Author: ممتاز حیدر

پاکستان کی جانب سے پاک افغان سرحد سے گرفتار کرکے امریکا کے حوالے کیے گئے داعش کے دہشت گرد شریف اللہ کو ورجینیا کی عدالت میں ابتدائی سماعت کے لیے پیش کردیا گیا۔

محمد شریف اللہ کو ورجینیا کی وفاقی عدالت میں جج ولیم پورٹر کے سامنے 5 مارچ کی دوپہر پیش کیا گیا اور اسے نیلے رنگ کا جیل میں پہننے والا لباس پہنایا گیا تھا۔امریکی حکام کا کہنا تھاکہ شریف اللہ ان 2 ملزمان میں سے ایک ہے جو کابل حملے میں ملوث ہیں،10 منٹ تک جاری ابتدائی سماعت کے موقع پر شریف اللہ کو بتایا گیا کہ الزامات ثابت ہوئے تو اسے عمر قید کا سامنا ہوگا، افغان شہری شریف اللہ نے جج سے بات کیلئے دری زبان کے مترجم کی خدمات لیں، اس موقع پر اٹارنی نے بتایا کہ ملزم کے پاس اثاثے نہیں اس لیے فیڈرل پبلک ڈیفنڈر درکار ہے،شریف اللہ نے کابل حملے کے حملہ آورکے فرار میں مدد اور مارچ 2024 میں ماسکو کے سٹی ہال میں حملے میں ملوث ہونے کا بھی اعتراف کیا ہے۔

اس سے پہلے امریکی محکمہ انصاف کا کہنا تھا کہ شریف اللہ نے 2 مارچ کو ایف بی آئی ایجنٹس کے سامنے تسلیم کیا ہےکہ وہ سن 2000 میں داعش میں بھرتی ہوا تھا، افغانستان میں امریکی فوج کے انخلا کے وقت کی گئی دہشت گردی سے متعلق شریف اللہ نے بتایا کہ اس نے ایک حملہ آور کو کابل ائیرپورٹ کا راستہ دکھایا تھا۔

26 اگست سن 2021 کو اس حملےمیں 13 امریکی اہلکار اور 170 افغان مارے گئے تھے، شام ساڑھے 5 بجے خود کش حملہ کرنے والے شخص کی شناخت عبدالرحمان ال لوگری کے نام سے کی گئی تھی۔

شریف اللہ نے بتایا کہ اس نے قانون نافذ کرنے والوں، امریکیوں یا طالبان کی چیک پوائنٹس پر ممکنہ موجودگی کو خود جانچا تھا اور بعد میں داعش کے دیگر دہشت گردوں کو بتایا تھا کہ راستہ صاف ہے اور یہ کہ خود کش بمبار کو پہچانا نہیں جا سکے گا۔شریف اللہ نے کابل ائیرپورٹ پر حملہ کرنے والے خودکش بمبار ال لوگری کی بطور داعش کے رکن کی حیثیت سے شناخت بھی کی ہے جب کہ اس نے داعش کیلئے کئی دیگر حملوں کی خاطر اپنی سرگرمیوں کا بھی اعتراف کیا ہے۔

20 جون سن 2016 کو داعش کے خود کش بمبار نے کابل میں کینیڈین سفارتخانے کے باہر حملہ کیا تھا جس میں سفارتخانے کے 10 سے زائد محافظ اور کئی شہری ہلاک اور اہلکاروں سمیت کئی شہری زخمی ہوئے تھے۔شریف اللہ نے اس حملے کیلئے علاقے کا جائزہ لینے اور دہشت گرد کو وہاں پہنچانے کا بھی اعتراف کیا ہے۔22 مارچ سن 2024 کو داعش نے ماسکو کے قریب کراکس سٹی ہال پرحملہ کیا تھا جس میں 123 شہری مارے گئے تھے، روسی حکام نےحملے میں ملوث 4 مسلح افراد کو گرفتار کیا تھا۔شریف اللہ نے دوران تفتیش ایف بی آئی کو بتایا ہےکہ اس نے حملہ کرنے والوں سے معلومات کا تبادلہ کیا تھا کہ کس طرح کلاشنکوف طرز کی بندوق اور دیگر اسلحہ چلایا جاتا ہے، شریف اللہ نے تسلیم کیا ہے کہ گرفتار 4 میں سے 2 افراد کو اسی نے ہدایات دی تھیں۔شریف اللہ نے ایف بی آئی ایجنٹس کو بتایا کہ وہ ن 2019 سے افغانستان کی جیل میں تھا،کابل حملے سے 2 ہفتے پہلے رہا ہوا تو اسے داعش نے موٹرسائیکل دی، ٹیلی فون خریدنے کیلئے رقم دی اور خبردار کیا کہ حملوں کے موقع پر داعش کے دیگر افراد سے رابطوں کیلئے صرف سوشل میڈیا پلیٹ فارم استعمال کیا جائے۔

ورجینیا کے مشرقی ڈسٹرکٹ کیلئے امریکی اٹارنی ایریک سیبرٹ نے کہا کہ شریف اللہ کے خلاف جن الزامات کا اعلان کیا گیا ہے وہ اس بات کا پیغام ہیں کہ دہشت گردی میں ملوث عناصر کو انصاف کے کٹہرے میں لانے سے امریکا کبھی پیچھے نہیں ہٹے گا۔تاہم امریکی محکمہ انصاف نے ساتھ ہی یہ بھی کہا ہےکہ جرم ثابت ہونے تک یہ تمام باتیں محض الزامات ہیں، قصور وارٹھہرائے جانے تک تمام افراد کو بے قصور تصور کیا جاتا ہے۔

داعش سے تعلق کے الزام میں گرفتار شریف اللہ کو اب پیر کو عدالت کے سامنے پیش کیا جائے گا۔

واضح رہے کہ پاکستان نے سی آئی اے کی دی گئی معلومات کی بنیاد پر عالمی دہشت گرد تنظیم داعش کے کمانڈر کو گرفتار کیا۔سکیورٹی ذرائع کے مطابق پاکستان نے کابل ائیرپورٹ پر حملے کے ماسٹر مائنڈ افغان شہری داعش کمانڈر شریف اللہ کو پاک افغان سرحد سے گرفتار کیا۔

آج کل جب بھی کوئی شخص کسی مقام پر سفر کرتا ہے، امتحان دینے جاتا ہے، یا کسی تقریب میں شرکت کے لیے نکلتا ہے، وہ راستہ معلوم کرنے کے لیے گوگل میپ کا سہارا لیتا ہے۔ چاہے وہ کار ہو، موٹر سائیکل ہو یا کوئی اور گاڑی، نیویگیشن کا استعمال عام ہو چکا ہے۔ لیکن گزشتہ چند مہینوں میں گوگل میپ کی غلطی کی وجہ سے متعدد جان لیوا حادثات پیش آ چکے ہیں، اور ان حادثات میں کئی قیمتی جانیں ضائع ہو چکی ہیں۔

تازہ ترین واقعہ گریٹر نوئیڈا میں پیش آیا، جہاں ایک اسٹیشن ماسٹر گوگل میپ کی غلط رہنمائی کی وجہ سے حادثے کا شکار ہو گئے۔ ان کی گاڑی ایک پُل سے 30 فٹ نیچے سیور میں جا گری۔ اس حادثے کی اطلاع فوری طور پر مقامی لوگوں نے پولیس کو دی، اور زخمی اسٹیشن ماسٹر کو اسپتال لے جانے کے لیے ایمبولنس بلائی گئی، لیکن بدقسمتی سے اسپتال پہنچتے پہنچتے ان کی موت ہو گئی۔

یہ پہلی بار نہیں ہے کہ گوگل میپ کی غلطی کی وجہ سے کسی کی جان گئی ہو۔ گزشتہ تین سے چار مہینوں میں ایسے متعدد واقعات سامنے آ چکے ہیں۔ چند ماہ قبل بریلی میں ایک نصف تعمیر شدہ پُل سے گر کر تین افراد کی موت ہوئی تھی، اور اسی طرح بجنور میں بھی ایک نوجوان اپنی جان سے ہاتھ دھو بیٹھا تھا کیونکہ اس نے آنکھیں بند کر کے گوگل میپ پر بھروسہ کیا تھا۔گزشتہ چند ماہ میں اس نوعیت کے حادثات میں زخمی ہونے والے افراد کی تعداد بھی کافی زیادہ رہی ہے۔ میڈیا رپورٹس کے مطابق حالیہ حادثے کا شکار ہونے والے اسٹیشن ماسٹر کی شناخت دہلی کے منڈاولی کے رہائشی بھرت بھارتی کے طور پر ہوئی ہے۔ وہ 2 دیگر افراد کے ساتھ ایک شادی میں شرکت کے لیے جا رہے تھے، اور یہ حادثہ یکم مارچ کو گریٹر نوئیڈا کے سیکٹر پی 4 میں پیش آیا۔

بھرت بھارتی کے بھائی دلیپ بھارتی نے بتایا کہ "بھرت راستہ بھٹک گئے تھے اور انھوں نے مجھے راستہ پوچھنے کے لیے فون کیا تھا۔ میں نے انھیں صحیح راستہ بتایا تھا، جسے انہوں نے گوگل میپ پر ڈالا، لیکن گریٹر نوئیڈا کے سیکٹر پی 4 کے قریب نیویگیشن نے صحیح طریقے سے کام نہیں کیا۔ گوگل میپ نے گاڑی کے ڈرائیور کو الرٹ نہیں کیا، اور نتیجتاً ان کی گاڑی 30 فٹ گہرے سیور میں جا گری۔”مقامی لوگوں نے بتایا کہ جہاں یہ حادثہ ہوا ہے، اس جگہ پر گوگل میپ کی وجہ سے پہلے بھی کئی حادثات ہو چکے ہیں۔ اس حادثے کے بعد پولیس نے اس مقام پر بیریکیڈنگ کر دی ہے تاکہ مستقبل میں مزید حادثات سے بچا جا سکے۔

یہ واقعہ اس بات کی غمازی کرتا ہے کہ گوگل میپ اور دیگر نیویگیشن سروسز پر مکمل بھروسہ کرنا خطرناک ثابت ہو سکتا ہے، اور ان کی رہنمائی کے نتیجے میں ہونے والے حادثات پر حکومت اور متعلقہ اداروں کو سنجیدگی سے غور کرنے کی ضرورت ہے

امریکی نیوز ویب سائٹ ایگزیوس کی رپورٹ کے مطابق، امریکی حکومت نے فلسطینی مزاحمتی تنظیم حماس سے براہ راست رابطہ کیا ہے تاکہ غزہ میں موجود امریکی یرغمالیوں کی رہائی کو ممکن بنایا جا سکے۔ یہ انکشاف ایگزیوس نے ان ذرائع کے حوالے سے کیا ہے جو ان مذاکرات سے متعلق معلومات رکھتے ہیں۔

ذرائع کے مطابق، امریکی حکومت اور حماس کے درمیان ہونے والی بات چیت یرغمالیوں کی رہائی اور جنگ کے خاتمے کے ایک وسیع تر معاہدے کے حوالے سے تھی۔ بتایا جاتا ہے کہ یہ مذاکرات امریکی صدر کے خصوصی ایلچی ایڈم بوہلر کی قیادت میں گزشتہ ہفتوں کے دوران قطر کے دارالحکومت دوحہ میں ہوئے۔یہ رابطہ غیرمعمولی نوعیت کا ہے کیونکہ امریکا نے اس سے قبل کبھی بھی حماس سے براہ راست بات چیت نہیں کی تھی۔

واضح رہے کہ امریکا نے 1997 میں حماس کو ایک دہشت گرد تنظیم قرار دیا تھا۔ تاہم، ٹرمپ انتظامیہ نے اس معاملے پر اسرائیل سے مشاورت کی تھی، لیکن مذاکرات کی تفصیلات اسرائیل کو دیگر ذرائع سے معلوم ہوئیں۔امریکی میڈیا کے مطابق، ان مذاکرات میں بنیادی طور پر ان امریکی شہریوں کی رہائی پر بات چیت ہوئی جو حماس کے قبضے میں ہیں۔ ساتھ ہی ساتھ، تمام یرغمالیوں کی رہائی اور طویل المدتی جنگ بندی کے امکانات پر بھی غور کیا گیا، تاہم کوئی حتمی معاہدہ نہیں ہو سکا۔ایگزیوس کی رپورٹ کے مطابق، سابق امریکی صدر ڈونلڈ ٹرمپ کی غزہ پالیسی موجودہ صدر جو بائیڈن کی پالیسی سے بالکل مختلف تھی۔ ٹرمپ نے ماضی میں کئی بار حماس کے خلاف سخت اقدامات کی دھمکیاں دی تھیں اور یہاں تک کہ غزہ کو امریکی کنٹرول میں لینے کی تجویز بھی دے چکے ہیں۔

اسرائیلی فوج کے مطابق، حماس کے قبضے میں اب بھی 59 یرغمالی موجود ہیں، جن میں سے 35 کی ہلاکت کی تصدیق ہو چکی ہے، جبکہ 22 کے زندہ ہونے کا امکان ظاہر کیا جا رہا ہے۔ یرغمالیوں میں 5 امریکی شہری بھی شامل ہیں۔دوسری جانب، غزہ میں جنگ بندی کا 42 روزہ پہلا مرحلہ گزشتہ ہفتے ختم ہو چکا ہے اور دونوں فریقین اس میں توسیع پر متفق نہیں ہو سکے۔ جنگ بندی کی مدت ختم ہونے کے بعد اسرائیل نے غزہ میں داخل ہونے والی تمام انسانی امداد روک دی ہے، جس سے وہاں قحط کا خطرہ بڑھ رہا ہے۔