بھارت ریاست ہماچل پردیش حکومت کے ذریعے کو رونا وائرس کی روک تھام کے لیے خریدے گئے طبی آلات میں بدعنوانی کا معاملہ سامنے آنے کے بعد بی جے پی کے ریاستی صدرڈاکٹر راجیو بندل نے ‘اخلاقی بنیاد’ پر اپنے عہدے سے استعفیٰ دے دیا۔ چار مہینے پہلے ہی ریاست میں بی جے پی صدر کی کمان سنبھالنے والے 65 سالہ بندل نے کہا کہ محکمہ صحت کے افسر پربدعنوانی کے مبینہ الزامات کی پوری جانچ یقینی بنانے کے لیے وہ اپناعہدہ چھوڑ رہے ہیں۔انہوں نے اس معاملے سے کسی طرح کا تعلق ہونے سے بھی انکار کیا ہے۔ بی جے پی کے قومی صدر جےپی نڈا کو بھیجے استعفیٰ میں بندل نے کہا کہ وہ اخلاقی بنیاد پر اپنا استعفیٰ دے رہے ہیں۔ خبررساں ایجنسی پی ٹی آئی کے مطابق، نڈا نے بندل کا استعفیٰ قبول کر لیا ہے۔ بندل کا استعفیٰ محکمہ صحت کے ڈائریکٹر اجئے کمار گپتا کی گرفتاری کے ایک ہفتے بعد آیا ہے۔ اسٹیٹ ویجیلنس اینڈ اینٹی کرپشن بیورو نے 43 سیکنڈ کا ایک آڈیو کلپ وائرل ہونے کے بعد گپتا کو 20 مئی کو گرفتار کیا تھا۔آ ڈیو کلپ میں گپتا ایک دوسرے شخص سے پانچ لاکھ روپے کی رشوت کا مطالبہ کر رہے تھے۔ بندل پانچ بارایم ایل اے رہے ہیں۔ وہ آیورویدک میڈیسن اور سرجری میں گریجویٹ ہیں۔ وہ سولن سے تین بار ایم ایل اے چنے گئے ہیں اور ناہن سے دوبارہ ایم ایل اے بنے تھے۔
Author: Khalid Mehmood Khalid
سنیما گھروں کے لئے آن لائن اسٹریمنگ پلیٹ فارمز، ایک نیامسئلہ
بھارت میں کو رونا وائرس کے باعث جاری لاک ڈاؤن کے دوران امیتابھ بچن اور آیوشمان کھرانہ کی نئی فلم ‘گلابو ستابو’ سنیما گھروں کے بجائے اب آن لائن اسٹریمنگ پلیٹ فارم پر ریلیز ہو رہی ہے۔ اس فلم کے ساتھ ساتھ کچھ اور فلمیں ہیں، جو اب انہیں پلیٹ فارمز پر ریلیز ہونے والی ہیں۔ ایسے میں سنیما گھروں کے سامنے آن لائن اسٹریمنگ پلیٹ فارمز نے نیامسئلہ کھڑا کر دیا ہے۔ کو رونا وائرس کے پیش نظر پورے بھارت میں 25 مارچ سے لاک ڈاؤن نافذکیا گیا تھا اور اب اس میں مسلسل چوتھی باراضافہ کرتے ہوئے اسے31 مئی تک بڑھا دیا گیا ہے.لاک ڈاؤن نافذ کرنے سے ہفتہ دس دن پہلے ہی وائرس سے تحفظ کی کوششوں کے
تحت لوگوں کو ایک جگہ جمع ہونے سے روکنے کے لیے مختلف ریاستوں میں دفعہ 144 نافذ کر دیا گیا تھا۔ ساتھ ہی احتیاط کے تحت مختلف ریاستوں میں سنیما گھراورملٹی پلیکس بھی بند کردیےگئے تھے۔ اس طرح سنیما گھر اور ملٹی پلیکس کو بند ہوئے تقریباً تین مہینے سے کچھ زیادہ وقت گزر چکا ہے۔ لاک ڈاؤن کی وجہ سے دوسرے کاروبار کی طرح دنیا کی دوسری بڑی فلم انڈسٹری بھی بری طرح متاثر ہے۔اسی دوران انڈسٹری سے ایک خبر آئی کہ امیتابھ بچن اور آیوشمان کھرانہ کی ایکٹنگ سے سجی اور شوجیت سرکار کی ہدایت میں بنی فلم ‘گلابو ستابو’ سنیما گھروں کےبجائے اب آن لائن اسٹریمنگ پلیٹ فارم امیزان پرائم پر ریلیز ہو رہی ہے۔اس خبر نے ایک بار پھریہ سوال اٹھا دیا ہے کہ ملٹی پلیکس کی وجہ سے جس طرح سنگل اسکرین سنیما گھر لگ بھگ ختم ہو گئے، کیا نیٹ فلیکس، امیزان پرائم، ڈزنی ہاٹ اسٹار جیسے آن لائن اسٹریمنگ پلیٹ فارم آنے کی وجہ سے کچھ ویسا ہی مستقبل اس کا ہونے والا ہے؟ گزشتہ چار مئی کو ہی دی ملٹی پلیکس ایسوسی ایشن آف انڈیا(ایم اے آئی)نے اسٹوڈیو پارٹنر، پروڈیوسر، اداکاروں اور فلم انڈسٹری میں اپنی خدمات دینے والے دوسرے لوگوں سے اپیل کی تھی کہ وہ اپنی فلموں کی ریلیزکو روک کر رکھیں اور ایک بار جب سنیما گھر کھل جائیں تو وہیں ریلیز کریں۔ تنظیم کی یہ اپیل ان قیاس آرائیوں کے بعد آئی تھی، جس میں کہا جا رہا تھا کہ اکشے کمار کی فلم ‘لکشمی بامب’ سمیت کچھ فلموں کو سیدھے ڈیجیٹل پلیٹ فارم پر ریلیز کرنے کی تیاری کی جا رہی ہے۔ گلابو ستابو کے ڈیجیٹل ریلیز کے اعلان پربھارت کے سب سے بڑے آئی ناکس اور پی وی آر جیسے ملٹی پلیکس چین نے بھی مایوسی کا اظہار کیا ہے۔آئی ناکس کی جانب سے کہا گیا ہے کہ سنیما اوراس کو بنانے والے ہمیشہ باہمی منافع کی خاطر کام کرتے ہیں. ایک بیان میں آئی ناکس نے کہا ہے کہ اس مشکل وقت میں ایک دوسرے کے شیئر ہولڈرز میں سے ایک کے ذریعے اس طرح کا قدم اٹھانا پریشان کن ہے۔بالخصوص اس وقت جب ایک دوسرے کے ساتھ کندھے سے کندھا ملاکر کھڑے ہونے کی ضرورت ہے۔ پی وی آر پکچرز کے سی ای او کمل گیان چندانی نے کہا ہے ہماری اپیل کے بعد بھی فلم کے پروڈیوسرزکی طرف سے فلم گلابو ستابو کو ڈیجیٹل ریلیز کئے جانے کے فیصلے سے ہمیں بے حد مایوسی ہوئی ہے۔
یہ پہلی بارنہیں ہے کہ کوئی فلم براہ راست امیزان یا نیٹ فلکس پر ریلیز ہو رہی ہے۔ اس سے پہلے رشی کپور کی فلم ‘راجما چاول’ اور ‘مرد کو درد نہیں ہوتا’ جیسی لو بجٹ فلمیں سیدھے آن لائن پلیٹ فارم پر ریلیز ہوئی ہیں۔گلابو ستابو بڑی فلم ہے۔ کہا جارہا تھا کہ لاک ڈاؤن کے بعد اس فلم کی ریلیز سے سنیما گھروں کو نئی جان مل سکتی تھی۔ انڈین ایکسپریس سے بات چیت کرتے ہوئے فلم ایکزبٹر اکشے راٹھی نے کہا کہ گلابو ستابو کی اسٹار کاسٹ بڑے پردے پر جادو جگا دیتی۔ وہ کہتے ہیں، ‘فلم میں امیتابھ بچن اورآیوشمان کھرانہ ایک ساتھ آ رہے ہیں۔ یہ فلم باکس آفس پر 100 کروڑ روپے کی حد پار کر لیتی۔ راٹھی نے کہا یہ صحیح ہے کہ کوئی بھی فلم اس کے پروڈیوسر کے بیٹے کی طرح ہوتی ہے اور اس کو اختیار ہوتا ہے کہ وہ اس کو جہاں مرضی ریلیز کر دے، لیکن یہ ایک مثال ہے، جس کا بڑے پردے پر سنیما دکھانے کی روایت منفی اثرمرتب ہوگا۔ واضح رہے کہ اچانک لاک ڈاؤن کی وجہ سے جہاں عرفان خان کی آخری فلم ‘انگریزی میڈیم’ اور ‘باغی 3’ کا کاروبار بری طرح متاثر ہوا تھا، جس کے بعد انہیں فوراً آن لائن اسٹریمنگ پلیٹ فارمز پر ریلیز کر دیا گیا۔اس لیگ میں ‘گلابو ستابو’ اکیلی فلم نہیں ہے۔ ودیا بالن کی فلم ‘شکنتلا دیوی: ہیومن کمپیوٹر’، ساؤتھ انڈین اداکارہ جیوتیکا کی فلم ‘پونمگل وندھل’، تمل فلم ‘پینگئن’، کنڑ فلم ‘آل’ اور ‘فرینچ بریانی’، ملیالم فلم ‘سوفیم سجاتیم’ بھی امیزان پرائم پر ریلیز ہونے والی ہیں۔
ٹرین میں کھانا اور پانی نہ ملنے کی وجہ سے خاتون کی موت
بھارت میں لاک ڈاؤن کے دوران خصوصی ریلیف ٹرینوں میں مسافروں کو کھانا اور پانی نہ ملنے کی خبریں لگاتار سامنے آ رہی ہیں۔ ایسے میں سوشل میڈیا پر ایک ویڈیو سامنے آیا ہے، جس میں ایک خاتون ریلوے اسٹیشن پر پڑی ہیں۔ ان کے اوپر ایک چادر ہے اور ان کا ڈھائی سالہ چھوٹا سا بچہ چادر کھینچتے ہوئے ماں کو اٹھانے کی کوشش کرتا ہوا نظر آتا ہے لیکن اسے معلوم نہیں کہ اس کی ماں نہ اٹھنے کے لئے سو گئی ہے.مبینہ ظور پرٹرین میں کھانا اور پانی نہ ملنے کی وجہ سے اس خاتون کی موت ہو چکی تھی۔ ان کا نام اروینہ خاتون (35) تھا اور وہ کٹیہار کی رہنے والی تھیں۔ وہ اپنے بہن بہنوئی کے ساتھ شرمک ایکسپریس سے احمدآباد سے بہار آ رہی تھیں۔
گزشتہ اتوار کو وہ ٹرین میں سوار ہوئی تھیں۔ اہل خانہ کے مطابق کھانا اور پانی نہ ملنے کی وجہ سے ٹرین میں خاتون کی حالت خراب ہو گئی۔ سوموار دوپہر قریب 12 بجے ٹرین میں اس نے دم توڑ دیا۔مظفر پور جنکشن پر دوپہرتین بجےکے قریب ریلوے پولیس نے خاتون کی لاش ٹرین سے اتاری ۔لاش کو جب پلیٹ فارم پر رکھا گیا تب ان کا ڈھائی سال کا بچہ لاش سے چادر کھینچتے ہوئے انہیں جگانے کی کوشش کرنے لگا۔ حالانکہ ریلوے نے بھوک سے موت ہونے کی بات سے انکار کیا ہے۔ ریلوے کے ڈپٹی ایس پی رماکانت اپادھیائے نے کہا کہ خاتون احمدآباد سے آ رہی تھی۔ خاتون کی مدھوبنی میں موت ہو گئی۔ اس کی بہن نے بتایا کہ اچانک ہی خاتون کی موت ہو گئی۔ انہوں نےمزید کہا کہ ٹرین میں کھانے اور پانی کی کوئی پریشانی نہیں تھی۔ خاتون کو پچھلے ایک سال سے کوئی بیماری تھی اور وہ ذہنی طور پر بھی ٹھیک نہیں تھیں۔ انہوں نے کہا کہ اس کی موت کی اصل وجہ ڈاکٹر ہی بتا سکتے ہیں۔
کورونا وباءاوراس کے بعد کی صورتحال پر اعلی سطحی ایف ایف ڈی تقریب
وزیراعظم عمران خان کورونا وباءاور اس کے بعد کے دور میں ترقی کے لئے سرمایہ کاری سے متعلق اعلی سطحی ورچوئل تقریب میں آج شرکت کریں گے۔
اس تقریب کی میزبانی کینیڈا، جمیکا اور اقوام متحدہ کے سیکریٹری جنرل کررہے ہیں۔ دنیا بھر سے چنیدہ سربراہان مملکت وحکومت اس اعلی سطحی تقریب میں مدعو کئے گئے ہیں۔وزیراعظم عمران خان کے علاوہ، فرانس، جنوبی افریقہ، قزاخستان کے صدور، برطانیہ، جاپان، ناروے، اٹلی، آئیرلینڈ کے وزرا اعظم، جرمن چانسلر اور سعودی عرب کے ولی عہد اس اعلی سطحی تقریب سے خطاب کریں گے۔ ترقی پزیر ممالک کے قرض سے متعلق مسائل مالی امور سے متعلق ان چھ موضوعات میں شامل ہیں جن پر اعلی سطحی تقریب میں بات ہوگی۔
وزیراعظم عمران خان نے اپریل کے مہینے میں ’قرض میں ریلیف دینے کے عالمی اقدام‘ کا آغاز کیاتھا تاکہ ترقی پزیر ممالک کے لئے وسائل کی فراہمی کی گنجائش پیدا کی جائے تاکہ وہ کورونا وباءکے نتیجے میں درپیش موجودہ بحران سے موثر انداز میں نمٹ سکیں اور پائیدار معاشی ترقی کی بحالی ممکن ہوپائے۔ ان کے اس اقدام اور پاکستان کی قیادت میں ترقی پزیر اور ترقی یافتہ ممالک کے نمائندہ گروپ اور بڑے مالیاتی اداروں نے اقوام متحدہ کی سائیڈ لائنز پراس موضوع پر غیررسمی صلاح مشورہ شروع کیا تاکہ بعض امور اور ان عملی اقدامات پر اتفاق رائے پیدا ہو جن کے ذریعے ترقی پزیر ممالک کو درپیش قرض کے مسئلہ سے نبردآزما ہواجاسکے۔
اس اعلی سطحی تقریب میں وزیراعظم عمران خان اپنے وژن سے آگاہ کریں گے کہ کس طرح قرض کے مسئلے اور ترقی پزیر ممالک کودرپیش شدید مالی مشکلات سے نمٹا جاسکتا ہے۔ وزیراعظم عمران خان کو اس تقریب میں شرکت کی دعوت ترقی پزیر ممالک کے مخلص ترجمان کے طورپر ان کے کردار اور غریب ممالک کو قرض کے دباو سے نجات کے اجتماعی حل کے ان کے بروقت مطالبے کے اعتراف کا مظہر ہے۔ اس اعتراف نے پاکستان کو یہ موقع فراہم کیا ہے کہ وہ بڑی معاشی واقتصادی طاقتوں سمیت معتبر ممالک کے گروپ کے ساتھ مل کرقرض کے مسئلے کو حل کرے۔
قرض، لیکویڈٹی، سرمایہ کاری اور پائیدار ترقی جیسے کلیدی مسائل کے حل کے لئے وزیراعظم عمران خان کے قائدانہ کردار سے پاکستان اور دیگر ترقی پزیر ممالک کے لئے امکانات میں بے انتہاءاضافہ ہوا ہے کہ وہ عالمی حمایت، یک جہتی اور تعاون حاصل کریں جس کی انہیں اس وقت اشد ضرورت ہے تاکہ ایک صدی قبل آنے والی بدترین عالمی کساد بازاری کے بعد سے درپیش موجودہ شدید معاشی بحران سے دنیا کی تیزی کے ساتھ بحالی کی طرف واپسی یقینی ہوسکے ۔
کورونا کیسز. بھارت دنیا کے ٹاپ 10 ممالک میں شامل
بھارت میں کورونا وائرس سے گزشتہ 24 گھنٹوں کے دوران تقریباً 7 ہزار نئے کیسز سامنے آئے ہیں جو اب تک یومیہ کیسز کی سب سے زیادہ تعداد ہے۔ گزشتہ روز بھارت، ایران کو پیچھے چھوڑ کر کورونا سے متاثر 10بڑے ممالک میں شامل ہوگیا ہے۔ صرف ایک روز میں 6977 نئے کیسز سامنے آنے کے بعد مریضوں کی مجموعی تعداد ایک لاکھ 38 ہزار 845 تک پہنچ گئی۔ جبکہ گزشتہ 24 گھنٹوں میں 154 افراد کی ہلاکت کے بعد ہلاکتوں کی مجموعی تعداد چار ہزار21 ہو گئی ہے۔ بھارت میں اب تک صحت یاب ہونے والوں کی کل تعداد 57 ہزار721ہو گئی ہے۔
بھارت میں پھنسے پاکستانیوں کے لئے خوشخبری
بھارت میں لاک ڈاون اور پاک بھارت سرحد بند ہونے کے باعث بھارت کے مختلف شہروں میں پھنسے ہوئے 179پاکستانی شہریوں کو پاکستان واپس آنے کی اجازت مل گئی ہے۔ اس سلسلے میں واہگہ اٹاری بارڈر کل ایک بار پھر خصوصی طور پر کھولا جائے گا۔ نئی دہلی میں پاکستانی ہائی کمیشن کے حکام نے بھارتی ریاستوں گجرات، مہاراشٹر، چھتیس گڑھ، دہلی، ہریانہ، اترپردیش، اور پنجاب کے مختلف شہروں میں پھنسے ہوئے179پاکستانی شہریوں کی وطن واپسی کے لئے جو انتظامات کئے ہیں ان کے تحت تمام پاکستانی آج شام تک بھارتی شہر امرتسر میں پہنچ جائیں گے جہاں سے وہ کل واہگہ بارڈر کے راستے اپنے وطن پاکستان پہنچ جائیں گے۔ اس مقصدکے لئے پاکستان اور بھارت کے حکام نے واہگہ اٹاری بارڈر ایک روز کے لئے کھولنے پر رضامندی کا اظہار کیا تھا۔بھارتی حکام نے اس حوالے سے تمام متعلقہ محکموں کو ایک خط لکھ دیا ہے جس میں پاکستانی شہریوں کو بحفاظت اٹاری بارڈر تک پہنچانے کے لئے انتظامات کرنے کا کہا گیا ہے۔ان تمام پاکستانی شہریوں کی واپسی کے لئے نئی دہلی میں پاکستانی ہائی کمیشن کے حکام نے بھر پور کوششیں کی ہیں۔
صحافی کی بے دردی سے پٹائی، دو پولیس اہلکار معطل
بھارتی پنجاب حکومت نے موہالی سے شائع ہونے والے ایک مقامی اخبار کے صحافی کی بے رحمی سے پٹائی کرنے والے دونوں پولیس اسسٹنٹ سب انسپکٹر کو معطل کر دیا ہے. مقامی پنجابی اخبار کے صحافی میجر سنگھ پنجابی ایک مقامی گرودوارے میں دو گروپوں کی ایک مفاہمتی میٹنگ کی کوریج کے لئے گئے. جب کہ اسی دوران موہالی پولیس اسٹیشن فیز 1 کے دو اسسٹنٹ سب انسپکٹروں (اے ایس آئی) نے ان کی پٹائی کر دی جس سے وہ شدید زخمی ہو گئے۔ میجر سنگھ پنجابی کی تصویریں اور ویڈیو سوشل میڈیا پر وائرل ہونے کے بعد صحافیوں کی کئی تنظیموں نے سخت احتجاج کیا جس کے بعد ملزم پولیس اہلکاروں کو معطل کر دیا گیا۔ میجر سنگھ اس وقت موہالی کے سول ہاسپٹل میں زیرعلاج ہیں۔ میجر سنگھ نے کہا کہ 22 مئی کی دوپہر کو وہ گرودوارے میں دو گروپوں کے درمیان ایک میٹنگ کو کور کرنے گئے تھے جب وہ وہاں پہنچے تواے ایس آئی اوم پرکاش اور امرناتھ کو دیکھا، جو ایک شخص جسپال سنگھ کو پکڑ کرکمرے سے باہر لا رہے تھے. انہوں نےاپنے موبائل فون سے اسے ریکارڈ کرنا شروع کر دیا اور جسپال سے بات کرنے کی کوشش کی۔ پولیس نے انہیں ویڈیو بناتے سے روکا لیکن انہوں نے پولیس کو بتایا کہ وہ صحافی ہیں اور کوریج کے لئے آئے ہیں اس کے باوجود دونوں پولیس اہلکارزبردستی انہیں ایک نجی گاڑی میں بٹھاکرموہالی کے فیز 1 پولیس اسٹیشن لے گئے۔ انہیں جس گاڑی میں بٹھایا گیا اس کا نمبر پلیٹ ہریانہ کا تھا۔ انہوں نے بتایاکہ گاڑی سے اترنے سے پہلے ہی اے ایس آئی اوم پرکاش نے ڈنڈے سے ان کی پٹائی شروع کر دی۔ دونوں انہیں گھسیٹ کر لاک اپ میں لے گئے، جہاں نہ صرف انہیں پیٹا کیا گیا بلکہ بے عزت بھی کیا گیا۔ ان کی پگڑی بھی کھول دی جب کہ وہ باربار پولیس والوں کو کہتے رہے کہ ان کی پگڑی کو ہاتھ نہ لگائیں لیکن انہوں نے ایک نہ سنی. اس کے ساتھ ساتھ ان کی جیب میں موجود کنگا بھی پھینک دیا.انہوں نے کہا کہ ان کے بائیں پیر، دونوں بازو اور پیٹھ میں شدید چوٹیں آئیں. موہالی کے ڈپٹی کمشنر گریش دیالن کا کہنا ہے کہ انہوں نے موہالی کے ایس ڈی ایم جگدیپ سہگل کو معاملے کی آزادانہ تحقیقات کر کے تین دنوں میں رپورٹ پیش کرنے کو کہا ہے۔اس دوران چنڈی گڑھ پریس کلب اور چنڈی گڑھ جرنلسٹ ایسوسی ایشن کے صدربلوندر سنگھ اور ڈوسرے نے پنجابی پر حملے کی مذمت کی اور قصور واروں کے خلاف سخت کارروائی کرنے کا مطالبہ کیا.
وزیر خارجہ کا سیکرٹری جنرل او آئی سی سے ٹیلیفونک رابطہ
پاکستان کے وزیر خارجہ مخدوم شاہ محمود قریشی نے سیکرٹری جنرل او آئی سی ڈاکٹر یوسف بن احمد العثیمین سے ٹیلیفونک رابطہ کیا ہے۔انہوں نے سیکرٹری جنرل او آئی سی کو مقبوضہ جموں و کشمیر میں جاری انسانی حقوق کی سنگین خلاف ورزیوں اور خطے میں امن و امان کی صورتحال سے آگاہ کیا۔ سیکریٹری جنرل او آئی سی نے کل ہونے والے المناک طیارہ حادثے اور انسانی جانوں کے نقصان پر گہرے دکھ اور افسوس کا اظہار کیا۔ وزیر خارجہ نے اظہار تعزیت پر سیکریٹری جنرل او آئی سی کا شکریہ ادا کیا ۔
مقبوضہ جموں وکشمیر میں انسانی حقوق کی سنگین خلاف ورزیوں کا حوالہ دیتے ہوئے وزیر خارجہ مخدوم شاہ محمود قریشی نے قابض بھارتی افواج کی جانب سے ظالمانہ کارروائیوں میں اضافے اور مقبوضہ خطے میں آبادی کاتناسب تبدیل کرنے کی بھارتی کوششوں پر پاکستان کی طرف سے گہری تشویش کا اظہار کیا۔ وزیر خارجہ نے بھارت کی جانب سے حالیہ ڈومیسائل قوانین میں ترمیم کا حوالہ دیتے ہوئے انہیں اقوام متحدہ سلامتی کونسل کی قراردادوں، چوتھے جینیوا کنونشن اور عالمی قوانین کی صریحا خلاف ورزی قرار دیا۔قریشی نے کہا کہ کورونا وباء کی آڑ میں بھارت نے مقبوضہ وادی میں جاری لاک ڈاون کو مزید سخت کردیا ہے، جعلی ”مقابلوں“ اور تلاشی کی کارروائیوں کی آڑمیں کشمیریوں کو بہیمانہ جبروتشدد کا نشانہ بنایاجارہا ہے، ماورائے عدالت ہلاکتوں اور دیگر اقدامات میں اضافہ ہو چکا ہے جب کہ بھارت، مقبوضہ جموں و کشمیر کی صورتحال مسلمانوں کے خلاف نسلی تعصب، نفرت اور اسلام مخالف اقدامات سے دنیا کی توجہ ہٹانے کے لئے کوئی نیا ”فالس فلیگ“ آپریشن کرسکتا ہے۔ انہوں نے کہا کہ مقبوضہ جموں و کشمیر میں جاری بدترین مظالم جانچنے کے لئے اقوام متحدہ کے فوجی مبصر گروپ برائے بھارت اور پاکستان (یو۔این۔موگپ)، او آئی سی، عالمی مبصرین کو موقع پر جا کر صورت حال کا جائزہ لینے کی اجازت ملنی چاہئے۔ وزیر خارجہ نے گذشتہ روز سیکرٹری جنرل اقوام متحدہ کے ساتھ ہونے والے ٹیلیفونک رابطے اور اس ضمن میں ہونیوالی گفتگو سے سیکرٹری جنرل او آئی سی کو آگاہ کیا۔ وزیر خارجہ نے او آئی سی کی جانب سے مقبوضہ کشمیر پر پاکستانی موقف کی پر زور اور غیر متزلزل حمایت پر سیکرٹری جنرل کا شکریہ ادا کیا اور کہا کہ ہم انسانی حقوق کے حوالے سے او آئی سی کی تنظیم (IPHRC) کی جانب سے مقبوضہ جموں و کشمیر میں ڈومیسائل قوانین کی ترمیم اور بھارت کی جانب سے کئے گئے دیگر یکطرفہ اقدامات کو مسترد کرنے کے حوالے سے جاری کردہ بیان کا خیر مقدم کرتے ہیں۔ وزیر خارجہ نےکہا کہ
بھارت کی جانب سے مسلمانوں کو کرونا وبا کے پھیلاؤ کا ذمہ دار قرار دینا،بھارت میں بڑھتا ہوا اسلاموفوبیا باعث تشویش ہے جس کے لیے او آئی سی کو اپنا موثر کردار ادا کرنے کی ضرورت ہے۔
سیکرٹری جنرل او آئی سی ڈاکٹر یوسف بن احمد العثیمین نے کہا کہ وہ مقبوضہ جموں و کشمیر کی صورتحال پر مسلسل نظر رکھے ہوئے ہیں- انہوں نے وزیر خارجہ کو او آئی سی کی جانب سے مکمل معاونت کا یقین دلایا۔ وزیر خارجہ نے کرونا وبا کے دوران، کورونا وبائی چیلنج سے نمٹنے کیلئے سیکرٹری جنرل او آئی سی کی جانب سے کی جانے والی مسلسل کاوشوں کو سراہا۔
وزیر خارجہ کی مقبوضہ جموں وکشمیر میں صورتحال کی سنگینی میں اضافے پر سیکریٹری جنرل اقوام متحدہ کو فون
وزیر خارجہ مخدوم شاہ محمود قریشی نے اقوام متحدہ کے سیکریٹری جنرل انتونیو گوتیرس سے آج ٹیلی فون پر بھارت کے زیرقبضہ جموں وکشمیر میں بگڑتی ہوئی سنگین صورتحال پر گفتگو کی۔ سیکریٹری جنرل اقوام متحدہ نے گفتگو کے آغاز میں پی آئی اے کی پرواز 8303 کے کریش اور انسانی جانوں کے ضیاع پر انتہائی افسوس کا اظہار کیا۔ وزیر خارجہ نے تعزیت پر سیکریٹری جنرل کا شکریہ ادا کیا اور انہیں ممکنہ جانی نقصان اور اب تک کی صورتحال سے آگاہ کیا۔ بھارت کے زیرقبضہ جموں وکشمیر میں انسانی حقوق کی سنگین خلاف ورزیوں کا حوالہ دیتے ہوئے وزیر خارجہ مخدوم شاہ محمود قریشی نے قابض بھارتی افواج کی جانب سے فوجی چھاپوں، ظالمانہ کارروائیوں میں مزید تیزی اور مقبوضہ خطے میں آبادی کاتناسب تبدیل کرنے کی بھارتی کوششوں پر پاکستان کی سنگین تشویش کا اظہار کیا۔ اس ضمن میں وزیر خارجہ نے بھارت کے زیرقبضہ جموں وکشمیر میں حالیہ ڈومیسائل قانون کا حوالہ دیا جو اقوام متحدہ کی سلامتی کونسل کی قراردادوں، چوتھے جینیوا کنونشن اور عالمی قانون کی صریحا خلاف ورزی ہے۔
وزیر خارجہ شاہ محمود قریشی نے افسوس کا اظہار کیا کہ کورونا وباءکے بحران کی آڑ میں بھارت نے مقبوضہ وادی میں لاک ڈاون مزید سخت کردیا ہے، جعلی ”مقابلوں“ اور تلاشی کی کارروائیوں کی آڑمیں کشمیریوںکو جبروتشدد کی مزید سفاکانہ نئی لہر کا نشانہ بنایاجارہا ہے، ماورائے عدالت ہلاکتوں اور دیگر استبدادی اقدامات میں اضافہ ہوگیا ہے۔ وزیر خارجہ شاہ محمود قریشی نے زوردے کر کہا کہ اپنے داخلی مسائل، بھارت کے زیرقبضہ جموں وکشمیر میں قابض افواج کے ظلم وجبر، مسلمانوں کے خلاف نسلی تعصب، نفرت اور اسلام مخالف اقدامات سے دنیا کی توجہ ہٹانے کے لئے بھارت کوئی ”فالس فلیگ“ آپریشن اور کوئی نئی مہم جوئی کرسکتا ہے۔ پاکستان عالمی برادری کو اس ضمن میںمسلسل پیشگی خبردار کرتا آیا ہے ، بھارت کی طرف سے کسی بھی عاقبت نااندیشانہ اقدام کاپاکستان بڑا موثر جواب دے گا۔
وزیر خارجہ شاہ محمود قریشی نے اعادہ کیا کہ پاکستان نام نہاد ”لانچ پیڈز“ سے متعلق دعوے کی ساکھ جانچنے کے لئے اقوام متحدہ کے فوجی مبصر گروپ برائے بھارت اور پاکستان (یو۔این۔ایم۔او۔جی۔آئی۔پی)کو اجازت دینے کے لئے آمادہ ہے، اگر بھارت کوئی متعلقہ مصدقہ معلومات فراہم کرے۔ بھارت کے الزامات کا بنیادی طورپر مقصد کشمیریوں کی مقامی اور ان کی خالصتا داخلی مزاحمت کو بدنام کرنا ہے جو بھارت کے کشمیریوں پر بدترین ظلم وستم اور جبرواستبداد کا براہ راست نتیجہ ہے۔ وزیر خارجہ شاہ محمود قریشی نے کہاکہ بھارت کی سیاسی وعسکری اسٹیبلشمنٹ کی طرف سے جنگی جنون پر مبنی بیانات خطے میں امن وسلامتی کے لئے خطرات بڑھا رہے ہیں۔
سیکریٹری جنرل کو لائن آف کنٹرول (ایل۔او۔سی) پر بھارت کی طرف سے جنگ بندی کی خلاف ورزیوں میں اضافہ سے آگاہ کرتے ہوئے وزیر خارجہ شاہ محمود قریشی نے جنگ بندی کی تمام خلاف ورزیوں کی مکمل رپورٹنگ کے ضمن میں اقوام متحدہ کے فوجی مبصر گروپ برائے بھارت وپاکستان کے اہم کردار کی اہمیت پر زوردیا۔
بھارت کے زیرقبضہ جموں وکشمیر سے متعلق اقوام متحدہ کی سلامتی کونسل سے حالیہ رابطوں کو اجاگر کرتے ہوئے وزیر خارجہ شاہ محمود قریشی نے زور دیا کہ اقوام متحدہ اور سلامتی کونسل کو صورتحال مزید خراب ہونے، بھارت کو ہر طرح کے غیرقانونی اقدامات سے روکنے اور جنوبی ایشیاءمیں امن وسلامتی برقرار رکھنے کے لئے اپنا موثرکردار ادا کرنا چاہئیے۔ انہوں نے کورونا عالمی وباءکے تناظر میں بھارتی مسلمانوں کو بدنام کرنے کی جاری مہم پر بھی تشویش کا اظہارکیا۔
سیکریٹری جنرل انتونیو گوتیرس نے وزیر خارجہ شاہ محمود قریشی کا بھارت کے زیرقبضہ جموں وکشمیر میں جاری صورتحال کے بارے میں بروقت ، جامع بریفنگ اور آگاہی دینے پر شکریہ ادا کیا۔ انہوں نے زوردیا کہ وہ تمام صورتحال پر گہری نظر رکھے ہوئے ہیں اور ان معاملات سے متعلق اپنے حصے کا کردارادا کریں گے۔
وزیراعظم عمران خان کے ترقی پزیر ممالک کے ذمے قرض میں رعایت دینے کے عالمی اقدام کا حوالہ دیتے ہوئے وزیر خارجہ شاہ محمود قریشی نے زوردیا کہ قرض میں ریلیف عالمی معیشت بحال کرنے میں ایک اہم اور ناگزیر ذریعہ ہے۔ وزیراعظم نے عالمی اقتصادی فورم (ڈبلیو۔ای۔ایف) کے کورونا کے لئے ایکشن پلیٹ فارم کے ورچوئل اجلاس سے خطاب میں پاکستان کے نکتہ نظر کو واضح کیا ہے۔ ترقی پزیر ممالک کو درپیش طویل المدتی مالی مشکلات کے حل کے لئے سیکریٹری جنرل کے اقدام کی پاکستان کی طرف سے حمایت سے بھی انہوں نے آگاہ کیا۔
سیکریٹری جنرل نے وزیر خارجہ شاہ محمود قریشی کو آگاہ کیا کہ ترقی کے لئے سرمایہ کاری کے عنوان سے آئندہ ہفتے ان کا دفتر کینیڈا اور جمیکا کے ساتھ مل کر ایک اعلی سطحی ورچوئل تقریب منعقد کررہا ہے۔ انہوں نے امید ظاہر کی کہ پاکستان اس تقریب میں وزیراعظم کی سطح پر شریک ہوگا۔ وزیر خارجہ نے دعوت دینے پر سیکریٹری جنرل کا شکریہ اداکیا۔
طیارے کےالمناک حادثہ پربھارتی ہندووں کا انتہائی شرمناک رویہ
پاکستان پر دہشت گردی کا الزام لگانے والےدنیا کےسب سے بڑے دہشت گرد ریندر مودی کے ملک بھارت کے عوام کی ذہنیت بھی مودی کی طرح دہشت گردانہ ہو چکی ہے.
کشمیر میں ہونے والے ظلم و بربریت کی طرف دھیان نہ کرنے والے بھارتی گھٹیا ذہنیت کی مالک عوام نے پاکستان میں ہونے والے المناک طیارے کے حادثہ پر انتہائی شرمناک رویہ اختیار کیا ہے سوشل میڈیا پرجتنے گھٹیا کمنٹس بھارتی عوام نے دئے دنیا بھر میں اس کی مثال نہیں ملتی. اگر آج ہٹلر زندہ ہوتا تو اس کا سر بھی شرم سے جھک جاتا. دنیا کے کسی بھی مذہب میں انسانیت پر کسی بھی طرح کے سانحہ گزرنے پردکھ اور افسوس کا اظہار کیا جاتا ہے لیکن بھارتی مودی کے ہندوتوا کا پرچار کرنے والے عوام کو شرم نہیں آئی.
