Author: ممتاز حیدر

اسلام آباد ہائیکورٹ نے 26 نومبر کے احتجاج کے دوران گرفتار ہونے والے 120 سے زائد پاکستان تحریک انصاف (پی ٹی آئی) کے ورکرز کی ضمانتیں منظور کر لی ہیں۔

عدالت میں قائم مقام چیف جسٹس سرفراز ڈوگر اور جسٹس محمد آصف پر مشتمل بینچ نے اس درخواست پر فیصلہ سنایا۔عدالت نے گرفتار پی ٹی آئی کے کارکنان کو فوری طور پر رہا کرنے کا حکم دیا۔ اس کے ساتھ ساتھ، تمام ورکرز کو پولیس اسٹیشن میں بیانِ حلفی دینے کی ہدایت کی گئی ہے، جس میں انہیں یہ وعدہ کرنا ہوگا کہ وہ آئندہ ایسا کوئی جرم نہیں کریں گے۔قائم مقام چیف جسٹس سرفراز ڈوگر نے اس موقع پر کہا کہ گرفتار افراد کو بیان حلفی دینا ہوگا کہ وہ مستقبل میں اس طرح کے احتجاج یا غیر قانونی سرگرمیوں میں ملوث نہیں ہوں گے۔

عدالت نے ورکرز کی رہائی کے لیے 20 ہزار روپے کے مچلکے اور ایک شیورٹی جمع کرانے کا بھی حکم دیا۔ اس فیصلے پر وکلا کی ٹیم میں علی بخاری، بابر اعوان، مرتضیٰ طوری اور دیگر وکلا بھی عدالت میں موجود تھے، جنہوں نے اپنے موکلین کی جانب سے درخواست دائر کی تھی۔

پیپلز پارٹی کی رہنما، رکن پارلیمنٹ سحر کامران نے کہا ہے کہ سزاؤں میں ریلیف اگر خط لکھنے سے ملنا شروع ہو جائے تو تمام قیدی خط لکھ کر سزائیں معاف کروائیں گے۔

نجی ٹی وی کے پروگرام میں بات کرتے ہوئے سحرکامران کا کہنا تھا کہ پاکستان پیپلز پارٹی وفاق کی جماعت ہے اور ہم پورے ملک کی ترقی پر یقین رکھتے ہیں۔ ہمیں کسی صوبے سے مقابلے کی بات نہیں کرنی، ہم ایک مضبوط وفاق اور خوشحال ملک کی بات کر رہے ہیں۔ہم آئین کے مطابق مشترکہ مفادات کونسل کے اجلاس اور وسائل کی منصفانہ تقسیم کی بات کر رہے ہیں۔

سحر کامران کا مزید کہنا تھا کہ ہمیں سندھ کی ترقی اور جدید ترین مفت ہیلتھ کیئر سسٹم پر فخر ہے، آج تھرپارکر بجلی پیدا کرکے قومی گرڈ کو دے رہا ہے۔ ہم وزیر اعظم اور وفاق کو ان کی ذمہ داری یاد دلا رہے ہیں، سندھ میں نامکمل وفاقی منصوبوں پر توجہ دینے کی ضرورت ہے، ان کا مزید کسی تاخیر کےمکمل ہونا بہت ضروری ہے۔

سپریم کورٹ نے ہراسگی کیس میں لاہور ہائیکورٹ کے فیصلے کیخلاف محمد دین کی اپیل مستردکردی، ہراسگی سے متعلق فیصلہ جسٹس منصور علی شاہ نے تحریرکیا۔

سپریم کورٹ نے ہراسگی کیس کے فیصلے میں کہاکہ ورک پلیس پر ہراسگی عالمی مسئلہ ہے، لاکھوں لوگ ورک پلیس ہراسگی سے متاثر ہوتے ہیں،مردوں کے مقابلے میں خواتین زیادہ ہراسگی کا شکار ہوتی ہیں، گلوبل جینڈر کیپ انڈکس 2024کے مطابق دنیا کے 146ممالک میں پاکستان کا 145واں نمبر ہے،امریکی سپریم کورٹ کا فیصلہ ہے کہ یرغمالی ماحول بھی ہراسگی کی تعریف میں آتا ہے۔

یاد رہے کہ ڈاکٹرسدرہ نے اپنے ڈرائیور کے خلاف ہراسگی کے معاملے پر پنجاب محتسب سے رجوع کیا تھا، محتسب نے ڈرائیور محمد دین کو جبری ریٹائرمنٹ کی سزا دی، ڈرائیور نے گورنر پنجاب کو ریپریزنٹیشن بھیجی جو مسترد ہوئی،لاہور ہائیکورٹ نے بھی جبری ریٹائرمنٹ کیخلاف درخواست مسترد کردی تھی۔

پاکستان تحریک انصاف (پی ٹی آئی) کے جنرل سیکریٹری، سلمان اکرم راجہ، نے اس بات کی وضاحت کی ہے کہ شیر افضل مروت کو پارٹی سے نکالے جانے کا معاملہ ان کے ساتھ ذاتی یا نظریاتی اختلافات کی بنا پر نہیں تھا، بلکہ یہ فیصلہ پارٹی کے مختلف رہنماؤں کی شکایات کی بنیاد پر کیا گیا تھا۔

جیو نیوز سے گفتگو کرتے ہوئے سلمان اکرم راجہ نے کہا کہ شیر افضل مروت نے پارٹی پالیسی کے خلاف بیانات دیے، جن میں سعودی حکومت اور مذاکراتی عمل سے متعلق متنازعہ رائے شامل تھی۔سلمان اکرم راجہ نے بتایا کہ شیر افضل مروت کے پارٹی پالیسی کے برعکس بیانات کے باعث بانی پی ٹی آئی نے انہیں پارٹی سے نکالنے کا فیصلہ کیا۔ پی ٹی آئی کے جنرل سیکریٹری نے کہا کہ ان کا نہ تو شیر افضل مروت سے کوئی ذاتی اختلاف ہے اور نہ ہی کوئی مقابلہ۔ ان کا کہنا تھا کہ شیر افضل مروت کو اگر کسی سے تنقید یا مناظرے کی ضرورت ہے تو وہ بانی پی ٹی آئی سے کریں، کیونکہ وہ خود شیر افضل مروت کے راستے میں نہیں ہیں۔

سلمان اکرم راجہ نے مذاکرات کی ناکامی کے حوالے سے بھی اہم باتیں کیں۔ ان کا کہنا تھا کہ حکومت کے پاس اختیارات کا فقدان ہے، جو شخص بانی پی ٹی آئی سے ایک ملاقات نہیں کروا سکا، وہ مذاکرات کس سے کرے گا؟ انہوں نے مزید کہا کہ پی ٹی آئی کا مطالبہ ہمیشہ یہ رہا کہ مذاکرات کا عمل ایک کھلے ماحول میں ہو اور 9 مئی اور 26 نومبر کے واقعات سے متعلق کمیشن کا قیام عمل میں لایا جائے۔ تاہم، ان کے مطابق، حکومت نے مذاکرات کے نام پر پی ٹی آئی کا مذاق اُڑایا اور ان کی تضحیک کی۔

پی ٹی آئی کے جنرل سیکریٹری سلمان اکرم راجہ نے یہ بھی کہا کہ اگر بانی پی ٹی آئی شیر افضل مروت کو واپس لانا چاہتے ہیں تو یہ ان کا فیصلہ ہے۔ اگر وہ شیر افضل مروت کو باہر رکھنا چاہتے ہیں تو یہ بھی ان کی مرضی ہے۔ سلمان اکرم راجہ نے اس معاملے میں اپنی بے دخلی کا اظہار کیا اور کہا کہ ان کا اس فیصلے سے کوئی تعلق نہیں ہے۔

اسلام آباد: وزیراعظم پاکستان محمد شہباز شریف نے سماجی انصاف کے عالمی دن کے موقع پر اپنے پیغام میں کہا کہ یہ دن دنیا بھر میں تمام لوگوں کے لیے مساوات، انصاف اور وقار کو فروغ دینے کے لیے منایا جاتا ہے۔ وزیراعظم نے مزید کہا کہ یہ دن حکومتوں، تنظیموں اور افراد کو سماجی انصاف کی اہمیت کی یاد دہانی کراتا ہے۔

وزیراعظم نے اپنے پیغام میں غربت، صنفی امتیاز اور سماجی تفاوت جیسے مسائل کو حل کرنے کی ضرورت پر زور دیا اور کہا کہ یہ دن ہمیں ان مسائل پر قابو پانے کے لیے اپنی ذمہ داریوں کا احساس دلاتا ہے۔ انہوں نے کہا کہ پاکستان کا آئین سب کے لیے سماجی انصاف اور مساوات کی ضمانت دیتا ہے، اور حکومت اپنے شہریوں کے حقوق کا تحفظ کرنے کے لیے مختلف پروگرامز متعارف کروا چکی ہے۔

وزیراعظم شہباز شریف نے مزید کہا کہ ہماری حکومت انسانی ترقی کی راہ میں رکاوٹ بننے والے تعصبات کو ختم کرنے کے لیے سخت محنت کر رہی ہے تاکہ ہر فرد کو برابر کے مواقع ملیں۔ انہوں نے اڑان پاکستان پروگرام کا ذکر کرتے ہوئے کہا کہ اس کے تحت مؤثر اقدامات کا آغاز کیا گیا ہے تاکہ معاشرتی فرق کو کم کیا جا سکے اور ہر پاکستانی کو ترقی کے یکساں مواقع مل سکیں۔

وزیراعظم نے اپنے پیغام میں آج دنیا کو منصفانہ اور جامع بنانے کے عزم کی تجدید کرتے ہوئے کہا کہ حکومت اپنے اقدامات کے ذریعے ایک بہتر اور برابر دنیا کی تشکیل کے لیے پرعزم ہے۔ انہوں نے کہا کہ یہ دن ہمیں ایک ایسا معاشرہ بنانے کے عہد کی یاد دلاتا ہے جہاں ہر فرد کو انصاف، مساوات اور عزت کی فراہمی یقینی بنائی جائے۔