Author: ممتاز حیدر

اسلام آباد: امریکہ اور ایران کے درمیان اہم مذاکرات پانچ گھنٹے سے زائد وقت گزرنے کے باوجود جاری ہیں، جبکہ پاکستانی دارالحکومت اسلام آبادمیں موجود ملکی و غیر ملکی صحافی مسلسل صورتحال پر نظر رکھے ہوئے ہیں۔ مذاکرات کی اصل سرگرمیاں ایک جانب جاری ہیں، تو دوسری طرف میڈیا نمائندوں کے لیے الگ سے خصوصی سہولیات فراہم کی گئی ہیں تاکہ وہ طویل انتظار کے دوران اپنی پیشہ ورانہ ذمہ داریاں جاری رکھ سکیں۔

پاکستان میں مذاکرتی عمل کی کوریج کےلیے غیرملکی میڈیا کے نمائندوں میں مردوں سے زیادہ خواتین صحافیوں کی بڑی تعداد آئی ہے جوکہ خوش آئند بات ہے۔خواتین صحافی اسلام آباد کی خوبصورتی سے بھی متاثر ہورہی ہیں۔
اسلام آباد کا مشہور جناح کنونشن سینٹر، جہاں عام طور پر ایوارڈ تقریبات، سرکاری تقریبات اور بڑے قومی پروگرام منعقد ہوتے ہیں، اس بار عالمی سفارتی سرگرمیوں کے تناظر میں میڈیا مرکز میں تبدیل ہو چکا ہے۔ یہاں دنیا بھر سے آئے رپورٹرز، اینکرز، پروڈیوسرز اور کیمرہ ٹیمیں موجود ہیں جو مذاکرات کی ہر پیش رفت پر نظر رکھے ہوئے ہیں۔
اصل مذاکراتی نشستیں سڑک کے دوسری جانب واقع فائیو اسٹار سرینا ہوٹل میں جاری ہیں، تاہم صحافیوں کے لیے جناح کنونشن سینٹر کو مرکزی میڈیا حب بنایا گیا ہے۔طویل مذاکرات کے پیش نظر میڈیا نمائندوں کے لیے کھانے پینے کے بہترین انتظامات کیے گئے ہیں۔ صحافیوں کو مفت کافی مسلسل فراہم کی جا رہی ہے، جبکہ دوپہر اور رات کے کھانے میں مختلف اقسام کے کھانوں پر مشتمل بوفے بھی موجود ہے۔بوفے میں روایتی سالن، باربی کیو، چاول، سلاد اور دیگر اشیاء شامل ہیں، جس سے واضح ہوتا ہے کہ پاکستان نے اس اہم موقع پر مہمان نوازی کا خاص اہتمام کیا ہے۔

پاکستان کی وزارتِ اطلاعات کا عملہ بھی جناح کنونشن سینٹر میں موجود ہے، جو صحافیوں کو تکنیکی اور انتظامی معاونت فراہم کر رہا ہے۔ ان سہولیات میں انٹرنیٹ، نشریاتی انتظامات، رہنمائی اور دیگر میڈیا ضروریات شامل ہیں تاکہ کوریج کے عمل میں کسی قسم کی رکاوٹ پیش نہ آئے۔اس اہم سفارتی عمل کو نمایاں کرنے کے لیے مقام پر خصوصی سفارتی سجاوٹ بھی کی گئی ہے۔ مرکزی ہال میں بڑے بڑے بینرز آویزاں ہیں جن پر “Islamabad Talks” درج ہے، جبکہ امریکہ، پاکستان اور ایران کے جھنڈے ایک ساتھ نمایاں انداز میں رکھے گئے ہیں۔سوشل میڈیا پر توجہ کے لیے کنونشن سینٹر کے فرش پر #IslamabadTalks کا بڑا سائن بھی نصب کیا گیا ہے، جس کے سامنے آرام دہ صوفے رکھے گئے ہیں تاکہ صحافی انتظار کے دوران آرام بھی کر سکیں اور براہِ راست اپ ڈیٹس بھی دیتے رہیں۔

مبصرین کے مطابق پاکستان نے نہ صرف حساس مذاکرات کی میزبانی کی ہے بلکہ میڈیا مینجمنٹ، سفارتی ماحول اور عالمی صحافیوں کی سہولت کے حوالے سے بھی مثبت تاثر دیا ہے۔ ایک طرف بند کمرے میں مذاکرات جاری ہیں، تو دوسری طرف میڈیا کو منظم اور باوقار انداز میں سہولیات فراہم کرنا پاکستان کی سفارتی تیاری کو ظاہر کرتا ہے۔امریکہ اور ایران کے درمیان جاری ان مذاکرات کو خطے اور دنیا کے لیے غیر معمولی اہمیت حاصل ہے۔ اسی وجہ سے عالمی میڈیا کی نظریں اسلام آباد پر جمی ہوئی ہیں، جبکہ ہر نئی پیش رفت کا بے چینی سے انتظار کیا جا رہا ہے۔مذاکرات کے نتائج سامنے آنے تک جناح کنونشن سینٹر میں صحافیوں کی سرگرمیاں، تجزیے اور لائیو اپ ڈیٹس کا سلسلہ جاری رہنے کا امکان ہے۔

اسلام آباد میں جاری اہم امن مذاکرات کے دوران پاکستان نے ایک نہایت محتاط، منظم اور مؤثر حکمتِ عملی اپناتے ہوئے مذاکراتی عمل کو میڈیا سرکس بننے سے محفوظ رکھا۔ اگرچہ بین الاقوامی میڈیا، ملکی صحافیوں اور سوشل میڈیا کی غیر معمولی دلچسپی موجود تھی، تاہم حکام نے اطلاعاتی ماحول کو اس انداز میں سنبھالا کہ تمام توجہ صرف مذاکرات کے اصل مقصد یعنی امن، استحکام اور انسانی جانوں کے تحفظ پر مرکوز رہی۔

ذرائع کے مطابق پاکستان نے مذاکراتی ٹیموں کو مکمل سکون اور رازداری فراہم کی تاکہ حساس اور اہم معاملات پر سنجیدہ انداز میں گفتگو ممکن ہو سکے۔ حکومتی حکمت عملی کا بنیادی مقصد یہی تھا کہ کسی قسم کی غیر ضروری میڈیا ہلچل یا قیاس آرائی مذاکراتی عمل پر اثر انداز نہ ہو۔اسلام آباد میں قائم میڈیا سینٹر میں ملکی و غیر ملکی صحافیوں کے لیے آرام دہ اور بہترین سہولیات فراہم کی گئیں، جہاں دنیا بھر سے آئے نمائندے موجود رہے۔ اس مرکز نے نہ صرف صحافیوں کے لیے رابطے اور معلومات کے تبادلے کا ماحول فراہم کیا بلکہ پیشہ ورانہ سرگرمیوں کے لیے بھی مناسب سہولتیں مہیا کیں۔اطلاعات کی فراہمی صرف سرکاری ذرائع اور باضابطہ چینلز کے ذریعے کی گئی، جبکہ سوشل میڈیا پر پھیلنے والی افواہوں، جھوٹی خبروں اور بے بنیاد اطلاعات کی فوری تردید اور روک تھام کی گئی۔ حکام کا کہنا ہے کہ حساس مذاکرات میں غیر مصدقہ اطلاعات نقصان دہ ثابت ہو سکتی ہیں، اس لیے معلومات کے اجرا میں نظم و ضبط ضروری تھا۔سفارتی ماہرین کا کہنا ہے کہ یہ مذاکرات شہ سرخیوں کے لیے نہیں بلکہ امن کے لیے ہیں۔ ایسے مواقع پر خاموش اور سنجیدہ سفارت کاری ہی کامیابی کی بنیاد بنتی ہے۔ماہرین نے پاکستان کے کردار کو ذمہ دارانہ اور بالغ نظر سفارت کاری قرار دیتے ہوئے کہا کہ اسلام آباد نے ثابت کیا ہے کہ امن مذاکرات کی کامیابی کے لیے رازداری، تدبر اور بروقت معلوماتی نظم و نسق ناگزیر عناصر ہیں

اسلام آباد میں امریکہ اور ایران کے درمیان جاری کشیدگی اور جنگی صورتحال کے خاتمے کے لیے اہم امن مذاکرات کا آغاز ہوگیا ہے۔ ذرائع کے مطابق دونوں ممالک کے نمائندہ وفود پاکستان کے دارالحکومت میں موجود ہیں، جہاں سفارتی سطح پر رابطے تیز ہوگئے ہیں۔

اطلاعات کے مطابق امریکی وفد کی قیادت امریکی نائب صدر جے ڈی وینس کر رہے ہیں، جبکہ ایرانی وفد کی سربراہی ایرانی پارلیمنٹ کے اسپیکر کے پاس ہے۔ دونوں وفود نے وزیراعظم پاکستان شہباز شریف سے الگ الگ ملاقاتیں کیں۔وزیراعظم ہاؤس کے مطابق وفود سے الگ الگ ملاقاتوں میں خطے کی بگڑتی ہوئی صورتحال، جنگ بندی کے امکانات، بحری راستوں کی سلامتی اور سفارتی حل کے مختلف پہلوؤں پر گفتگو کی گئی۔ تاہم ابھی تک اسلام آباد میں امریکہ اور ایران کے درمیان براہ راست مذاکرات کی باضابطہ تصدیق سامنے نہیں آئی۔

ایرانی سرکاری ٹی وی کے رپورٹر کے مطابق تہران نے ثالثوں کے ذریعے اپنی تجاویز اور "سرخ لکیریں” پاکستان کے وزیراعظم تک پہنچا دی ہیں۔ ایران کے اہم مطالبات میں آبنائے ہرمز کی حیثیت، جنگی ہرجانے کی ادائیگی، ایران کے منجمد اثاثوں کی رہائی اور پورے خطے میں فوری جنگ بندی شامل ہیں۔ایرانی حکومت کی ترجمان نے سرکاری ٹی وی سے گفتگو کرتے ہوئے کہا کہ ایران مذاکرات کے لیے تیار ہے، لیکن مکمل احتیاط کے ساتھ اس عمل میں شریک ہو رہا ہے۔ ان کا کہنا تھا کہ ایران اعتماد کے فقدان سے بخوبی آگاہ ہے، اس لیے سفارتی ٹیم انتہائی محتاط حکمت عملی کے تحت مذاکرات میں داخل ہو رہی ہے۔

تجزیہ کاروں کے مطابق اگر اسلام آباد مذاکرات کامیاب ہوتے ہیں تو نہ صرف امریکہ اور ایران کے درمیان کشیدگی میں کمی آسکتی ہے بلکہ پورے مشرقِ وسطیٰ میں امن و استحکام کی نئی راہیں بھی کھل سکتی ہیں۔ عالمی برادری کی نظریں اس وقت اسلام آباد میں جاری ان اہم بات چیت پر مرکوز ہیں۔