Author: ممتاز حیدر

وزیر اعلیٰ سندھ مراد علی شاہ کا کہنا ہے کہ غلطیوں کو درست کرنے کے لیے انکوائری کریں گے، سانحہ گل پلازا میں جس کی غلطی ہوئی، انہیں سزائیں ہوں گی۔

گل پلازا میں لگنے والی آگ پر خصوصی اجلاس کے بعد میڈیا سے گفتگو کرتے ہوئے انہوں نے کہا کہ کمشنر کراچی کی سربراہی میں اس واقعے کی انکوائری کروائیں گے، یہ انکوائری کسی کے پیچھے پڑنے والی نہیں ہو گی، اگر انکوائری میں تخریب کاری کے شواہد ملے تو اس پر ایکشن ہوگا، انکوائری میں اصل توجہ اپنی غلطیوں کو ٹھیک کرنے پر ہو گی، اگر ضرورت پڑی تو انکوائری کے لیے جوڈیشل کمیشن بھی بنائیں گے، گل پلازا میں آگ بہت بڑا واقعہ ہے، گل پلازا میں آگ مکمل طور پر نہیں بجھ سکی ہے، فائر فائٹر اور ریسکیو کا عملہ تین جگہوں سے اندر جانے کی کوشش کر رہے ہیں، شاید گل پلازا کی پوری عمارت کو گرانا پڑے، جاں بحق افراد کی تعداد 15 ہوگئی ہے، سانحہ گل پلازا میں 65 افراد لاپتہ ہیں، کوشش ہے لاپتہ افراد کا پتہ چل جائے۔ گل پلازا میں دکانداروں کے نقصانات پورے کرنے کے لیے اقدامات کریں گے، غلطیاں ہیں، بالکل ہیں، انکوائری میں سامنے آئے گا، ایسے واقعات کی صورت میں امدادی کام کے لیے رسائی آسان بنانی چاہیے، جب ایسے واقعات ہوتے ہیں تو ہر کوئی اپنی ماہرانہ رائے دینا شروع کر دیتا ہے، ایسے واقعات کی صورت میں جس کا جو کام ہے اسے کرنے دیں، اس کے لیے رسائی مشکل نہ بنائیں۔

وزیراعلیٰ سندھ کا مزید کہنا تھا کہ سانحے کی جگہ کو فوری طور پر سیل کر دیا جاتا ہے تاکہ کام کیا جا سکے، دکانداروں کی بھی ذمے داری ہوتی ہے، لیکن اس وقت یہ باتیں ٹھیک نہیں۔ ہم سب کو اپنے گریبان میں جھانکنا چاہیے، میں لوگوں کے سامنے جوابدہ ہوں، 2024 میں 145 عمارتوں کا فائر آڈٹ ہوا تھا۔ فائر سیفٹی آڈٹ 2024 میں کیا تھا اس پر فوراً کام کریں،

مراد علی شاہ نے سانحہ گل پلازا میں جاں بحق افراد کے لواحقین کو ایک کروڑ روپے دینے کا اعلان کر دیا، کہا کہ سانحہ گل پلازا میں جاں بحق افراد کے ورثاء میں امدادی رقم کی فراہمی کل سے شروع ہو جائے گی۔

اس موقع پر گفتگو کرتے ہوئے تاجر رہنما جاوید بلوانی نے کہا کہ وزیر اعلیٰ سندھ کی تمام باتوں سے اتفاق کرتے ہیں، انسانی جانیں بچانے کے لیے سب سے ضروری فائر الارم ہے،کراچی چیمبر تمام مارکیٹوں میں فائر ڈرل کرائے گا، ہم وزیراعلیٰ ہاؤس میں بیٹھے ہیں اور ضروری فیصلے کیے بغیر نہیں جائیں گے، اب مستقبل میں سانحات سے بچنے کی کوشش کریں گے،کوئی مصیبت میں ہو اور اس سے تفتیش شروع کردی جائے تو الجھن ہوتی ہے۔

وزیراعلیٰ سندھ نے سانحہ گل پلازہ میں آتشزدگی کا فارنزک کرانے کا اعلان کردیا۔ مراد علی شاہ کا کہنا ہے کہ گل پلازہ کی تعمیر نو بھی کی جائے گی۔

وزیراعلیٰ سندھ کو بریفنگ میں بتایا گیا ہے کہ سانحہ گل پلازہ میں آتشزدگی سے 50 سے زائد اموات کا خدشہ ہے۔ مراد علی شاہ نے آتشزدگی کا فارنزک کرانے کا اعلان کردیا۔ ان کا کہنا ہے کہ گل پلازہ کی تعمیر نو بھی کی جائے گی۔

سانحہ گل پلازہ پر وزیراعلیٰ سندھ نے آتشزدگی کی فارنزک کرانے کا اعلان کرتے ہوئے کہا کہ گل پلازہ کی دوبارہ تعمیر نو بھی کی جائے گی۔وزیراعلیٰ سندھ نے چیف سیکریٹری کو فیکٹ فائنڈنگ کمیٹی بنانے کی ہدایت کردی۔ انہوں نے کہا کہ متاثرین کو دکانیں دینے کا طریقہ کمیٹی بنائے گی۔وزیراعلیٰ سندھ کو اجلاس میں بریفنگ میں بتایا گیا کہ سانحہ گل پلازہ میں 50 سے زائد اموات کا خدشہ ہے۔ مراد علی شاہ نے کہا کہ شہداء کے خاندانوں کی مالی مدد کی جائے گی۔بریفنگ میں بتایا گیا کہ گل پلازہ متاثرین کیلئے کمیٹی قائم کی گئی ہے، کمیٹی معاوضہ اور متاثرین کی بحالی کیلئے سفارشات دے گی، کمیٹی میں صوبائی وزراء ناصرحسین شاہ، سعید غنی، میئر کراچی مرتضیٰ وہاب اور کمشنر کراچی شامل ہیں۔

وزیراعلیٰ سندھ نے کہا کہ آصف زرداری اور بلاول بھٹو زرداری مسلسل رابطے میں ہیں، پیپلزپارٹی قیادت متاثرہ تاجروں کی فوری بحالی چاہتی ہے، انہوں نے ہدایت کی کہ وزراء شہداء کے گھروں میں جاکر تعزیت کریں۔مراد علی شاہ نے کہا کہ فائر فائٹنگ، حفاظتی نظام کا طویل المدتی پلان بنایا جائے گا، عمارتوں میں ایمرجنسی راستوں اور فائر الارمز کو یقینی بنایا جائے۔

گل پلازہ سانحے کے تناظر میں فائر سیفٹی قوانین اور عمل درآمد نا کرنے اور ٹاسک فورس نا بنانے کا معاملہ سندھ ہائی کورٹ پہنچ گیا

ندیم شیخ ایڈووکیٹ کی جانب سے توہین عدالت کی درخواست دائر کر دی گئی، درخواست میں کہا گیا کہ سندھ ہائیکورٹ نے 2017 میں فائر سیفٹی قوانین پر سختی سے عملدرآمد کا حکم دیا تھا ،عدالت نے کمشنر کراچی ،ڈپٹی کمشنر اور اسسٹنٹ کمشنر کو ٹاسک فورس تشکیل دینے کا حکم دیا تھا ،عدالت نے ہر ماہ عمارتوں کا معائنہ کرنے اور فائر سیفٹی قوانین پر عملدرآمد کا جائزہ لینے کا حکم دیا تھا ،کمشنر کراچی اور سندھ حکومت عدالتی فیصلے پر عمل درآمد کرنے میں ناکام رہے ہیں ،گل پلازہ میں دس سے زائد افراد ہلاک اور 15 سے زائد زخمی ہیں،سندھ ہائیکورٹ کے فیصلے پر عمل درآمد کرلیا جاتا تو گل پلازہ کا سانحہ نا ہوتا،عدالت سے استدعا ہے کہ ذمہ داروں کے خلاف توہین عدالت کی کارروائی کی جائے ،