Author: ممتاز حیدر

لاہورپریس کلب کے پروگرام میٹ دی پریس میں سابق ترجمان بلوچستان حکومت وممبر صوبائی اسمبلی بلوچستا ن فرح عظیم شاہ نے خصوصی شرکت کی ۔ لاہورپریس کلب کے صدر ارشد انصاری ، سیکرٹری زاہد عابد، ممبر گورننگ باڈی راناشہزاد ، محبوب چوہدری نے معزز مہمانوں کو کلب آمد پرخوش آمدید کہا۔اس موقع پر کامن ویلتھ پارلیمنٹری ایسوسی ایشن کے ایگزیکٹو ممبرڈاکٹر کرسٹوفرنے خصوصی شرکت کی ۔

میڈیاسے گفتگوکرتے ہوئے فرح عظیم شاہ نے کہا کہ پورے بلوچستان میں سیکیورٹی کے مسائل نہیں، محض چند حصوں میں شورش ہے جن کی واحد وجہ دہشتگرد ہیں جن کا نہ تو کئی مذہب ہے نہ انکا پاکستان سے کو ئی تعلق ہے،ایسے لوگوں کیساتھ آہنی ہاتھوں سے نمٹا جائیگا، بلوچستان کوئی محتاج نہیں لیکن ان مسائل کی اصل وجہ پربھی توجہ دینی ہو گی ، ہر مسئلہ طاقت سے حل نہیں ہو سکتا۔انھو ں نے کہاکہ ہنر مند بلوچستان بنائیں گے۔ فرح عظیم شاہ کا کہنا تھا کہ بلوچستان میں منفی کی بجائے بہت ساری مثبت چیزیں ہو رہی ہیں جنہیں زیادہ سے زیادہ اجاگر کرنے کی ضرورت ہے،کامن ویلتھ پارلیمنٹری ایسوسی ایشن کے حوالے سے مختلف پارلیمنٹیرین سے بات ہوئی تو انھوں نے بڑی خواہش کا اظہار کیا کہ وہ پاکستان بالکل وزٹ کرنا چاہتے ہیں۔ان کا کہنا تھا کہ کسی بھی علاقہ میں وہاں کی عوام کے حقوق یا وسائل کی وجہ سے مسائل جنم لیتے ہیں اور دنیا بھر میں ایسی مثالیں موجود ہیں۔انھوں نے مزید کہا کہ عوام کی ترقی اور فلاح کیلئے بہت سارے اقدام کئے جارہے ہیں ان میں سب سے بڑھ کر ایمان پاکستان تحریک شروع کی گئی جس کی وجہ سے لوگوں میں نفرتیں کافی حد تک کم ہوئی ہیں۔

فرح عظیم شاہ کا کہناتھا کہ چند مٹھی بھر لوگوں نے منفرد جذبے کی مدد سے پاکستان کوحاصل کیا اور اب تو کروڑوں ٹیلنٹڈ لوگوں کی فراوانی ہے بس 1947والے جذبے کی ضرورت ہے اور ایمان پاکستان تحریک شروع کرنے کا مقصد بھی یہی ہے اور صوبہ کے کچھ حصوں میں محض ایک ماہ کے اندر لڑکیوں کیلئے تین ووکیشنل ٹریننگ سنٹرز قائم کر دیئے گئے ہیں،ہم اپنے بلوچستان کومحتاج نہیں، ہنر مند بلوچستان بنائیں گے اور ہم لوگوں کی سپورٹ لینے کی بجائے ان کو سپورٹ فراہم کرینگے۔اس حوالے سے ترکی کے ساتھ جلد معاہدے کئے جائیں گے جس کے بعد ہنرمند افراد کو وہاں بھیجا جائیگا، اپنی یوتھ کو سکالرشپ پر وہاں بھیجا جائیگا،کاروباری خواتین کو عالمی منڈیوں تک رسائی فراہم کی جائیگی،اپنے فنکاروں کو متعارف کروایا جائیگا۔ممبر صوبائی اسمبلی کا کہنا تھا کہ میڈیا ورکرز پاکستان کے سفیر ہیں اور ایمان پاکستان تحریک کیلئے بھی میڈیا کی اشد ضرورت ہے،انہوں نے کہا کہ منفی کی بجائے مثبت چیزیں دنیا کے سامنے رکھنی ہونگی کیونکہ جو کام بندوق کے زور پر نہیں کیا جاسکتا وہ کام اخلا ق سے کیا جا سکتاہے۔سب کو پتہ کہ بہت ساری عالمی قوتیں ہیں جو پاکستان کو کمزور دیکھنا چاہتی ہیں اور یہ قوتیں بوچستان میں کام کر رہی ہیں اور کچھ لوگ انہیں کے آلہ کار بنے ہوئے ہیں لیکن ایک بات واضح ہے کہ معدنی وسائی اور ٹرانزٹ روٹ کی وجہ سے بلوچستان پاکستان کا مستقبل ہے۔

ایک سوال کے جواب میں انہوں نے کہا کہ جوممالک پاکستانیوں پر ویزے کی پابندیاں لگا رہے ہیں ان کو چاہئے کہ پابندی کی بجائے وہاں جا کر بھیک مانگنے اور چوری کرنیوالوں کو ہمارے حوالے کریں ہم سخت سزا دیں گے۔

اس موقع پر صدر لاہور پریس کلب ارشد انصاری نے ایمان پاکستان تحریک کیلئے میڈیا کے بھرپور ساتھ کی یقین دہانی کروائی۔

اس موقع پرڈاکٹر کرسٹوفر، ایگزیکٹو ممبر کامن ویلتھ پارلیمنٹری ایسوسی ایشن نے موسمیاتی تبدیلیوں اور اسکے اثرات پر گفتگو کی اور کہا کہ پنجاب اسمبلی میں ہونیوالے اجلاس میں بھی اس پر بات ہوئی ہے اور اس بات کا اعادہ کیا گیا ہے کہ موسمیاتی تبدیلیوں کے اثرات زائل کرنے کیلئے مشترکہ کوششیں کی جائینگی۔انھوں نے پاکستانی عوام،وزیراعظم محمد شہباز شریف، سپیکر پنجاب اسمبلی، سیکرٹری پنجاب اسمبلی کا شکریہ ادا کیا اور پاکستان کی مہمان نوازی کو سراہا۔آخر میں صدر پریس کلب ارشد انصاری، سیکرٹری زاہد عابد کی طرف سے مہمانان کو یادگاری شیلڈ پیش کی گئی۔

لاہور: باٹا پور کے علاقے میں فائرنگ کے نتیجے میں 2 سوتیلے بھائیوں کی ہلاکت کا افسوسناک واقعہ پیش آیا۔ اس معاملے کی تحقیقات کے لیے ایس ایس پی انویسٹی گیشن لاہور محمد نوید نے جائے وقوعہ کا دورہ کیا اور وقوعہ سے حاصل ہونے والے شواہد کا معائنہ کیا۔

ایس ایس پی محمد نوید نے ایس پی کینٹ کو واقعہ کی فوری انکوائری رپورٹ پیش کرنے کی ہدایت کی۔ تفتیش کے مطابق، ہلاک ہونے والے سوتیلے بھائیوں میں سیف اسلم اور ارسلان شامل ہیں، جبکہ ایک اور شخص مرسلین شدید زخمی ہے۔ ایس ایس پی انویسٹی گیشن نے ابتدائی تفتیش کے حوالے سے بتایا کہ دونوں پارٹیوں کے درمیان جائیداد کے تنازعہ پر فائرنگ کا واقعہ پیش آیا۔فرانزک ٹیموں نے جائے وقوعہ سے تمام ضروری شواہد اکٹھے کر لیے ہیں، اور واقعہ کی تمام پہلوؤں سے تحقیقات جاری ہیں۔ ایس ایس پی محمد نوید نے یقین دلایا کہ اس ڈبل مرڈر کے واقعہ میں ملوث دیگر ملزمان کو جلد گرفتار کر لیا جائے گا۔ انہوں نے مزید کہا کہ اس کیس کی تفتیش میں کسی بھی قسم کی غفلت برداشت نہیں کی جائے گی۔

ایس ایس پی انویسٹی گیشن محمد نوید کا کہنا تھا کہ واقعہ کے تمام پہلوؤں کو مدنظر رکھتے ہوئے اس کی تفتیش کو جلد مکمل کر لیا جائے گا اور ملزمان کو قانون کے کٹہرے میں لایا جائے گا۔

پاکستان مرکزی مسلم لیگ کے جوائنٹ سیکرٹری قاری محمد یعقوب شیخ نے پارٹی کے ڈپٹی جنرل سیکرٹری حافظ خالد نیک گجر کی رہائش گاہ پر ملاقات کی اور انہیں ڈپٹی جنرل سیکرٹری مقرر ہونے پر مبارکباد پیش کی۔

اس موقع پر قاری محمد یعقوب شیخ نے حافظ خالد نیک گجر کو گلدستہ پیش کیا اور ان کے لیے نیک تمناؤں کا اظہار کیا۔ انہوں نے کہا کہ پاکستان مرکزی مسلم لیگ کو مزید فعال اور متحرک بنانے کے لیے پارٹی قیادت کی بہترین حکمت عملی جاری رہے گی۔ اس موقع پر جماعتی نظم و ضبط کو مزید مضبوط کرنے کے عزم کا اعادہ کیا گیا۔حافظ خالد نیک گجر نے قیادت کے اعتماد پر شکریہ ادا کرتے ہوئے کہا کہ وہ جماعت کے نظریے کی ترویج اور کارکنان کو متحرک کرنے کے لیے اپنی تمام تر صلاحیتیں بروئے کار لائیں گے۔

ملاقات میں دیگر پارٹی رہنماؤں اور کارکنان نے بھی شرکت کی اور نئی ذمہ داریوں پر حافظ خالد نیک گجر کو مبارکباد دی۔