Author: ممتاز حیدر

آبنائے ہرمز میں کشیدگی: ایرانی اقدام پر بھارتی جہاز کی ضبطی کا دعویٰ، سوشل میڈیا پر نئی بحث چھڑ گئی

آبنائے ہرمز میں جاری کشیدگی کے دوران ایک نئی پیش رفت سامنے آئی ہے، ایران نے دو جہازوں کو تحویل میں لیا ہے جن میں سے ایک بھارتی ہے،

بھارتی معروف تجزیہ کار اشوک سوین کی جانب سے سوشل میڈیا پلیٹ فارم ایکس (سابقہ ٹوئٹر) پر جاری بیان میں کہا گیا ہے کہ ایران اس سے قبل بھی دو بھارتی جہازوں پر فائرنگ کر چکا ہے جبکہ آج ایک اور بھارتی جہاز کو آبنائے ہرمز میں ضبط کر لیا گیا ہے۔بیان میں مزید دعویٰ کیا گیا کہ ایران پاکستانی اور بنگلہ دیشی جہازوں کو آبنائے ہرمز سے گزرنے کی اجازت دے رہا ہے، تاہم بھارتی جہازوں کو روکا جا رہا ہے۔ اس صورتحال کو بھارت کی خارجہ پالیسی سے جوڑتے ہوئے کہا گیا کہ "بھارت، وزیر اعظم نریندر مودی کی اسرائیلی قیادت سے قربت کی قیمت ادا کر رہا ہے”۔

واضح رہے کہ آبنائے ہرمز عالمی تجارت کے لیے نہایت اہم گزرگاہ ہے، جہاں حالیہ دنوں میں کشیدگی اور بحری سلامتی کے واقعات میں اضافہ دیکھا گیا ہے، جس پر عالمی برادری تشویش کا اظہار کر رہی ہے۔

آبنائے ہرمز ایک بار پھر عالمی کشیدگی کا مرکز بن گیا ہے، جہاں ایران کی جانب سے تیسرا بحری جہاز نشانہ بنائے جانے کی اطلاعات سامنے آئی ہیں۔

ایرانی سرکاری خبر رساں اداروں نور نیوز، فارس اور مہر کے مطابق “یوفوریا” نامی جہاز کو نشانہ بنایا گیا، جو اس وقت ایرانی ساحل کے قریب پھنس چکا ہے۔ تاہم اس واقعے کی مزید تفصیلات فوری طور پر جاری نہیں کی گئیں۔
اس سے قبل ایرانی میڈیا نے دعویٰ کیا تھا کہ دو دیگر جہازوں کو آبنائے ہرمز میں تحویل میں لے لیا گیا ہے، تاہم یہ واضح نہیں کہ وہ مکمل طور پر ایران کے کنٹرول میں ہیں یا نہیں۔بین الاقوامی میڈیا رپورٹس کے مطابق یہ جہاز MSC Francesca اور Epaminondas ہیں، جنہیں ایک گن بوٹ کی جانب سے فائرنگ کا نشانہ بنایا گیا۔

بحری سکیورٹی ادارے نے بھی تصدیق کی کہ دونوں جہازوں پر فائرنگ کی گئی۔ماہرین کے مطابق MSC Francesca دنیا کی بڑی شپنگ کمپنی MSC کے زیرِ انتظام ہے، جبکہ Epaminondas یونانی کمپنی Kalmar Maritime کی ملکیت ہے۔اطلاعات کے مطابق دونوں جہاز خلیجِ عمان کی جانب جا رہے تھے جب ان پر حملہ کیا گیا۔میرین ٹریفک ڈیٹا کے مطابق جہازوں نے آبنائے ہرمز عبور کرتے وقت اپنے ٹریکنگ سسٹمز بند کر دیے تھے، جو حملوں کے وقت دوبارہ فعال ہوئے۔

آبنائے ہرمز پہلے ہی ایران اور امریکہ کے درمیان جاری کشیدگی کا اہم مرکز بن چکا ہے۔جنگ کے دوران ایران نے اس اہم گزرگاہ کو بند کر دیا تھا، جس سے عالمی معیشت متاثر ہوئی اور تیل کی قیمتوں میں نمایاں اضافہ دیکھنے میں آیا۔ادھر امریکہ بھی اس علاقے میں ناکہ بندی کیے ہوئے ہے، جس سے صورتحال مزید پیچیدہ ہو گئی ہے۔گزشتہ ہفتے کے آخر میں امریکہ نے ایک ایرانی جہاز کو تحویل میں لیا تھا، جس کے بعد تہران نے جوابی کارروائی کی دھمکی دی تھی۔پینٹاگون کے مطابق امریکی افواج نے بحرِ ہند میں ایران سے منسلک ایک اور جہاز پر بھی کارروائی کی۔تازہ واقعات کے بعد آبنائے ہرمز میں صورتحال نہایت حساس ہو چکی ہے، اور ماہرین خبردار کر رہے ہیں کہ اگر کشیدگی میں مزید اضافہ ہوا تو اس کے اثرات نہ صرف خطے بلکہ عالمی تجارت اور توانائی کی منڈیوں پر بھی پڑ سکتے ہیں۔

ایرانی پاسدارانِ انقلاب نے دعویٰ کیا ہے کہ انہوں نے آبنائے ہرمز میں دو بحری جہازوں کو تحویل میں لے لیا ہے۔

ایرانی سرکاری میڈیا کے مطابق خبر رساں ادارے تسنیم نے بتایا ہے کہ تحویل میں لیے گئے دونوں جہاز "قواعد کی خلاف ورزی” کے مرتکب تھے۔ رپورٹ میں ان جہازوں کی شناخت MSC Francesca اور Epaminondas کے ناموں سے کی گئی ہے۔تسنیم کے مطابق ان دونوں بحری جہازوں کو "ایرانی ساحل کی طرف لے جایا گیا ہے”، تاہم یہ واضح نہیں کیا گیا کہ انہیں کس طریقے سے تحویل میں لیا گیا یا کن قانونی بنیادوں پر یہ کارروائی کی گئی۔رپورٹ میں مزید الزام عائد کیا گیا ہے کہ دونوں جہاز "بغیر ضروری اجازت ناموں کے سمندری حدود میں سرگرم تھے اور نیویگیشن سسٹمز کے ساتھ چھیڑ چھاڑ کے ذریعے بحری سلامتی کو خطرے میں ڈال رہے تھے”۔

یہ پیش رفت ایسے وقت میں سامنے آئی ہے جب حالیہ دنوں میں امریکہ کی جانب سے ایک ایرانی جہاز کو تحویل میں لینے اور ایک دوسرے جہاز پر سوار ہونے کی رپورٹس بھی سامنے آ چکی ہیں، جس کے بعد خطے میں بحری کشیدگی میں اضافہ دیکھا جا رہا ہے۔آبنائے ہرمز عالمی توانائی ترسیل کا ایک اہم راستہ ہے اور یہاں کسی بھی کشیدگی کے اثرات عالمی سطح پر محسوس کیے جاتے ہیں۔