سہ ملکی سیریز کے دوسرے میچ میں جنوبی افریقا نے نیوزی لینڈ کو 305 رنز کا ہدف دیا ہے۔ لاہور کے قذافی اسٹیڈیم میں کھیلا جانے والا یہ میچ دلچسپی سے بھرپور رہا۔
نیوزی لینڈ نے ٹاس جیت کر جنوبی افریقا کے خلاف پہلے بولنگ کا فیصلہ کیا، اور پروٹیز نے مقررہ 50 اوورز میں 6 وکٹوں کے نقصان پر 304 رنز اسکور کیے۔ میچ میں جنوبی افریقا کے بیٹر میتھیو برٹز نے شاندار ڈیبیو کیا اور 150 رنز کی اننگز کھیل کر ون ڈے کرکٹ کا نیا ریکارڈ قائم کر دیا۔ اس کے علاوہ ویان ملڈر نے 64 اور جیسن اسمتھ نے 41 رنز بنائے، جس کے نتیجے میں جنوبی افریقا کا مجموعہ 304 رنز تک پہنچا۔
کیوی بولرز میں میٹ ہینری اور ول او رورکی نے دو، دو وکٹیں حاصل کیں، تاہم وہ پروٹیز کے بیٹرز کو روکنے میں کامیاب نہ ہو سکے۔
ٹاس کے بعد نیوزی لینڈ کے کپتان مچل سینٹنر نے بتایا کہ ٹیم میں ایک تبدیلی کی گئی ہے، اور راچن رویندرا کی جگہ کونوے کو شامل کیا گیا ہے۔ انہوں نے مزید کہا کہ یہ تبدیلی ٹیم کے بہترین مفاد میں کی گئی ہے۔
اس موقع پر جنوبی افریقا کے کپتان ٹیمبا باووما نے گفتگو کرتے ہوئے کہا کہ اگر ہم ٹاس جیتتے تو پہلے فیلڈنگ کا فیصلہ کرتے۔ انہوں نے مزید کہا کہ ٹیم میں نئے کھلاڑی شامل ہیں اور وہ اس میچ کے لیے بہت پرجوش ہیں۔
واضح رہے کہ 3 ملکی سیریز کے پہلے میچ میں نیوزی لینڈ نے پاکستان کو 78 رنز سے شکست دی تھی۔ نیوزی لینڈ نے پہلے بیٹنگ کرتے ہوئے پاکستان کو 331 رنز کا ہدف دیا تھا، جس کے جواب میں پاکستانی ٹیم 252 رنز بنا کر آؤٹ ہوگئی تھی۔اب جنوبی افریقا کی جانب سے دیا گیا 305 رنز کا ہدف نیوزی لینڈ کے لیے چیلنج بن چکا ہے، اور دونوں ٹیموں کے درمیان آنے والے اوورز میں دلچسپی مزید بڑھنے کی توقع ہے۔
