Author: ممتاز حیدر

دفتر خارجہ کے ترجمان شفقت علی خان نے کہا ہے کہ دہشت گرد تنظیم داعش کے رکن شریف اللّٰہ کو کس قانون کے تحت امریکا کے سپرد کیا گیا، اس کے بارے میں وزارتِ قانون بہتر وضاحت فراہم کر سکتی ہے۔ انہوں نے کہا کہ پاکستان نے اقوامِ متحدہ کی قراردادوں کے تحت اس کی گرفتاری عمل میں لائی اور امریکہ کے حوالے کیا، اس میں کوئی پریشانی یا خوف کی بات نہیں ہے۔

ہفتہ وار بریفنگ کے دوران شفقت علی خان نے کہا کہ پاکستان علاقائی امن و استحکام کے لیے امریکہ کے ساتھ اپنے تعلقات کو مزید مضبوط بنانے کی پوزیشن میں ہے۔ انہوں نے مزید کہا کہ وزیراعظم کا شریف اللّٰہ کی گرفتاری پر ردعمل ریاستی ردعمل تھا، جو ملکی سلامتی اور عالمی ذمہ داریوں کو مدنظر رکھتے ہوئے تھا۔ شفقت علی خان نے افغانستان کے حوالے سے پاکستان کے موقف کو واضح کیا اور کہا کہ پاکستان افغانستان کے ساتھ بہتر ہمسائیگی پر مبنی تعلقات چاہتا ہے، لیکن افغان سرزمین پر تحریکِ طالبان پاکستان (ٹی ٹی پی) اور دیگر دہشت گرد گروپوں کی محفوظ پناہ گاہوں کی موجودگی ایک بڑا چیلنج ہے۔ترجمان نے بتایا کہ افغان سائیڈ نے پاک افغان سرحد پر پاکستانی حدود میں دو سرحدی چوکیوں کی تعمیر کی کوشش کی، جس پر پاکستان نے احتجاج کیا اور منع کیا۔ تاہم، افغان فورسز کی جانب سے پاکستانی حدود میں فائرنگ کی گئی جس کے باعث طورخم سرحد کو بند کر دیا گیا ہے۔

علاوہ ازیں، شفقت علی خان نے بھارتی وزیر مملکت کے آزاد کشمیر سے متعلق حالیہ بیان پر افسوس کا اظہار کرتے ہوئے اسے قابلِ مذمت قرار دیا۔ ترجمان نے کہا کہ بھارت کی جانب سے اس نوعیت کے بیانات ایک مرتبہ پھر پاکستان کی خودمختاری کی خلاف ورزی ہیں۔

سی آئی اے کی خفیہ اطلاع پر پاکستانی انٹیلیجنس نے برق رفتاری سے شریف اللہ افغانی کو پاک-افغان سرحد کے سنگلاخ پہاڑوں سے گرفتار کر لیا۔

چند پراپیگنڈہ باز اس گرفتاری کو مختلف رنگ دینے کی کوشش کر رہے ہیں، لیکن یہ سمجھنا ضروری ہے کہ یہ ایک روایتی انٹیلی جنس آپریشن تھا جس میں امریکہ کی جانب سے فراہم کردہ معلومات پر پاکستانی ایجنسی نے کارروائی کی۔ تاہم، یہ بات بھی اہم ہے کہ یہ دونوں ممالک کے درمیان کامیاب تعلقات کی ایک مثال ہے؛ جن میں دیگر نمایاں سرگرمیاں شامل ہیں . جنوری 2025 میں ٹرمپ کے قریبی ساتھی گینٹری بیچ کی قیادت میں اعلی سطحی امریکی وفد نےدورہ کیا، حالیہ دنوں میں گینٹری بیچ جونیئر، جو صدر ٹرمپ کے ڈیجیٹل اثاثوں کے مشیر ہیں، نے وفد کے ہمراہ پاکستان کا دورہ کیا،

پاکستان کی امریکی مشاورت سے نیشنل کرپٹو کونسل کے قیام کی منصوبہ بندی ہوئی،امریکی صدر ٹرمپ نے پاکستان کے بارے میں اپنی افتتاحی کانگریس خطاب میں تعریف کی، امریکہ کا اس بات کا اعتراف کہ افغانستان دہشت گردی کا گڑھ بن چکا ہے۔ امریکہ اور صدر ٹرمپ کا یہ ادراک کہ افغانستان میں چھوڑے گئے تمام امریکی اسلحہ و گولہ بارود کو جلد از جلد واپس لیا جائے؛ جو پاکستان کی دیرینہ خواہش کا اعادہ ہے۔ پاکستان کے آرمی چیف جنرل عاصم منیر کے حالیہ برطانیہ کے دورے پر ان کا غیر معمولی استقبال، جس کے دوران مغرب نے پاکستان کو امریکی نقطہ نظر سے دیکھا۔

پاکستان کے دشمن، چاہے وہ داخلی ہوں یا خارجی، اس گرفتاری پر نالاں ہیں، لیکن امریکی صدر نے پاکستان کا شکریہ ادا کیا ہے۔ یہ دونوں ممالک کے درمیان ہونے والی متعدد کامیاب کارروائیوں میں سے صرف ایک ہے، جن میں دونوں ممالک افغان خطے میں امن کے لیے امریکی اسلحہ و گولہ بارود کے جلد انخلا کی امید رکھتے ہیں۔ جبکہ پاکستان نے صرف سی آئی اے کی فراہم کردہ انٹیلی جنس پر عمل کیا، امریکہ نے جلدی سے شریف اللہ افغانی کی حوالگی کو ممکن بنایا تاکہ انہیں امریکی قوانین کے تحت کاروائی ہو سکے۔ دونوں ممالک اپنے دوطرفہ تعلقات کو تیز رفتار انداز میں آگے بڑھانے کے لیے تیار ہیں۔

اسلام آباد: وفاقی وزیرِ دفاع خواجہ آصف نے پارلیمنٹ ہاؤس میں میڈیا سے گفتگو کرتے ہوئے سنگین الزامات عائد کیے ہیں کہ سابق آرمی چیف جنرل قمر جاوید باجوہ، اس وقت کے آئی ایس آئی سربراہ جنرل فیض حمید اور پاکستان تحریکِ انصاف (پی ٹی آئی) کے بانی عمران خان نے دہشت گردوں کو پاکستان میں واپس بسایا۔

خواجہ آصف نے کہا کہ دہشت گردوں کو واپس بسانے میں جنرل باجوہ کا بھی اہم کردار تھا، اور فیض حمید تو اس وقت گرفتار ہیں، لیکن جنرل باجوہ سے یہ سوال کیا جانا چاہیے کہ انہوں نے ان دہشت گردوں کو پاکستان میں واپس کیوں بسایا؟وفاقی وزیر نے اس موقع پر عالمی سطح پر دہشت گردی کے مسئلے کی اہمیت کو اجاگر کرتے ہوئے کہا کہ دہشت گردی کا مسئلہ صرف پاکستان کا نہیں بلکہ دنیا بھر کا ہے، جسے مل کر حل کرنا ہو گا۔ انہوں نے اس بات پر زور دیا کہ دہشت گردی کی روک تھام میں ناکامی کو جانچنے کے لیے خیبر پختون خوا حکومت کی انکوائری ہونی چاہیے۔

خواجہ آصف نے خیبر پختون خوا حکومت پر بھی تنقید کی اور کہا کہ اس حکومت نے دہشت گردی کے خلاف کوئی مؤثر اقدامات نہیں کیے۔ ان کا کہنا تھا کہ خیبر پختون خوا میں موجودہ حکومت، جو کہ بانی پی ٹی آئی کے زیر اثر ہے، صرف اقتدار کی جنگ لڑ رہی ہے اور دہشت گردی کے خلاف اقدامات اٹھانے میں ناکام ہے۔

انہوں نے مزید کہا کہ اگر بانی پی ٹی آئی امریکہ کے سابق صدر ڈونلڈ ٹرمپ کو خط لکھ رہے ہیں تو اس کا بھی وہی حشر ہو گا جو ماضی میں ہوا تھا۔ خواجہ آصف کا کہنا تھا کہ مفاہمت کی سیاست تبھی کامیاب ہو سکتی ہے جب دونوں فریقین کے درمیان تنازعات نہ ہوں، مگر جب آپ کے خلاف حملہ آور فریق موجود ہو تو اس کا مقابلہ مزاحمت کی سیاست سے کرنا چاہیے۔وزیرِ دفاع نے کہا کہ پہلے پاکستان میں خطوط بازی ہوتی تھی، لیکن اب ان خطوط کو بین الاقوامی سطح پر متعارف کرایا گیا ہے، اور جو ماضی میں ان خطوط کا حال ہوا تھا، ویسا ہی حال اب بھی ہو گا۔ خواجہ آصف نے مزید کہا کہ وہ کسی کو مشورہ نہیں دے رہے کیونکہ وہ خود مشورے سے بہت بلند ہیں۔

اسلام آباد: وزیرِ قانون اعظم نذیر تارڑ نے سینیٹ اجلاس کے دوران سینیٹر عون عباس بپی کی گرفتاری پر وضاحت پیش کی اور کہا کہ عون عباس بپی کو چنکارا ہرن کے غیر قانونی شکار پر گرفتار کیا گیا ہے۔ وزیرِ قانون کے مطابق، سینیٹر عون عباس بپی کو بہاولپور کے تھانہ پی ایس دراوڑ میں ایف آئی آر کے تحت گرفتار کیا گیا۔

وزیرِ قانون نے کہا، "سینیٹر عون عباس ہمارے کولیگ ہیں اور اپوزیشن میں ہونے کے باوجود ہم ان کی قانونی حقوق کا تحفظ کریں گے۔ ہم سینیٹر عون عباس بپی کو ہر ممکن قانون کی سہولت فراہم کریں گے۔”اس دوران سینیٹ اجلاس میں پی ٹی آئی کے اراکین ایوان سے واک آؤٹ کر گئے۔ سینیٹر علی ظفر نے کہا کہ آج کا اجلاس یہاں ہی روک دینا چاہیے اور عون عباس بپی کے پروڈکشن آرڈر جاری کیے جائیں تاکہ انہیں ایوان میں پیش کیا جا سکے۔سینیٹر منظور کاکڑ نے پوائنٹ آف آرڈر نہ ملنے پر احتجاج کیا۔ اسی دوران، سینیٹ میں قائدِ حزبِ اختلاف شبلی فراز نے کہا کہ "ہمارے پاس عون بپی کی گرفتاری کی ویڈیو موجود ہے، اور گرفتاری کے وقت ان کے گھر میں توڑ پھوڑ کی گئی تھی۔ گرفتار کرنے والوں نے قانونی تقاضے پورے نہیں کیے۔”

اس پر وفاقی وزیرِ قانون اعظم نذیر تارڑ نے وضاحت پیش کی کہ "ہم نے پنجاب پولیس سے تفصیلات حاصل کی ہیں اور عون عباس بپی کے خلاف غیر قانونی شکار کا مقدمہ درج کیا گیا ہے۔ وہ غیر قانونی حراست میں نہیں ہیں، بلکہ ضابطے کی کارروائی کا سامنا کر رہے ہیں۔”وزیرِ قانون نے مزید کہا کہ عون عباس بپی کی گرفتاری کے معاملے میں تمام قانونی تقاضوں کو پورا کیا گیا ہے اور وہ ہر طرح کی قانونی سہولت کے حق دار ہیں۔