈیا دعوے کو کھوکھلا قرا دیتے ہوئے کہا ہے کہ مودی حکومت کا فرانس سے 114 رافال جنگی طیاروں کامنصوبہ بھارت کے لیے ایک سیاسی نعرہ زیادہ اور حقیقی پیش رفت کم دکھائی دیتا ہے۔ حکومت اس منصوبے کو بظاہر اس کی دفاعی برتری کا نیا سنگِ میل قرار دے رہی ہے لیکن یہ محض ایک تکنیکی مسئلہ نہیں بلکہ بھارت کے دفاعی نظام کی گہرے انتشار کی نشاندہی کرتا ہے۔ یوں “میڈ اِن انڈیا” کا نعرہ ایک بار پھر کھوکھلا ثابت ہوا ہے کیونکہ اگر ٹیکنالوجی کی بنیاد ہی دوسرے ملک کے قبضے میں ہو تو مقامی پیداوار محض اسمبلی لائن کا نام رہ جاتی ہے۔ یہ پہلا موقع نہیں کہ بھارت کی دفاعی منصوبہ بندی اس نوعیت کی مشکلات سے دوچار ہوئی ہو۔ ٹیجاس منصوبے کی تاخیر، Kaveri انجن کی ناکامی، اور ایس 400 کی ترسیل میں تاخیر اس امر کی عکاسی کرتے ہیں کہ بھارت دفاعی خود انحصاری کے راستے پر محض نعرے لگا رہا ہے، حقیقی پیش رفت نہیں ہو رہی۔ فرانس کی جانب سے پیدا شدہ رکاوٹ نے نریندر مودی حکومت کے “ویژن 2035 دفاعی منصوبے” پر بھی سوالیہ نشان لگا دیا ہے۔ بھارت اپنی سیاسی خواہشات کے زیرِ اثر ایسے منصوبے بنا رہا ہے جن کی تکنیکی اور مالی بنیادیں غیر حقیقت پسندانہ ہیں۔ ایک جانب وہ خود کو “عالمی سپر پاور” کہلواتا ہے، مگر دوسری جانب بنیادی پرزہ جات اور ایویونکس سسٹم تک درآمد پر انحصار کرتا ہے۔ ماہرین کا کہنا ہے کہ رافال ڈیل کی تاخیر کا سب سے بڑا نقصان بھارتی فضائیہ کو ہو گا جو پہلے ہی پرانے مگ-21 طیاروں کی ریٹائرمنٹ سے کمزور ہو چکی ہے۔ اس دوران چین اور پاکستان اپنے فضائی بیڑوں کو تیزی سے جدید کر رہے ہیں، بالخصوص چین کے J-20 اور پاکستان کے JF-17 Block III کی موجودگی میں بھارتی فضائیہ کے پاس تکنیکی برتری باقی نہیں رہی۔

افغان عبوری وزیر خارجہ امیر خان متقی کی پریس کانفرنس میں خواتین صحافیوں کو شرکت سے روک دیا گیا۔ جمعہ کے روز افغانستان کے عبوری وزیر خارجہ امیر خان متقی نے نئی دہلی میں افغان سفارت خانے میں ایک پریس کانفرنس کی جس میں انہوں نے ہمسایہ ممالک کے ساتھ افغانستان کے تعلقات پر بات کی۔ لیکن اس پریس کانفرنس کا سب سے متنازعہ پہلو یہ سامنے آیا کہ خواتین صحافیوں کو اسے کور کرنے کی اجازت نہ دی گئی۔ امیر خان متقی جو افغانستان میں طالبان کی حکومت کے قیام کے بعد پہلی بار اعلیٰ سطحی مہمان کے طور پر بھارت پہنچے تھے ان کی پریس کانفرنس میں خواتین صحافیوں کی عدم شرکت نے ایک بار پھر بھارتی میڈیا پر ہنگامہ برپا کر دیا ہے۔ اہم بھارتی ٹی وی چینلز کی خاتون صحافیوں سمیت کئی غیرملکی خاتون رپورٹرز کو بھی داخلے سے روک دیا گیا۔ انسانی حقوق کی تنظیموں نے اسے افغان طالبان کی مردہ پالیسیوں کا تسلسل قرار دیا ہے جو اب صرف افغانستان تک محدود نہیں بلکہ سرحدوں سے باہر بھی نظر آ رہی ہے۔ ایک بھارتی خاتون صحافی نے کہا یہ صرف ایک کانفرنس کی بات نہیں بلکہ یہ ظاہر کرتا ہے کہ افغان طالبان کی سوچ اب بھی وہی ہے جو خواتین کو خاموش کرنے پر تلی ہے۔ بھارت جس نے انہیں عزت دی وہاں یہ کیسے ممکن ہوا۔ یہ واقعہ اس وقت رونما ہوا جب متقی کی بھارت آمد کو عالمی سطح پر اہم سمجھا جا رہا تھا۔ اقوام متحدہ کی سلامتی کونسل نے انہیں خصوصی طور پر بھارت جانے کی اجازت دی تھی۔ ایک اور بھارتی خاتون صحافی نے کہا کہ افغانستان میں طالبان کی حکمرانی کے بعد سے خواتین صحافیوں پر پابندیاں بڑھتی جا رہی ہیں۔ اطلاعات کے مطابق کابل میں بھی حکومتی پریس کانفرنسوں سے خواتین کو دور رکھا جاتا ہے اور اب یہ پالیسی بھارت جیسے ملک میں بھی نظر آئی۔ انہوں نے کہا کہ بھارت جیسی جمہوریہ کو ایسی پالیسیوں کی مذمت کرنی چاہیے۔ متقی کا بھارت کا یہ دورہ 16 اکتوبر تک جاری رہے گا جس دوران وہ تاج محل کا بھی دورہ کریں گے اور بھارتی کاروباری برادری سے ملاقاتیں کریں گے۔ تاہم خواتین صحافیوں پر پابندی لگانے کا یہ واقعہ اس دورے کی چمک کو دھندلا دیتا ہے اور طالبان کی عالمی سطح پر تنقید کو مزید ہوا دیتا ہے۔